Ka Hngilhtheilo Khai Can Kha!

Minung hin kan nunnakah thil tawn le teh mi tampi kan nei. Cun, kan nunnakah hgilh ih kan hngilh thei lo mi kan rualpi ṭha, sungkua , nu le pa lole tikcu can kan nei ṭheu. Cuvek tikcu can cu kan nunnakih harsat kan tawn laifang a silolen lungawinak nasatak kan tawnlai can ah a si duh zet. Hrekkhat hrangah cun nupi pasal ih thisan awk can tla hi hngilh thei lo mi tikcu can a si ih cun hrekkhat hrangah cun pianthar ni , nupi palsal neih ni,  motor thar neih mi, innthar neih mi, vanzam to  hmaisatbik ni, phunhra awn ni, mai pianni, ramdang thlen hmaisatbik ni tivekin a phunphun kan mah le pumpak tawnteh mi ihsin kan nei cio. Keikhal in thil tampi ka nunnak ih ka tawntehmi , ka hngilh theilo dingmi lak ihsin Pathian kutcak ka tawn mi ka lo hlawm ve ding. Cui, ka thil tawnmi cun kan Pathian a nung, ziangkim tlunih thuneitu le uktu a si zia a tarlang ding.

Jeremiah 33: 3  hi zumtupawl hrangah cun Bible catlang mikhual lo zet a si ka zum. Cui catlang ah cun, “ I ko aw la ka lo sawn ding. Na theih lomi thil khuaruahhar le mangbangza ka lo sim ding” tin a ti.  Kan Bible kan zoh tikah Pathian in a mipawl parih a phuansuahawknak tampi hmuh ding a um. Pathian ih kutcak khawruah har cu Israel fate pawl nunnakah tla tampi kan hmu thei. Moses hmangin tipisen a kangcat ter ih, Josua hmang in Jordan tiva a kan pi. Sun ah Ni in zan ah Thlapi in cutin Pathian ih khawruahhar mangbangza Israel mipawl in an hmu ṭheu. Cun, Thuthlung Thar lam kan zoh asilen Jesun’ sangper panga le ngahte pahnih in minung thawng nga rawl a do.  Damnak duhih a diltu, “ Jesu David fapa I zangfah aw “ ti ih a autu phar pahra pawl tla damnak an co. Pathian ih thilmak tuahmi le khawruahhar cangvaihnak mi parih a tuahmi pawl cu sim le hmuh ding tampi kan Bible le Bible leng ah a um. Cun, cupawl thu kan siar tikah ngai a nuam in, siar khal a nuam zet. Cun, kan nun khal thazang thar le cahnak mi a pe fawn. Nan, thu pakhat suhawk nuam lo zet nan thupizet mi cu nangteh ziangtin cui Pathian ih khawruahhar, mangbangza cangvaihnak cu na rak tep ? ti hi a si.

Aliamcia mi kum 2003 ṭhal tlawngpih kha a si ih, cutin Champhai, Mizoram ih ka nu tlawng dingah ṭhal ah cun ka hawng tlung. Cule, kan tlawng Biblical School of Theology (BST) in kan neih ṭheu vekin ṭhal ah Pathian thuthang ṭha sim in chin tlang khawte pawl kan fang. Cui, kum khal cu khaw 10 zikzik pal in Pathian thusimnak kan nei. Ka rualpi pahnih  Salai Za Kap Vung le Salai Lal Nei Sum ( BST ah lecturer tu ah a ṭuan lai) thawn kan si.  Cutin, kan tawpnak lam kan pan thlang tikah, Sunthla ihsin in rak thlah phah ah Khuangli  tiang an ra ve. Vawikhat hman Khuangli lam ka feh hrih lo tikah cutawk ihsin Simdihai , Seipi, Palte, Laizawl, Thingcang, Phunte ti ih feh ih Tio ral kai ding ka si. Khuangli ka um lai ah ka nu thih ngamin a besia ti ka thei ih cutin a ranglam ih hawng tlung lohli dingih thawmvang thuthang ka thei bet. Cutin, ka rualpi pawl in Khuangli ihsi in tlunsan hnuah keimahten Simdihai lam pan in ka feh.

