Thlacam Hlawknak

Leitlunah ziangvek biaknak khal in thlacam timi hi kan nei thluh cio.Thlacamnak neilo biaknak a um a zum um lo.Cu mi lakah kan nih Pathian nung neitu pawl hi thlacamnak nei mal pawl sawn kan si men thei.Ziangah tile thlacam ih hlawknak kan theih mal tuk ruangah a si men thei.Thlacamnak in hlawknak tampi a nei. Cui pawl lakih a hrekkhat tla cu:
1.Thlacamnak cun Pathian in theifiang ter deuhdeuh{Eph.1:15-18}
         Paul in Ephesi kohhran pawl hnen ah an piangthar zo nan Pathian an theihfeng deuhdeuh nak dingah thla a camsak.Rundamtu a sinak ih Pathian kan theih lawng a tawk lo. Amah theihnak ih ṭhang sinsin dingah in duh{2Pet.3:18}.Mi in thlacamnak thawn Pathian a pawl tam deuhdeuh le Pathian a theifiang deuhdeuh a si.
2. Thlacamnak cun Pathian remruah in theih fiangter.{Jer.33:3,Dungthlun.13:1-3}
         David siangpahrang cun Pathian thu a rawn ringring ruangah Bawipa in a remruah a hnenah a simfiang cingcing{1Sam.23,30:5-8,2Sam.2:1-2}.Moses khal Pathian a pawl ringring ruangah Bawipa in a remruah mi a hnen ah a phuangsuak{Exo.33:13-15,Ps.103:7}.Israel fatepawl cun Pathian ih THILTUAHSAKMI lawng an theih laiah Moses cun A TUAHTU PA'I DUHZAWNG LE A LAMZIN a thei{Ps.103:7}.Pathian ih remruahnak{a lamzin}theih timi le a thiltuahsak mi hmuh a bang aw lo.A kutcak hrekkhat le a thiltimi hrekkhat cu tisa mi zet si cing in theih le hmuh a theih.Israel pawl khal phunnawi paih zet,vuivai hmang zet,thulunglo zet an si cing in
ramcarah Pathian in a kutcak a hmuhter rero thotho hai.Asinan Moses lawnglawng in Pathian ih sinak,a duhzawng,a remruah le a lamzin a thei ban.Ziangah tile Bawipa thawi an pawlawk ringring ruangah si{"He made known His ways to Moses,His acts to the children of Israel".Ps.103:7}.
3.Thlacamnak cun Pathian thuthup mi a theihter{Eph.6:18-19}
           Paul cun thuthang ṭha thuthup kan phuansuah theinak dingah ka hrangah thla i camsak uh
a ti. Pathianah cun thuthup a um lo nan kanmah minung in Bible casung ih ngan cia mi kan theih banlo mi thuthup tampi a um cumi cu thlacam ih Amah kotupawl hnenah Pathian in a phuangsuak ṭheu.{Jer.33:3}.
4.Thlacamnak cun lungawinak le hnangamnak thar mi a pe ṭheu{Phi.4:4-7}
            Zumtu pawl cu thinhar le beidong ih kan um lai khal ah van kan Pa'i hmaiih thla kan cam taktak ah cun lungawinak thar le hnangamnak thar kan nei ṭheu.Kan phurit khal a hlo ṭheu a si{1Pet.5:7,Ps.50:156}.
5.Thlacamnak cun Pathian in nel ter deuhdeuh.
           Minung khal be dahlo le kawm aw dahlo in nelawk a theihlo. Pathian khal a fa le Amah kawm tam tu pohpoh le Amah be tam tu pohpoh thawn an nel aw a si. Pathian neltu si hi a sunglawi bik.{Rom.8;15-16,Mk.14:34}.
6.Thlacamnak cun nehnak in co ter.
            Thlacam dahlo zumtu pawl in nehnak nun a tak in an co theilo.A ngaingai ahcun ziangvek thlemnak le harsatnak khal hi thlacamnak taktak ah cun neh theilo mi a um lo.{Matt.26:41,Jam.4:7}.
7.Thlacamnak cun Pathian a cangvai ter.
            Zumtu'i thlacamnak cun mangbangza in Pathian a cangvai ter thei a si.Pathian cu kan ai ih ropi asi ruangah kannih in thu kan pe{command}theilo. Asinan thlacamnak in kan cangvai ter thei asi.{Isai.62:7-8,Joshua.10:12-14}.
            Curuangah thlacam hi a hlawk bik mi a si.Nehnak a si ih lungawinak khal a si. Kan sun zo mi {kan hloh zo mi}hman ngahsal thei nak lamzin a si.Pathian duhnak theih theinak lamzin a si.

