Piangthar Ih Danglamnak

1.         A sual ringring thei nawn lo (1 John 3:6,9;5:18)
     Zumtu tampi in an buaipi ṭheu mi cu piangthar pakhat khi zuu in ringring saal sehla a thih ahcun a rundamnak a hlo lo ding maw? Piangthar pakhat sualnak a tuah saal ringring ih sualih tlu ih a thih ta ahcun vanram a kai thei pei maw? Pathian lam cun rundamnak a hlo lo nan minung in kan hloh san thei ko, tiah an ti ṭheu. Asinan a tlunih  kan tar langmi Bible ahcun, "Piangthar cu a sual ringring thei nawn lo, ziangruangahtile Pathian fapa in a kilhim ih a sungih Pathian thlaici (Thlarau or thutak) a nun ngah zo ruangah a sual ringring thei nawn lo. Mi zokhal sualnak a tuah ringring tu cu Pathian fa a si lo ih Jesuh Khrih a nei hrih lo tu le a tong hrih lo tu an si," a ti.

    #  Piangthar cu a sual thei nawn lo si lo in  :
      (a) A sual ringring thei nawn lo ( I Jn.3:9 )
      (b) A sual ringring ngam nawn lo (Thufing 8:13; Isai.38:15)
  Ziangahtile Pathian ṭihnak taktak a nei ngah zo ih Thlarau Thianghlim in lam a hruai (Rom 8:14)

2.  A tlu lan ta thei lo
     Piangthar ih danglamnak pakhat leh cu sualnak sungah a tlu lanta thei nawn lo. Ziangahtile Pathian in a kutin a kai hnget (Saam 37:24). Micak ih in kaihhnget hmanah kan tlu maimai lo sikhawh Pathian cakbik ih in kaihhnget ahcun zo maw tlu lanta thei ding? Vei sarih tiang tlu hman haisehla kaihthawhin an um saal ding (Thufim 24:16). Zosaw mai duhdawtmi fahniang bah hmu ih kaitho lo um? Khatin rak bah hrih awla hmai thla lamah ka lo kai tho leh ding ti keel? Zaangfah duhdawtnak thawn kan kai tho ṭheu a si lo sawm? Piangthar tlu lanta an um keel lo. ThlarauThianghlim in a kai tho saal ringring.
    # Thuṭhimnak ah David, Samson, Peter, Jonah...an tlu nan an thosaal ṭheh.

3.        Nunsimtu PA a nei ( Heb.12: 7-11)
    Leidaan ah duhdawttu pa, nei le nei lo cu a dang aw lawlaw. Nunsimtu ṭha nei lo cu an sual daan a danglam cuang. Piangthar cu a sualle van ah khin nunsimtu Pa a nei (II Samuel 7:14). Pathian cun a duhdawtmi fa cu nun a simih thilṭha lo a tuah tikah fungfekin a vuak ṭheu. Ka piangthar ti si ih sualnak tuah khalih vuaktu nei lo, nunsimtu nei cuang lo cu a diktawk lo.

4.        Bible ca a ngaina (Tirh. 17:11)
      Naute dam cun nui hnawiti a hlam mai. Piangthar dik cu Bible ca a ngaina mai. Bera khaw pawl cu Paul ih thuthangṭha simnak in an piangthar ih Bible a ngaina zet.

5.        Pathian thu a haal (John 4:40;7:37)
     Mi pakhat khi a pianthar le pianthar lo theihtheinak a mah ah a lang thei. Cucu Pathian thu a haal maw haal lo? tiah a ṭhum aw. Mi zokhal Khrih sungih nunthar a neih ngah curco ahcun Pathian thutak ngai le zir caaknak a nei vurvo mai. Pathian thunung ngai le thangṭhatnak hlasak, thlacam a kaa thaw emem.

6.         Biakiin a ngaina (Saam 84:10; John 5:14)
     Bethesda tili kapih kum 38 mingawr pa kha Jesuh in a dam ter tikah biakinn ah va feh aw, a ti lo nan Biakinn
a pan furfo. Jesuh thawn Biakinn sung rori ah an tong aw. Piangthar Zuudawr le phekahnak dawr ah an to duh nawn lo.Pathian Biakinn an pan, an tlaihsan ih khawm an hiar thei ngaingai.