Lamzin ah cun Bag pahnih phurrit nawn thawn ka pai aw.  Simdihai ka lan fel ih cutin mi feh dan ka sut vivo. Cuini kha ngel le cel in nikhua a dur zet. Zin le ka feh dah nak a si lo tikah ka thin a nuam lo. Pathian hnenah thla ka cam phah rero. Cutin, Seipi ka thleng. Reilote tidai in ih ka cawlh laiah, ni khua  a rawngdur bet ciamco ih Lentlang ngawpi ka hawn zoh cu a thim ṭei ṭei, cui si reilote ah ruah a sur cih. Cun, ka ratnak lam ka zohkir sal a silen ruah a sur rero ka hei hmu. Caam dingin le ka nu ka seherh fawn , hmel thei ka nei lo thawn cutin Pathian rinsan in ka pawk suak sal. Hitin thla ka cam, “ Bawipa, ka nui damlonak na thei, kei le ka fehnak ding cin le ka thei lo. Nangmah in in hruai aw, ni khaw sia ruah lak, sahrang lak le tihnung lak ihsin in hum aw, tlaungten ka tumnak hmun Palte in hruai thleng aw” tin thla ka cam. Mak ka ti zet mi cu ka hawn feh ih reilote ah Seipi khua khal ruah a rawng sur ciamco ka vawn hmu. Cun, ka fehnak lam khal ka zoh vivo. Ka hmailam Lentlang ngawpi khal cu ruah a sur rero, cun ka dunglam khal cun ruah a ra sur rero. Nan, ka umnak ziangtik hmanah thlen ti a nei lo.  Ruah cu tak zet in ka dunglam le ka hmailam ah a sur rero nan, ka tlennak cincin ah a sur dah lo. Cutin, Lengtlang ngawpi ka hawn tleng cu ka vawikhat thlennak a si ih, a rul in a thim fawn ka ning a ṭih nawn. Asinan, cutawkah ka hmuhsuah mi thil a um ih cucu ruahih i man dah lo kha Pathian ih lamhruainak, umpinak mangbangza a si ti hi a si.  Ziangkim thlun- nikhua le ram tlun khalah Pathian in thu a rak nei ti mi a tak in ka hmu suak. Cun, Peter tidai parih fehter theitu Pathian in, “ In ko uh la ka lo sawn ding”  ti a timi kha a takin ka nunnak ah ka tep.  Ka thlennak pawl len a rak ciar depdep thluh fawn ka umnak hmun ruahpi sur lak ihsin in humhimsak ka hawn hmu cu Pathian hnenah lungawi thu ka sim rero. Cutin, thimzawngah Palte lutin ka tumnak hmun ka thleng.

Kum ziangmaw zat a rei zonan, khai ṭum ih Pathian ih lam in hmuhdan le hruaidan kha ka hngilh thei dah lo. Ka can liamcia le rawngbawlnak tete ka ruahsal can ah Pathian ih rinumnak a tharin i mangtersal ringring.  Khai ni ah khan Ni le khua, kan nunnak le ziangkim tlunih thuneitu hi Amah kan Pathian a si ti fiangsin in ka hmusuak.  Vawitampi cu nitin kan nunnakah kan theihthiam ban lo in harsatnak, mangbangnak, vansannak le buainak kan tawng, kan mahten runawk theinak le tlansuahnak kan thei lo kan ti hmanah “ In ko uh la ka lo sawn ding” (Jeremiah 33:3) ti in tiamtupa, ziangkim tithei Pa Pathian kan rinsan ngam a si ah cun a kutcak kan tep ding. Kan harsatnak pawl hmuahhmuah hnakin in Runtu le kan Pathian cu a tumsawn, a cak sawn ti kha hngilh hram hlah! Ziangvek harsatnak sum zing in a lo nen a si hmanah Amah cu pawk hnget fetfet aw la, a nih khalin ziangtik hmanah a lo thlah lo ding! Na hngilh thei dah lo ding mi thuanthu nung, Pathian kutcak le umpinak na siar can ah Bawipa’n a cang ter ding.

Siartu zaten Pathian in lo thlawsuah hram seh.