Zumtu mi piangthar ti aw hin Pathian duh lo zawng thil sual kan tuah tikah sual ngaidam dil kan ṭul mo?

Thusuhnak: U Henry Zaangfah ten ka question in rak answer thei pei mo? A cang thei len Bible verse thon, cun kha mi Bible ih a tih duhsan thawn. Tu ṭum ih ka lo suh mi hi kan dung ta cu a si lo... Zumtu mi piangthar ti aw hin Pathian duh lo zawng thil sual kan tuah tikah sual ngaidam dil kan ṭul mo? Ṭhen khat rongboltu hnenih ka theih danah cun dil a ṭul nawn lo Pathian in in ngaidam CIA zo, dil rero a ṭul lo an ti... ziangtin si Bible ih in zirhdan ti fiang le fel ten ka theih duh ruang ah si…

Thuhmahruai

Hi na thusuhnak hi mitampi khal in an rak buai thup ve mi a si thei tin ruat. Na thusuhnak vekin Piangthar lo thu hla cu rel lo in Piangtharpawl ih thuhla kan Bible ih in simdan ihsin kan sang aw tum ding. Can bicilh deuh ruangah duhvekin famkim tak tla in ka lo saang lo a si thei, nan hi tawk ih saannak ihsin na thusuhmi thuhla na feng the ihram ka beisei.  Kan saannak a feng sin theinak dingah hitin ṭhenhnih  ah , “ Sual Ngaidam Dil kan Ṭul lonnak Thu” timi le “ Sual Ngaidam dil Kan Ṭulnak Thu” ti’n kan zoh hnik ding.

1.     Sual Ngaidam Dil Kan Ṭullonak Thu.

a.            Rundamnak Thu thawi Pehpar aw mi ah

 Misual thi ding kan si laiah kan hrangah Jesu in thihnak tuarin rundamnak famkim Kross Parah in tuahsak ( Rom 5: 8-9). Kanmai minung sinak le zuamnak in zohman mahte’i runsuak aw thei le Pathian cohlan tlakih fel thei kan um lo ruangah, kan ai in awhsaktu ding le luatnak lamzin in sialsak tu dingah Pathian in Jesus Khrih in pe ( John 3: 16; Rom 5:10-11) . Cutin, Kan sualnak pawl hmuahhmuah, kan fellonak pawl hmuahhmuah, kan leiba pawl hmuahhmuah le van kan thlen theinak ding ih dawnkhamtu thil hmuahhmuah cu Pathian in Jesu Khrih parah a ṭhum. Isaiah cun,“ Asinain amah cu kan zawnzaihnak tuartu a si, kan natnak phurtu khal a si. A zawnzaihnak le a tuarnak pawl cu Pathian ih hremnak a si tiah kan ruat. Sikhalsehla kanmah ih sual ruangah hriamhma a pu, thil ṭhalo kan tuah ruangah vuaknak a tawng, Hremnak a tuar mi cu kan damnak a si, vuak a tuarnak cu kan rundamnak a si” (Isaiah 53:4-5) ti’n le Korinth cakuat cun,“ Sual hrimhrim thei lo kha kan mai ruangah sualah tuah in a um” a ti ( 2 Kor. 5: 21), Cun, “a vuaknak vual ah damter in kan um “ ti khal in Bible cangdang in in sim. Awle, cutin Jesu in luatnak famkim in tuahsak mi cu keimai hrangah a si tin RINNAK thawn, Thlarau Thianghlim bawmnak in kan cohlan/ zum  tikah Rundamnak cotu, Pathian faduat, van nun neitu,  mithar ah Pathian in in pawm ( Eph. 1:13; Eph 2: 8-9; 2 Kor 5:17 ). Kan mai tuahfel ruangah le thilti ruangah si lo in Rinnak ih Pathian fapa Jesus Khrih zumnak thawi kumkhaw nunnak cotu kan si ruangah ( Titus 3:5) cui Khrih ih kan nunnak cu zianghman in in siatsuah thei lo( Rom 8: 31-30). Kan nunnak cu Khrih sungah thuh in a um ( Colossa 3:3) ih Pathian kutsungih ta cu zohman in kan nunnak in lakhlohsak thei lo, ziangruangah tilen Jesu Khih cu lei le van ih thuneitu sangbik a si ruangah ( Matt. 28: 18). Kan fel le tlin ruangah rundam kan si lo ih mifel le thianghlim Jesus Khrih zumnak sawn ruangah rundam kan si ruangah cui vawi khat rundam kan sinak cun kumkhua a daih. Hi kan rundamsinak cu a pung in  a kiam thei lo, a ṭhang thei lo ih a thlep thei fawn lo ( I Peter 1: 4). Kumkhaw daih a si ih Fapa Jesus Khrih zumnak thawi a lakih Pathian in in pek mi a si ( Rom 6: 25). Hi mi hrangah ngaidam kan dil a ṭul nawn lo. Kan sualnak le tluknak khal in hi kan kumkhaw rundamnak a siatsuah lo.  Jesu kan zum leveten kumkhaw daihin vankainak hrangah rundam kan si zo.

