Awle, Hlawhtling cingih hlawhsam tivek
thil ngelcel teh cu thil um kel teh a si pei maw? Ziangtin cui thu cu kan
simfiang thei ding? Unau hnihte Ashley
le anau Libba hi a liamca kum ziangmaw
zatah khan Portland, Oregon ah an um. Unau hnihte lawng an si ruangah an duhdaw
aw zet. An unau hnih in an hmel a ṭhat tuk ruangah a Ashley tla cu model lam
a paih zet. Cutin, an hawng tleirawl in hmunpi ah an unau in in an sang. Anau-Libba
sawn cu a lengah hna a ṭuan, cule a usawn-Ashley kha model lam ṭuan
tumtu a si tikah cutin hnaṭuan ngutngat lo in mawinak thawi sumpai
lakluh lam kha a tum. Cutin, zanih nawmnak hmun ( night club) ah lamtu ah hna a
ṭuan
ih cutin, a naunu-Libba thawn an mil aw tuk lo. Areicun, a nundan thlahdah awk
ruangah a nau ih hnenah tla tlung nawn lo in a
lengah a riak phahphah. A hawng rei deuh cun a nau ih hnen ihsin a tlan
ih cutin zu le sa, sitham pawl hnenah a thleng. In a tlun nawn lo tikah a nau
nu in a ngaihtuah tuk ih a zingzawi ringring. Nan, a thuhla a thei thei nawn
lo. Cuti a um laiah a unu cu nunau thalo pawl ih zuarawknak ah tlung thei nawn
lo in misual pawl in an thup bet ih cutin, a naunu in cui hmun ihta runsuak dingah
a ti theinak hmuahhmuah suah in a sun a zan a bei. 
A naunu cu fala mawizet a si ruangah
duhdawttu tlangval felzet David a nei. Cutin, hringtu a nu le pa, le a tlangval
pa thawn theitawp an suah. Asinan, tum vekin thil a cang lo. A unu Ashley cu
misual pawlin nasa ngaingai in a hrengbet, suak thei nawn lo in si le vai thawi
an kham tikah a thi maw a dam ti khal an thei lo. Nan, a naunu cun ka hmuhsuah
lai hlan lo ka tawp lo ding a ti. Kum le thla a hawng rei cun, hmasawnnak dang
a um lo tikah a nu le pa in tawpsan ding ah an ti. Cun, khatlamah a tlangval pa
khal in kan nei aw kei thildang kan ṭuan ke tin a ti ve. A tlangvalpa David
thaw cun an nei aw ih cutin an um tlang. Asinan, a unu a seherhnak cu a reh
thei lo ruangah a sun a zan in cui thuhla hlir a ruat. Apasal ih hnaṭuan
khal a umpi man in a tuamhlawm man lo. Anu le pa in len tawpsan aw ti an ti
leuhleuh tikah a mang a bang. Ka tawpsan thei lo a ti ruangah a nu le pai hnen
lungawi nawn lo in cutin , a nu le pa thawn an ṭhen ṭhek aw. Cun, a tlangval pa khal in
tawpsan dingih a ngen rero cingin a tawpsan duh lo ruangah, a pasal khalin tuar
nawn lo in a suahsan. Cun, mi hrekkhat in le na unu cu a thizo tin an ti
leuhleuh. Asinan, Libba cun tawpsan
duhlo in amah ten cutin a hna a sun zawm. A tawp a tawp ah cun Ashley , a unu
cu raipuar thlathum naukeng pumpuar cia nawn than an hlawn ih cumi cu a sar suak ih cutin a hruaikir. Cule, cuisi thawk in anau nu lawng si lo
mitampi khal unu vek ih hrem le hmuhsuam tuar an um ti a thei suak ih cutin, mihlo
pawl ahleceiin nauhak ngaihsaktu nei lo pawl cawmnak a dinsuak ih cutin cu hmun
ah hna a tuan. Asinan, a naunu cu fa a
neih thluh ah a umnak hmun ah kirsal in cutin a thih tiangah ziangtin a khawsa
vivo theih lohin a um.