Siartu zate Pathian in thlaw lo suah hramseh.

Evan.David Ceu
{Ceu family}
Tahan

.........................

Hminsin: Thlacawm ih hlawknak sunglawi zet in hlawmtu Saya David Ceute ih tlunah lungawinak ka tarlang.

David Ih Hlawhtlinnak Thuthup

Bible Sirhsan: 2 Sam.5:10;1Sans.12:22-23

1.Pathian thu a rawn ṭheu.

1Sam.23:2, 2.Sam.5:19.23 Filistin pawl ka do kem?.

1Sam.30:8.9 Ral ka do kem?.

2Sam 2:1 Juda ramah ka feh kem?. David cun a tuah ding mi ah ama’i duh dandanin cangvai mai lo in Pathian thu a rawn ta.A rawn lawng si lo in Pathian ih a sim vekin a tuah.Cucu a hlawhtlinnak pakhat cu a si.

2.Sualsir nun a nei.  2Sam.12:13 Bawipai hmaiah ka sual zo. 2Sam.24:10 Ka sualnak i ngaidam aw.

2Sam.24:17 A mawhtu cu keimah ka si.  David cun a sualnak a hmuhsuah lawng si lo in a sual mi ah a siraw ih a tuah sal nawn lo.Cucu a hlawhtlinnak a si.

3.Pathian kutcak a hngak thei.

          1Sam.16:13 Siangpahrang dingih hriakthih a si.

          2Sam 2:11 Hebron in Juda pawl a uk.

          2Sam.5:3 Isarel Siangpahrang ah an tuah. David cun Siangpahrangah hriakthih ka si pam ti in a tik cut lo khalah hmanhmawh zetin a cangvai mai lo. Pathian remtinak leh kutcak a hngak thei. Cucu a hlawhtlinnak a si. Hi David ih hlawhtlinnak thu hmangin kan mah te zoh aw in Pathian ah kan nun rem ding a um mi rem uh si.

Pathian in a thu kan zate hrangah mal in sawmsak hram seh.

Evan.  Lal Eng Lian

Tahan

...................

Hminsin: David nunih si hlawhtlinnak thuthup pawl in hlawmtu Saya Eng hnenah lungawinak nasa ngaingai ka nei.

Pathian Neih Ih Thlawsuah

Bible Sirhsan:  Sam 33:12; 144:15

Pa Pathian… Pathian ih neih hi ziangruangah thlawsuah co an si cuang tile?

1.Ziangtik khalih siatthei lo le hlo thei lo Pathian an neih hi thlawsuah an conak a si.

          Leitlun thilri neih hi a ṭha lo cu a si lo.Lungawinak ziang maw ti zat cu a um. Asinan hlothei mai an si ruangah lungawinak hnakin thinbangnak a tam sawn. Pathian neih cu hlothei lo a si ruangah thinnawmnak hlir a si. Cucu thlawsuah co an si nak cu a si.

2.Kaa ih simthiam lomi lungawinak an nei.1Pt.1:8

          Hi lungawinak hi van tiangih kan kenluh ding mi a si. Hi lungawinak hi Pathian neilotu cun an neih lo. Leitlunah lian hnenhnen khal haisehla Pathian an neih lo cun kaa ih rel thiam thei lo mi lungawinak cu an nei lo. Hi tluk lungawinak neitu cu mi thlawsuak an si ko lo sawm.Unau Pathianhi Pathian ah na nei ngaingai maw?.Thi awla vanram na kai kem?. Pathian neih lo cun leitlun hi ṭihnung a si ho khaw.

Pathian in a thu thlawsuah in peksak hram seh!

Evan Lal Eng Lian

Tahan

.......................

Hminsin: Sermon sunglawi zet in hlawmtu Saya Eng tlunah lungawinak ka tarlang.