2.           Sual Ngaidam Dil Kan Ṭualnak Thu

a.  Sual ih Kan tluuk tikah. 

Hi mi hi Khrisitian nun a si ih rundamsinak thu a si lo.  Zumtu Pathian fa si cing in sual kan tuah thei lai maw? tin thu sut aw sela ziangtin kan sawn ding? A tawizawngin kan sang a silen tuah thei tuk! Rinnak thawi ke kan kar ngam lo le Thlarau Thianghlim ih kan khah lo tikah, kan tisa duhnak thlun in Pathian ningnat ter le Thlarau Thianghlim meifar kan mah ih alh rero mi mihter, riahsiatter a theih a si ( I Thess. 5: 19) Cun, lei tisa ih um kan si ruangah sual phunphun- taksa cakhiarnak, hngalnak, zu le sa, mipat nunau sualnak , nun thlahdahawknak le  Pathian duhlozawng a phunphun tuahnakah kan tlu thei. Mifamkim, sualnak tuah dah lo le palhnak nei lo zumtu kan si hnu khalah kan si ruangah, kan Bible, Pathian thu cun sual thupha cawinak nei ringring dingah in fawrh.  Ni khat ih kan nunnakah tuah ding ih Pathian in in fial mi pawl kan tuah lo can siseh, tuah lo dingih in duh mi kan tuah sual can, Pathian duhlo mi a si ti thei cingih tisa caaknak kan neh lo ih sual ih kan tluuk can khal a um thei. Asinan, cuvek can ah Pathian hnenah sual thuphacawinak kan neih tengteng a ṭul. Cuti, sual thuphacawinak kan neih tikah, kan rin Pathian cu duhdawtnak ih khat a si ruangah kan sualnak in ngaidam lawng si lo in kan fellonak pawl tla in tleng faisal ṭheu( I John 1:9). Taksa dan ih um lai kan si ruangah nitin Pathian hmaiah sualphuannak le nun zohfelawksalnak neih hi zumtu hrangah a thupi ngaingai. Mi piangthar si cing in sualphuannak, Pathian thawi pawlkawmawknak, Bible siarnak le thlacamnak nun kan daitlang a si ah cun tluuk le bahnak in kan nun in hmuak.

(b) Sual in man a nei.