Hi thuanthu nung hi kan ruah tikah
hlawhtling cingih hlawhsam timi kan thulu kan hmu thei. A naunu in a unu-Ashley a hawlsuahnak ding hrangah a thi le
thazang, a fimnak zate, a tik le cu can,
sum le pai tampi cemin hna a ṭuan. Cule, a tawp atawp ah cun a
hlawhting in a naunu a sarsuak. Asinan, khatlamah kan zoh vesal a silen hringtu
a nu le pa le a pasal duhdawtmi-David a hloh in a can thung. Ziangtin Libba ih hnaṭuannak
hi na rel ding? A hlawhtling na ti ding maw a hlawhsam na ti ding? Keicun a
hlawhtlin dan hi a hrek tiang lawng a
thleng a si in ka thei. A hlawhsam kan ti ding len a hlawhtling ve fawn.
Curuangah, hlawhtling cingih hlawhsam kan ti mi cu hi ciah hi a si.
Kan ram ih Christian tampi le leitlun ih
innsang tampi cu hi thuanthu nung vek ciah hi kan si. Pastor le a innsang
thuthawi pehpar aw in hawn rel sela, a lenglam ih kan hnaṭuan-
camping, crusade le cangvaihnak tampi ah cun kan hlawhting tin min in ti. Kan
thusim nak zarah hmu aw suak le piangthar khal ziangmaw zat an um. Asinan, cumi
lakih riahsiatza zet innsang hrekkhat ih
a thleng mi cu kan innsang kan hloh ṭheu hi a si. Lenglam le cangvaihnak ah
kan can le tikcu kan hmantam tuk tikah, kan innsang- Pathian ih in pekmi, kan
rawngbawlnak ding hmaisabik a si mi kan ngaihthah in kan innsang nupa karlakah
siseh, fale karlakah siseh hmuhthiamawk lonak, buainak le ṭhenṭhekawknak
tiang a thleng phah ṭheu. Curuangah, rawngbawltu pawl kan hrangih a
thupi zet mi cu a lenglam cangvaihnak le rawngbawlnak ah mai innsang le fanau
pawl hngilh khawpkhawp in kan hmang aw pang maw ti hi a si? Tlawng a kaitu le
company a neitu pawl hrangah khal kan degree sangsang le mak taktak Doctor
degree le upatnak tampi khal ngah hman nungla, kan rawngbawlnak hmaisabik-
innsang kan hloh a si ah cun kan thlawhtlin dan a zik tluang cuang lo tinak a
si. Tongdang in ka rel asilen kan hlawhtling si hlawhsam a si.
Bible
kan zoh asilen Jephthah ih thuhla ( Judges 11) ah kan hmu thei. A raldonak ah a
hlawhtling. Tluangten a hawng tlung ih mipi in an hmuak in an hlir. Asinan, a ṭongkam
ralrin lo ruangah a innsangah cun a
sungta riai. Mipi ih upat le ngaisan, hlir le lawm cu a hlawh ko nan, a duhdawt
zetmi a fanu a can ta riai aw! Lenglamah
mipi an au an zuan rero laiah ṭahnak mithli thawn a innsang a khat. Ziangkim
kan tinakah a bukaw tawk te ih ke kan kar thiam hi a thupi tuk. Innsang nei kan
silen Pathian kehram ih kan fa le innsang kimtei hlan le hruai ringring hi kan
hna tumbik a si. Lenglam hlawhtlinnak ziangvek tum khal kan khum a si hmanah
Pathian ih in pekmi kan innsangah kan hlawhsam a si ah cun “ Hlawhtling cingih
hlawhsam” kan si thotho ding. Na innsang
le pumpak nunnakah hlawhtling ngaingai tu maw nasi, hlawhtling cing ih
hlawhsam- hlawhtlinnak kebai lawng thleng? Hlawhtlinnak tak kan thlen cio
theinak diangah Pathian in siartu zate in bawm hram seh.
No comments:
Post a Comment