Ziangruangah Zumtupawl Kan Lungawinak a Hlosal ṭheu?

Kumkhua Hellram ih a tla ding mi in Pathian duhdawt ,zaangfahnak ruang ih in tuahsak mi rundamnak kan hun co tluk ih leitlun ih lungawinak dang hi a um zik lo.Cui lungawinak cu kaa ih sim theihlo lungawinak a si{1Pet.1:8,Ps.4:7}.Asinan, kan pianthar pek ih kan lungawi nak kha ni le can a hungrei tikah a hlo vivo ih{kan rundamnak cu a hlo cuang lo nan ,rundam lungawinak ahlo ṭheu {Ps.51:12}.Thlacam khal thaw nawnlo,Bible siar khal thaw thei nawn lo,khawmawk khal le a dan vek men ah a cang ih,thlarau lam lungawinak a hlo vivo tikah mihrekkhat cun ka piangthar ngaingai lo maw si ding aw ti ih awloksawng khal an um ṭheu.Ziangah si pei hi ti vek ih kan lungawinak hi a hloh ṭheu?

1. Sualnak Ruangah{Ps.51:1-12}.

David khal a rundamnak a hlo cuang lo nan sualnak ruangah thlarau lam ih a lungawinak a hloh tikah Pathian hnenah..."Na rundam lungawinak in pe sal aw a ti"{Ps.51:12}...na rundamnak in pesal aw a ti lo.Curuangah zumtu nun ah sualnak le lungawinak a fehtlang theilo. Pathian mi in sualnak a tuah tik ah a nun ah nunkhaw ronak,lungawi theilo nak,beidongnak in a nun a khat theu.

2.Daithlanak{Thlahdahawknak } Ruangah.

Zumtui nunah thlarau lam ih thlahdahawknak hi ral ṭihnung zet mi a si. Bible siar,thlacam le zumtu dangthawi pawlkomawknak daithlan le, nun thlahdahawknak ah cun thlarau lam lungawi nak a um thei lo..Thildang sual kan tuah ṭheu nak khal hi a hram cu thlarau lam ih thlahdahawknak ruang ah si.

3. Leitlun Thilri ih Buai Tuk Ruangah.

Kan Bible in "Leitlun le a sung ih thil um mi hi duhdawt hlah uh in ti"{1John.2:15}.Cun Bible lala in Zuri hlah uh ti ah in ti{Eph.5:18}.Unau zu lawng hi rit theih a si lo...Paisa khal rit a theih,Hnipuan khal rit a theih,thildangdang khal rit a theih thluh.Pathian in ziangkhal hi rit in sianglo.Lawng cu tidai par ih feh ding ih tuah a si ko nan a Lawngsung ih Tidai a luh ah cun pil lawng a hmabak a si ko.Zumtu khal leitlun ah kan um nan kan nunsung lam ih leitlun a luh pang ah cun tluk lawng kan hmabak a si ko. Curuang ah unau thlarau lam ih na lungawi nak siat ding khawp in leitlun thilah buai thlah.Bawipa in kan ṭul mi a thei ko{Phi.4:19}.

4.Iksiiknak le Thinlung Ṭhatlonak Ruangah.{Eph.4:30-31}

Caina in anau Abel a iksik ih a parah thinlung ṭha lo a put cun a mah lala khal a lungawi thei lo ih mivakvai ah a cang{Gen.4:1-17}Saul siangpahrang in David a iksik ih thah tiang
a tum. A do ding mi ral hman do lo in David lamlam a do tikah siangpahrang tohkham ih to cing in a lungawi thei cuang lo a si kha{1Sam.18:10-11}.Dinhmun ṭha sawn nei cing in a thinlung put a diklo ruang ah amah hnak in David a lung awi thei sawn.

5.Mithawi Remawklo{Mihuat Neih}nak Ruangah.