Nitin kan nunnakah kan tuahmi tinkim hin man a nei. Pathian fa si na cingin Pathian rawn lo in kan duh duh in kan nung asilen, kan duhtlannak a sualah kan hman asilen kan duhthlanak sual ih rak khal kan teel sal. Ṭhimnakah, David in Bethshebi thawi nupa ṭangṭawm sualnak a tuah tikah Pathian hnenah lungsir in a ṭap, ngaidam a dil. Pathian in cule a ngaidam. Asinan, a sualnak tuah man cu a teel thotho. A fapa in a thihsan ti thu kan hmu. Sual kan tuah mi siseh thil ṭha kan tuahmi siseh Pathian hmaiah thuh thei mi zianghman kan nei lo, kan tuahmi a ṭha a silen a ṭhatnak van lawngah si lo in hi lei khalah kan aat ( Galati 6: 7-10). Nan, thil ṭhalo kan tuah a silen nitin thuṭhennak kan parah kan tawng cumi cu kan siatnak dingah si lo in kan ṭhatnak ding sawn ah a si. ( Heb. 12: 5-6).

 Zumtu cun sual thuṭhennak nitin kan tawng. Sualnak  pakhat khat kan tuah, Pathian hnenah ngaidam kan dil duh lo, kan sualnak ihsin kan sir aw lo, kan sualnak kan tlansan duh lo a silen, Pathian nunsimnak a phunphun kan tawng thei. Bible ah kan zoh asilen, Pathian thu a ngailotu- Jonah nunah Ngahpi pumsung a thleng, Mi hngal Nebuchahnezar cu- Kum 7 sung hrampi a ei. Saul siangpahrang cu Pathian in a hnawn phah le a dang tampi rel ding a um. Sual tlansan duh lo in kan tuah vivo asilen, Pathian ih nunsimnak hmaisa- lungawinak a hlo thei, nitin um le tlan danah thiamawklonak, nawm lonak thup nunah a um thei. Cui, sin kan sualnak kan siar duh lo thotho asilen, a ai ih harsa deuh- kan pumpaak nunnak tluanlonak- kan eihawlnak a tla sia, kan hnaṭuan a sinpi lo, kan taksa ah damlonak tivek, innsang tlaksiatnak tivek a phunphun a thleng thei. Cuvek in kan nunnakah fiangtuk in Pathian nunsimnak kan tawng ti thei na cingin kan sual kan sir duh lo, kan sualnak ihsin Pathian hnenah kan kirsal duh lo a si ah cun, a tawpnak cu kan nunnak khiahsak a si. Hi mi hi Puithiam , Eli, a fale nunsimnak ih a daitlan ruangah Pathian in a ring a herh kiahsak ti kan hmu thei. “ Vawitam tak nunsimnak tawng cingih ring ti khawng hrim cu vawi leh khatah a ring herhkiahsak a si ding” tin Bible in in zirh.

Thukhaarnak

Kan Bible in Zumtupawl cu Pathian duhdawtnak ruangah , fapa Jesu Khrih in pekmi zumnak thawn a fa hniang, rocotu ah le kumkhaw nunneitu ah in tuah. Asinan, cui zaangfahnak zarah rinnak thawi kan co mi kumkhaw nunnak cu sual khuhnak le ṭhatlonak thawi nunpi dingah a ti mi a si lo.  Man awlbik- alak ih kan co mi a si nan a ṭhatlam cu man khungbik ( best quality) a si. Curuangah, kan nih khal in daitlaannak le Pathian ningnatternak ah thiamcoter kan sinak hi hmang ding kan si lo. Thil ṭha kan tuah theinak dingah le Pathian kan sunlawinak ding hrang sawnah rundam kan si ( Eph. 2:10). Zumtupawl in hi thu hi fiangten kan theih le kaihhnet a thupi.  Pathian fa ka si zo pam, sual ka tuah khal len ka rundamnak a hlo thei lo ti ih duhduh ih nunnak cun Pathian fate taktak nunnak ah cun Pathian nunsimnak kut a tuar ṭheu ih, sual a sir duh lo le sualnak ih sin a tlansuak duh lo a si ah cun a tawp a tawp ah a nunnak tiang a hloh thei( taksa nunnak).  Amahlawngte cu,  Pathian cu a fale hrangah thinsau, duhdawtnak ih khat le kan sualnak vekih in thungrul siang lo tu a si ruangah, kan sualnak a hnenah phuang in, lungsir thawi amah kan pan sal a si ah cun, kan sualnak in ngaidam ih hleiah, in thianfai sal ṭheu. A duhdawtnak kut cu kan hrangah kaupi’n a awng. Fapa tlanhlo in lungkuai thawi a pa a pansal tikah, pa’i duhdawtnak cun a ngaidam lawng si lo in a thuamthar sal.  Zumtu cun nitin sual thuphacawinak le Pathian hnenih lungawi thusimnak, nun hlanawk tharnak kan neih ringring a ṭul.

