Leiba Ruangih Thahawk a Tumtu Tlangval

Leiba neih hi a har a si ding ,a tam deuh pheiah hin cun um a nuam thei lo zet. Kan sumpai baknak neitu hmuh le tawn tla hi cu Pawpi tawn vekin kan hreh.

Russia siangpahrang Nicolas II kha na thei dah maw? Anih kha mi menmen vekih thuamawk in a ralkappawl dinhmun thei ding ih an camp fan hmang zet tu a si.  Cui Camp pakhatah cun tlangval pakhat, a pa in thuawihnak nun zir dingih ralkap ih a luhter mi pa a um.  Asinan, khuahkhrih le thunun, training a kainak pawl cun a nunah ṭhathnemnak  zianghman a neih a langsuak cuang lo.

A sualnak lakih langhngan bikmi pakhat cu sumpai leh hi a s.  Asinan, tangka thawi lehawk hmangzet e ti lo in cabu lawngte a ngaina zet.  Peipunawk a tum tuk tak ah cun leiba a neih bet vivo ih , cutin a tawp atawp ah cun an Camp tangka a puk a ṭul thlang. Cumi hnu khalah cun  sumpai cu a puk bet vivo ih , a sinan peipunawk lam cu relloh leiba rualriat thawn mangbang in a um.

Zankhat cu a leiba neihmi pawl  a tuat a tuat ih a tamtuk thlang tikah ti ngaihnak thei lo in mah le mah thah awk a tum thlang. A meithal a la ih, a cabu kau aw cia ah cun hitin, “ Hi tluk lawmmam ka leiba tam hi zo si in samsak thei ding?” tin a ziak. Cutin, ihnak si hlum a lem hnu cun thawzet cun a vawng it that phawt.

Cui zan ngel le cel ah cun singpahrang Nicolas II cu ralkap bawi fate deuh vekin a thuam aw ih cutin camp pawl cu a ra fang.  Ralkap tlangval itthat patei kiang ih meito te vang aw le a kiangih cabu kau aw cia cu fiang zetin a va zoh. Cuisin, cui ralkap tlangval pa ih dinhmun zangfahumza cu zo ih sim le ruah ṭullo in a thei cih.

Tlangval pa a itthat a hawng ṭhangharh cu a meithal kau in , a meithal li hmetpuak cih mai ding in a meithal zim cun a lu cu a hawn sawh. A ziangih thu ah lehlam, a hmeh hlan te ah a cabu kau aw cia cu a vawn zoh sal kherkher. Cutin, a thuziak , “ Hi tluk lawmmam ka leiba tam hi zo si in samsak thei ding?” ti ih a nganmi hnuaiah cun, “ Pek ṭheh a si zo ( paid in full), Czar Niclolas II” tin a rak ngan aw aw.

Leitlun minung cu kan sualnak ruangah le sualleiba ruangah Pathian hnen thleng thei lo kan si. Asinan, kan sual leiba hmuahhmuah Jesu’n a parih a phurh le calvary Kross parih kan hrang a tih tikah khan kan sualnak leiba le cazin a zaten a phiat theih ih, “ Theh a si zo” (John 19:33) tin in ti ve. Zumnak thawi cui Jesu’i in tlaksakmi a co ih a zumtu cun thi lo in kumkhaw nunnak an nei ding ( John 3:16). Pathian in lo thlawsuah hram seh.