Sunday, August 7, 2011

Zawhte le Zinghnam


Hlanlai ah inn pakhat ah Zinghnam an tam tuk ih zantin inn tek te an ti buai rinring inn tek pa thinheng in Zinghnam thah dan ding a ruat. Cutikah mi Zawhte a sang ih zantin Zawhte in Zinghnam pakhat hnu pakhat in a deh vivo. Zinghnam cu zankhat hnu zankhat an cem vivo tik ah meeting an tuah ih ziangtin ha kan ti ke, Zawhte ruangah zantin in kan cem vivo si an ti.Cutikah an lak ih Zinghnam pakhat in ralkiltu kan tuah kei Zawhte a rat le amah in ralrin nak in pe kei cuisin kan tlan ding tiah thu a rawt.Asinan an lung a kim thei deuhlo ih a dang hunruat hrih uh ti ah an ti aw. Cutikah an lak ih pakhat in keimah ka thei, Zawhte hngawng ah kuang te kan orh ding, Cule kuang a on veten Zawhte a ra ti kan thei kei kan tlan ding, cutin kan him ding tiah an ti.An zaten a ṭha-- a ṭha an ti thluh.Asinan an lakih pakhat in asilen zo saw Zawhte hngawng ih kuang te va orh ding? tiah a ti tik ah zohman in an ngam sal lo. 
Cutikah thu ṭha zet an rel nan a cangthei lo ti an thei sal. Thu hi a theory ṭhazet khal sehla a tak ih tuah theih{akawng athe phaw theih} lo mi ah nang cu[Falam} telve duh aw hlah.

Evan. David Ceu
Tahan

Thursday, August 4, 2011

Ziangtin Jesu Khrih Ih Nunzia Kan Nunah A Langsuak Thei Ding?


"Cun Thlarau in nan nunzia lo ukseh,cule tisa caknak nan thlun lo ding"{Gal.5:16}.

               Jesu Khrih ka nei timi le ka nunah Khrih ziaza a langsuak timi hi thil bang aw a si lo. Zumtu mi piangthar zo pawl cun Jesu Khrih cu kan nei cio ko nan kan neih mi Jesu Khrih ih ziaza kan nun ih a langsuak
ṭheu lo mi hi a poi tuk mi cu a si. Zumlotu pawl in kan neih mi Jesu Khrih an hmuh ve thei nak um sun cu kanmai nun ih a langsuak lawngah hin a si. Asile ziangtin kan nun ah Khrih ziaza cu a langsuak thei ding.?

1. Thlarau Thianghlim ih uk theihmi si a
ṭul{Gal.5:16-17,24;Eph.4:30}
              Zumtu kan nun nak hi tisa duhdan silo in Thlarau duhnak ih in thunun lawnglawngah kan nun ah Khrih ziaza a lang thei a si. Pathian in a fapa Jesu Khrih nun zia bangnak ah
ṭhang vivo ding ah in duh. Asinan cu tivek ih Khrih bangnak nun nei ding ih in hruai thei tu umsun cu Thlarau Thianghlim lawnglawng a si.{2Kor.3:18}. Curuangah zumtupawl kan nunnak ah in cencilhtu Thlarau Thianghlim riahsiat ter lo, timih lo, le a hruainak ih thulung zet ih pek luh awk hi kan ṭuanvo a si.{Eph.4:30;1Thes.5:19;Gal.5:16-17;Rom.8:12-13}. Thlarau Thianghlim ih uk theihlo mi zumtu'i nunak ah Khrih hmel hmuh ding a um thei ve lo a si.