Zumtu pakhat si ve ti aw si mihuat mi nei ringring tivek le mi thawi thubuai nei ringring kan si ah cun lungawi ngaihnak a um lo.Lungawinak taktak neih na duh le mithawi thubuai neih nak lakah ralring aw..mi hmuahhmuah thawi remawk duh aw...kan Bible in "a cangthei tawk in nanmai lam tal mi hmuahhmuah thawn rem aw uh"tiah in ti{Rom.12:8-12,13:8}.Curuangah, unau zohnen hman ah duhdawtnak lo leiba nei tum hlah aw la na lung a awi ding{Rom.13:8}. Thil pakhat khat ruang ih thlarau lam na lungawinak a hloh zo pang asilen Bawipa ah kirsal aw la, na sual thupha cawisal aw la na lam zin dik lo thla san aw,cule van lungawinak thar in Bawipa'n a lo khat ter ding{1John.1:9-10,Pro.28:13}.

"Bawipai Parih Lungawinak Cu Kan Cahnak a si”{Neh.8:10}.

Siartu za te parah Pathian in mal in sawm hramseh.

Evan.David ceu{Saya Ceute}

Pathian Thawi Pawlawknak

Milai kan damsung ih thupibik cu Pathian kan theih le amah thawi naihawte ih kan lentlang ding hi a si.  Ziangvek cekci in Pathian kan hmu ti mi in a rei a rei ah cun kan nunnak ah hngawk thukzet a nei leh ding. John 17: 3 ah cun , “ …nang Pathian dik pakhat lawng le na thlah mi Jesu khrih theih hi, kumkhaw Nunnak cu a si” tin kan hmu.  Ṭawngfang, “ theih lole thei” ti ih kan hmuh mi hi Greek ṭawngfang “ ginosko” ihsi ra mi a si ih a sullam hi nu le pa pawlawknak ih pehzawmawknak thukzet relnak khalah hman theih a si.  Cumi ihsi kan hmuh thei mi cu hi mi hin thluak ih theihnak men lawng si lo pumpak nunih Pathian thawi pehawmawknak thuk zet a rel lang a si.

James 4: 8 lam kan zoh a silen, Bible in hitin,” Amah kan naih asilen anih khal in in naih ve ding” a ti. Hi mi hin fiangten Pathian in kanmah thawi naih aw zet ih um a duh ti in sim. Ngaingai tei kan ti len, Hosea 6:6 lamah tla cun amah lungawiter kan duh asilen cu amah kan theih a ṭul thu kan hmu bet. Thinlung hmuahhmuah thawi amah kan hawl a si ah cun kan tawn ding thu khal in tiamkam fawn ( Jeremiah 29:13).

Bawipa Pathian hi na theifiang taktak zo maw? Hitawk ah Pathian theihfeng a thupitzia thuthum in kan zoh tlang pei:

1.  Pathian cu Amah a sinak vekin hmu aw.

Pathian, asinak vekih sangtak ih hmuhnak cun kan nun zalam tluan le dinhmun a sinak ding diktak ih um thei dingah in bawm. Pathian hi asinak vekih hmuhnak dik thawi kan zoh asi ah cun harsat mangbang, vansan le buainak a phunphun kan tawn can khalah kan hnin lo ding ziangruangahtile kan biakmi Pathian cu zo a si ti fiangten kan thei. Kan mangbang vansan pittawp can khalah a cakmi Pathian, ziangkim tlun ih thuneitu, huham thawi khat, ziangkim thei thluh le kumkhua Pathian a si ti kan fiang.

Siangpahrang Uzziah a thih kum ah, kamsang Isaiah cun Bawipa a hmu. Vangsang le aanhai ih a um lai fangah, Bawipa Pathian cu a ropitnak thuam thawi Lal tohkham ih a to le ziangkim a kut ih a ukthluh kha a hmu. A siahhlawhpawl cu serafim vangcungmi an si ih, thla pahnih in anhmai an khuh aw; a dang pahnih in an ruangpi an khuh aw ih a dang pahnih in an zuang. Pakhat le pakhat an ko aw ih: “ Thianghlim, thianghlim, thianghlim! Cungnungbik Bawipa cu a thianghlim! A sunlawinak cu leitlun ah a khat a si,” an ti. ( Isaiah 6: 2-3).  Cutlukin vancungmi pawl cun kan Pathian ropitnak hlir in an sunlawih. Cuvek thotho in kan nih khal in kan Pathian hi asinak vekin kan hmuh hi a ṭul.