Nun Diriamnak Tak

Leitlun minung hmuahhmuah ih hawl mi le hâl zet mi cu nun diremnak hi a si. Asinan a pawi zet mi cu minung in nun ih diremnak hi a um nak ah hawl lo in a um lo nak sawn ih a hawl tik ah a tawng ngah thei lo ih a nun a buai deuhdeuh men. Cui minung in a hawl rero mi le a hal zet mi nun diremnak cu khui hmun dang khalah a um lo a sersiamtu pa thawi tawnawk ngah nak lawngah a um a si. Curuangah Zisu in, "Zokhal hi tî a in tu cu an tî a hâlsal leh ding, asinan ka pek mi tî a in tu cu an tî a halsal nawn lo ding a ti"{John.4:13-14}. Asi le cui nun diremnak cu khuiah a um......?
1. Jesu Khrih tawnngah lawngah
Sersiam mi ramsapawl cu an pum khawp ei le in ding an hmuh cun an hna a ngam {an di ariam}men ziang an ruat nawn lo. Asinan minung cu ziang tluk in a taksa ṭul mi ei le in,inn le lo le thil dangdang a neih hman ah a nun sungril taktak cu a di a riam mai lo. Ziangah ti le minung cu a sersiamtu le a rundamtu pa thawi an tawnawk ngahnak lawnglawng ah nun diremnak a neithei a si{Lk.1:45-46}. Leitlun thil hin reilo te sung nawmnak cu mi a pe thei ve ko nan sunglam nun diremnak taktak cu Khrih tonngah nak lawngah a um a si.{Job.20:5-7;Ps.73:25- 28;John.4:13-14}.Mi in a nun ih Jesu khrih a tonngah taktak cun a nun di a riam, a nun a kim,nunman neibik a si zia a thei fiang a si. Curuangah minung nun nak ih lungawinakim,hnangamnak kim le diremnak kim cu rundamtu Jesu neitu lawng in kan co ngah asi.

2. A thutak sungih nun {tlanglen}

Jesu Khrih kan neih tikah kan nun di a riam zet. Asinan nitin kan nunnakah a thutak vekih kan
nun sinsin cun kan nun di a riam sinsin. Minung cu kan damtikah,kan neihnun tikah,duhdawtu ṭha kan neih tikah, kan hnaṭuan kan hlawhtlin tikah ka lung a awi ṭheu...Asinan Pathian cu a fa le parih a lungawi bik can cu "ATHUTAK' sung ih kan tlanlen tikah asi...."Ka fa le thutakah an tlangleng {an um}ti ka theih ih liamah lungawinak dang hrimhrim ka nei lo  a ti"{3John.4}.Curuangah unau pianthar lawng a tawklo Pathian thutak sung ih tlanlen hi nun diremnak a si. Na pianthar hnu khal ah Pathian thulo vekih na nun le na nun di a riam cuang lo ding...."Run inn dawh sung ih um hna a ngam cuanglo thutak sung ih um lawng hi hnangamnak{diremnak}"a si.
3.Theitawk te’i Bawipa’i hnaṭuan

Pathian in zumtu pawl hi mah le tlintawk tei a rawngbawl dingah in ko. Pathian ih a lo fialmi na
ṭuan ngah lawngah na di a riam ding,"I fialtu'i duh zawng ti le a hnaṭuan ṭheh hi ka rawl a si”{John.4:34}. Joshua cun, "Kei le ka innsang cun Bawipa'i hna lawng kan ṭuan ding"a ti.{Joshua.24:15}.Aw...zumtu na tlin tawk ten Bawipa'i hrangah hmang aw hman..na nun di a riam ding. Bawipa'i hrang ih a hmang aw tu an sir aw dahlo...Bawipa'i hrangah na ṭuan rero zo nan na nun di a riam cuanglo a si ah cun na ṭuan dan ah a fello mi a um a si ding...Saam cangan tu cun, "Lungawi zet{diriamzet} in Bawipa cu rian uh"{Ps.100:2}a ti a si. Bawipa'i hnaṭuan cu harsatnak tam hman sehla nun diriam ter tu a si.
4.Midang hrangih nun hman