 2. Sual lak ihsin thiarfihlimawknak nun neih tengteng a
ṭul{1Pet,1:15-16,1Thes.4:7-8}
           Zumtupawl cu leitlun ah kan um ko nan leitlun mi{zumlotu}kan si nawn lo{John.17:12-17;Phi.3:20}. Leitlun lak ihsi kawhsuah zo mi kan si ruangah leitlun mi{zumlotu}pawl vek ih nun thei kan si nawn lo. Zumlotupawl ih tuah mi tinkim, zumlotu pawl ih nawmnak tinkim le uarzawng tinkim ah tel ve thei kan si nawn lo. Zumtu in sual lak ihsi thiarfihlimawknak nun a neih lo a si le thlarau lam ah huham cak nak a um theilo. Khrih nunzia kan nun ih a langsuah theinak ding ah cun sual lak ihsi thiarfihlimawknak nun hi a
ṭul hrimhrim mi a si. A thupte nun ah siseh a thup te lo khal ah siseh, sual thawi buahcih aw phahphah cing in Khrih nun langsuah theinak ding lamzin a um lo
 3. Khrih thawi pehzawm awknak nun neih ringring a ṭul{John.15:1-18}
           Zisu in keimah ah i pehzawm ringring uh Sabit hri cu a kuangpi ih a pehzawm ringring lo asile amah te in a rah thei lo vek in nannih khal keimah ih in pehzawm ringring lo le rah{Thlarau rah or Khrih ziaza}nan suah thei lo ding. Rundam dingah Khrih ah ka um zo{1Kor.1:30} timi le Khrih thawi pehzawmawknak cat bang lo in ka nei ringring ti hi thil bang aw a si lo. Minung khal kan kawm awk tam le kan thinlung kan thei aw, kan duhzawng le duh lo zawng khal kan thei aw,kan ziaza tianghman kan kai aw{suan aw}thei a si. Cuvek in zumtu khal in piantharnak co men lawng silo in nitin nun ah Khrih thawi fellowship{pehzawmawknak} nak kan neih ringring lawngah kan nun ah Khrih nun ziaza a luangsuak in a langsuak thei a si. Leitlun thil hmai ih nahzi paziat um khal ih khop theilo Pathian hmai ih thlacam le Bible siar ah cun minute 30 hman can pe theilo zumtu nun in Khrih hmel langsuah ding cu a har zet ding.

 4. Khrih cahnak lawng rinsan tu a si a
ṭul{Johan.15:5}
                Zisu in "Keimah lo in zianghman nan tuah theimi a um lo"{John.15:5} a ti. Zisu lo in zianghman kan tuah theilo tihi kan thluak men silo kan nunnak rori ih kan theih feng ding Bawipa'n a duh. Rundamtu dingah Amah lawng kan rinsan vek in nitin nunnak hrang khal ah Amah lawng hi rinsan dingah in duh. Mi in a nun taktak in Zisu lo in zianghman ka ti thei lo ti a theih awk taktak ahcun Amah rinsan lo in a um thei nawn lo. Thil fate bik khal ah Bawipa'i rem ti nak a la ta ringring
ṭheu a si.Ziangkim a tinak dingah a pakhat nak ah a remcang kem? Ka tluang kem? Mi in in lawm kem? Ka hlawk kem ti lam hnak in Bawipa' rem ti asi kei maw?Bawipa a lungawi ter kem? timi hi a suh hmaisat sawn mi cu a si. Mi naa pakhat in ka natnak hi keimah te zingawk men{enkawlawknak men}cun dam thei ci a si nawn lo ti a theihfeng cun Doctor kut ah za ah za a ap aw tawp mai vek in Bawipa lo in zianghman ka tithei lo ti hi mi in a nun tak ih a feng a si le a phi cu Bawipa ah za ah za a ap aw tawp mai a si. Cuvek zumtu'i nunah Khrih hmel{ziaza}a langsuak ṭheu ih Pathian a sunglawi ṭheu asi. Amen.
  
Siartu le ngantu kan zaten Pathian in thlaw in suahsak hramseh.
Evan. David Ceu{saya Ceu te}
Tahan

Khrih Neih Ih Danglamnak


1. An sual ringring thei nawn lo ( I John 3:6,9; 5:18)
Piangthar pakhat a sual ringring ahcun a rundamnak a hlo thei. Pathian lam ta si lo in, tiah a titu an um ṭheu. Bible cu,"Pathian hrin, piangthar taktak an sual ringring thei nawn lo" a ti. Curuangah RUNDAMNAK A HLO THEI ti hi Bible ṭhate ih kan siar lo ruangah a si.

2.Thih hnangamnak an nei (Saam 23:4-7)
          Minug fa zokhal thih ngam taktak an um lem lo ding. Thihngamnak le
     thih hnangamnak hi Thlarau hna
ṭuan lawngih kan ngah thei mi a si.

3. Can tawkih lungawi theinak an nei (Habakuk 3:17-19)
          Leitlun hi can tawk le sinak tawkte ih lungkim thei lonak ram a si. Khrih neitu lawnglawng in cuih lungawinak taktak neih theih a si.

 4. Suupawktheinak an nei (IITim.1:7)
          Tisa hiarhaalnak a phunphun hi minung minunnak cun a har tuk. Thlarau bomnak in suupawktheinak hi Pathian fa pawlin kan nei.

