Ziangtin Mission Hnaṭuannakah Kan Hlawhtling Thei Ding? (I Sam. 16-17) -I

Thuhmaihruai

Tulai fang ih leitlun khawvel sawihnintu- micak, boxing thiam hminthang, Philippines idol a si mi cu Manny Pacquiao hi a si. Tufang ah hin champion belt thuah riat ( 8) rori kaitu a si. Philipines ramsung lawng si lo in leitlun khawvel in boxing thuthawi pehparaw ih an atcilh mi a si.  Leitlun ih mi hminthang bik bik le mi lar bikbik an hrirmi top 10 ah khal a lang ban ve ti a si. Hi pa hin hlawhtlinnak maksak tak a neih theinak dingah timlamnak nasa ngaingai a nei. Training hmanhman ten a tuah, ti le rawl ṭha ṭha a ei, cuihleiah, amah khal nehnak cotu si rori ding in a thinlung le cahnak hmuahhmuah thawn a lek ṭheu! Mah le mah thununawk, zuamnak le thazaang cahnak timi pawl hi a thupi tuk, asinan mission hnaṭuannak ih hlawhtlinnak ah cupawl lawng in a ngah lo,cun mi lan in kan theih tengteng ṭul mi thupi zetzet  Bible in tampi in zirh.  Kan Bible bu pumpi kan zoh le zingzawi a silen, Pathian mi hman ropi zet zet kan hmu thei. Cupawl lakah, kum note ih Pathian in rawngbawlnak ih a kawh mi khal ziang maw zat an um ih cupawl lak ihsin Kamsang Samuel le Siangpahrang David hi ka uarbik mipawl lakih pahnih an si.Tui ṭumah, David ih hlawhtlinnak thuthup pawl ihsin Mission hnaṭuannak ih kan hlawhtlin thei dan ding kan ruat tlang ding.

Mission kan ti mi hi ziang a si?

Zumtu zate ih kan mission a si mi le kan rawngbawlhna ih thupibik cu mi phunkim hnenih Pathian rundamnak thuthang ṭha sim, thlarau hlo a hnenih hruaikir le a zumtu hmuahhmuah dungthluntu ih tuah le ser pitlin hi a si. ( Matt. 28:19-20). Hi hnaṭuan hi zumtupawl ih kan damsan le kan mission a si. Hi kan thulu simfiang dingah David in a mission –Goliath a thah dan, a nehdan le Israel mipi a runsuahdan thawi pehparaw in thlarau lam thazaang la tlang dingah ka lo sawm bet.

Thilcang mi le an dinhmun

Khalai canah khan, Israel raalkappawl cu siangpahrang Saul ih hruainak thawn anral Filistinpawl do ding ah Elah rawnah an riak. Cun, anraal Filistinpawl khal cu Israelpawl do dingah Sokoh khua ah riahbuk an khuar ve. Cutin, Israel raalkappawl cu Filistin pacakbik (champion), Goliath in amah thawi hmatawn ih pakhat le pakhat sual aw dingah ni 40 sung rori an riahnak tlang ihsin a uah ringring. Cutikah, Saul le a raalkap pawl cu ṭih le khur in cui Goliath ih au aw le hronak an thei cu an um. Zohman do ngam um lo in cutin mangbang in vansang an lam. Culaiah, David cu a pa in a um le va veh dingah a tuukhalhnak hmun ihsin a hei thlah. Goliath ih hronak aw le hrinnak aw a theih cun keimah in ka do ding tin a ti. Cutin, a do ih Pathian in nehnak Israel pawl hrangah a pe ti kan hmu thei. Hi doawknak hi ngunngaih sin in kan zoh asilen taksa dan ih Israel raalkappawl le Filistinepawl doawknak men a si lo, Pathian ih raalkappawl le Satan ih raalkappawl doawknak ti’n kan ti thei. Hi doawknak hin zumtupawl nitin Mission hna kan ṭuannakih thlarau lam doawknak , setan thawi doawknak kan tawn mi le harsatnak phunphun kan tawn mi pawl a hmuhsak.

Hitin nangmah le mah na rak sut aw dah maw, ziangtin hi David nauhakpa te in kha tluk Pa tuum, pa cak, ralthiam le cakbik (champion) rori awlsam te ih a neh thei? (I Sam. 17:4-11; 51). David khan ti pang thilthu ah Goliath ih calpadar ah a ngah pang teh a si thei pei maw? Lole, tlunlam thiltitheinak, Pathian ih telpinak a tel? Tuini ah David bangin,  pa cak, pa tumpi, lole harsatnak a phunphun na nunah tawng ding si bang ta aw la, lole na tawng rero tla rak si bang ta sela, ziangtin ha cui harsatnak pawl cu na sawn ding?  A nehtu maw a sungtu na si ding? Nitin ih Pathian hna kan ṭuannak le ke kan karnakah zohman in hlawhsam kan duh ka zum lo, cun Pathian khal in kan tlanzuamawknak le mission hnaṭuannakah kan hlawhtlin in duhsak. Asinan, cui hlawhtlinak cu hmakhattei tohmun le kutbawm men ih kan neih thei mai mi a si lo, David vekin hlawhtlinnak a takih a cotu, nehtu si kan duh asilen le ngun zetin ziangtin David in hlawhtlinak a tawng ti mi kan zir le theih a thupi zet.  David thuanthu ih a hlawhtlinnak hrampawl ihsin thazaang kan la tlang pei uh.

I.          David cu zoha a si? Jesse, Bethlehem khua ih a um mi ih fapa a si. Unau pianpi mipa pasarih a nei i, anih hi an unau lakak a nautabik a si. Tukhaltu a si ih a caan tambik cu tuukhal in hramlakah le phul pawl ah a hmang. Mi tuaktam, pianṭha, ralṭha le raldo thiam zet a si. Amah lawng hi si kan Bible in “ Pathian thinlung vek a kengmi” ( Dungthluntu 13: 22) ti ih a ngankum mi um. Hi Goliath thawi an doawk sanlai ah hin Bible mithiam tampi cun kum note 14-16 karlak hrawnghrang lawng a si ti’n an ti. Hi tumih an sualawknak hi Ramsa lak ihsin Kiosa le Savawm thawi an sualawk ti lo ah cun, David in minung thawi a vawikhat ral beihnak a si. 

Hminsin: A pehzawm mi siarbet hram aw.