Titanic Lawngpi Ihsin

Nikum kum tawplamih Movie (Zuknung) thar rawngsuak mi “Avatar” hlan tiang hmuahhmuah kha cu “ Titanic” Movie hi leitlun  Movie ih sum la lut tambik a si. Kan nih khawte berek ih rak ṭhanglian mi le Chin tlang lungkhawrawk le tlangpar ih a  um mi hrang khalah a hming a mi khual lo nasa. A hawng lar taktak kha cu Kawlram Niciasih kawm ah le cabu kawmah an zuk a khat ti thei a si. Kawlram hman a ra thlen ban cun leitlun pumpi in a vanglai ah an buaipi mi zuknung a si.

Hi Titanic Lawngpi hi leitlun lawng hmuahhmuah ih minung phurtam thei bik, tumbik, ṭhabik le mawibik a si. A tum, a sauṭha in a sanlam khal hi sawng sangtak nei ih tuah a si.  Ahleice ih tuahmi le sermi a si tikah “ Millionaire’s Special” ti tiang rori in a hmin an pe. A mawizia le a nawmzia cu kaa ih simfiah thiam rual lo a si hleiah a cungcuang in leitlun khawvel sak le thlang a mawinak le cangkannak in a dengsuak.  A vawikhat tlawnsuahnak ding ah Southampton, England ihsih New York Khawpi pan in a pawk. A pawhsuah ni kha April ni 10, 1912 si in a sungah minung 2,223 a phur.  Cuti nuamtin cen in a sung ih cuangpawl an um lai ah a ni linak ah vurtlangpi ( Iceberg) rin lo paralah pah in April ni 15 cun Tipithuanthum a thuknak pi 12,000 ah pil. Cuti vurtlang an ṭaihnak ruangah lawng thuailam pi 300 lai cu a siat bal thluh ih cuisin tidai in an lawng a khat tluh a si kha! Khaiṭum ah a cuangtu minung 2,223 lak ihsin mimal sawn 1,178 lawng an ruansuak ngah. Culo dang pawl hmuahhmuah cu an ti thluh.

Ngaingai tei kan ti ah cun Titanic lawngpi kha lawng menmen si lo minung ropitnak le sunlawinak tarsuahnak ih tuah mi sawn a si.  Ropitnak, mawinawk, siattheilo ti pawl cu Titanic lawng thuhla rellar nak bik pawl an si. Siat ruallo, pil thei lo ti ih an rinsan tuk mi khan minung a thawngtel a pil hloh pi ta riai aw! Khai Titanic lawngpi pil  ihsi khan minung tampi cun minung bantha cahnak, lennak, ropitnak le neih hlawnthil pawl hi hngalpi an tlak lo, rinsan an tlak lo ti an hmusuak!