  5. Beidon thinhar caanah hnemtu an nei (John 16:27,33)
          Minung in kan rual
ṭha le unau hi ziangmaw cin cu kan hnem thei a bang nan  a pittawp cu kan hnem aw thei lo. David a fapa thih tumih lungawi theinak a neihmi, Job kha a fanau le a neih mi an cem ṭheh ni ih a lungawi theinak kha hnemtu Thlarau zar ah a si.

  6. Vanah Pa an nei (Mtt. 6 :9)
          Khawmvel mi cu anmah hringtu leitlun pa lawng an nei ih zumtu cun thithei lomi vancung ah PA kan nei.

 
7. Vanah an hmin ngan in a um (Luka 10:20)
          Nunnak cabu sungih kan hmin ngancia a si thu theih fiang ahcun hnangam lo in kan um thei lo.
    
  8. Vanah Inn-nuam an nei (John 14:1-2)
          Leitlun ih Inn le lo kan neih hmanah kan hna a ngamih vanih innnuam kan neih mi zumnak mitih kan hmuh bet cun lungawi a mak.

  9. Vancungmi pawlin nitin an kil (Saam 34:7)
            Leitlun raalkap ih kilmi ralbawi hman khi an hnangam tuk. Vanmi kilmi kan si hi a nasa lawlaw.

  10. Pathian in a ngaihsak (I Pet. 5:7 )
          Milian le leitlun bawi ih ngahsakmi sihman khi a nuam tuk. Pathian in in ngaihsak sokhaw.
    
  11. Vanah laksawng an nei (II Kor.5:10)
          Kan
ṭuanman hmuahhmuah Bawipa’n vanah in khawl sakih in pe leh ding.

  12. An sual tikah nusimtu kan nei (He.12:5-6)
          Cung Pathian ih nunsim duhmi cu a fa duat kan si.

13. Sualah an tlu lanta thei lo (Saam 37;23-24)
         Kan tluk le thosaltu Thlarau kan nei.
Siartu zaten Pathian in thlawsuahnak in peksak hramseh
Evan. S. Tha Nei Fai
Tahan

Minung Semsuah San


Pathian in minung a semsuah tikah mawlmang zet le sullam um lo in a semsuah lo. Duhsan tampi nei in  a semsuah.

1. Amah sunloih, thangṭhattu dingah ( Isai.43:7)
            Cung Pathian in vancung mi pawlih sunzan an thangṭhat lawng a duh tawk lo.  A semsuahmi minung pawlih sunloih hi nuam a ti. Sungril nun taktak ih Amah sunloih thangṭhat tam pohpoh in nun hnangamnak tam sin an ngah. 
Unau!, Pathian sunloih thangṭhatnak ah na laam dah maw? Na kut na beeng maw?  Na baan teh na phar maw? A lo semsuah san sullam nei lo in na hmang pang maw?  Bawipa thangṭhat ih laam hi taksa damnak a si. Phurrit khal a zaang. Zumtu baan  pharih thlacam le laam hi satan in a ṭih ngaingai.

2. A kom le a leenpi dingah (Mikah 6:8)
            Pathian in kan nih vek men in pawl duh, in kom duh hi a va mak em! Santlai lo te khal Bawipa'i Thlarau ih a pawl ahcun leitlun hi vanram tlukin nuam a ti ṭheu. Bawipa Pathian ih kom le pawl theih dingin hmun fianrial ah caan pe ṭheu aw. Thlarau ih  pawl mi pawlin lunglen le ningṭih an nei dah lo.

3. Sersiammipawl kilkhawitu dingah (Semtirnak 1:28)
            Kan Cung Pathian in sersiammi pawl hi vancung mi pawl kutah ret sawn loin a rundam fa
 kan kutih a ret hi a va mak em! Zumtu cun Pathian semsuah mi hmuahhmuah hi kan kilkhawi ding hrimhrim a si.

4. Eden hmuan kilvengih tuantu dingah(Semtirnak 2:15)
    Amah in Eden hmuan cu kil sehla a mawi nan minung ih kilkhawi dingin thu a pe. A va sunglawi ve!  Hmuan sung thingrah phunphun khal a ei dingah a pe.

Evan. S. Tha Nei Fai
Tahan

Monday, August 1, 2011

" Harsat kan ton mi hi teh malsawm pek in duh ruangah maw hremnak hrimhrim teh a um thei maw?"