Hminsin # Piangthar  hi miṭha kan si lo nan miṭha (Jesuh ) neitu kan si.
               # Piangthar  hi kan thianghlim lo nan mithiang ih ta kan si.
               # Piangthar  hi kan fel lo nan kan felnak Jesuh a si.
               # Piangthar  hi kan cak lo nan micakbik kan lamah a ṭang.
               # Piangthar  hi kan lian lo nan milian bik ih fahniang kan si.
              # Piangthar  hi kan fim cuang lo nan vanlam fimnak neitu kan si.
              # Piangthar  hi kan mawi cuang lo nan Jesuh kan mawinak a si.

Evan. S. Tha Nei Fai

Jesu Khrih A Tawngtu'i Nunnak.

Thuhmaihruai

Pathian in milai hi Amah bangpi in in sersiammi kan si ruangah Amah thawi kan lentlang, kan kawmawk, kan pehzawmawk le umtlang ding a tumtah. Asinan, milai sual ih kan tluuk le Pathian thawn kan pehzawmawk lo tikah kan nunnak cu sual in in uk ih cutin a duhnak lamlam ah in mawng. Sersiamtu Pathian sunlawih, Amah thangṭhat, A mah thawi lentlang hnakin tisa sualnak tuah le ṭhatlonak thawi nunsuah nak in kan nun in luah khat ṭheu! Asinan, amah thei lo ih kan um le kan tluksiat tik khalah Pathian cun in hngilh in in tansan kumkhua siang lo. Amah thawi kan tawnawk le pehzawmawk thei dan ding lamzin in hawlsak sal. Cutin Jesu cu leitlun ah rawngṭum in Pathian thawi kan pehzawmawksalnak ding lamzin in sialsak. Jesu cu leitlun a lenlaiah mi aanhai le beidawng tampi in an rak tawng. Mi naa pawl in damnak an co, mitcaw pawl in khua an hmu, hnasetpawl in thu an thei, kebai le zengpawl khal ke in an feh ih Pathian ih runsuahnak maksak zetzet an co. Cuih runsuahnak a cotupawl nunnakah thlengdanglamawknak nasa zetzet hmuh ding tampi a um. Tuiṭum khalah Mark Bung 5 pa in Jesu a tawn dan le cui a tawnmi Jesu’i ruangih a nunnak pumhlum ih thlengdanglamawknak thlengmi zoh in thazang kan la tlang ding.

1.  Jesu lo cun ruahsan ding nei lo pa a si (Mark 5:1-5)

Jesu’n a kutcak mangbangza thawn Galilee tilet le tisuar a rehter ih a dungthluntupawl thinphannak le thihṭihnak ihsin a runsuah hnu ah ( Mark 4:35-41) a khatlam ral Gerasene peng an va thleng. Cuih hmun ah khawsia ih a polh Mipa in Jesu a ra tawng. Hi pa hi khawsia ih luhhnawh, khawsia ih duhduh ih thunun le ukmi a si ruangah kan Bible in hitin , “ Cupa cu khawsia ih polhmi a si ih, thlaan lakih a ummi a si. Zohman ih hreen thei lomi pa a si. Vawi tampi thir cikcin rori in a kutke an ṭem ṭheu na’n an ṭem tinte in thirhri cu a ticat ih a ke ṭemnak thirhri cu a botcat ṭheh, zohman a kaihrem theitu an um lo. A sun a zan in thlaan lak le tlang lakah a vak ih amah le amah lungto in a sun, a at aw phah ṭheu” ( c.2-5) ti ah a ti.  Amah hi milai cu a sinan polh mi a si ruangah khawsia ih luhhnawh, thunun le uk mi a si. Cun, “Thlaan lakih ummi”tin kan Bible in in sim ruangah a rualpipawl cu mithipawl  lole mithi thlarau siapawl an si kan ti thei. Cule a sungthu ihsin veng le hnen, unau sungkhat pawl khalin an theitawp suahin an ngaihven lawk zet a bang ziangahtilen “ Vawi tampi thir cikcin rori in a kutke an ṭem ṭheu” tin kan Bible in a ti ruangah. Asinan, cuti an ngaihsaknak le tuahṭhat an tumnak khal cun ṭhathnemnak a suah pi lo a bang ziangahtilen “ an thirhri cu a ticat ih a ke ṭemnak thirhri cu a botcak ṭheh” ti’n kan hmuh ruangah. Culawng khal siloin “ amah le amah lungto in a sun , a at aw phah phah ṭheu” ti ah kan Bible in a sim bet.  Mai nunnak le taksa siatsuah ding ih sual ih duhtawk ih a velh le thawi mi a sizia kan hmu thei.

