Taksa Kang Damternak Si ṭha bik

Taksa kang hi leitlun minung tambik cun kan duhthu si lo in ka tisual pang lole kan kiangkap ih thil cangmi pakhat khat ruangah kan tep cio ding ka zum. Cun, taksa kang hi a phunphun in a um thei; kut lole ke kang, taksa hrekkhat kang lole a besebikah taksa pumpi kang tivekin. Kang hi a takih tuarlo tui hrangah cun theihthiam pi a harset. Kan Chin ṭongfim pakhat “ a hmelin zoh hlah a aan in ngai aw” kan ti mi hi kang thu ah hin a fiang zet in ka thei. Lenglam ih hmuhnak le zohnak ih ziang ti thamlo kang fate khal hi a takih tuartui hrangah cun pacang pa rum hrunhro rero nak tlak a si.

Awle, hi ka cahram ah hin ziangtin taksa kang lole kang lak ihsin kan humhim aw thei ding ti lam rawn ngan ka tum lo ih kan parih taksa kang lole kang kan tawn leveten ziangtin kan tuanhlawm aw ding ti lam sawn a si. Ahman, vawitampi cu taksa kang lole kang hi kan mai fimkhut lole ralrin lo ruangah kan parah a thleng , cumi ih ralrinnak kan pekawk theih mi cu ralring tei taksa kangter lo dingih um a si. Asinan, vawitampi cu kan ral ring cing in minung ti pan cu kan rak ralring ringring cawk lo. Rinlopin, kan rawl hmeh suan tivek in in rak per, ka siti kan tivekin in rak peh, cun, bel kan cawiah ralring man lo in a tlang sa in kan taksa in rak kang tivek a phunphun kan rillohpi in kan parah tleng an um ṭheu. Cutiasiruangah ziangtin cuvek kang na taksa parah a um tikah na tuah ṭheu? Na fale pawl kut le ke a kang tikah ziangtin na tuamhlawm? Kang lo dingih kilhimawk a thupit tluk in na taksa a kang pang a si khal len na taksa siatsuah lo ding le a rang thei bik ih a damnak si na ngaihtuah lohli cu na hrangah le ka hrangah thil ṭha bik mi a si. Ahman, nang cu pitling na si ruangah na kut le ke kang ding tla in vanduai thilthu ti mi lo ah cun na fimkhur thiam tla a si men thei, asinan, na fanu, na fapa ralrin thiam lo pawl hrangah ziangtin an kut le ke a kangah na tuamhlawm ding?

Keimai pumpak nunah, nauhak lai ihsin mi zuanzang le harhvang ti cu tawh lo ding ding, tham lo dingding rak tawh thai hi ka paih zet si hmang. Ka taksa khal ah kang hi ka rak tuar ve nasa. Amahlawngte cu Pathian kilvennak zarah kang hliamhma tum pipi tivek cu ka rak tuar dah lo. Kut zungpi, zunglai kang lole ngel kang tivek cu ka rak tuar ve phahphah. A sa a nat thei tuk tik ah ziangtin ka damter lohli ding ti hi ka ruah tambik mi a si. Hrekkhat cun hasi(Colgate) lole a bangpi a dangdang a ṭha an ti. Cutin, ka ciing ih ka vawn hnih ṭheu. Reilote cu a zia um a bang nan a hawng khing ih cutin a puar ding cu a dawnkham cuang lo. A sa zualpi reilote sung cu a daih nan, a rei deuh in a puar thotho.

Mi hrekkhat dang leh cun kang hmasi um nawn lo ih dam viarviar na duh len cu “ khuaitizu” tla kang hmasi ah hnih ringring sela a ṭha an ti. Nan, hi thu cu keimah ah a takih tawnteh mi ka nei lo.  Thufim pakhat kan theih larzet mi “ experience is the best teacher” ti mi thuthawi pehpar aw in taksa kang si ih ka hman mi si ṭha bik ka lo ruah ding.  Hi ka relding mi si hi Mizoram lam, mizo unaupawl tla cun “ tinreng damdawi” – “ziang hmuahhmuah si” tin tla in an ko. Thil ziangtinkim deuh thawh ah an rak hmang si awm tak a si.

Ahmin cu “Ṭhunsuiwa” lole “ efficascent oil”  ti kan theih mi ruhna si kha a si. Taksa ruhcang na ih hnih le hmehawknak lawngah si lo in taksa kang hrangah hleihlei a ṭha tuk lawm mam!  Ka taksa a kang tinten a kangnakah khan hmakhatten ka hnih cih ih cutin, a hawng sa nawn lawk, asinan a sa a reh cun a dam cih ringring. Hi Ṭhunsuiwa ka hnih le hman cin ah cun kang ruangah taksa puar le na ka tuar a um nawn lo.  Na taksa khawitawk khal a kang a silen sumpai cem hautak lo bik le ṭhabik ih ka hmuh mi cu “Ṭhunsuiwa” kawl si hnih lohli kha a si.  Doctor pawl in teh ziangtin hi thu an sim ding cu ka thei lonan keimai pumpak tawnteh mi ah cun kang hmuahhmuah lakih si ṭhabik ka ka hman rero mi a si. Na taksa a kang tikah daitlang loin rak hmang ve hman… na sir aw lo nasa ding. Amahlawngte, na kut lole na taksa a kang leveten na hnih lohli a ṭul, a puarhnu lole a reihnu ah cun a ṭhahnem tuk lemlo. Nan, a kang ihsi na hnih cih hngal a si ah cun a takin a ṭhazia na sawr ṭangkai cih ding.