Hi tawkih sannak phunphun ka ngan mi hi Timothy Vuk thawi facebook ih thusuhmi kan lehawknak a si ih, " Thlarau Rawl"in lengtu hrangah ṭhathnemnak a si ve ruahsan in ka post sal. Hmanhmawh ih lehawkmi a si tikah Bible cang pawl ka tarlang lo mai.

Thusuhnak " Harsat kan ton mi hi teh malsawm pek in duh ruangah maw hremnak hrim2 teh a um thei maw?"

Si, harsatnak kan tuarnak san hi kan Bible vek asilen tampi a um thei. Tullo ruangih hremnak tuar hrimhrim ti ai in harsatnak kan tawn mi tambik cun san le sullam an nei. Hitivekin:

(1) Hrekkhat cu kan mai sual ruangah khal si lo asinan Pathian sunlawinak phuansuahawknak ding hrangih kan tuarmi a um (e.g. Nauhak mitcaw damter thu ah khan.. kan hmu thei)

(2) Kanmai sual le diklo ruangih Pa'i nun in simnak khal a tampi. (e.g. Puithiam Eli le a fatepawl).

(3) Mi dangin Pathian an hmuh theinak ding le Pathian in midang hrangah kan nun ah tumtah a neih ruangah (e.g. Joseph ih tuarnak, Job ih tuarnak).

4. Pathian thu rawn lo in thubawhcahnak kan tuah ruangah. Hi thu ah mi tampi cun harsatnak kan tawn tinten Satan kan mawhsiat lawk ṭheu, harsatnak hmuahhmuah hi Satan hnen in a ra kan ti.. a si ko harsatnak thlentu hrampi cu Satan a si ṭheu ngai.. a sinan kan mah le mah parah Pathian rawn lo ih thubawhcahnak kan tuah le kan duh duh ih thil kan tuah tikah tawn lo lo kan tawng, dai lo dingding kan dai. Pathian in kan thubawhcahnak kha hramhram in a ṭha lo lole tuah lo ding in direct in in kham cih lo..zalennak in pe ih cumi ah a mah rawn lo ih kan tuah tikah lamlakah kan buai ciamco. Hi zawnte hi kan Chin mi mi tampi kan buainak, keimah tel in kan si ṭheu maw tin ka ruat. 

5. Hngalnak ruangah (e.g. Saul, Nebuchadnezar le mi tampi Bible ah) . Zumtu si cing in maw zumlotu kan si ah maw hngal hi Pathian in a duh lo zet ih kan hngal tikah Pathian in tuarnak hmangin, harsatnak hmangin tangdawr nun in zirh ṭheu. 

6. Zumtu kan si ih thil ṭha kan tuah ruangah mi in in dodal, in iksik, in hua in in tuahmawh. Asinan, Peter cakuat vek cun hi vek ruangih tuarnak cu tuarnak dik, tling a si ti ah a ti. 

7. Kan mah ruang khalah si lo, Satan ruang khalah si hran lo, Pathian ruang khalah si hran lo .. leitlun sinak ( nature) ruangah kan parah harsatnak a thleng ṭheu. ( e.g. Linghin, thlisia le aphunpphun- mi piangthar in siseh thar lo khal in an tuar). 

8. Malsawm pek le khaisan sawn in duh ruangah kan tuar khal a um thei- khatlamah kan zumnak fiahnak thla a um thei (e.g. Abram in a fapa a hlanthu vek tla kha). 

9. Kan sual ruangih Pathian nunsimnak le hremnak kan tawn mi khal a um thei. (e.g. Sodom le Gomorrah urkang, Lei khing sungih tla pawl).

10.Ziangruangah kan tuar ti mi kan theih ban lo mi thil tampi khal a um thei...amah Pa Pathian lawng in a thei. 

Zumtu pawl cu kan parah ziang thil pawl a thleng ti mi hnakin kan parih thiltleng pawl kha Pathian ṭihzahnak, upatnak le rinnak thawn kan sawnkirsal maw ti mi a thupi deuh. Harsatnak hrekkhat cu kan ti ban lo ( out of control) in kan parih rawng thleng mi tampi a um thei.. asinan, ziangvek tluk harsatnak thuk, sang le mangbangza kan ton hman ah Bawipa ṭihzahnak le Pathian in in thei ti mi thawn kan sawn a si ah cun harsatnak tawng cing in Pathian in buainak tlunah in lengter ṭheu ih cui harsatnak pawl ih sin nun thuksin le sunglawi sin in zirh ṭheu. A sau zik mai hi vial si hrih seh aw....Ka lungawi