Thudik a si mi cu, hi kan milai ruahnak le theihnak biikte ih si hin cinneilo Pathian cu kan thei famkim thei dah lo ding. Amah theifiang sinsin ding hi kan damsung  khualtlawnnak  ih kan hmuitin mi a si a ṭul.  Pathian theihfeng sinsin nak thuthup a si mi cu tangdawr ten Amah theihfeng sinsin ka ṭul ti duhnak thuuk zet neih hi a si. Curuangah, taimak suahin Amah thawn nitin can kan hman tlang le a thunung Bible ruahnak thawi ke kan kar ringring a ṭulnak a si.

2.  Na sinak vekin nangmah le mah hmu aw aw.

Pathian ih sunlawinak, ropitnak le maksakzia kan hmuh le veten kan mai tlinlonak le sualnak khal kan hmu thawk ( Isaiah 6:5). Anih cun kan ṭulsammi le kan nun ronak san pawl hmu thei dingah kan hmuhnak mit a vang ter ding. Amah thawi naihte ih kan um tikah, midang sawisel le relsiat kan tawpsan ziangruangahtile kanmah khal in a zaangfahnak midang pawl thawn bangraan in kan ṭul ve ti kan hmusuak.

Pathian thawn naihte in kan um tlang maw tlang lo ti  mizaraan kan nunnih awlsamte ih a lang ṭheunak cu kan nunih hngalnak um ṭheu mi in a si. Siangpahrang Uzziah ih nun ihsin zir cio uhsi. A hram cu a thawk ṭha zet. Pathian mithmai a hawl vekin a hlawhtling. Asinan, a rawng hlawhtlin ngaingai tikah hngaknak in a nun a luah khat ih a hlawhtlinnak kha Pathian hnen ihsi ra mi a si ti a hngilh.  Curuangah, Pathian in a lennak a lakhloh sak ih hleiah nun a sim. A thih ni tiangah pharnat a neih phah a si kha ( 2 Chron. 26).  Pathian hlatnak cun hngalnak kanmah ah a thlen ih, cui hngalnak cun Pathian thin a heng ter ih, cui Pathian thinhengnak cun a fale pawl parah nunsimnak a thlen. Pathian nunsim tiangtiang hngah ih sual sir duh lo hi a pawi! A mivuaknak fungfek hi a khaa in luhlul hrim hrangah cun nun tawinak tiang a thlen.

Pathian theihfengnak cun thlacam nun nei dingah in bawm ziangruangah tilen Bawipa cu a nung ih kan dilmi in pe thei ti kan feng ruangah. Cuvek thiamthiam in, amah kan theihfengnak thotho cun amah rinsannakah in hruai ih cutin amah pan lo le naih lo thei lo ah in tuah ziangruangah tilen harsat vansan tawn canah a kutcak kan ṭul ti fiangten kan thei.  Fiangtei Bawipa a theitupawl cu an nun a hnget ziangruangahtilen an biak Pathian cu ziangkim tlun ih thuneitu, harsat an tawn mi le tuarmi par khal ih thuneihnak famkim neitu a si ti an theihfeng ruangah.

3. Midang ih ṭulsammi na hmu

Naihaw te ih Bawipa thawi pawlkawmawknak cun  a duhnak theihfeng sinnak ah in hruai. Amah thawi naihaw te ih kan um tikah, ziangmi in a lung a awiter in ziangmi in a lung a kuaiter ti mi kan thei. Mikip hi Bawipa’i hrangah an thupi thluh ih mi hmuahhmuah a rundamnak hruang sungih hruai luh hi a thinlung ih a seherh bik mi a si.