 Zumtu nun cu mai ṭanghmasial nun si lo in midang hrang ih nun a si. Zumtu si cing ih mihuat mi{mi ngaih dam theilo mi} nei ringring tivek,mi rem lo mi nei ringring tivek le midang hrang ih zianghman siang dah lo tivek nun a hahdam thei lo.Bawipa’i hrang le midang hrangah nung hman..na nun hi a nini in na di a riam ding.Ama’i san lai ih leitlun ih milian bik a si mi..John D.Rock Feller cun "Ka neih mi sum le pai le thil le ri hnak in midang hrang ih ka hman mi in ka nun di a riam ter sawn" a ti. Ka neih mi mifarah le rethei hrang ih ka hman ve ten min in that pang kei maw or Damiah in ṭaih pang kei maw ti ka phannak hmuahhmuah a hlo theh ih
hnangam ten ka um thei thlang a ti..Unau mi harsa voi ziat na bawm zo? Miretheipawl na kiangah an hna angam maw?Midang hrang ih nun hi milai dan ah cun sungvek kan bang nan kan nun sungril a hahdam in di a riam a si.Zumtu ziangvek khal ih tirhfak tuk rengreng an nun a hlim
taktak thei lo. Bible in, "mi tirhsiang nunnak cu thau ter in a um ding"{Thufim.11:25-26}a ti.

Pathian in siartu nan za ten thlawsuah lo pe hramseh.
Evan.David Ceu{saya ceu te}
Tahan

.............................

Hminsin: Pathian thu ropi zet in hlawmtu Saya David Ceute hnenah ka lungawinak ka tarlang.

Tlanzuamawknak Ih Ṭulmi

Tlanzuamawknak kan titikah Thlarau lam thu a si.Zumtu pakhat kan si cun thlarau lam tlan zuamawknak ah kan tel tinak a si.Cui Thlarau lam tlan zuamawknak ih a tel tu’i hrangah a tuah tengteng ding mi tampi a um dingih cu mi lakah mal lai in kan zoh tlang hnik ding.

1.Tlannak dawn khamtu hlih thlak.

Thlaraulam tlan zuamawknak ih a tel tu cun a tlannak cak lo ko a tuah tu pohpoh cu a hlih duh a ṭul.Ziang bik ha cak lo ko a lo tuah tu? Nangmah ten zoh aw la cucu na duh zet mi a sikhal le hlit siang aw. Na tlannakah cak lo ko a lo tuah tu cu ziang si Kuak,Kuva,Zu,Sumpai,hminthan duhnak,theibik si duhnak,Hngalnak,Thuphan relnak, pawl an si maw? Hlit mai uh si. Cu ti lo cun na tlan cak thei o ding. Kol.3:8

2.Tuar fainak.

Tlan zuamawknak ih a teltu cun ziangkimah a tuar fai a ṭul.Harsatnak,Relsiatnak,Hmuhsuamnak,Hnawlnak,Farahnak ziangkim hi a tuar paih a ṭulih a tuar fai khal a ṭul. Tuarfainak um lo cun tlan zuamawknakah cun a tel taktak theih lo tluk a si (Heb.10:36;Rom 12:12;1Kor.9:12).Tuarfai a ṭul.

3.Taimaknak.

Tlanzuamawknak ih a teltu cun taimak zetih a tlan paih a ṭul.Tlan sa tliah tlan menmen a ngah lo. Ṭuan hruthro a ṭul. Mi tampi cun minungih taimak suah hi zianghman a si lo an ti.Bible cun minungih taimak kansuah in fial cu miah kan taimaknak lawng si lo in Thlarau Thianghlim rinsan in kan taima ding a si.Thlarau Thianghlim in in taimak ter si lo in kan taimaknakah Thlarau thianghlim kan rinsan ding a si sawn.Cu lawngah Thlarau Thianghlim a cangvai ṭheu a si (Apos.20:34;2Tim.2:6). Taimak a ṭul.

4.Hmuitin mi neih.

Tlanzuamawknak ih a teltu cun a tlannak ah hmuitin mi a neih rori a ṭul.Mai duhduh ih tlan ruri men cu thil cangthei a si lo.Mai duhzawng ih tlan menmen khal a cangthei lo.Hmuitin mi a neih a ṭul( 2Kor.9:26;Fil.3:14)

Siartu zaten Pathian in lo thlawsuah hramseh.

 Evan.Lal Eng Lian

Tahan

.............................

