Monday, July 25, 2011

Ihthah Theinak Si Ṭhabik


Ihthat thei lo hi nauhak laiah cun kan thei lem lo. Asinan, kum a hawng upat deuhdeuh len ziangtik laifangah kan rak nei ti theih lo in mi tamsawn cun kan rak kawl.  Zan ihthah thei lo ih harzia hi ziangvekin kan rel ding? Keitla cun hremhmun tlak vek a si ding tin ka ruat. Ihthah tum poh len a harh aw deuh deuh in ka thei. Hremhmun khal hi kan sualnak le ṭhatlonak pawl hngilh tum len famkim zetin kan hmu ding tivekin ka ruat.
Awle, ihthah thei lonak hi a san tampi a um thei. Taksa lam ṭawnṭaih ruangah a si thei, cun phurrit tuk lole mangbangza ṭihnung a phunphun tawn ruangah a si thei. Cun, coffee in tamtuk lole A e in tamtuk tivek ruangah le ningṭih ruang khalah a um thei. Cun, cindawk lak ṭhalo zan meng rei ringring ih um ruangah ṭuantei ihthah theilonak tivek le a phunphun ruangah thil a um thei ding.
Keikhal hi a liamcia kum ziangmaw tizat ihsi khan zan ih thah thei lo hi ka nei ve ih vansang awlawksawng in ka tal buai ṭheu.  Hmunpi ah tu cu ka um ih a zia deuh. Hla ngaiding internet ah siseh, cun computer thawn catuah duh le hnaṭuan duh tikah cutin zan varvar ka to can a tam. Asinan, cuti zan var zikzik sim pipi tiang to cu taksa in a rak hua zet ih thil pakhat khat ihthah theinak ka ngaihtuah a ṭul ding tin ka ruat.  Rualpi hrekkhat in, number siar a ṭha an ti ih ka siar nasa, ziangmaw zat cu a ṭhahnem ve nan cutluk cun ka sawr lo. Cutikah, Missional Spirituality kan zirnak ah in zirhtu Dr. Charles Ringma in daitei punghman ih thawlak dan phunkhat in zirhih cuisin zan ihthah theinak si ṭhabik ka sar suak.
Zan na ih tikah na itthat thei lo a silen, number siar ciamco hnakin thil ṭha deuh ih ka hmuh mi pakhat a um. Cumi cu hihi a si; nangmah ih rem na tidan dan in rem zet in zau huahhi aw la, cule na thaw lak kha dimten hawn sang in cutin dimten thlah sal aw. Na mitsing aw la, na thawthaw cu ṭha ten vawn ngai aw. Thudang tampi ruat ciamco lo dingah cui na thawthawt mi ah cun na thinlung ret aw. Cuti, punghman ten na thaw na hip ih na thlah tikah, si le vai zianghman ṭul lo in hahdam ten Bawipa’i pekmi zandai thiangah na cawlhahdam thei ding. Manpek tullo ih ihthah theinak ṭhabik pakhat a si in ka hmu ve. Nangteh ziangtin zan na ihthah thei lo canah itthah thei ding in na zuam?

No comments:

Post a Comment

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...