Hipawl hmuahhmuah ihsi kan hmuh thei mi cu hi pa hi milai lam ah cun ruahsan ding um nawn lo rori mi a si. Minung a si lai nan mithi tluk ih sung le kua venghnen khal ih an hmuh mi a si.  Tulai ṭongin kan rel a silen sung le khat unau khal ih buaipi theih nawn lo , hremhmun aikaih kan timi pawl vek kha a si ding. Jesu tello ih a dinhmun kan zoh asilen a liamcia ih a dinhmun siseh, atu fangih a dinhmun siseh, a hmailam dinhmun hrangah ruahsan ding zianghman nei lo, mi hmuahhmuah ih hnawn le hnihsuah, mibang lo an ti mi a si.  Cuhnakih sebik, khawsia ih pawlh le ukbet mi a si bet. Hi thuanthu nung ih in sim a tummi cu Jesu Khrih nunnak taktak ih a neilotu pawl ih umdan a si. Hi thuanthu hin leitlun hmunkip ih milai, Jesu neilotupawl zate dinhmun a awh thei ding.  Sual in siseh, tisanak in siseh, duhamnak le ṭhatlonak in remote control ih TV kan control bangin kan taksa le nunnak in mawng ih a sal ah in khum. Jesu a neilotu pohpoh cu kan hmailam can a thim, a bit bepbep. Asinan, kan dinhmun le sinak fiangten sualin in uk ruangah ziangtluk dinhmun sia in kan um tit la kan theifiang aw thei cuang lo. Tuini ah mi piangtharlopawl ih kan dinhmun cu hi pa vek hi kan si. Jesu tello cun ruahsan ding neilo, thlarau lamah mitcaw le mi aa kan si. Nangteh hi pa ih dinhmun ah na tanglai maw?

2.  Jesu a tawng ih damnak famkim a co (cang 6-13)

Hitin kan Bible in a ngankhum, “ Hla nawn ihsin Jesu cu a hei hmu;  a va tlan ih a hmai ah a khuk a bil ih, a aw neih patawp in, “ Maw Jesuh, Cungnungbik Pathian ih Fapa! Nang le kei ziangso kan seng aw? Pathian hmin in ka lo dil, I hrem hramhram hlawh aw!” ti ah a au ciamco” (c. 6-7). Hi tawkah hi  khawse luhhnawh pa in Jesu a hmuh tikah zovek mi a si ti kha a thei ih a ṭih tuk lawm mam! A hlanah cu mi ih kaih khih theih lo mi, mi ih tawng ngamlo mi, mi hringhrotu a sinan tu- ah cun Jesui hmaiah a khur, a sinak a hmu aw ih a ṭih tuk! Zangfah a dil. Ziangruangahtile Jesu in “ Thlarau siava , hi pa sung ihsin suak aw”(c.8) ti ah a rak ti ruangah. Cule Jesu in , “ Na hmin zo a si?” ti ih a suh tikah. Hi polhmi pa cun “ Burpi” ka si ziangahtile kan tam ngaingai” ti ah a ti. Hi tawk ih burpi timi hi mirang cun Legion ti a si. Legion timi cu Latin ṭawng ih lehmi a si ih cumi cu Rom Ralkap battalion tumbik relnak ih hmanmi a si ih mipum 3000 ihsi 6000 karlak hrawng tluk relnak a si. Himi ihsi fiangmi cu hi pa luhhnawhtu khawsia pawl hi pahnih khat mai silo tampi, burpi an si ti ai a si. Jesui hnenah, “ Khur thukpi sungah in thlak hram hlahaw” ( Lk. 8:31)ti ih an dil ruangah Jesu in cawp le cilh ih hremcih hngal lo in vawkrual sungah a luhter ih cutin vawkrual pawl cu an zaten kham ah an tla that ṭheh. Hi tawkih “ Khur thukpi” ti mi hin kum thawngkhat uknak sungih Setan thlak ih a umnak ding hmun a khih hmuh. Jesu cu Setan tlunah thuneihnak nei hmanseh la, Setan khuah khirh ih a um can a kim hrih lo tikah a hrem hrih lo ( Thup. 20:1-3). Satan in dik lo zetzet in zumtu siseh zumlotupawl parah hnaṭuannak can malte lawng a nei thlang ti a theihawk tikah kiosa rilrawng bangin nitin zantin mi a thlem. (I Pet. 5:8).