Kan zum ah maw zum lo ah maw thudik a si mi cu, kan lei taksa a thih hnu ah nun kan nei vivo ti hi a si.  Cui kumkhaw nunnak cu vanramah Pathian thawn umtlang a silolen Amai hnenih si dawi hloh Hremhmun mellipi ih um ding a si.  Hi lei kan damsung ih duhthlannak kan tuahmi in kumkhua hmun kan hmannak ding hmun a sawh.  Bible , Pathian ṭawngkam sual thei lo cun hitin, “ Fapa a zumtu in kumkhaw nunnak a nei. Fapa a zumlotu cun nunnak a hmu lo ding ih, Pathian thinhengnak cu a parah a um ringring sawn a si,”( John 3: 36) a ti.

Mitampi cun hi thutak hi mak ah an siar lo!.  Naihaw te ih Bawipa thawi kan um tlangnak cun midang pawl ṭulsammi hmuh theinak dingah kan mit a vang ter ih hleiah cupawl Pathian hnenih hruai thlen, rian dingah huham cahnak in pe. Amah thawi kan lentlang tamnak ihsin, Isaiah bangin, “ Hi tawk ah kei ka um, Bawipa I thlah aw” ( Isaiah 6:8) ti ah kan ti thei ve ding.  Kan rawngbawlnak le lamzin zawh mi cu a harsa in a bingbo zet a si hmanah, zumtupawl in kan thupitter ding mi bik cu in thlahtu Bawipai lungawi zawng dawi le amah lungawiter hi a si. Pathian ka rian kan ti rero mi hi amah thawi kan pehzawmawknak le amah kan duhdawtnak luangliam ihsi ra mi a si.  Amah thawi pehzawmawknak hngetzet le amah duhdawtnak taktak thawi a rian kan ṭuan lo a si ah cun, harsatnak kan tawn can ah, kan duhthusam bangin thil a feh lo tikah, mi ih relsiat le zohhnawm kan tuar canah, beidawng ih dunglam hawikir a awl te. Kan thupitter mi kha a diklo, a sual a si phei ah cun, rawngbawlnak ah caurau ih puakkuai a theih a si.

Asilen, duhdawtmi unau, Bawipa na thei maw? Amah na theifiang taktak maw? Cun, amah teh in a lo theih mi na si maw?  Kan pumpak nunnak pakhat cio hrangih a thupi bik mi cu Bawipa theihfeng hi a si. Amah thawi naihawte ih kan pehzawmawknak cun Pathian cu a sinak vek in, a dikmi ruahnak le lungthin thawn hmu thei dingah in hruai, kanmah le mah khal a dikmi hmuhawknak in neih ter ih hleiah kan kiangkap umpawl seherhnak le veinak thuktak in neih ter. Culawng hman siloin Amah theihfengnak cun kan leinun lan in kumkhaw nunnak sunglawi kan dam sung lala ah in tepter ih, kan kumkhaw nunnak cu hnget zetin in kilhimsak ( John 17:3).

Curuangah, zumtu u le nau kan nunsungah Bawipa theihfeng le amah thawi naihawte ih kekar tlang ding hi thupibik ah ret in a dawi rori in kan dawi tlang pei uh!

Pathian in siartu zaten lo thlawsuah hram seh

KAWHHRAN NUNG LE THI KHAIKHINNAK

Zumtu pakhat sinak le khawhhran member sinak in zocio khalin kan saduhthah mi cu kawhhran nung le ṭhangso neih hi a si ka zum. Ahman! Asinan, a hmin men ih kawhhran member sinak, zarhpi zing le zan ih sermon va ngaithlak khuaukhi men lawng khin kan thlarau lam nunah ṭhansohnak sangtak mi a thlen har zet. Member si cingih khawm dah lo, biakinn thleng dah lo si hnak cun a ṭha deuh fang men khi a si. Cuhnak ih thuksin in zumtu mipiangthar kan si ah cun kan nundan, Pathian biakinn kan ngainat le a thunung sungih kan hnimphumawk dan in Pathian fa kan sinak a lan ding hi Pathian ih in duhsak mi a si.