 Pathian in lo thlawsuah hram seh.

Mission le Nangmah (Thuhmaihruai)

Thuhmaihruai

Hi cabu fate hi a hmaisabik namsuah a si ihsi kum hleinga hnu lawngah a vawihnih namnak tuahsal theih in a rawng um.  Hi tawk cahmai sungih thu le hla um mi pawl tla kum ziang maw tizat sung missionarypawl le a thlahsuaktupawl nunram, a hleicein ram thim a nawrtupawl le a takih ramthim rawngbawlnak hrang hma a tuangtupawl bawmtu ah hman in a um ti ka theih tikah ka lungawinak a zual. Hi cabu ih thuken mi cu tluangtlam te a si nan a hmansuahnak lam hrang ve thungah cun kan zate hrangah thuukzet le ṭhathnempinak tlak thuhla ṭha tampi a keng.

Kum hleinga sung mission hnaṭuannak le kan leilungpi ih thil thleng mi kan zoh asilen, thil her danglam aw mi tampi kan hmu thei. Cupawl lakih a hleice mi pawl pali ka tarlang. Ahmaisabik ih thlengaw danglam mi cu Western missionary a si lo mipawl missionary ding ih ramthim luhhnawh tu an pung in an tam sinsin. Hi thu hi thu phurum za le lungawiza ngaingai a si.  Asinan cuti ti tikah Western missionarypawl kan ṭul nawn lo ti ai lawngte cu a si lo ti kan theih a ṭul. Ziangpawl ti um lo le, khawitawk minung kan si ti um lo le khawitawk ram ih piang kan si ti thleidan um cuang lo in zumtu a si ta pohpoh cun hi thupek ropi phurhsuahnak ṭuanvo hi bangran in kan nei thluh a si.  Amahlawngte, western missionarypawl hin ramthim nawrnak  ah  ṭuanvo thupituk cu an nei ti tuini khalah a lang fiang thotho lai. Cui, an ṭuanvo cu thei in western missionarypawl khalin anmai hna cu an ṭuan rero.

Apahnihnak ih thlengdanglamaw mi kan hmuh saal mi cu Evangelical ( thuthang ṭha sim a uartu) a ti aw mi sung khalah inclusivism (sakhaw dang thawn khal kan bang aw sawhsawh ko lo maw) ti mi pawmnak le cohlannak sang zet hi a si. Tawiten kan sim fiang asilen cu, inclusivism ti mi ih sullam cu Vanram kainak ding hrangah lamzin tampi a um ti ruahnak (idea)  a si ih cumi ah Khristian pawl lawng Vanram kai ding an si lo, Khristiannak cu lamzin tampi a um mi lak ih pakhat men a si ti ai a si. Minung lam hmuhdan cun, incluclusivism pawl ih hmuhdan a dik a si ti ih zum cu thil hahdam zet a si men thei. Zo si Muslimpawl siseh, Hindupawl siseh, Buddhistpawl siseh kanmah pawl thawi Vanram ah hmuh ding a duh lo tu um ding? Asinan, thu ngaingai a si mi cu cuvek ruahnak sual zatekai lungput (inclusivistic thinking) neihnak cun thuthang ṭha phuansuah a ṭulzia a nepter ih hleiah kan Khristian kekarnak le rawngbawlnak ṭhuanawp ko in in tuah.  Cuvek zatekai lungput sual kan neihnak cun missionary thlasuah a ṭulnak khal kha zumtu pumpaak nun le kawhhran khalah a thi ter.  Asinan, kan Bible cun fiangten Vanram kainak lamzin cu pakhat lawng a um ti’n in sim ih cuihleiah cui zin a um mi sun cu fapa neihsun, Jesu Khrih fehtlang lawng in a si ti ah a ti.  Hi Bible, Pathian thutak ih zirhdan hi kan hlohsan a si ah cun thuthang ṭha ih a hrampi le sinnak kan hloh fithla riai tinak a si.

