Ziangruangah Thuthangṭha Ka Zahpi Lo?

"Khrih thuthang ṭha hi ka zahpi lo,ziangah tile zokhal a zumtu hmauhhmauh in rundam an si theinak ding ah Pathian thiltitheinak asi"{Rom.1:16}.

Tuihlan ih a do bikmi le a huat bikmi thuthang ṭha cu tuah cun Paul in ka zahpi hrimhrim lo a ti. Ziangruangah a si pei..?
1. Misual nun danglam ter theitu asi ruangah
             Paul hi a pianthar hlanah cun Zisu Khrih le a thuthang ṭha dotu bik asinan thuthang ṭha cun a nun a thlengsak ih Zisu thih tiang ih ṭan ngamtu ah a cang a si. Zumtu pawl hrem ding ih a fehlai ah Zisu thawn an tong aw ih a nun a danglam thluh. A tumtahmi ṭhalo khal thuthang ṭha in a thlengsak. Thuthang ṭha cu ka tumtah mi ṭhalo tiang in thlengsak theitu a si. Voikhat cu Pathian mi ropi Bakht Singht in mi pakhat beidong ih mahte that aw zik mi pa'i hnenah thuthang ṭha a sim. Cu pa cun saya pa in tibuai duhhlah na thusim khal ka ngai man lo, mi beidong pittawp mahte that aw zik ka si tiah a ti. Cutikah Bakth Singth in na thahawk ding ka lo dawnlo, Asinan ka thusim mi ngai ta awla cuhnu le na tuahduhmi cu na tuah ko ding a ti. Cu le thuthang ṭha a vunsim cun cu pa cu a piangthar ta riai. Bakth Singth cun kha feh aw na tuahduhmi cu va tuah aw a ti tikah, Sayapa ka duh nawnlo, ‘leitlunah nun man nei bik ka si zo’ tiah a ti. Thuthang ṭha cun nun man neiah in tuah ih kan tumtah ṭhalo khal in thiatsak thei tu a si.
2. Leitlun ih pek theilo mi hnangamnak le lungawinak maksak in pe tu asi{Lk.2:10,Ps.4:7,1Pet.1:8, John.14:27}.
             Leitlunah milai in lungawinak le hnangamnak cu ziangmaw zat leitlun thilah a tong ve ṭheu. Asinan kumkhua a daihlo a langte sung hrang lawng a si. Vanlam ihsi ra mi thuthang ṭha cun kumkhua a daih mi lungawinak le hnangamnak in pe thei.  Thu thang ṭha ih ruangah thih hnangamnak, nun hnangmank le thih lungawinak kan nei a si.
3. Ruahsannak nung in pe theitu a si{1Pet.1:3}
             Milai cu ruahsannak tello in kan nung theilo. Asinan Khrih thuthang ṭha lawng in ruahsannak nung in pe thei a si.{1Pet.1:3,1Thes.4:13}.
4. Pathian thiltitheinak lang tertu a si.{Rom.1:16}.
              Pathian in a thiltithei zia hi a phunphun in a lang ter ṭheu. Sersiam mi thil in, mangbangza a tuah mi hmang in tvp.. Asinan hipawl hi kan thlarau saltang a run thei lo. Kross thuthang ṭha lawnglawng hi kan thlarau saltang run thei tu umsun a si. Hi thuthang ṭha ih thiltitheinak a theifiang tu pawl cun an zahpi lo. Lei le van ih thiltithei bik le duh um bik le a THABIK miangmo cu thuthang ṭha hi a si.

Siartu zate Pathian in lo thlawsuah hram she

Evan. David Ceu
{Ceu Family}
Tahan