Awle, mah le kawhhran cio zohkir salin, a tlun ih thulu hmang khin kan kawhhran kan vawn teh cio hnik pei! kawhhran nungzet  hmang kan si kan ti awk laiah a thi mi kawhhran tla kan rak si hlulhli pang kei ti a phan um zet. Ziang zawnah kan cak in cun ziangzawn ah ka caklo ti tla mah le kawhhran cio bih sela ṭhathnemnak ah kan hmantlang cio ka beisei.

1.  Kawhhran nung ah cun hruaitu bik Pastor in Pathian thawi pumpak nun ih pehzawmawknak hnget khoh a nei ti member pawlin an hmu thei.   Asinan, kawhhran thi ah cun hruaitubik Pastor in Pathian thawn pumpaak nun ih pehzawmawknak a neih le neih lo ah member pawl aanhai in an um.

2. Kawhhran nung ah cun member pawl in Biakinn ah Bible an keng fekfo ih cutin an sawrbawk zet. Asinan, kawhhran thi ah cun member pawl Bible thawi biakinn pan hmuh ding an vang zet.

3. Kawhhran nung ah cun thlacam thawmvang le lungawi sopar ih au aw thawmvang ṭha theih ding a um ringring. Asinan, kawhhran thi ah cun thawmvang theih ding a um lo, kawhhran a reh in a ro.

4. Kawhhran nung cun an Biak inn tumter dan thuhla an ruat. Asinan, kawhhran thi ah cun cuvek thawmvang reltlang le titi a um lo.

5.  Kawhhran nung cun nauhak le mino tampi a nei ih an thawmvang khal hna a set thei zet.  Asinan, kawhhran thi lawngte cu thlan bang in a reh in a reh.

6. Kawhhran nung cun member pawl thupi zet ah a ruat ih a ngaihsak. Asinan, Kawhhran thi cun member pawl ngaihsak ding a thlahthlam.

7. Kawhhran nung ah cun member pawl an duhdawt aw tawn in an ngaina aw zet. Asinan, kawhhran thi ah cun relsiatawknak, eltaiawknak, zumawklonak le iksikawknak a pung .

8. Kawhhran nung cun thuthang ṭha phuansuah le kawhhran sung le leng ih cangvaihnak ah nasa ten ke a kar khawm , asinan, kawhhran thi ah cun member sungih minung malte lawng in Pathian hna an ṭuan.

9. Kawhhran nung ah cun Pathian hrangah mi tirhsiang an tam. Asinan, kawhhran thi ah cun ti dan phung vekin mi in peknak a pe.

10.  Kawhhran nung cu a a nit el in a ṭhang so vivo. Asinan, kawhhran thi cu a ni ni in a ṭumsuk.

11. Kawhhran nung cun missionary thlahsuah, mission hnaṭuan le thuthangṭha sim an uar. Asinan, kawhhran thi  ah cun cupawl cu agenda fate bik pawl an si.

12. Kawhhran nung ah cun Pathian thangṭhat, khawm le  thusim a nung . Asinan, kawhhran thi ah cun thangṭhatnak hlasak khal mithi topi vek vang a si.

13. Kawhhran nung ah cun member pawl in khawm le Pathian thangṭhat an hngakhlap, an khawp thei lo. Asinan, kawhhran thi ah cun nu le pa, pastor hmaisawng men fangih Biakinn pan an tam.

14.  Kawhhran nung ah cun member pawl in a thar tetti khan ding (tawntehmi  rel ding) an nei thei ringring. Asinan, kawhhran thi ah cun a liamcia ih hmuntawn mi siar lo , tetti khan thei an vang zet.

15. Kawhhran nung ah cun Pathian ṭihzahtu, Pastor upat ṭihzahnak, Pathian hnaṭuan hi duhsaknak sang a si ti thei in lungawinak thawi Pathian rian an tam. Asinan, kawhhran thi ah cun Pathian hnaṭuantu upatlonak, Pathian hnaṭuan hi Pathian thlawsuah ti ih siar hnakin phurrit a si ti ih hmuhnak a tam.

Siartu zaten Pathian in lo thlawsuah cio hram seh.

Ziangruangah Zumtupawl in Bible Kan Ngainat a Tul ?

