Thlawsuah hi Kan Tlûknakah a Cang Pang maw?

Thusuhnak tluangtlamte “ Thlawsuah dawn a duh lo kan um maw?”ti’n sut aw sela, “ um lo” ti’n ka sawn cio ko ding ka zum. Ahman, leitlun minung hmuahhmuah in thlawsuah, malsawm dawn kan duh cio. Cuti asilen, “ Thlawsuah malsawm (blessings) kan ti mi hi anmahten an ṭha cio maw?” ti’n sut aw bet sehla teh, “ Aw, an ṭha” tin kan ti cio sal ko ding, asinan thlawsuah malsawn dawndan ding ih a timlam aw lo pawl cu tlûknak lole thil ṭihnung –siatnak in a hmuak ve thung. Pathian in thlawsuah malsawm pek ding mi a hawl rero nan mitampi ih thinlung le nun cu thlawsuah malsawm co dingin an tiar (ready) hrih lo. Malsawm thlawsuah tampi dawn khal hin ṭhatnak lam silo tlûknak le siatsuahnakah mi a thlen thei.

Company tumpi rak hohatu, Christian ih rawng cang, Kawhhran tumpi, nung le cakzet ih  pastor hnaṭuan rak ṭuantu  mi pakhat hi a um. Mi turu le thusim hriakthih co zetu a si. Pathian in thlawsuah mangbangza a burh ih cutin sumdawnnak hlawhtling zetzet tampi a nei. A tirte ah cun mi tampi thlawsuah malsawm pesawngtu a si. A hawng rei deuh in thlawsuah malsawm a dawn mi le a hlawhtlinnak ah cun duhtawk nawn lo in politics ah a lut. Vawitampi rampi ukawknak (public Office) luah ve ding ah a bei, asinan Pathian in a hlawhtlin a rem ti lo.  Nasa ngaingai in a thin a nau ih cutin Bawipa ih a rinnak khal thlauthla in, khua a rei vivo cun a dungtawlh. A dinhmun siatbet vivo in , a netnakah cun a innsang  nu-Kristian nupi duhnung zet le a fanau pawl suahsan in a nunhlun tisa nawmnak cen in a um. A thlawsuah dawn mi pawl cu Pathian sunlawihtu si lo in a hrangah camsiatnak ah a cang.

Pathian hnenah thlawsuah malsawm lo vur dingih na dil, thla na cam hlanah, malsawm thlawsuah na dawn dingmi kilkhawi thiam dingah nungcang ṭha/dik le fel na neih ta a ṭul. Na ralring lo asilen lennak le neihnunnak in na nun a lo siahsuah thei. Asinan, Pathian cu  mi rinum, duhdawtnak le ngilneihnak ih khat a si ruangah dungtawlh le a tlusawn zo mi a fale ngaidam le tundinsal theitu a si.  Lungsir ih a hnenih tlulutsaltu a falepawl cu a duhdawtnak kut zabawng in a cohlang sal ṭheu.  

