Pathian Thawi Pawlawknak

Milai kan damsung ih thupibik cu Pathian kan theih le amah thawi naihawte ih kan lentlang ding hi a si.  Ziangvek cekci in Pathian kan hmu ti mi in a rei a rei ah cun kan nunnak ah hngawk thukzet a nei leh ding. John 17: 3 ah cun , “ …nang Pathian dik pakhat lawng le na thlah mi Jesu khrih theih hi, kumkhaw Nunnak cu a si” tin kan hmu.  Ṭawngfang, “ theih lole thei” ti ih kan hmuh mi hi Greek ṭawngfang “ ginosko” ihsi ra mi a si ih a sullam hi nu le pa pawlawknak ih pehzawmawknak thukzet relnak khalah hman theih a si.  Cumi ihsi kan hmuh thei mi cu hi mi hin thluak ih theihnak men lawng si lo pumpak nunih Pathian thawi pehawmawknak thuk zet a rel lang a si.

James 4: 8 lam kan zoh a silen, Bible in hitin,” Amah kan naih asilen anih khal in in naih ve ding” a ti. Hi mi hin fiangten Pathian in kanmah thawi naih aw zet ih um a duh ti in sim. Ngaingai tei kan ti len, Hosea 6:6 lamah tla cun amah lungawiter kan duh asilen cu amah kan theih a ṭul thu kan hmu bet. Thinlung hmuahhmuah thawi amah kan hawl a si ah cun kan tawn ding thu khal in tiamkam fawn ( Jeremiah 29:13).

Bawipa Pathian hi na theifiang taktak zo maw? Hitawk ah Pathian theihfeng a thupitzia thuthum in kan zoh tlang pei:

1.  Pathian cu Amah a sinak vekin hmu aw.

Pathian, asinak vekih sangtak ih hmuhnak cun kan nun zalam tluan le dinhmun a sinak ding diktak ih um thei dingah in bawm. Pathian hi asinak vekih hmuhnak dik thawi kan zoh asi ah cun harsat mangbang, vansan le buainak a phunphun kan tawn can khalah kan hnin lo ding ziangruangahtile kan biakmi Pathian cu zo a si ti fiangten kan thei. Kan mangbang vansan pittawp can khalah a cakmi Pathian, ziangkim tlun ih thuneitu, huham thawi khat, ziangkim thei thluh le kumkhua Pathian a si ti kan fiang.

Siangpahrang Uzziah a thih kum ah, kamsang Isaiah cun Bawipa a hmu. Vangsang le aanhai ih a um lai fangah, Bawipa Pathian cu a ropitnak thuam thawi Lal tohkham ih a to le ziangkim a kut ih a ukthluh kha a hmu. A siahhlawhpawl cu serafim vangcungmi an si ih, thla pahnih in anhmai an khuh aw; a dang pahnih in an ruangpi an khuh aw ih a dang pahnih in an zuang. Pakhat le pakhat an ko aw ih: “ Thianghlim, thianghlim, thianghlim! Cungnungbik Bawipa cu a thianghlim! A sunlawinak cu leitlun ah a khat a si,” an ti. ( Isaiah 6: 2-3).  Cutlukin vancungmi pawl cun kan Pathian ropitnak hlir in an sunlawih. Cuvek thotho in kan nih khal in kan Pathian hi asinak vekin kan hmuh hi a ṭul.

Thudik a si mi cu, hi kan milai ruahnak le theihnak biikte ih si hin cinneilo Pathian cu kan thei famkim thei dah lo ding. Amah theifiang sinsin ding hi kan damsung  khualtlawnnak  ih kan hmuitin mi a si a ṭul.  Pathian theihfeng sinsin nak thuthup a si mi cu tangdawr ten Amah theihfeng sinsin ka ṭul ti duhnak thuuk zet neih hi a si. Curuangah, taimak suahin Amah thawn nitin can kan hman tlang le a thunung Bible ruahnak thawi ke kan kar ringring a ṭulnak a si.

2.  Na sinak vekin nangmah le mah hmu aw aw.

Pathian ih sunlawinak, ropitnak le maksakzia kan hmuh le veten kan mai tlinlonak le sualnak khal kan hmu thawk ( Isaiah 6:5). Anih cun kan ṭulsammi le kan nun ronak san pawl hmu thei dingah kan hmuhnak mit a vang ter ding. Amah thawi naihte ih kan um tikah, midang sawisel le relsiat kan tawpsan ziangruangahtile kanmah khal in a zaangfahnak midang pawl thawn bangraan in kan ṭul ve ti kan hmusuak.