Hminsin: Hi Sermon sunglawi zet in hlawmtu Saya Eng tlunah ka lungawinak ka tarlang.

Pathian Kan Pek Ding Mi

Sam cangantu cun, “ Ka parih a ṭhatnak ruangah hin Bawipa cu ziang so ka pek ve ding?” (Sam 116:12) ti ah a ti. Kan nih teh Pathian kan parih a ṭhat tuk ruangah hin ziang so kan pek ve ding?.Pathian kan pek ding mi hi tampi a um ding nan mal lai in kan zoh hik ding.

1.Kan thinlung.

            Thuf. 23:26 cun hitin, “ Ka fapa na thinlung i pe aw” tin  a ti. Kan thinlung hi a ṭhat lonak tampi Bible hin a rel ih a sinan kan thinlung a duhnak a ngan lala.Curuangah kan thinlung hi Pathian in a duhih kan pek a ṭul.Thinlungih khat mi cu kaa in a suak a ti bangin kan thinlung bik Pathian kan pek ah cun a hungsuak ding mi cu a phundang ko ding.Kan ram zumtu mitampi in Maw Bawipa ka thinlung ka lo pe ti ih hlanaw kan mal zet. Kan thinlung bik Pathian in a neih ah cun kan taksa cu a cia tluk a si mai.Curuangah kan thinlng hi Pathian pe uh si.

         1Sam.16:7 khalah Pathian in thinlung a zoh ti mi kan hmu thei .David kha Isarel Siangpahrang ṭuan dingah Pathian in a thinlung a zoh ih a duh.Khatlam zawngin a thinlung ruangah Pathian in Siangpahrang dingah a hril kan ti thei.

         1Sans.29:17 ah cun Pathian in thinlung a hniksak ti mi kan hmu sal.  Kan thinlung hi a thupi zet mi a si ruangah Pathian in a duh.Kan thinlung Pathian pe lo pi ih Pathian thu kan au rero hi cu ziangkim theitu Pathian ih lungawi zawng a si lo riai ding.Kan thinlung Pathian kan pe kei uh.

2.Kan taksak

            Rom 12:1 cun, “ Curuangah ka u le ka nau tla Pathian lainatnak ruangah nan taksaruangpum tla cu Pathian hnenah a nungih raithawi mi vekin le thianghlim le Pathian lungawi ter ih hlan dingah ka lo fawrh a si. Cumi cu nan ti ding awm hrimhrim a si” ti ah a ti. Zumtu pawlin kan thinlung kan pek lawng si lo in kan taksa khal Pathian kan pek a ṭul.Kan taksa hi Pathian in nei seh.Hitawk Rom 12 ah hicun thi ih thawiawknak si lo in nungih thawiawknak a si a rel.Nungih thawiawk ti cu Pathian in a duhduh ih a hman dingah tinak a si.Rom 6:13 ah Nan taksa peng pawl cu dingfel lonak ah pe lo in dingfelnak hrangah pe sawn uh a ti.

       1Kor.6:20  cun, “ Nan taksa in Pathian sunlawih uh” tin in fawrh sal.Pathian hnenih pek mi taksa cun Pathian a sunlawih a si cu.Kan taksa Pathian hnenih kan pek cun kan ceiawk dan tiangin kan mai duhduh ih cei awk ciamco tla ṭha kan ti nawn lo mai ding.A mawi tawk te in kan ti ko ding.Kan taksa Pathian hnenah pe uh si. A duh dandanih a hman dingah.

3.Malsawm kan dawn mi.

            Malakia.3:8-9  cun hitin, “ Kei khalin ka lo sut ve hnik pei.Mi pakhat in Pathian ta fir hi a dik nan ti maw?A dik lo ti cu zapi theih a si.A sinain nannih cun nan fir thotho.Ziangtin so kan lo fir tiah nan sut hrih.Thenhra ṭhenkhai leh thawhhlawm nan pek lo tikah nan fir a si.Nan zate parah siatcamnak a thleng.Ziangahtile nan miphunpi in ka ta nan fir ruangah a si” Cang 10 “Biakinn ah nan ṭhenhra ṭhenkhat cu kim ten rak keng uhla rawl tampi a um ding.In hniksak hnik uh vancung sangka pawl ka awng dingih nan hrangah thilṭha a phunphun ka run burh ding” ti ah a ti. Zumtu in kan thinlung,kan taksa lawng si lo in malsawm kan dawn mi pawl hi Pathian hnenah kan pek a ṭul.Cucu Pathian ih duh zawng a si.Pathian in malsawmnak a phunphun in pe ih cucu a mai hnenih pek sal kan siang nawn ṭheu lo hi kan ti sual a si.Malsawm kan dawn mi Pathian kan pek hi a mah kan duhdawtnak le kan sunlawihnak a si ve.

