Na Fale An Him Maw?

Nu le pa’i hrangih Pathian thlawsuah sangbik cu fanau rocan hi an si ( Sam 127:3). Kan hrangah kan lungawinak le kan innsang nun ti hngettu khal an si fawn. Amawhlawngte cu fanau Pathian ih in pekmi kilkhawi le zirhnakah nu le pa kan daitlang a si ah cun kan duhlo mi sawn rahsia tampi in kan innsang in hnaihnawk thei.

Atui kan san phei hi cu internet le technology san a si tikah kan pupa san lai thawn kan nuntu khawsak dan a dang aw verver. Kan uarzawng le kan tuah paih zawng, kan zoh paih zawng khal a dang law law. Khawpi ih pitling fanu, fapa hrangah cun video games le technology lam thil hi a tlangpi thu in an uar. Cucu, a reihlanah kan Chin tefa ramsung le ramleng ih a um mi pawl tlun khalah a takin a thleng ding.  Kan kiangkap ih hmasawnnak hi kan nih in kan dawn kham thei lo. Company lole zung pakhat khat kha an hna ṭuan lo ding-an thilṭha tuah mi siseh, thil ṭhalo tuahmi siseh tawp ter ding ah thuneinak kan nei lo. Amahlawngte cu, an thil tuahmi lei duh le duhlo thuthawi pehpar aw cun kan mah ih ṭuanvo a si. Hramhram in in lei ter thei nak le hmanter theinak an nei ce lo.

Dark Harbor Stories production cun movie ṭhazet pakhat " Trust" ti mi hitin a tuahsuak. Innsang pakhat ah hin sungkua duhdawaw zet le nuam zet an um . Fanu mawizet pahnih le fapa pakhat an nei.  An nauhak lai ihsin a fanu upa sawn cun lehnak lam-volleyball a paih zet. A thiam in a cak khal a cak fawn. A nu le pa khal mi hmelṭha le tuaktam sungkua ihsi a ra mi an si. A pa khal office ah hnaṭuan in a nu khal a lengah cutin hna a ṭuan ve. Kum a hawng rei deuh cun nu  le pa khal mai hnaṭuan ah an ṭul nasa ih ziangha kan fa le in an tuah, an ti ti khal ngaihven man tuk lo in an um. Cun, khatlamah innsang ih a pa bik cun a fanu cu za ah za a rinsan law law. A fanu in ziang a tuah, ziang a uar, ti le khawilamah a um ṭheu ti rengreng a zingzawi dah lo.

Cutin, a fanu cu a hawng tleirawl zik thlang ih tulai san vekin computer le internet a hmang ve. A mai khan sungte ah cun phone in siseh, laptop thawn internet chating a online ve ṭheu. Rualpi pawl le midang dang a chat phah. Nan, a pa in ziang a tuah ti rengreng a ngaihven dah lo. Cutikah, tlangval note ti ih a ti aw mi pakhat in a fanu cu a rak chat ringring. Cupa cu ṭongkam tiam tuk a si tikah zingah siseh, sun ah siseh, zan ah siseh cupa cun messages a phone ah siseh, a computer ih chating room ah cakuat tawi tete a tan ringring. Cutin, cui a fanu tleirawl te khal cu cupa ih messages ngah ding cu a hngakhlap thei zet. A tirte ah cun cupa in kum 20 hrawng in a rel aw. Asinan, cui fala nute in a uar ngaingai thlang ti a theih cun kum 20 ihsin kum 25 ka si a ti. Cun, a rei vivo ih kum 40 a si tiang a sim. Nan, cui tleirawl nute cun cupai ṭongkam le biak cu ngainuam a ti in cupa thawi chating luh cu a khawp thei nawn lo. A hrial in a hrial thei nawn lo.