Cutin a sungih khawsia an suah tikah cui mi aa pa, ruahsannak neilo pa, mi ih hnawn mi pa cu a lung a hawng fim ih a damfel (c. 15). A saltannak Satan kut ihsin suah zalen a si. Thangkam tu’i thangsung ih vate a suak bangin kumkhaw hrangah Jesu a tawnmi pa in a suah zalen! Halleluijah! Unau, Jesu in ziangsal hmanah kan tan a siang lo, tuini ah ziang sal pakhat khat ah na tang lai maw? Jesu’n na tannak sal ihsin tuini ah lo suahter a duh. Jesu a tawngtu cu an tlansan theilomi sualnak, anmah a ṭemtawntu sual le Satan huham sungin Jesu’n pehzawm in a runsuak vivo.

3.   Jesu a theilotu a kiangnai um pawl an mangbang (c. 14-17)

Cui khawsia ih polhmi pai nunnak ih thlengawknak a thlengmi an hmuh le theih tikah Vawk khaaltupawl cu an mang a bang tuk ih khawsungah le lo lakah cuithu cu an sim ciamco. Cutin mipipawl cu thil cangmi zoh dingah Jesu’i damternak hmun ah an va feh. Cule, dam le harhfim ih khawsia ih a polh atmi pa a rak um le hnipuan ṭha tei a rak hruk kha an hmu! Cutikah an thin leh lam a phang ih thil cangmi pawl kha mi dang an sim sawng vivo. Cule, “Jesu kha an ram tlansan dingah an dil ciamco” (c.17).  Hi tawk ihsi kan hmuh thei mi cu Jesu’i  phuansuahawknak hmun ah zumlotupawl mangbang in an um.  Jesu’i kutcak ih a runsuah mi pa ih thuanthu cu khawsung le tlangtluan a fan cih ih cutin hngawng nasa zet a nei. Hi zawnah kan nun zohkirsal aw cio dingih ka sawm awk duhmi cu Jesu neitu kan sinak hin kan kiangkap le in theitupawl nunnak ziangtluk thu a sim ban ve? Kan kiangnai ih a ummi pawl hin kan neihmi Jesu’i ruangih kan parih Pathian kutcak langsuak mipawl ruangah danglamnak thilthleng kan nun ah hmuh ding an nei ve maw? Ka piangthar ti aw si ih a ṭhazawng lole a ze zawng talih kan kiangkap le innsang pawl ih theihpi mi kan si lo ah cun kan pianthar dan hi zohfengawk sal a ṭul ding! Bawipa’i kutcak nunnak ih  a hmutu le a teptu pawl nun ah danglamnak nasa tak a thlen rualrual in an kiangnai ih umpawl khal in a ṭha zawng maw a se zawng talin an rak hmu ban ringring.

            Hi ṭumih Jesu’i phuansuahawknak thilthleng mipi pawl in an sawnkirsalnak (response) lawngte cu a ṭha zawng si lo in a sezawng in a si. Keimai ruahdan ah cun kha tluk mi besia, dam cing ih thi, minung khal ih ruah nawn lo, hawng piangthar, damsuak cu mipi lungawi ih Jesu kan hnenah kumkhua in in campi aw ti awm tak an si nan! Jesu kha cam ding in an sawm lo men lawng si lo a rang thei bikih an ram suahsan lohli dingah an ngen! Ziangruangah a si pei? Asan tampi lakih pakhat a um thei mi cu khai mipipawl kha leitlun hlawn thilri ah an buai tuk ruangah minung nunnak hnakin sum saw le neih thilri an duhsawn. Curuangah, Jesu a um cun midang dam lo le cak lo tla a dam ter vivo kei, cule an ṭilva pawl tla an can vivo ding ti an phang. Leitlun thilri in an nun a luahkhat thluh tikah Jesu’i hrangah an nunnak le can an pe siang lo. An thinlung sangka an khar aw. Tuini khalah mi tampi cu kan hmuh thei mi a langte sung larnak, sum le saw le leitlun thil in in ciahneh tuk ruangah thlarau hlo veinak, kumkhaw nunnak le ro hrangih can le neihsiah pek, Pathian thu thawi nitin kekar hnakin leitlun thawi mil aw ih nun kan hril sawn! Nan, kan Bible cun tisa duhnak thlun cu thihnak tin a ti ( Rom 8:13). Nang teh atufang na nundan bihkir in tisa duhnak in maw na nun thlarau ih a lo hruainak thlun in?