            Thuf.3:9.10  cun, “ Tangka in Pathian sunlawih uh” tin in sim. Cun Thuf.11:24-25 khal in hitin, “ Siangzet in pe aw lennak a si” ti ah in sim bet thotho. Ziang a si hmanah Pathian ih kanmah ih duh mi a neih mi cu kan pek rori a ṭul.Thusimtu pakhat cun hi tin a sim.Pathian hnenah cun kan sianmi lawng pek ding a si lo kan sianglo mi tiang in pek ding a si a ti. Ṭhimnakah cawlhni thawhhlawm ah $2 Ks 100 Rm2 lawnglawng hi kan pek siantawk a si a bang.Kan sian tuk lo mi pek khal cu a ṭhatnak a um ngai ding. Zawngsangnak ah.

     Pathian in kan hrangah ziangkim a sian vekin kan nih khal Pathian hrangah cun siang uh si.A mah in ṭul a ti cun ziangkim a nei.In pe bet vivo thei ho khaw.Kan thinlung,Kan taksa,Malsawm kan dawn mi pawl hi Pathian pe uh si.A duh dandan in hmang seh.

Pathian in a thu kan zate hrangah mal in sawmsak hram seh.

Evan. Lal Eng Lian

Tahan

 ..................

Hminsin: A sermon sunglawi zet in hlawmtu saya Eng tlunah ka lungawinak ka tarlang

THLARAU RAWL: Zumtu In Buainak Kan Tawnnak San

THLARAU RAWL: Zumtu In Buainak Kan Tawnnak San: "1.Thlarau lamih kan ihthah ruangah ( Efe.5:14; 1 Thes.5:6-8)

Thlarau lamih it that..."

Bawipa Ih Lungawinak Rah

Bible Sirhsan: Fil. 3:1; 4:4; 1 Thes. 5:16

Zumtu kanmah le bulpak ciar zohsal tikah Pathian ih lam in hruainak pawl ruangah Pathian ah lungawi lo awk ṭha a si lo. Hairah cu haikung parih a lang bangin Pathian ih lungawinak rah cu a lungawitu zumtu ih parah a lang.

1.  An Cak(Neh.8:10) 

 Bawipa ih lungawinak a neitu cu thlarau lamah an cak. Lungawinak nei lo tu cu thazang nei lo in an cau sialsial.

             Heb.11:33.34  Zumnakin ram an la.

             Isai.62:7  Pathian an cangvai ter. Bawipa ih lungawinak a neitu cun Pathian an cangvai ter mai.Thlarau lamih micak pawlhin ram an la.Thlarau lamih cak ding cun Pathian ih lungawinak neih a ṭul.

2. Pathian an vuivai lo (Habakuk 3:17.18)

 Bawipa ih lungawinak neitu cun Pathian an vuivai dah lo. An lungawinakin a neh ruangah. Pathian na vuivai a si ah cun Pathian ah lungawinak na nei mal tinak a si.

             Mt.11:6 Keimah ih phunzai lo cu mi vanṭha a si.

             Fil.4:11.12 Ziangvek khalah lungawi ka thiam.

            ,Job.1:21.22 Job cun a parih harsatnak maksak a thlen tikah Pathian a mawhthluk lo.Vuivainak a nei lo.Zumtu kan vuivai ringring ṭheunak hi cu Pathian ih kan lungawinak a mal tuk ruangah a si ko.

3.  An tirh a siang (2.Kor.8:2.3)

Masidonia pengih Kawhhran pawl cu Pathian ih an lungawinak anatsat tuk ruangah an tirh a siang. An pek thei hnakih tlun tiang pek duhnak an nei. Zumtu Pathian leh a ram hrangih kan tirh a sian thei lonak cu Pathian ih kan lungawinak a mal tuk ti nak a si. Pathian ih lungawinak a neitu pawl cu an tirh a siang ngaingai.

