Zisu in thla nan cam tikah........
1. Midepdepawl vek ih cam lo ding{Matt.6:5}.
Mipi hmuh lawng ih rei ngaingai thlacam duh,
mahte fianhrial ah le thlacam dahlo, Mi in in thei haiseh ti duhnak lungput
thawi thlacam, Mi uar ding le ngainuamnak ding men hawl ih tongkam mawi hawl
hrim ciamco tvp. pawl hi midepde thlacam cu a si. Unau, thla kan cam tikah
mingai nuam ding maw kan hawl or Pathian hmaiah kan thinlung kan sungbung sawn?
Mah te um can ih thlacam le Zubui meican te mi zapi thawi cam can le netkhawr
cuh ringring, hnukcat theilo ih rei ngaingai bei ciamco {thlacam rei hrimhrim
hi a sual cu a silo nan}tivek hi Zisu'n a uar lo. Kan Bawipa Zisu khal mipi
hmai ih thla a cam le a sau dahlo.Thimnakah...Lazar a kaih thawh zawng,
Mipi 5000 Sang panga le Nga te pumhnih ih a cawm tvp. Hivek can ah tawite thla
a cam ṭheu men, Asinan Amah te lawng tlangpar le hramlak ih a Pa'i hnen ih thla
a cam canah cun zanvar te tivek in a cam ṭheu{Lk.6:12,Matt.14:23}.
Mi hrekkhat ih thlacam cu thlacam phah ih mi ṭhua,thlacam
phah ih mi kawk le mi to le nun mi sim ciamco tla an um. Khavek kha Pathian
hnen a thleng lo ih a camtu lawng an di a riam men a si.
2. Zentel pawl{Lawki}mipawl vekih thlacam lo ding{Matt.6:7}.
" Cule thla
nan cam tikah zentel pawl vek in sullam neilo ṭong nawlhsal rero hlah uh,
Ziangahtile, annih cun ṭongkam tampi an sal nawn rero ruangah Pathian ih
theihsak dingah an ruat"{Matt.6:7}.
Hitawk ih Zisu'i sim duhmi hi thil pakhat hrangah voikhat lawng dil uh ti lam a
si lo. Thil pakhat hrangah, ṭhimnakah,
Crusade programe le camping hrang tivek ah a kum tel khal in kan cam thei ko. Asinan
a sim duh sawn mi cu mi in thla a cam rei thei in ti haiseh ti ruang ih salbang
sal rero, a can rei ding hrimhrim duh ruang ih thil thupi hnailo le
thinlung tak tel hnai lo ih sal kual sal kual kha a sim duh mi cu a si. Thlacam
rei thei a suallo, asinan a rei ruang men ih a sannak[aphi} ngah ding cu a silo.
3. Mi nautatnak or hngalnak thawi thlacam lo ding{Lk.18:11-12}.
Farasi pa le
siahkhawngtu pa'i thlacamnak ah kan hmu. Farasi pa cun hngal zet le uar aw zet
in mi nautatnak thawn thla a cam ti kan hmu. Mah lawng ṭha ih theih awknak le mi zianghman ih siarlo nak thawi thlacam hi Pathian
in a duhlo.
4. Mi tlinlonak ngaidam duhlo cing ih thlacam lo ding{Matt.5:23-24}.
Thinlung ih mi huatnak le mi ngaihdam duhlo
nak thinlung thawi thlacamnak in hual a nei theilo. Thla kan cam tikah Pathian
in kan hmur silo in kan thinlung a zoh sawn.
Siartu zate Pathian duhdan ih thla kan cam theinak
ding ah thlaw in suahsak hramseh.
Evan. David Ceu
No comments:
Post a Comment