Malte boruak a hawng rei cun, cupa cun, “ Ka lo duhdawt, na mawi tuk, ka lo uar” ti ṭongkam pawl le “ a lengah kan tawng aw kei cu” ti pawl in a sawm ringring. Cun, mipat nunausinak ṭongkam a phunphun thawn a be ṭheu! A rei a reicun cui thleirawl te tla cu mipat nunaunak hmanpi ding tiang in a sawm ih cui thleirawl nute khal cu cupai zun ah a uai ngah. Cutin, a tawp atawp ah cupa tawng ding cun cui tleirawlte khal cu mawi zet ih thuam aw in a pawksuak. Cutin, cupa thawn pangpar hmuanah tawng aw in, cupa in a phunphun in a thlem ih cutin hotel luhpi in a ihpi. Cuithu cu a darh cih ih cutin, doctor pawl in cui tleirawl te cu tu le tu thu an sut, cun a hliamhma tla ci le vai thawn an tuamhlawm. Cuithu, a pa in a theih le a fanu te a hmuh cun a thinlung a na tuk ih a puakkuai thluh. Cuini ihsi thawk in a fanu te siatsuahtu cu thah tum in a sun a zan in a hawl, a fanu te a sut ih a fanu te in le “ pawngsual ka si lo, keimai duhthu in a si, ka parah a ṭha tuk a si si, khavek mipa cu an um lo ding, ka lo duh, ka lo uar, ka lo ngai tin nitin in ti ringring a si si. Nang, ka pa ti aw mi in i ngaihsaknak ziangtikah na lan teri. Zing in zan tiang hna na ṭuan ih mi khal na ngaihsak lo” tin a ti. A fanu te cun a sim duh lo. A pa cu thinna in rawl a ei thei lo, hnaṭuan khal a ṭuan thiṭha thei lo. A fanu le tu le tu interview dingin an ko, thu an suh leuhleuh tikah  an innsang nawmnak hmuahhmuah a hlo. A nupi in le a dem, a nih in le a nupi a dem ve. Cutin, innsang nuam rak si dah cu mangbang le vansangin an um.

A fanu leng lamih a suah le ca a zir khalah nawmnak ngaingai a hmu thei nawn lo. A thupten a mah le mah a zohawk tikah beisei ding ka nei nawn lo . Mi hmuahhmuah in in hmu tleu tluh! Ka hrangah thih tiang a hlawksawn ding ti tiang a ruat! Cuisin, a pa in a tlawngkainak ah siseh a tlun phahphah ih zo si a fanu siatsuahtu ti rori a ngaihven. Vawikhat cu volley ball an beng laiah mi pakhat in a fanu zuk a rak zaih rero ih cupa cu a fanu siatsuahtu ah ruat in a thawng in a vel ciamco. A fanu khal mi lakah hlim thei nawn hlah! Cutin, vangsang in an um. A tawp a tawp ah cun, a fanu a damcak lo ih ihkhun ah a it. Khua a dai zet ih  puan hlumpi thawn a pa cun a khuh. A pa a it that thei lo. Zankhaw sik ah cun puanhlum ( blanket) a la suak ih cutin, dai tla lak ah cun vangsang in lengah zanvar a va to. A fanu te a hawng ṭhang ih a pa a um lo tikah, puan thawn a pa hawl in inn sung le leng pawl a hawl. Cutin, a pa in leng vurtla rero lakih vansang ih a rak to a hei hmu. A fanu te in a pa a  hei pan ih hitin, “ Ka pa na ṭha maw? , ziangruangah hi tawkah na um?” ti a suh tikah. A pa cu, mit thli rialti bang  a mitah luangin hitin, “ Nute, I ngaidam aw, na pa keimah mawh hlir a si, ka rak lo rinsan tuk tikah ka ṭuanvo la lo in ka rak lo zalen ter tuk a si, in ngaidam thei kem? Keimah palh nak a si, a pawituk aw tin tin tap suak ih a hnitawk rero tikah afanu te biang khalah mitthlir fawr in cutin  a fanu te cun “ Papa, keimah mawh ho khaw, I ngaithiam aw maw”  tin ngaidam a dil ve. Vurdai sur lakah cun an pawm awh ih tap le lungawi si in cutin innsungah an lutsal.

Kan chin mi khal ram sung le ram leng ah nitin ten a um mi kan tam deuhdeuh. Cutin kan nuntu khawsak dan khal kan kiangkap thil tampi in in ciah ve. Cumi ah nu le pa pawl in kan fale hi ziangtluk in Pathian thutak ah kan zirh in kan hruai ti hi kan suh awk le kan bihawk a thupi zet ding tin ka ruat.  Tuini ah nu le papawl kan fale nunau mipatnak sual, zu le sa, rittheih thil le sualnak a phunphun pawl lakah an him maw? Na fanu, na fapa an him maw? Pathian in rocan fanau in pekmipawl hi lamzin dikah ke an kar maw ti zoh in mah le innsang cio ah tlungsal in kan bih aw cio pei uh.

Pathian in siartu lo thlawsuah hram seh.