Apathumnak ih thlengaw mi kan hmuh thei leh mi cu Evangelicals ( Thuthang ṭha sim uartupawl )  lakah “ vantlang lole khawtlang nun”  remṭhat uarnak: khawtlang nun ṭhansoh ter le thianfai, hriselnak lam thupitter ti le a dangdang pawl a si.  Ahman, thuthang ṭha timi cu thu le tuahnak a pahnih in a kawp aw.  Tuahnak tello cun thuthang ṭha cu a famkim thei lo. Cuvek thotho in, tuahnak thuthlang ṭha (Gospel of deeds) cu thutak phuansuahnak (proclamation of the word) tello cun thuthang ṭha a si thei lo hulhual lala.  Ziangtin si mipawl cu an pum puar kiarkiar in cawm hman nung la thuthang ṭha phuansuah mi ngaithlaaknak caanṭha an neih lo ah cun an hrangah thuthang ṭha kan phuansuah mi kha ziangtin an ṭhathnempi thei ding?  An lei taksa cu puar le tlai in kan cawm tla a si men thei, a sinan an lei nunnak a cem le veten Khrih umpilonak hmun kumkhua Meipi a si mi ah an feh thotho ding. Curuangah, Thuthang ṭha phuannak le tuahnak hi, ramthim kan nawr tikah rawngbawlnak cak nei thei ding cun an thupi zet ti kan cin ringring a ṭul.

Apalinak ih tlengawknak a si mi cu zum lotu lole Pathian theilotu kan leilungpi ah an karh ciamco hi a si.  Leitlun mipum ṭhansohnak ruangah, thuthang ṭha ih a palban hrih lo mi mipum 2.3 billion ihsin kum hleinga sungah 3 billion rori tuini ah an pung. Asinan, thuthang ṭha thlen ban hrihlonak hmun le ram ih missionary a ṭuantu pawl cu mipum ah anmah kel lawng an si ringring lai. Hi thudik le fiangfel a si mi hin ziangvek suanlam kan neih ah maw, kan ṭawngsuak a si khalah mission hnaṭuan can a cem hrih lo, missionarypawl ih hnaṭuan can a um lai, mission hnaṭuan hi kan ṭultuk lai a si ti in theihter sal. Tuisun ah mission hnaṭuan hi a thi hrih lo a si. Thupek ropi kan awih le thlun a si ah cun tuini ah loh theih lo in missionary tampi kan leilungpi in a ṭul hrih a si.

Curuangah si, hi cabute “Mission le Nangmah” khal hi pehzawm in kan ṭul hrih lai nak san.  Mission hnaṭuannak thu thawi pehparaw in na hrangih Pathian in ṭuanvo a lo pekmi na ruahnak le na sawnkirsalnak thawn Pathian in lo thlawsuah hram seh.


Dr. Larry W. Caldwell

Leitlun Khai LinglettuPawl -Zianghman lote Ihsin Miropi Zetah

1. Mizan sun ih thawng inn sung ih um rero,a unau pawl khal ih zuar men mi...tuisun ah mi ramdang lak ah uk tu tiang ih cang Joseph {Joseph hi a u le pawl ih an zuar lai le sual puh tuar in thawng inn sung ih a um lai ah khan a mangman mi kha a tak ih a thlen ngaingai ding a zum kei maw? a zumngam ka zum lo, asinan kan Pathian cu mi rinum Pathian a si,vision{sunmang} pe tu khal Amah, a famkim ter tu khal Amah thotho a si.{Gen.39--45}.

