ZÂNGFAHNAK THUTHAGṬHA CUN NUN A DANGLAMTER

Dungthluntu Paul ih nun ihsin ziangtin Pathian ih zângfahnakin mi a danglamter ti mi fiangten kan hmu thei. A nunhlun- zumtu pawl a kaihhrem lai le Pathian kawhhran pawl cawl lo rori ih sawisa dingih a dawinak dinhmun ihsin ( Gal.1:13), mi tangdawr Pathian thutak ṭhahnem ngai zet ih simtu ah a cang.  Pathian ih zângfahnak cun a nunhlun pawl hmuahhmuah lan in mi thar ah a thleng danglam ta riai. Himi a si theinak sancu zângfahnak  hi minung hnen in si lo Pathian hnen in a rat ruangah a si ( Gal. 1:11-12).

Galati 1:13-14 kan zoh asilen, Jews pawl ih zirhnak hnuai ih Paul ih nunnak cu nunphung( traditions) in a khat.  Nunphung pawl cu a sualnak zianghman a um lo cing in , kan ralrin lo asilen cupawl cu Baibal ih zirhnak vek an si lo ṭheu ruangah Pathian ih zângfahnak dawnkhamtu pawl ah an cang thei.  Kan tuah le thil ti mi tinkim ah Pathian thutak kan theihfeng le cumi parah ṭhum aw in ke kan kar a ṭul.  Mark 7:6-9 cun hitin, “  Jesu in a sang hai ih, “ Nannih midepdepawl, profet Isaiah in nan thuhla a sim tikah a sim dik a si. Hitin a ngan, ‘ Hi minungpawl in an hmurka cun in upat. Asinan an thinlung cu ka hnen ihsin a hla zet. In biaknak cu alak a si. An thurin zirh mipawl tla cu minungih thupek men an si.’ Ziangahtile, Pathian thupek cu nan tan ih, milai-ih thurosiah mi sawn bel le no khawlhdanpawl cu nan thlun.Cuvek a dang tampi khal nan tuah.” ti ah a ti. Cule an hnenah, “ Nan zirhawksin vivo mi nanmai thurosiah thlun dingah Pathian thupek cu nan hnawng. Cutiih nan tuah tikah thil tiṭha ah nan ruat aw.” ti ah a ti.

Paul in “ amai lungawizawng vekin ka nui pum sungih ka um lai ihsin Pathian cun i serhhran ih, azângfahnak in i rak ko,” (Gal. 1:15) a ti bangin, kan nih khal vanduainak thilthu lole thil pakhatkhat cang men mi ih rahsuah( product) kan si lo. Kan pian thlak hlan ihsin Pathian in kan hrangah tumtahnak felfai zet a nei. Jeremiah bang, kan nui pumsungih kan umlai ihsin Pathian in in rak ruatcia zo. David bangin, mangbangza le maksak zetih tuahmi kan si. A tawizawngin kan sim asilen, kan palhnak le ṭhelhmi pawl hmuahhmuah khal kha nemhnget cia an si.

Cang 16 nak cun hitin in sim, Pathian in kan nun in thleng tikah, a liamcia ih kan sualnak pawl in ngaidam lawng a si lo, kan hmailam ke karnak le ṭuanvo hrangah in tungding.  Paul ih hlan nun kan zoh asilen mithianghlim tampi thawngin sungah a rak thlâk, thah an sinak  ding hrangah a lungkim pi, Sinakok tinkim ah a hrem, lohtheihlo in Pathian thangsiatter ding in a rak zuam. Culawng hman siloin, an mah ti duhdah dingin ram dang khuapawl tiang a rak thleng( Dungthluntu 26:10-11), asinan Damaskas lamzin ih khual a tlawn laiah, Hebru ṭong in a hnenih thusim vekin aw a thei, “Saul, Saul, ziangah i tiduhdah rero?” (Dungthluntu 26:12). Cuṭhehah, Bawipa’n tho in a ke ih ding dingah le a hmuh mi thilpawl le a hmuh cawp dingmi thil pawl theihpitu dingah le a rawngbawltu dingih a rak hril cia zo thu a sim. ( Dungthluntu 26:15) Cutin, mission hnaṭuan a pe, “ Nangmah cu atu ah Jew-pawl le Zentelpawl hnenah ka lo thlah ih, an hnen ihsin ka lo runsuak ding. Cucu an mit ka vanternak dingah le thim ihsin thleu ah le Setan thuneihnak ihsin Pathian hnenih an kirsal ih sual ngaidamnak an co theinak dingah le keimah in zumnak thawngin mithianghlimpawl thawn ro an cotlang theinak dingah ka lo thlah a si,” (Dungthluntu 26:17-18) tiah a ti.  