 1. Leitlun ih cabu lakah sual theilo le kumkhawdaih umsun a si ruangah{Matt.24:35,1Pet.1:24-25}. Leitlun ah cabu tampi a um ih Biaknak tin in mah le cabu{Bible}cio khal kan nei. Asinan leitlun ih cabu dang cu an ziamsal in an hlo ṭheu. Asinan, lei leh van hlohral hman ih a hloral lo ding ih kumkhua a daih ding mi umsun cu Bible{Pathian thu}lawng hi a si.{1Pet.1:24-25,Matt.24:35}.

2. Pathian ih thawkkhum mi le van tiang ih mi hruai thleng theitu umsun cabu a si ruangah{2Tim.3:16-17,Rom.1:16}. Tiva cu a taw in hrawhso vivo aw la a tawp nak ah a hna na thleng ding. Cuvek in Bible cu kan zawi vivo tikah Amah Pathian hnen ah in hruai thleng a si, ziangruangah tile Bible ra suah nak hrampi cu Pathian hnen ihsi a si ruangah a si. Leitlun cabu dang in Pathian hnen{Van ram ah} mi a thlen thei dahlo.

3. Bible cu Pathian ih sinak in theifiang ter tu le a rundamnak sunglawi in co tertu a si ruangah{Rom.1:16,Ps.119:105}. Pathian cu milai fimnak ih hawlsuah theih le theihfeng theih mi a si lo.Curuangah milai in kan theihfeng theinak dingah Amah le Amah a thu hmang in kan hnen ah a phuangsuak aw a si. A thu hmang in kan sunglam nun thim a ti eng a si.

4. Bible cu kan riahsiat lai le kan thanau lai can khal ih inhnemtu le kan thazaang a si ruangah{Ps.119:50,54}.Zumtu a nunak ah beidongnak le thinharnak na tong ṭheu maw? Asi lole thanau zet ih na um can teh a um maw? Cuican ah Bible siar hman Pathian in a thu hmang in a lo thangharh sal in thazaang a lo pe ding.

 5. Bible cu kan nun tithianghlim tu,kan tuah le tuah lo dingmi fiang tei in simtu a si{Ps.119:9-11,Joshua.1:8-10,John.17:17}. Pathian thu Bible tello in Pathian duhzawng ih nun thianghlimnak a um thei lo. Kan sunglam nun ih Pathian thu ih in control lo cun zumtu si man a um lo,sual tuah kan man cia a si ko.Pathian thu lawng in lamzin dik ah in hruai thei a si.

 6. Kan ralthuam a si ruangah{Eph.6:17}. Zumtu pawl ih hmuh theihlo Setan ral kan donak ah  Bible le thlacamnak hi kan ralthuam ṭhabik a si.Curuangah zumtu unau Bible siar hi kan ngaina kei uh. Voi tampi ah crusade le camping ah le colhni sun ah sermon ṭhaṭha kan ngai ṭheu,thazaang kan ngah zet kan ti nan ziangruangah rei kan daih ṭheu lo a si pei..? Asan tampi lakah Bible siar kan ngaina lo tuk,kanmah rori Pathian thu kan zohzir paihlo mi sim mi lawng ngai kan tum men.Curuangah zumtu unau na kut ah mi ropi ih lo tuahtheitu,Pathian duhzawng na theih theinak ding,ral Setan na neh theinak ding le na thinharnak lo hnem theitu ding Bible a um kha...siar aw,hmang aw la a tak in a thatnak na congah ding."Rawl cu pumpuarnak a sinan kan ei lawngah atak in kan pum a puar a si kha,cuvek in Bible khal a tak ih na siar le na hrangah nehnak le lungawinak a si ding.

 Siartu zate Pathian in mal za in sawm hramseh.

Saya Ceu te Tahan

Siddhartha Gautama le Jesu Khrih Ih Danglamnak

Leitlun ih biaknak ropi din suak tu Siddhartha Guatama hi India ram Ganges tipi kap Himalaya tlang kiang ah Zisu'i suahhlan B.C 500 hrawng ah khan Hindu miphun sakya siangpahrang Sudhodan Guatama ti mi ih fapa a si.Milian maktara fapa a si ih nupi hmelṭha zet nei in fapa te a nei asinan a nun ah hnangamnak a neih thei lo ruang ah hnangam nak hawl in a nupi le a fapa duh zet cu a fehsan ih hramlak ah a mah te in a um cu tawk ih sin Buddism a rak din suak.