2.Mizan sun ih hramlak ih Tuu khal rero ...tuisun ih Israel siangpahrang ih cang David{2.Sam.7:8--10}.Tuu khal ihsin siangpahrang tohkham ah to tertu kan Pathian a si.{David khal Saul siangpahrang ih thah a tum lai ih thihṭih ah hramlak ih a tlan rero lai ah khan nikhatkhat ah siangpahrang ka ṭuan leh ding ti hi a ruahsan ngam ka zum lo}.Unau, tui na dinhmun zoh in na beidong mai aw hlah,Bawipa in na ruahawknak hnakih ṭhasawn na hrang ah tumtah mi a lo neih sak ve a si{Rom.8:28}.

3.Mizan sun ih ramcar ih mi Tuukhal ih um rero men..Tuu khal ih a nun{Ba uah}hmanglan ta men ding ih ruat aw zo...tuisun ih Israel mipi hruaitu ropi tak ih cang Moses.{Pathian in thu ngaithlak ih a hman tum mi pawl hi tlimno lak ah si lo in nelrawn ramcar ah training a pe ta ṭheu a si.e.g.Moses...Exo.3.Zisu..Matt.4,Paul..Gal.1:17--19}.

4.Mizan sun ih leilet rero pa tuisun ah prophet ropi ih hung cang Elisa{1Siangpa.19:19-21}.

5.Mizan sun ih Ngakai rero,ca khal phunsang kai lemlo...tuisun ah Jerusalem khawpi hnin thluh ko ih thuthang ṭha simtu Peter[A mualpho zo nak,Zisu a phatsan zo nak hmun Jerusalem lala ah Bawipa'n ropi tak in a hmang.Unau, Setan ih a lo mualpho ter nak hmun rori ah Bawipa'n nehnak lo pek sal a duh,curuang ah tho aw la ṭan la sal aw}.

6.Nuhmei fapa, an farah tuk ruang ih tlawng hman phunsang kai thei lo{phunruk tiang lawng kai mi}...asinan leitlun pi theih Evangelist ropi ih rung cang DL Moody.

7. A harhdamnak a ṭhat lo tuk ruang ih Mission board hman in missionary ding ih a dil nak voihnih lai a hnawlsak mi,tingaihnak an theih lo ruang ih a duh em mai feh ve men ko seh ti ih missionary ih an thlah mi,..a hnu ih missionary ropi ih rungcang David Brainerd{Red Indian pawl lak ih rawngbawlnak hlawhtling emem}.

8. India pawl ih kedam siat ṭhi ih mission hna ṭuan ih mihlawhtling emem William Carey.
9.Nuhmei fapa farah tuk ruangih cazoh nak ding far ti van ding hman nei lo ...asinan American rampi president tiang ih rung cang sal Abraham Lincon{America president 16 nak}.

10.Tlawng a kai lai ah ca a thiam lo tuk ruang ih an zirhtu nu{sayamah}hman ih beidong pi mi thlathum{3months}te lawng tlawng kai nan leitlun pi theih Scientist ropi ih rung cang Thomas Elva Edison.

11.Kumkua a ti tiang hman ṭhiṭha ih ṭongthiam hrih lo,a hna khatlam set betbet...asinan leitlun pi theih Scientist ropi ih rungcang Einstein.

Hipawl lo khal tampi an um nan ngan cawk a si lo. Hipawl nun kan zoh asilen Bible ih sim vek in "An hramthawk ah cun fate zet an sinan a tawp lam ah cun ropi tak ah an cang ta"{Job.8:7}.Ziangruangahtilen...Pathian an rinsan, tairialnak an nei, dung an sip maimai lo, tuarfainak nun an nei, pekawknak taktak thawn tangdor ten hna an ṭuan...curuang ah a si. Kan Bible in, 'I cawisangtu cu ka cawisang ve ding ih i hmuhsuamtu cu ka hmuhsuam ve ding a ti"{1Sam.2:30--31].