             Thuf.3:9 Na sumin Pathian cawimawi aw.

             Thuf.11:24.25 Mi tirhsiang pawl an lian deuhdeuh. Thildangih tirhsiang si lo in Pathian leh a ram hrangih tirhsiang a relnak a si.

            Zumtu na nunnak cekaw hnikaw Pathian ah na lungawi dan ziangvek ha a si.Taksa danih nunnawm deuh ah cun lungawi tla a awl men thei.Hmunnuamih um tikah cun lungawi tla a awl men thei.Ziangvek dinhmun thlen khalih Pathian ih lungawinak neih hi cun rahṭha leh mawi zet a rah suak a si.Cucu Pathian leh zumlo tu pawl khalin hmuh an duh ṭheu.

Siartu nan zaten Pathian in lo thlawsuah hram she.

Evan Lal Eng Lian

Tahan

.....................

Hminsin: Hi sermon ropi zet in hlawmtu Saya Eng hnenah ka lungawinak ka tarlang.

Mawsi Nun Hmangih Thazang ngahnak

Bible Sirhsan: Heb.11:24-27

1.Mawsi cun Faraw ih fanu ih fapa tiih kawh ding cu a el. Mawsi ih a el mi hi ruah ciamciam lem lo ah cun umzia nei lemlo tla a bang. Asinan a el mi hi taksa danih thil sunglawi leh nawmnak,ropitnak maksak pawl an si.Siangpahrang inn ah um hmansehla asinak vekih si a duh, a ngam. Curuangah hihi a elnak a si. Zumtu pawl taksa danih sunlawinak,ropitnak,nawmsinnak pawl hi Pathian ruangah kan el ngam ve kem. Kansinak ciah Pathian fate si hi kan ngam a si ah cun Mawsi bangin el ding kan neih a ṭul a si cu.

 

2.Pathian mipawl thawi tiduhdah tuar cu a hril sawn.

          Mawsi hin hrilmi mak tak a nei.Faraw inn pi sungih nuam hngualhnoih um hnakin Pathian mipawl thawi tiduhdah tuar a hril sawn.Tulai zumtu pawl hnenih Setan hnaṭuan maksak zet cu nawmsin duhnak neih hi a si. A sual ciamco lo ding nan Pathian mipawl thawi tiduhdah tuar paih lonak a thlenah cun a sual ko e. Mawsi bangin hril ding kan nei a si cu. Pathian mipawl thawi tiduhdah na hrilah cun taksa nawmcennak pawl cu na dungtun a ṭul a si. Zumtu kan hril ve kem.

3.Khrih ruangih hmuhsuamnak cu lennak ropi ah a ruat.

Mawsi ih lennak ih a ruah mi hi danglam tak a si. Zumtu tampi cun Khrih ruangih hmuhsuamnak  tawn le tuar hi kan duh lo zet mi a si. Mawsi cun lennak ah a ruat thei e. Kan mai sual le ṭhat lo ruangah si lo ih Khrih ruangih hmuhsuamnak tuar hi cu leh hnuih kan len nak ding cu a si hrinmhrim ko. Lennak danglam hi duh ve uh si.

4.Siangpahrang thinhengnak a tih lo.Izip ram a tansan vurvo.

          Izip ram suahsan mai hi Siangpahrangih thinhnengnak khal cu a si ko. Cuihleiah a duh lo zawng tuah hi Mawsi cun pawi a ti lo. Zumtu pawl Izip ram hi suahsan ngam uh si. Siangpahrang cu thinheng ko seh. Izip suahsan lawngah zalen zetin Pathian kan rian thei ding. Mawsi ih nun mawi zet hi zumtu pawl in thazang kan laknak ah hmang cio uh si.

Hihi siaraw la Thlacamnak thawn Nangmah le nangmah thusut aw aw.

Pathian in lo thlawsuah hramseh!

EvanLal Eng Lian

Tahan

................

Hminsin: A sermon sunglawizet in hlawmtu Saya Eng tlunah nasa ngaingai lungawinak ka nei.