Kan Bawipa Zisukhrih khal Bethlehem Caw rawleinak ah a rak suak ih Khristian biaknak hi a mah ruang ah a um ve. Asinan nasa tak in danglam awk nak an nei. Cupawl tla cu:

1.Guatama cu hnangamnak hawl in a lal inn a suahsan.....Khrih cu hnangamnak mi pe ding in van ih sin a ra.{John.14:27}.

2.Guatama cun thu ṭha zet a zirh ve nan "kei i zumtu cun kumkhaw nunnak an nei ding a ti ngam lo....Khrih cun mi zokhal kei i zum tu cun kumkhaw nunnak an nei ding, an thi nawn lo ding a ti.{John.5:24,8:53--55}.

3.Guatama cu kum 80 a si hrawng ah lei dan in a thi....Khrih cu misual kan hrang ah a thi.{1Tim.1:15}.

4.Guatama cu amah thluntupawl ih sualnak a phur in a thihpi thei lo....Khrih cu kan sual hmuahhmuah phur in Kross par ah a thihpi thluh.{John.1:29,1Pet.2:24}.

5.Guatama cu a thihnak in a mah dungtlun pawl ih sual nak leiba a sam sak thei lo...Khrih cu a thihnak in kan sualman thihnak ding leiba a samthluh{Kol.2:14}.

6.Guatma ih thihnak cun Pathian thinlung ah thu a sim thei lo....Khrih thih nak cun Pa’i thinlung ah ngaihdamnak in tuah sak.{Lk.23:34,Rom.5:8=10}.

7.Guatama ih thihnak cun Setan a neh thei lo..Khrih thihnak cun Setan in neh sak{Heb.2:14-15}

8.Guatama cu a thih ni hi Hellram a thlen ni a si...Khrih cu a thihnak in a zumtu hrang ah Hellram sangkaa in khar sak{hellram in neh sak}tu asi.[Thup.1:18}
9.Guatama cu thihnak in a thuanthu a cem ter....Khrih cu a thih hnu ah neh nak thawn a thosal.{Thup.1:18}.

10.Guatama cu thihnak ih sin a thawhsal nawn lo ruang ah thlan in a zirhnak le a thuanthu a cem ter....Khrih cu thlan in a kaitang thei lo ih thlan khat lam ral ah nehnak thawn a ding thei.Hi hin a zirhnak khal thlan ah a cem men lo ti a fiang.{John.8:53-55}.

11.Guatama cu a ra sal leh ding ti ih hngah ding a um nawn lo....Khrih cu thihnak neh ih a thawhsal men lawng si lo in van ah a  kai a mah rori a ra sal ding.{Dungthlun.1:11,Tita.2:13,John.14:1-3}.

12.Guatama cun Pathian a hawl a tawp ah amah kha Guatama
miatsuaphaza ti ah an ko.....Khrih cu amah hi Pathian asi ih Pathian
minung ah rung cang in misual rundamtu asi.{John.1:14,1Tim.1:15,}.

Curuang ah "Aw Zisu i rundamtu um sun le Bawi hmuah lak ih Bawibik,siangpahrang lak ih siangpahrang um sun"ti ih thangṭhat a lak asi. Amen.

Hminsin:Hihi biaknak{sakhua}hmuhsuam nautatawknak ih ngan mi a si lo,thudik thutak a si dan vek ih ngan mi sawn asi"

Evan. David Ceu {Saya Ceute}

Thingkung Phun Thum

Kan Bible sungah thing kung tampi kan hmu ih cumi lakah thingkung danglam ce phunthum kan hmu ih cu mi hmang in thlarau lam nun kan zir thlang ke.