"Curuangah a tikcu can te ih a lo cawisan thei nak ding ah ziangkim ti theitu ih kut hnuaiah cun tangdor te in um aw"{1Pet.5:6}.

Siartu za te Bawipa'n lo thlawsuah hram seh.
David Ceu{Ngailan}
Evangelist

Ziangruangah Zumtupawl Kan Tluse Ṭheu?

1. Setan thlemnak ruangah{Lk.22:30-31,1Pet.5:8}

Zumtu pawl hi Setan in nitin thlem thlu ding in in bawh ring ring. Zumtu thlem thluuk hi Setan ih rawlthaw bik pakhat a si.Curuangah Pathian ralthuam famkim le thlacamnak thawi do ding kan si{Eph.6:10-18,Matt.26:46}.

2.Tisa nak{Mah le mah rinsanawknak}ruang ah{1Kor.10:12}

Bible in, "Ding ih a ruat aw mi pawl cu an tluuk lo nak ding ah ralring seh a ti".  Kanmai cahnak men cun thlemnak fate hman kan neh thei lo ruangah Pathian lawng kan rinsan a ṭul.

3.Rualpi ṭha lo pawl ruang ah{1Kor.15:53}

Zumtu cun{a hleice in piangthar pek te tla cun} kan kiangkap{kan pawl mi rualpi hi ralrin a
ṭul nasa.Ziangah ti le Bible in "Rualpi ṭhalo cun nun canṭha a siatsuah ati".{1Kor.15:53}.

4.Thlarua lam ih rawl um lo nak hmun ih um ruangah{1Pet.2:2-3,Heb.5:11-12}

Leitlun ah a nung mi pohpoh cun rawl kan ṭul. Zumtu khal kan ṭhan thei nak ding ah rawl kan ṭul.Thlarau lam ih rawl ṭhatnak hmun ih kan um lo len thluuksiat a awl te.

5. Daithlannak ruangah{Jer.48:10}

"Daithlaang zet ih Bawipa'i hna a ṭuantu cu camsiat in um seh a ti." Daithlannak hi thluuknak hram a si. Thlacam,Bible siar le zumtu dang thawi fellowship daithlannak hin thluuksiatnak a thlen thei a si.

6. Zumtu dang thawi pawlkomawklonak ruangah{Heb.10:25}

Zumtu cu pakhat le pakhat em alh aw ton ding kan si. Zumtu dang thawi pawlkom awk mal nak cun thlahdahawknak le tluuksiatnak tiang a hring thei a si.

7.Pathian thlawsuah hmansual ruangah{Hosea.2:8}

Pathian thlawsuah hmansual hin thluuksiatnak tiang a thlen. Fapa thlanhlo khal a pa’i Ro a
hman thiam lo nak in a nun a siatsuah a si kha{lk.15:11--30}.

8.Zirhnak diklo ruangah

Zumtu pawl in zirhnak dik lo hi kan do a ṭul. A thlahdah aw zawng le a poisa lo zawng vek ih zirhawk nak ruangah hin zumtu'i nun a siatsuah thei asi.1Tim.4:1-3}.

Adang khal a um lai nan hivial in sihrih seh, siartu za te hnen ah Pathian thlawsuahnak thleng hramseh.

Saya Ceu te
Tahan

Mikip Hrangih Lungawinak Thuthang Ṭha

" Ṭihhlah uhla,Ngaihnik uh,Mikip hrangih lungawinak maksak thuthang ṭha ka run thlen a si"{Lk.2:10}.

 1. Ziangruangah mikip in thuthang ṭha kan ṭul?

               Eden tluuksiatnak ruangah milai thuanthu cu a se thluh zo ih,Pathian mithmuh ahcun mithi, mihlo, Setan fa, Hellram tla ding, mahte rundam aw thei nawnlo le misual selinglet thluh zo mi kan si. Adam ih thluuksiatnak cun kan thuanthu a siat ter thluh zo ruangah thuthang ṭha kan ṭul nak san a si.