Ânka Ropi


1.  Lungawi ringring theinak lamzin ṭha le nai bik insim hai sehla, "Na tlunih thil hmuahhmuah ah Pathian hnenah lungawi thusim in amah thangaṭhat vivo hi na nun dan ah hmang aw ti hi a si ke". Asan cu thilṭhalo vekih lang mipawl hi,cumi ruangah ih Pathian kan thangṭhat a si ahcun malsawmnak ah an cang sal ṭheu a si.                           William Law
 2. Na theihcia mi hman na hman si lo ah cun thil thar na zir mi cun a lo bawm lo ding.       Socrates

3. Ka piansualnak ruangah hin Pathian hnenah lungawi thu ka sim sawn,ziangruangah tile himi ruangah mah le mah hmuh fengawknak le Pathian hmuh fengnak ka neih phah a si .                  Helen Keller
4. Duhdawtnak kan ti mi cu duh a tlak lo mi va duhdawt thei khi a si.         Robert Dl

5. Hniksaknak tinkim ah hin Pathian kutcak na hmuh theinak dingah dil aw la,Pathian lairelnak ih na lungawi vivo theinak dingah a zangfahnak dil in thlacam aw.Duhlo cingih tulut aw lo ih lungawi zet
le aipuang zet ih tulut aw thei ding in dil aw. Cumi kan thlen cun buainak le harsatnak kan tawnmi hmuahhmuah a hlo
ṭheu a si.     Charles H. Spurgeon

6. Keicu keimai ruahnak lawng ring lo in mi ih ruahnak in pekmi ka la
ṭheu.                   Woodrow Wilson

7. Mangbangnak sumpi zing hin Ni tleu phen
ṭheu hman sehla,ruahsur tertu pakhat a sive ti ka theih feng hnucun sumpi zing khal hi ṭih sawnlo in lungawi thu ka sim sawn ṭheu.                 Anonymous
8. Mi an ziaza theihfeng nan duh ah cun Bawi/upa sinak pe uhla a lang mai ding.                    Abraham Lincoln

9.  Acancan ahcun Pathian ih in cawmnak rawl hi tisa dan ahcun kha zet a si lai ah ka thlarau nun hrangah cun in tuah
ṭha tu ropi bik a rak si ṭheu.                                          Anonymous

10. Leitlun ah tuarnak le harsatnak um lo sehla vanram {ka pa'i um nak}ka ngailo pang ding.               Anonymous
11.  Aliamcia kum (60) ah cun ziangkim ka thei nan a tu ah cun zianghman ka thei nawn lo. Ziangruangahtile ka zirnakin ka theihlonak in hmuhter ruangah a si.               Will Durant

12.Thlaler ram tihal rilrawn nak hmun ih feh hi ka paihlo zet
ṭheu nan,himi lamzin lo in le Kanaan ram thlen theih a si si lo.               Anonymous

13. Ka Pathian cu tlangsang zet ih in ding tertu Pathian lawng silo in acancan le
ṭahnak le hlawhsamnak horkuam khal ah in hruai ṭheutu Pathian a si ti ka thei feng hnucun .Aw..ka Pathian hi tlang Pathian lawng a rak silo horkuam Pathian khal a si ve thotho ti ka fiang ih lungawinak cirhti a puk sal ṭheu""{Ps.84:5-6}.                  Anonymous

14. Harsatnak le mangbangnak khal hi Pathian in a fale incawmnak
rawl phunkhat a si ve{Isai.30:19-20}.                      Anonymous

Arti Dahte


ARTI DAHTE
Arti Dahte, ka Arti Dahte,
I mangter sal maw Senlai ka nun
Ka ruatban lo ziangruangah
Hringtu nulepawl in mawlcenak an lo ti
Ni le thla herliam in mibang ka pitlin hnu cun
Na duhnunnak thliten an sim ka thei
Nauhak in ei kel si lo mawlcenak an ti cu
Theithiamtu’i hrang duhkawhnak aanka a si ual
Arti Dahte, ka Arti Dahte,
Na rak men lo, mi mak na si;
Sirah hnawlin an lo tan hmang ti laiah,
Theithiamtu Nu’i hrangah cun
Pasal duatnak si thabik na si aw
Arti Dahte , ka Arti Dahte
Na men lo aw ka lo uar
By Chin Pualva

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...