Kawhhran pakhat khalah hin pastor kum upa tuk lo a um.  Cui, pastor cun a pastor hnaṭuan cawlhsan in sum a dawng.  Hlawhtlinnak le lennak nasa zet ih vur a hawng si tikah Pathian a theihhngilh.  Rinnak ah a dungtawlh ih kum 5 sung rori zumlotupawl vekin a nung. Kum 1997 ih sumdawnnak tlakniam ciamco ṭumah khan a sumdawnnak khal a tla niam ve. A sum lakluh pawl cun a loan, tangka pungṭhang ih a pukmi rulhnak a daih nawn ta lo. Cuisin, hnadang a innsang tundinnak le leiba rulhnak ah ti’n a hawl ciamco, nan hnaṭuan ding a tawng fuh thei lo.  Sumpai lut um nawn lo ti ngaihnak thei lo cu a neih cia mi thil ri pawl a zuar a zuar ih a netnakah a umnak innpi lawng a tang thlang.  An nitin ṭulsam mi le eiin hrangah nuam tete’n an sui le ngun, phones, hnipuan le neihsiah hmuahhmuah an zuar thluh tlang. Nikhat cu a duhdawt zetmi a fanute in hnipuan se ngaingai, hlun zet le tlek diardiar pawl a hruh a hawn hmu cu a ning a na tuk ih, “ Aw,  ka cem thla riai aw “ ti’n a ti. A duhdawtmi a fanute a hmuh cun a lung a zur tuk ih umngaihnak a thei lo, a riah a se tuk lawm mam.  A khan (room) sungah a lut lohli, sangka a hren aw ih cutin khukbil in Pathian hmaiah nauhak ṭah in a ṭap ciamco.  Hiti’n cu pa cun amai thu  “ Pathian hmaiah ṭhing awk rual lo in mitthli canghnap thawn ka ṭap ciamco” ti’n a rel. Hiti’n, “ Bawipa, Ka sungkhan a si ( I surrender to you), I ngaidam aw, I bawm sal hram aw”  ti’n thla a cam. Cuti mitthli rualriat thawi Pathian a ṭahhnawh sal hnu cun “ ka zang deuh vuarvi ngaingai” ti’n a ti. Thil ziangmaw si hin a taksa ihsi suahsan vek hin a thei aw, nan ziangbik a si ti cu a thei lo- phurrit maw, beidawnnak maw lole khawsia (demon) khal a si thei. Culeveten, Bible a siar ih cui a Bible siarmi cun a nun ah thu a sim, “ BAWIPA cu nanmah runtu si dingah a ṭawntai tuk lawmmam lo. Bomnak dilih nan aunak theilo tiangin a hna a sêt lo. Nan sualnak ruangah a lo thei lo a si sawn. Amah biak nan tum tiah Pathian thawn a lo ṭhentu cu nanmah ih sualnak a si.” ( Isaiah 59:1-2).  Cuihleiah, Pa ih sualnak in fale tiang a siatsuah thei ti mi a vawn thei bet ( Exod. 20:5; 1 Sam. 12:13-19). Sual sir ih ngaidamnak Pathian hnenah a dil ih thla a cam hnu cun , a tlunah hnangamnak maksak zet a rawng thleng vekin a khansa. A thaisun ah phone thawn hnaṭuannak ding a hawl ih cutin, hnaṭuan ṭha zet manager hna a ngahsal. Tufang ah cupa cu thlarau lamih hlawhtlinnak le taksa lamih hlawhtlinsalnak zin ah um in Pathian ih ṭhatnak a tepsal.

Unau, nangteh Pathian ih thlawsuah malsawm na dawn mipawl hin Bawipa a lo naihter sin maw a lo hlatter sin? Thlawsuah malsawm na dawn mi hi amah na hngilhnak le na tlûknakah a cang sual pang maw? Kan lennak, neihnak le thlawsuah pawl hmuahhmuah hi Pathian kan hngilhnak, kan hngalhngawnnak , hrosuannak le titerawknak ah hmang ding kan si lo. Malsawm thlawsuah kan dawnnak san hi midang hnakih kan thiamce, ṭuanthei ce le cungcuance ruangah a si lo, Pathian in midang hrangah bawmtu kan si theinak dingah thlawsuah in vur sawn a si. Pathian ih thlawsuah na dawn mi pawl kha ziangtin na hmang? Pathian lungawinak ti famkimtu, innsang le kawhhran, rawngbawlnak, mission hnaṭuannak hrangah na hmang maw? lole na thlawsuah pawl kha Pathian hmelphentu le amah na hlatnak hmanrua ah an cang? Thlawsuahtu hngilh ih thlawsuahmi biak hi Pathian ih huatbik mi a si. 

Thlawsuah tampi kan dawnmi pawl hi kan tlûknak ah cang lo ih Pathian sunlawinak le midang hrangah malsawm kan sinak hrangah a can theinak dingah Pathian in siartu kan zaten in bawm hram seh ti ah thlaza ka cam.