Zumtu In Buainak Kan Tawnnak San

1.Thlarau lamih kan ihthah ruangah ( Efe.5:14; 1 Thes.5:6-8)

Thlarau lamih it that cu mi piangthar lo pawl si lo in mi piangthar mai nun dan ding vekih nung lo pawl hi an si. Zumtu mi tampi cu kan nun dan ding tlansanih mai duhduh ih ṭawng, thuphuah,cangvai mai kan tam vivo. Hi vek pawlhi thlarau lamih itthat cu an si. Zumtu kan itthat ruangah buainak kan tawng theu.

      Bible sungih mi itthat pawl:

      -Abraham (Sem.15:12) Buainak a tawng. A cithlah pawl salah an tang.

      -Nu pakhat (1 SPH.3:20) Buainak a tawng. A fa nung, fa thi in an thlengsak.

      -Zutikhas (Apos.20:9 ) Buainak a tawng. Inn parin a tla that lawk.

Zumtu pawl Thlarau lamih kan ihthah ve ten a phunphun buainak cu kan tawng cupco.Nang itthat tu tho aw.Buainakin na kiangin a lo bawh e.

2. Kiangkap kan zoh ruangah(Heb.12:2)

Kiangkap zoh titikah zoh lo ih mitsin ringring ding tinak a si lo. Pathian hnakih thupi ih ret sawn, mi ih neih vek, sivek si ve ta rori tumnak pawl hi kiangkap zoh kan ti cu a si.

            Kiangkap zohtu:

            -Peter(Mt.14:29.30) Buainak a tawng.Tisuar pawl a zoh cun a ṭihih a pil ruangro.

            Zumtu kan sim zo bangin mai sinak tawkah lungawi hnathiam hi tum uh si.Cu lo cun kiangkap zoh ruangah a phunphun in buainak a ra suak cupco ding. A ṭul lem loih buainak tawn rero hi a ṭha lo.

3. Pathian thu kan el ruangah. 

Pathian thu el ti cu Pathian ih duhnak kan thei, in fialmi kan thei cu cingih mai duhnakih cangvaih vivo thotho hi a si.

            Pathian thu eltu:

            -Jonah(1:3-4) Buainak a tawng. An lawng tisuarin a nuai ciamco. Amai ruangah mi dang pawl khalin an buai phah thluh.

             -Saul Siangpahrang (1 Sam.15:3,20-21) Buainak a tawng. Khawsia in a luh hnawh(1 Sam.16:23;18:10;19:9)

            -Samson (Thut.13:5;16:19) Buainak a tawng. A ral pawlih hmuhsuam,zawkzet. Nautatnak a tawng ciamco.

            Zumtu in Pathian thu kan el cun a phunphun buainak in in pan mai. Nangmahte zoh aw inthu sut aw hnik aw. Pathian thu elih na cangvaih cun rei lo te sung cu tluang zetin um khal aw la buainak cu na tawng mai thotho ding. A rei lo ding. Zumtu pawlin buainak hi kanmah inkan hawlsuak ṭheu a si ko e.

4.Leitlun thil kan duhtuk ruangah.   

Minung kansi cun leitlun thilhi ṭul lo le duh lo kan um lo. Kan sim duh mi cu lei tlun thil duh tuk ruangih Pathian thu tlansan mai.Pathian in ṭul a tile i pe ko ding ti lo ih neih ve ngah ve si ve duh tuknak thawi cangvaih mainak hi a si kan sim duh mi cu.

            Leitlun thil ngainatupawl:

            -Lot (Sem.19:16). Buainak a tawng. A neihmi le a nupi tiang in a sun phah.

            -Balaam (Mip.22:22-28,Daan.23:4 1Pt.2:15).  Buainak a tawng ciamco.

            -Gehazi ( 2 SPH.5:21-27) Buainak a tawng.

            Zumtu pawlin buainak kan tawn mi tam sawn hi cu kan mai ruangah a si. Lei tlun famkim lonak ramih kan um sungah cun buainak thawn kan ṭhenaw thei lo nan vawi tampi buainak kan tawn hi cu kan mai mummal lo ruangah a si ṭheu. Zumtu Pathian ah tlulut ringring uh si.

Pathian in a thu kan zate hrangah malsawmnak in peksak hramseh.

Evan. Lal Eng Lian

Tahan

.....................

Hminsin: A sermon nungzet in hlawmtu Saya Eng hnenah lungawinak ka tarlang.