Duhdawtnak Tello Cun

Minung hi khat le khat pehtlaih aw, pehzawm aw ding ih sersiam kan si. Midang tello in kan nung thei lo vekin kan tello in midang khal an nung thei ce l. Cuti a si ruangah, kan tuahmi, kan ṭuanmi le cangvaihnak  hmuahhmuah khal hi Pathian sunlawinak le midang tungdinnak ih hmangsuak ding le cuimi hrangih dinsuah kan si ( Ephesi. 2: 10).

Aliamcia kum ziangmaw tizatah khan vawikhat cu mi pakhat thawn Pathian thu ah kan rak el aw ciam co. Anih khal a thiam le ti theinak hmuahhmuah sawmkhawm in a thuhram ṭan cun ṭan a khawh ve. Keikhal ka Pathian thu zirmi le theihmi pawl sawmkhawm ve in cutin debate phun in Pathian thu kan el aw aw. Kan pahnih ve ve ih rak ruahdan le tumtah ah cun thu ṭha hlawm aw ding le Pathian thudik sawn khihhmuh awk ding kha a si. Asinan, kan rel vivo…cutin, kan awkam a sang, kan hmuhdan le thlirdan khal a bang aw lo zet. A tawp a tawp ah cun ṭongthei deuh le zir deuh na nana cu ka neh deuh tin ka ruat. A ṭongding a cem ih anhai deuh le ningzak deuh nawn khin a um. Thiam ka ti aw in ka di a riam khawp mai.  Ka neh riai e tin ka ruat aw aw.

Cutin, kum ziangmaw tizat a hawng rei cun ka neh ka ti mi kha ka rak sungziar a si ti ka hmusuak.  Ka hmeltheih rualpi ṭha pakhat in Bible tlawng ka kai hnu ah cu mi Pathian thu ka elmi pai thuhla in sim. In simdan cu Saya Henry kha na thei maw tin ka suh tikah, aw ka thei tuk! Nan, vawikhat Pathian thu ah natuk in in rak el ih khai cin in ka uar le ngaisanak hmuah a hlo thluh in ti! Keimai hmundan le ruahdan ah cun khai kum a liamcia ziangmaw tizat ih Pathian thu ih kan rak elawk cu a cemzo, keitla cu a cin hman ka cing nawn lo. Nan, ka elmi pai hrangah cun ka hmin le Pathian thu ka sim mi khal kha a hrang dawnkhamtu phar vekah a cang ti ka hmusuak. Cui thu ka rualpa pakhat in in ruah tikah lungkuai in ka sir aw ih Pathian hnenah ngaidam ka dil. Ephesi 4: 15 ih insim mi “ Duhdawtnak thawn thutak sim aw” ( speak the truth in love) ti mi ka mang ih duhdawtnak tello cun thudik kan sim, thil ṭha ih lang kan tuah, Pathian hna kan ṭuan le kan pumpekawk tla hi a lak men an si ti ka hmusuak , “ Minung ṭongpawl le vancungmi ṭong tlain ṭong hman ningla duhdawtnak ka neih si lo ah cun kei cu dar awn vek men le darsumsel awn vek men ka si” (I Kor. 13:1). 

Duhdawtnak thawi a nungtu le thusim tu si dingah Pathian in lo tlawsuah hram seh!