Pathian thawn naihte in kan um tlang maw tlang lo ti  mizaraan kan nunnih awlsamte ih a lang ṭheunak cu kan nunih hngalnak um ṭheu mi in a si. Siangpahrang Uzziah ih nun ihsin zir cio uhsi. A hram cu a thawk ṭha zet. Pathian mithmai a hawl vekin a hlawhtling. Asinan, a rawng hlawhtlin ngaingai tikah hngaknak in a nun a luah khat ih a hlawhtlinnak kha Pathian hnen ihsi ra mi a si ti a hngilh.  Curuangah, Pathian in a lennak a lakhloh sak ih hleiah nun a sim. A thih ni tiangah pharnat a neih phah a si kha ( 2 Chron. 26).  Pathian hlatnak cun hngalnak kanmah ah a thlen ih, cui hngalnak cun Pathian thin a heng ter ih, cui Pathian thinhengnak cun a fale pawl parah nunsimnak a thlen. Pathian nunsim tiangtiang hngah ih sual sir duh lo hi a pawi! A mivuaknak fungfek hi a khaa in luhlul hrim hrangah cun nun tawinak tiang a thlen.

Pathian theihfengnak cun thlacam nun nei dingah in bawm ziangruangah tilen Bawipa cu a nung ih kan dilmi in pe thei ti kan feng ruangah. Cuvek thiamthiam in, amah kan theihfengnak thotho cun amah rinsannakah in hruai ih cutin amah pan lo le naih lo thei lo ah in tuah ziangruangah tilen harsat vansan tawn canah a kutcak kan ṭul ti fiangten kan thei.  Fiangtei Bawipa a theitupawl cu an nun a hnget ziangruangahtilen an biak Pathian cu ziangkim tlun ih thuneitu, harsat an tawn mi le tuarmi par khal ih thuneihnak famkim neitu a si ti an theihfeng ruangah.

3. Midang ih ṭulsammi na hmu

Naihaw te ih Bawipa thawi pawlkawmawknak cun  a duhnak theihfeng sinnak ah in hruai. Amah thawi naihaw te ih kan um tikah, ziangmi in a lung a awiter in ziangmi in a lung a kuaiter ti mi kan thei. Mikip hi Bawipa’i hrangah an thupi thluh ih mi hmuahhmuah a rundamnak hruang sungih hruai luh hi a thinlung ih a seherh bik mi a si.

Kan zum ah maw zum lo ah maw thudik a si mi cu, kan lei taksa a thih hnu ah nun kan nei vivo ti hi a si.  Cui kumkhaw nunnak cu vanramah Pathian thawn umtlang a silolen Amai hnenih si dawi hloh Hremhmun mellipi ih um ding a si.  Hi lei kan damsung ih duhthlannak kan tuahmi in kumkhua hmun kan hmannak ding hmun a sawh.  Bible , Pathian ṭawngkam sual thei lo cun hitin, “ Fapa a zumtu in kumkhaw nunnak a nei. Fapa a zumlotu cun nunnak a hmu lo ding ih, Pathian thinhengnak cu a parah a um ringring sawn a si,”( John 3: 36) a ti.

Mitampi cun hi thutak hi mak ah an siar lo!.  Naihaw te ih Bawipa thawi kan um tlangnak cun midang pawl ṭulsammi hmuh theinak dingah kan mit a vang ter ih hleiah cupawl Pathian hnenih hruai thlen, rian dingah huham cahnak in pe. Amah thawi kan lentlang tamnak ihsin, Isaiah bangin, “ Hi tawk ah kei ka um, Bawipa I thlah aw” ( Isaiah 6:8) ti ah kan ti thei ve ding.  Kan rawngbawlnak le lamzin zawh mi cu a harsa in a bingbo zet a si hmanah, zumtupawl in kan thupitter ding mi bik cu in thlahtu Bawipai lungawi zawng dawi le amah lungawiter hi a si. Pathian ka rian kan ti rero mi hi amah thawi kan pehzawmawknak le amah kan duhdawtnak luangliam ihsi ra mi a si.  Amah thawi pehzawmawknak hngetzet le amah duhdawtnak taktak thawi a rian kan ṭuan lo a si ah cun, harsatnak kan tawn can ah, kan duhthusam bangin thil a feh lo tikah, mi ih relsiat le zohhnawm kan tuar canah, beidawng ih dunglam hawikir a awl te. Kan thupitter mi kha a diklo, a sual a si phei ah cun, rawngbawlnak ah caurau ih puakkuai a theih a si.

Asilen, duhdawtmi unau, Bawipa na thei maw? Amah na theifiang taktak maw? Cun, amah teh in a lo theih mi na si maw?  Kan pumpak nunnak pakhat cio hrangih a thupi bik mi cu Bawipa theihfeng hi a si. Amah thawi naihawte ih kan pehzawmawknak cun Pathian cu a sinak vek in, a dikmi ruahnak le lungthin thawn hmu thei dingah in hruai, kanmah le mah khal a dikmi hmuhawknak in neih ter ih hleiah kan kiangkap umpawl seherhnak le veinak thuktak in neih ter. Culawng hman siloin Amah theihfengnak cun kan leinun lan in kumkhaw nunnak sunglawi kan dam sung lala ah in tepter ih, kan kumkhaw nunnak cu hnget zetin in kilhimsak ( John 17:3).

Curuangah, zumtu u le nau kan nunsungah Bawipa theihfeng le amah thawi naihawte ih kekar tlang ding hi thupibik ah ret in a dawi rori in kan dawi tlang pei uh!

Pathian in siartu zaten lo thlawsuah hram seh