1.Asia le Aṭha Theihnak Thingkung{Gen.2:9,17}.
2.Thinglamtah Kross...................{1Pet.2:24}.
3.Nunnak Thingkung..............................{Gen.2:9,3:21-24}.

1. Asia le a ṭha theihnak thingkung {Gen.2:9,17}.

Hi thingkung cu Pathian in Eden dum laifang ah a ret ih a milai sersiam mi hnen ah "Arah hi na ei lo pei na ei ah cun na ei ni lala in na thi tengteng ding” tiah a ti mi kha a si{Gen.2:17}.Adam tei nupa in Pathian thungai lo ih an ei ih ruangah hi thingkung rah ei nak cun:

 1. Pathian thawn in ṭhen aw ter.{Eph.4:18}.

2. Mithi ah in cang ter{Gen.2:17,Eph.2:1-2}.

3. Van malsawmnak in sung ter.{Rom.3:23}.
4.Setan fa ah in cang ter{John.8:44} 5.Pathian ral ah in cang ter{Kol.1:21-22}.

6. Pathian ramsung in in dawi suak{Gen.3:23-24}.7.Camsiat nak in tuar ter{Gen.3:16-19}.

8. Nunnak thingrah ei in siang nawn lo{Gen.3:22-24}.

9. Lei Eden paradise in sung ter{Gen.3:23-24}.

Asia le aṭha theihnak thingkung ruang ah hi pawl hi kan co mi cu an si.

2.Thinglamtah (Cross)

 Pathian in Eden ih Asia le Aṭha theihnak thingkung ruang ih kan thuanthu se thluh zo mi cu thinglamtah hmang in thuanthu thar in tuah sak sal. Cui thinglamtah cun zumtu hrangah cun:

1.Pathian thawi pumkhat awknak kan nei sal{Eph.2:14-16,Kol.1:21-22}.
2.Pathian thawn rem awk sal nak in tuah sak.{2Kor.5:18-20,Kol.1:21-22}.
3. Setan fa ih sin Pathian fa ah in canter{John.1:12}
4.Nunnak thar vanlam nunnak in pe{Rom.6:4-5}.
5.Van paradise ah in hruai lut{Kol.1:13.Lk.23:43}.
6.Lamzin thar le lamzin nung in sialsak{Heb.10:19-10}.
7.Eden sual natnak in dam ter{Isai.53:5,1Pet.2:24}.
8.Camsiatnak a cem ter ih van malsawm thar in pek.[Gal.3:13,Eph.1:3}.
9.Kan sual leiba a cem ter{Kol.2:14}
10.Setan in neh sak{Heb.2:14-15,Kol.2:15}.
11.Leithlun thawn in then aw ter{Gal.6:14}.
12.Kan minung hlun thi ter tu{Rom.6:6}.
13.Van roco tu ah kan cang{Rom.8:17}.

3.Nunnak Thingkung {Gen.2:9,Thup.22:1-3}.

Hi thingkung hi Adam tei nupa in Asia le ṭha theihnak thingrah an ei hnu ah cun Pathian in ei a siang nawn lo ih an ei thei nawn lo nak ding ah dawisuak in Cherubim vancung mi pawl a kil ter mi kha a si. Sual ruang ah kan ei thei nawn lo nan kan ṭhat le felnak tello in Khrih thinglamtah par ih thih nak ruang ah a zumtu pawl in van eden thar ah duhduh in ei thei nak khuan kan nei sal a si.Cui nunnak thingrah kan ei tik ah cun: Thihnak{mithi zunngaih},natnak,mitthli tlak nak,farah retheihnak,zatlaknak,nun khaw harnak,piansualnak a um nawn lo ding ih thil hmasa hmauhhmuah a cem thluh ding ih ziangkim a thar ding.Nitleu le meifar khal a ṭul nawn lo ding,lungawinak in tlai tluan in a khat ding...Halelujah ..amen{Thup.21:4-6}.

Curuang ah zumtu unau tui na dinhmun zoh in na beidong hlah na hrang le ka hrang ah khua a vang cing ding.

Siartu zate pathian in mal za lo sawm hram seh.

Evan. David Ceu

{Saya Ceute}.