A Tlanhlo Mi Nun

Kan Bible ca sungah fapa tlanhlo lawng silo in a tlanhlo
mi kan hmu hnuaihni.


1.Kaina:{Gen.4:1-16}

A nau Abel thawn Pathian an be tlangih a nau ih biaknak lawng Pathian ih a pom ruangah a iksik ih a that.Atawpnak ah Pathian hmai ihsin a tlanhlo[Gen.4:16]. Pathian biaksual cu nun di a riam theilo. Midang siatsuahnak le iksiknak cun nun vakvai ah mi a thlen.Pathian ti lungawi lo tu le midang siatsuahtu rengreng an nun a vakvai ringring.


2.Jacob.{Gen.28:5,10-22}

Jacob khal a mai miatnak dingah a pa a bum ih a diklo zet in a u Esau ih thlawsuah a laksak mi mitthli a tlak ter ruangah a tawpah cun a pa'i inn hmanah um ngam lo in a tlan. Mai  ṭanghma lawng sial le mai miatnak ding lawng a ruat ih mi mithli tlak poi ti lo cu nun vavaihnak{tlanhlohnak} a si.


3.Prophet Tlanhlo Elijah:{1Siangpa.19:1-4}

Mizan sun ih meisa ko thla ih Baal prophet 450 lai that theitu pa tuisun ah cun ramcar ah
nunau pakhat  ṭih ah a tla ih thih a dil a si kha.{1Siangpa.19:4}.Pathian ih nehnak a pek nak hmun Karmel tlangah um men duhlo ih nehnak hmun ihsi a suk ruangah a si kha.Pathian ruangih
hna ropi tak kan  ṭuan ih thlemnak ropi tak kan neh khalah kan ralrin lo le thil fate men ah mualpho a theih asi. Mizan ih ka Khrihtian nunah nehnak ropi ka co asi hmanah tuisun ah a thar ih Bawipa'i cahnak ka rinsal a  ṭul. Mizansun ih nehnak kha tuini ah ka ring thei nawnlo. A thar ih thazang lak ringring ka  ṭul. Mi in nehnak co zet hmang in ti laiah mai bulpak nun thup ah cun thihmen hman duh sawn ih um a theih.{1Siangpa.19:4}.Curuangah mizan ih sunglawi zet ih nehnak co tu tuisun ah mi tlanhlo ah a cang ih curuangah Pathian in "....hitawkah hin ziangha na ti Elijah?..."{1Siangpa.19:8-9} tiah thu a sut a si kha. Unau nangteh na um nak ding{Pathian ih um ter in duhnakah}na um maw?


4.Jonah:{Jona.1:1-4}

Jonah khal Pathian ih fialnak ah feh duhlo in a mai duhnak ih a feh veten mi tlanhlo ah a cang. Asinan, Pathian in thlipi in a dawi a si kha. A mai thulung duhlo tu zumtu pawl nun simnak
ding ah Pathian in ziangvek khal a hmang thei.Kumthum voikhat a feh mi Lawng ticket tla ol ten a va ngah sapbai. Unau Pathian thulung lo ih feh cing hin hmakhatte cu hlawhtlin lawk a theih ve hokhaw. Asinan, atawpnak ah thlipi thawi nuai awk a si ko. Jonah cu Pathian hman ding in a
heltuk lai ruangah Pathian in Tifinriat le Ngapi pumsungah a suanhmin ta a si kha. Pathian zumtu a thulunglo tu mi heltam pawl suanhmin dan hi a thiam tuk ee.


5.Fapa tlanhlo.:{Lk.15:11-32}.

A pa'i ro a pek mi cu a nunsiatsuahtu ah a cang riai. Unau Pathian malsawmnak hi hman dan thiam lo cun turah a cang thei a si cu. A pa a tlansan hlat poh le a niam deuhdeuh a si ko. Pathian tlansan cu niam lam pan nak a si.A tawpah a pa a tlansan manah a duhlo bik mi dinhmun{bavuah}ah a thleng ta a sikha. Pathian tluksan le hawisan cu duhlo bik mi dinhmun tiang ih thlennak a si. Nun vavaihnak a si.


6.Demas:{2Tim.4:10}

Demas hi Paul ih rawngbawlnak rak thlun rero zotu a si. Asinan, atawpah Thesilonica khua ah leitlun nomsaknak duh ah a tlanhlo.{2Tim.4:10}A thuanthu thawk lam cu duh a um zet nan
atawpah thuanthu mawi lo zet in a cem. Unau kan thuanthu hmaisa lam athat ih ruangah hnangam men hlah uhsi. A tawpnak hi a thupi sinsin{Thup.2:10}. Setan in kan thuanthu hmaisa lam a siatsuah theilo khal le a tawp lam tal siatsuah a tum ringring asi. "Curuangah ding ih
ruat aw mi cu ralring seh a tluklo nak dingah" tiah Ca thianghlim in a  ti.{1Kor.10:12}.


Siartu zate Pathian in thazang lo pe hramseh.
Evan.David ceu{ Saya ceu te}
Tahan

.....................

Hminsin: A sermon sunglawi zet in hlawmtu Saya David Ceute tlunah lungawinak nasa ngaingai ka nei.