Ziangti zawngin na nupi na duhdawt ding?

Jesu in John 15:13 ah “ Mi pakhat in a rualpi pawl hrangah duhdawtnak tumbik a neihmi cu an hrangih a nunnak pek hi a si” tin a ti.  Na nupi hrangah  taksa thihnak tuar kherkher lo in na duhdawtnak na langter dan tampi a um ko ding. Cu mi lakih lamzin pakhat a si mi cu na nupi hrangih na nunnak thlacamnak thawi hman hi a si.  Pumpe aw tahratin na can tampi na hmanmi lak ihsin a hrangah can malte tal a ṭhatnak ding bik ruatin thla camsak ringring aw. Cuti na ti tikah a tawp a tawp ah cun na nupi lawng si lo nangmai hrang lala khalah na camsak nak cu malsawmnak ah a cang ding.

Nupi in a pasal hnen ihsin a theih duhmi thil tampi a um ko ding. Cupawl hmuahhmuah lakih a thupi bikmi pali lakih pathum cu “Ka lo duhdawt,” “ Na mawituk,” le “ Kan leiba pawl ka sam thluh zo” ti pawl tla an si men thei.  Asinan, thil pakhat nunau hmuahhmuah in theih an duh tuk mi, thil dang hmuahhmuah hnakin anmah kan duhdawt hleice ti a takih teptertu le nuamtertu a um ih cucu “ Na hrang tuini ah thla ka lo camsak” ti hi a si.

Nupi in ziangtikcan khalah a pasal in thla a camsak ti a theih hi cun , cui a thil theihmi cun ka pasal in in duhdawt taktak ti a nunnakah a takin a tepter hleiah ngaihsak le kimhim a sinak a takin a tepter. A pasal hrangah a thupit zia khal a pasal in thla a camsak ti a theh in a khansa fawn. Pathian in na nupi ih thinlung nemter dingih na duh a si ah cun lole nan nupa karlakih thubuai remṭhat, nan nupa nun hlawhtlin ter lole nan nupa nun tluangtei fehter na duh a silen cu thil dang lamzin a um lo thla na nupi hrangah cam aw. Na nupi nunnakah remduh mi le tuahṭhat duhmi na neih asilen, “ tuini ah ziangha na hrangah thla ka lo camsak ding?” tin sut aw.  A pekah cun na nupi in a theithiam lo in a ngaih lamlam tla  a ṭha lo a si men thei. Asinan, na suh ngun a si ah cun cumi ih ruangah a lo duhdawtnak kha a zual ding. Cui ṭongkam “  ziangmi pawl hrangah si thla ka lo camsak ding?” na ti mi pawl cu a hrang le nan neihawknak hrangih na pumpekawkzia phuangsuaktu ṭongkam pawl an si. Amahlawngte, na hrangah thla ka lo camsak ti kaa ih ti cingin na camsak lo a si ah cun, ṭhathnemnak a um lo ding.

        Zan an ihthah sungah an lupar ah kutsuang in minute 5-10 karlak a awn in maw, a awn lo khalin thlacamsak  theu aw ziangahtilen cuti na pumpekawk nak cun nasa takin na nupi nunnakah  hmuar a nei. Nupi hrangah ka pasal in ziangtluk in duhdawt ti mi le ziangtluk in thlarau lamah ka pitlin in duhsak ti an theifiang ih pasal duhdawtnak le innsang nuntu khawsaknak ah nasa ngaingai in kan beiseiban lo tiangin thlacamnak cun nun mi a rem. Pa pawl hrangah nupi ṭongkam ih nunsim hnakin, thlacamnak thawi Pathian hnenih thlen le nunih langter in hmuar a nei deuh. Nan innsang nupa nun lungawisawn, aipuang sawn le duhdawtnak thuksawn thawi ṭhan na duh asilen na nupi hrangih thlacamsak kha nunpi aw. Cutin, Pathian in nan nupa nunah palai ṭuanin nan ruahban hnakih sangsawn tiang lungawinak le hlawhtlinnak a lo pe ding. Papawl ziangtluk zing in si nan nupi hrangah thla nan cam?