Paul Ih Tuahmi Thil Pathum

Phi.3:12-14 sungah Paul in thil pathum a tuah mi kan hmu.

1.Tlunlam Pathian Kawhnak Lawmman Co dingih Dawi{Phi.3:12,14}.
Pathian ih a kawhnak san theifiang in cui a kawhnak san cu kai ngah ve ding in ka dawi a ti. Unau Pathian in tumtahnak nei in in ko cio.Cui Pathian ih in kawhnak cu kai ngah ve tu si ve ding hi kan nun ih a thupi bik mi a si. Pathian ih in kawhnak san kan kai ngah ve zo maw? Himi kan kaih ngahlo asilen kan nun cu tumtah mumal um lo in a tlan rero ding a si ko. In kawhnak phu ih nun thiam hi a thupi tuk mi asi{Eph.4:1-2}.Tlunlam zoh ih feh hi kan ṭul
asi{Kol.3:1-3}.

2.Dunglam Thil Kha Hngilh{Phi.3:13}.
A liamzo mi ah ziangvek hlawhsamnak kan tawng? Ziangvek harsat le beidawngnak kan tawng? Ziangvek hlawhtlinnak kan tawng ?Ziangvek zatlaknak kan tawng? Ziangvek thlawsuahnak kan dawng khal asilen cu pawl cu ṭhumawknak ah hmang nawnlo in Bawipa ah ṭhum aw in hmailam cuan uh si. Dunglam kan zohsal cu a ṭulcan a um nan,cumi in kan nun in kai{in awk}ding a si lo. A liamzo mi ah ziangvek nehnak ka co ti hnak in a ra laiding mi hrangah ziangvek in ka timlam ding ti mi hi a thupi sawn. Paul in dunglam thil kha hngilh a tum a si.

3.Hmailam Thil Dawi{Phi.3:13}.
A ra thlenglai ding mi ah ziangvek in ke kan kar ding? Ziangvek in Bawipa’i hrangah ka hmang aw ding? timi pawl hi a thupi mi a si. Aliam zo mi ah na dungtawlhnak, na cahlonak, na tifuhlo mitete a um ko ding ziangkhal sisehla kan thlencin in hmai kan nawr vivo kei uh{Phi.3:16}.Khristian tlan zuamawknak cu ziangtluk ih cak in ka tlan thei timi hi a pakhatnak a si lo. A tawp tiang ka tlan thei maw? timi hi a thupi mi cu a si.{1Kor.9:24-27}. Cak zet ih na tlan theilo khal le na beidawng hlah, hmailam na pan hrimhrim kha a thupi mi a si. Paul khal ka thlengzo ka ti aw lo, Zisu'i i kawhnak san lawmman co ding in kawlthuam{Panttaing}lam pan in ka tlan ngetngo a si a ti{Phi.3:14}.

Siartu zate Pathian in lo thlawsuah hram seh!

Evan.David ceu
{Ceu family}
Tahan

..........................

Hminsin: A sermon ropi tak in hlawmtu Saya David Ceute hnenah lungawinak ka tarlang.