    

2. Thuthang ṭha cun ziang in pe? {or} Ziangruangah thuthang ṭha hi lungawinak maksak a si?

 {a.} Thuthang ṭha cun sualman leiba kan neih nawnlo zia in sim{Kol.2:14}.

             "Kan sual leiba ngannak cazin cu a sungih a um mi, mi a ṭemtawntu dan terek pawl thawn a phiat hlo zo,kanmah donkhamtu si nawnlo dingah a hlonhlo zo a si"{Kol.2:14}.Sualman ah na thi ding ti mi hi thuthang sia cu a si. Asinan zianghman tuah theimi kan neihlo laitak ah,cui can te ah cun Pathian in a fapa in pe ih Zisu cun "Sualman thihnak"cu a thihnak in in kuansak thluh zo a si. Curuangah sualman leiba na nei nawnlo timi hi thuthang ṭha cu asi. Unau sualman thihnak ding leiba na nei nawnlo ti mi hi rak thei ve thlang aw.Thuthang sia cun leiba in cawh, thuthang ṭha cun in kuansak.

 {b}.  Camsiatnak a cem ter{Gal.3:13}.

           "Khrih cu kan aiah camsiatnak a tuarih dan camsiatnak sungih ta in runsuak zo a si"{Gal.3:13}. Eden sual ruangih camsiat kan sinak hmuahhmuah cu Khrih in thinglamtah parah a thih pi zo ruangah kan hrangah camsiatnak a cem zo a si. Isaak ih aiah Tuu a thih veten Isaak a luat vek in Khrih cu kan aiah camsiat nak tuar ih a thih zo ruangah nang le kei in camsiatnak thihpi ding kan nei nawnlo. Hi hi a si lungawinak thuthang ṭha cu.

{c].Lamzin thar le lamzin nung in sialsak{Heb.10:19-20}.

           "U le nau pawl lamzin thar le nung in sialsak zo ih puanzar khal a tleekthluh zo,Khrih thisen ruangah hmunthiangbik sungah neeltak le ngamtak ih luh theinak kan nei zo a si"{Heb.9:19-20}. Khrih thihnak, a thisen le a thawhsalnak cun vansangkaa in on sak zo cu cu a si thuthang ṭha cu.

{d}.Setan le thihnak in nehsak {Heb.2:14-15}.

              " Nauhak pawl hi thisen le taksa nei an si vek in Amah{Khrih}khal cuvek ah a rungcang, a thihnak in thihnak ih thuneitu{Cu Cu Setan asi}cu a siatsuahnak dingah le thih ṭih ruang ih damsung saltaang mi pawl a runsuahnak dingah asi{Heb.2:14-15}.Khrih thihnak cun Setan le hellram in nehsak zo a si. Ṭih ding a um nawnlo, Curuangah a si Vancungmi in "ṭihhlah uh "{Lk.2:10}ti ah a ti. Thuthang ṭha cu ruahsannak nung in petu le hnangamnak in petu khal a si{1Pet.1:3,John.14:27}.

{e]. Thinlung kekkuaimi tuamdamtu le riahsia mi pawl hnemtu a si{Isai.61:1-3,Lk.4:16-17}.

              "Zion ih riahsia mipawl hrangah vutzam aiah pangpar ṭhi, riahsiatnak aiah lungawinak,thinlung kekuai mipawl tuamdamtu dingah i thlah ih Bawipa'i thlarau cu ka parah a um a si"{Isai.61:1}. Unau na tha a nau in na bei a dong maw ?Na thinlung a har in  ziang riahsiatnak na nei? Na thinlung a kekuai maw? Cuvek minung pawl hnenah a si thuthang ṭha in lungawi nak pek in tum. Bawipa zoh aw a lo hruai ding a si.

Siartu zate thuthang ṭha ih thlawsuah dong cio uh law.

 Evan. David Ceu