Pathian in Paul ih nun a danglamter ṭheh ah, mission hnaṭuan hrangah a thlah suak. Khristian Pathian zumtu kan vekin, dai ziar le nuam pa seel in zarhpi nitin biakin ah to hiahhiah men le hi mi hi a si hmang Khristian nundik tin kan um huaphi men thei lo.  Jesu thawi zumnakin pehzawmawknak kan neih leveten kan Khristian nun a thawkih cutin kan tawpnak ding khal cu Amah riannak thawi a hnenih sunlawinak le ropitnak pek kirsal hi a si.  Cumi cu Pathian in kan nunnak hrangih a khawkhan le tumtah mi a si.

Kumthum a liam hnu ah, Paul cu Jerusalem ah a fehkir sal ih, Cephas, Peter ti ih kan theih mi hnenah ni hleingai sung a cam (Gal.1:18).  Cui hnuah, Siria peng le Silisia pengpawl tla ah feh in hitin , “ Khrih ih a um mi, Judia peng kawhhranpawl cun pumpak takin in rak thei lo. Asinan, “ hlanih in rak tiduhdahtupa khan atu ah hlanih siatsuah a rak tum rero mi zumnak thu a phuang,” ti lawng an hna in an rak thei. Cule, Keimah ruangah Pathian an thangṭhat” (Gal. 1:21-24) ti ah a ti.  Paul ih nun thlengdanglam aw mi mi in an hmuh tikah Pathian an thangṭhat. Minung pa ziat ha na nunnak le ka nunnak thleng danglam aw mi ruangah Pathian thangṭhat ve ding?

Pathian ih zângfahnak cun harsatnak le hlawhsamnak fehtlang khal in kan nun in thleng danglam. Cuvek harsatnak le hlawhsamnak pawl tla cu kan nun in ṭhangharh tu ah hmang in le cui kan tawnteh mi ihsin zirsuak ding ah in bawm. Paul thotho in hitin I Korin 15:8-10 ah, “ Anetnakbikah, a tikcucan lo ih suak nausen vek a si mi keimah hnen khalah a lang ve. Ziangahtile, kei cu dungthluntupawl hmuahhmuah lakah a thupilobik ka si. Pathian kawhhran ka tiduhdah ruangah dungthluntu ti ih kawh tlak hman ka si lo. Asinan, Pathian zângfahnak ruangin keimah cu ka si vekin ka si. Ka parih zângfahnak i pek mi cu rahsuah nei lo a si lo. An zate hnakin tamsawn ka ṭuan. Asinan, a ṭuantu cu keimah ka si lo. Ka hnenih um Pathian zângfahnak in a ṭuan sawn a si” ti ah a ti.

Asinan, thutak le Pathian thuthangṭha ruangih thleng danglamawk nak cu a dikzawng ih na rak sawn sal tik lawngah a thleng. Pathian zângfahnak hnuaiih na pumpek (surrender) awk thluh hlan cu hi thil hin na nunnak a lo danglamter dah lo ding. Curuangah, mi hrekkhat lamzin diklo ih a feh rero pawl le tumtahnak diklo ih ke a kar rero tu pawl, thutak lamzin ah nan kirsal lohli, A thutak Babal siar in, a kawhnak hnuaiah na pumpekawk sal a ṭul. Cuti nan ti leveten, A zângfahnak mangbangza in a lo danglam ter ding ih nunman nei le Pathian lungtawng ah na cang ding. Pathian in lo thlawsuah hram seh.