Ziangruangah Si Innsangah Kan Hlawhsam Ṭheu-2

Pathian mi hman ti ih kan theih lar zetzet mi pawl, asinan an fale  kilkhawinakih hlawhsam pawl hi a tamsawn an fale suh le kawm tikah “ ka pa in in tlawnsan tamtu” lole “ Ka pa in in lehpi dah lo pi” lole “ ka pa inn ah a um mal tuk a si si” tin suanlam ṭha zet an nei ve. Culo khal suanlam tampi a um thei ko ding. Khatlamah, an suanlam hi ruah le zoh rero tikah a dik thei mi tampi a um thei ruangah nu le pa in kan fale kilkhawinakah an lungput le nundan hi thupi zetah kan ruat a ṭul. Tuihlan kum ziangmaw tizat ih kan Chin nu le pa, Pathian mihman pawl ih kan rak uar zet mi cu mai innsang khal tlung lo ih thla tamtak rawngbawlnak mission field lole rawngbawlnak hmun ih cam thei kha a si ih, mi pakhat khat crusade, camping thawi vak suak thei ringring le mai inn hlumman lo cu Pathian mihman tile mi langsar tin kan ruat. Aṭhazawng in kan ruat asilen cu a diknak khal ziangmaw zat a um ngai. Mai innsang hman ngaihsak man lo khawp ih Pathian hnaṭuan thei cu! Asinan, cumi ih a rahsuah, an fale zutama, nu le pa’i thuawih lo, mi luhluh lole mibawraw ih an um hmuh le theih cun mai innsang thlahthlam tahrat ih lenglam rawngbawlnak thupibik ih ret kha a rak fuh bik lo ti a hmu suak aw vivo.  Atu kan san, leitlun fimthiamnak , technology, internet le globalization sanah phei cun tuihlan kan pi le pu san hnakin innsang ah fanau le in nuthling lole Patling an mahmawh cuang. Innsang a hlawhsam a si ah cun a lenglam hlawhtlinnak kha hlawhtling ti ih siar theih a si lo. Lenglam hlawhtlinnak cu innsang hlawhtlinnakih rahsuah ding mi a si.

Awle, cuti insangah kan hlawhsam ṭheunak san pawl ih lang cu kan fale sim le zirh an ṭul canah an zohṭhimding, an thlun ding le an ṭulsam mi zirh, hruai le bawm dingah nu le pa in kan khihhmuh mal deuh ruangah a si thei. Ahman, zo cio khal in mai fale cu ka sim ko, ka zirh ko  tin kan ti thluh ding. Asinan, fale kilkhawi ti hi – “tuah aw, ti aw, na ti lo len ka lo thawi ding” tivek zawngih zirhawk le hro a si lo. Cuhnakin  duhdawtnak thawi “ tuah tlang, tuah pi, biangbiakawk, lehtlang, hnihsuah sai tlang, hro si lo in thuawih dingih zirh, ṭihding ih thupek si lo in thuawih ding ih nunsim thiam” tivek lam sawn a si. Nu le pa tampi in kan palh ṭheu mi cu kan fale zirh, kaihhruai an ṭul tuk canah zirh lo in an pitlin hnu ah thunun (control) ciam co kan tum. Ziang ka ti ai saw? Ṭhimnakah, Bible in “ Nauhak cu a fehnak ding lamzin ah a nauhak lai ihsin zirh aw la a upat hnu khalah a thlah lo ding” (Thufim 22:6 ) a ti. 

Nu le pa tampi cu kan Bible ih in sim mi a linglet zawng in kan thei. Fale an nauhak laiah zirh tum lo in an pitlin hnu ah thunun kan tum ciamco ih a sawt mawh zet. An pitlin hnu ah cun zirh hnakin thurawn pek an hlawkthlak deuh. A si, nule pa in kan fale an nauhak laiah kan zirh mal deuh a bang, kan zirh kan ti hmanah a men men in mi tampi cun kan zirh. Pathian ṭihzah ding, nu le pa upat ding, ai ih upa upat ding, u le pawl upat ding , sung le kua duhdawt ding, lole thuawih nun neih ding” tivek  pawl. Hi pawl nauhak zirh can ṭhabik cu “ nui pumsung an um ihsi kum 13 an kim hlan hi a si. Kum hleingai a thlen hlanah na fanu, na fapa kha Pathian thuthawihnak nunah ṭhatei na kaihruai a si ah cun a damsung kum lamzin dikah na hruai thei ding. Asinan, hi kum  13 a si hlanah ṭhatei na zirh lo a si ah cun thungai thlak suahin kum 13 a kim hnu ah zirh tum ciamco khal aw la a sawt mawh zet ding. Minung kan mizia, kan uar zawng, mi kan biakdan, kan nundan a zate hi zankhat thilthu ih kan parih thleng thutthi mi an si lo. A kumtel ih kan rak ṭhanlen pimi, mizia le sinak pawl an si. Kum 13 kan si tiangah neh zetih nu le pa in fale in hruai lo a si ah cun cumi hnu ih kan nunnakah thleng danglamawknak thleng ding cun harsatnak pakhat khat kan tawnta lo le Piantharnak kan co a ṭul. Harsatnak, ṭahnak, aihramnak le beidawnnak kan vawn tawn curco khin thu kan sut aw ih , Pathian kan hlam lawng si lo in nu le pa khal kan hlam sal. Nan, cuvek hnu ih harhsal cu thil awlai a si lo, vanglai ih co ding mi le thiamding mi thilṭha tampi kan can ih , kan thlennak ding thleng ban lo ih kan um lanta khal a tam ding. Cun, kan harhsuah a tlai ruangah kan thlen tumnak kah thlen khal a tlai in rual kan ban loh phah thei fawn.

Awle, ka rel tam thlang, ziangruangah innsang ah kan hlawhsam ṭheu ti mi cu sannak tampi um lakah nauhak lai ih zirhawk, kaihhruai awk  nu le pa in kan thlahhlam le innsang kekkuai mi ihsi ra kan si ruangah tin kan hmu thei. A ra lai dingmi ah innsang hlawhtling, nuam, lei ihsi van nun tep duhtu kan si ah cun thil dang hmuahhmuah hnakin mai innsang ( rawngbawlnak hmaisabik) kha thupibikah kan ret rori a ṭul. Nu le pa in Pathian ṭihzahnak thawn, punghman ten fale an nauhak lai kum 13 a kim hlan kulh sung hmuahhmuah ah thlacamnak thawn, Bible zirtlangnak thawn, lehtlangawknak le thanzang pekawknak thawn theihtawp suahih ṭan kan lak cio a ṭul! Nu le pa in fale kilkhawi nak hrangih kan hman tlang dinmi duhthusam tla ruah aw, ngansuak in cutin ṭan kan lak rori a ṭul. Cutin, innsang nun , nu le pa ihsin fale pawlah a hlawhtling a silen kawhhran a fansuak ding ih kawhhran ihsin pawlkawm tete le a rampum tiang a fansuak thei ding a si. Pawl tinkim damnak, Khawhhran tinkim damnak le rampumpi damnak cu innsang ih fa le nau kan kilkhawiawknak le innsang nun hrisel le selonak parah a ṭhum aw aw a si. Nu nasilen innsang nuam dinsuak dingah leitlun ah nangmah na thupibik ih pa na si khal len innsang hlawhtling dinsuak dingah Pathiang sangtu ah cun nangmah na thupibik ti na cohlan le Pathian rinsan in na mawhphurhnak ralṭha zet le duhdawtnak thawn na kenkawh ngam a ṭul.

Siartu zaten Pathian in lo thlawsuah hram seh