4.  Jesui thupek lung in a innsang ihsin rawngbawlhna a thawk (c.18-20)

Mipi in Jesu cu duhlo in dawi hmanseh la damnak famkim a cotu cun a thlah siang nawn lo. Jesu lawng sungih a luh zawng ah, “ Na hnenah ka feh ve pei” ti ah a dil. Tong dangin kan rel  a silen ka lo thlun duh a tinak a si. Asinan, Jesu in mi hrekkhat a damter mi “in thlun aw” ti ih a kawhmi ( Thimnakah, dungthluntupawl le mi dangdang) an um  laiah hi pa cu “aih!” tin a ti. Cuhnakin va tlung aw la Bawipa in na parih a tuahmi le a lo zaangfahnak cu na sungkhawpawl hnenah va sim aw tin a ti. Hi thu ihsin kan hmuh thei mi cu Pathian in kan pumpak ih rundamnak kan co, damnak kan co mei hi a rak duhtawk lo ti a fiang. Damnak co hmaisatu kan si ah cun a co hrihlopawl hnenah Pathian kutcak kan siar mi phuang le sim, zirh le aupi ih sungkua ih rundamnak kan co lai hlan lo vei aw ding kan si thu kan zir thei. Hi Jesu’i runsuahak cotupa in a thupek thlun in a innsang le ram Dekhapolis (khawpi pahra pawl) hmuahhmuah ah feh ih Jesu’i kutcak a siarmi a sim le aupi tikah mi tampi mangbang in an um ti kan hmu. Bible thuthiam hrekkhat tla  cun Mark 3 sungih sim mi peng dangdang- Galilee peng, Judea peng, Jerusalem khua, Idumea peng, Jordan tiva ihsi nisuahnak lam ram, Tai-ar le Sidon kiangkap ram pawl tiang ih mipi ra mipawl hi Mark Bung 5 pai thusim thei le teti khatnak ihsi Jesui kutcak hmuh duhtu an si ti ah an ti hngehnge.

            Mi piangthar, Jesu’i nunneitu kan si ah cun kan rawngbawlnak hmasabik cu kan innsang a si. Nupi fanau nei kan silen kan nupi fanau a si. Lawnglak le fala tlangval kan si len kan nu le pa, u le nau pawl an si thei. Taksa lam ih an ṭulnak sawmdawl a thupit hnak hman in thlarau lam ih an dinhmun hi kan liangpar ih ṭhumaw mi a si.  Kan piartharnak hi in theihpi lawng a tawklo kan neihmi Jesu hi an neih ve theinak ding tiang lam hmuh le pitlinter kha kan mawhphurh a si. Rawngbawltu kan si khal len lenglam rawngbawlnak kan thupitter tuk ruangah innsang lam ih sung le kua taksa le thlarau lam ṭulnak kan thlahthlam ding a si hrimhrim lo. Bukawtawn ten rawngbawlnak kan fehpi rori a ṭul. Jesu’n damnak a pekmi pa kha na innsangah va kir aw a ti bangin tuini ah zumtu tampi le rawngbawltu tampi hi Jesu’n na innsangah va kirsal aw tla in ti ve men thei so khaw? Innssang rori ih Jesu kan neih ngah lai hlanlo cu mi piangthar in kan mawhphurhnak hmaisa bik kan thlauthla tinak a si. Nan innsang an damkim maw?

Thukharnak

Hi thuanthu nung ihsin mah le mah kan dinhmun zohkirsal aw cio uh si. Khawitawk dinhmun ah kan ding? A pakhatnak Jesu tello ih ruahsaknak neilotu dinhmun ah maw kan um lai? Apahnihnak, Jesu nunnak ih a tawngtu le damnak famkim a co pekte ? Apathumnak, Jesu a thei lotu a kiangnai ih um pawl vek? Lole apalinak, Jesu’i thupek lung ih  a fialnak vekih amah riantu? Hitawk ah khawsia ih luhhnawh ruahsannak neilopa cu ruahsannak famkim le damnak famkim neitu Jesu a tawn leveten a thuanthu a danglam in a nundan a linglet ta viarviar. Jesu a nunnak ih a tawn hnu ah cun a nunhlun thlanmual le tlangah aukio nawn lo in, a duhdawtmi u le nau, minung hnenah Jesu’i rundamnak tetti a khan, thu a sim. Unau, nangteh Jesu’i rundamnak cotu na sinak hin na nunnak ah ziangtluk danglamnak a lo thlen? Jesui rundamnak neitu, cotu ka si ti cingin tisanak le na nunhlun Aigupta Sabel na ngaisual pang maw? Lole zumtu ka si ti cingin mai innsang ih rawngbawlhna ṭuan ṭultukmi na thlahthlam pang maw? Jesu in kanmah pumpaak lawng rundam kan si hi in tumtah sakmi a si lo, kan sungkaw run ih van sui khawpi kan luh le amah thawi pumpak ih pehzawmawknak nung kan neih ding hi a duh a si.  Jesu a tawngtu’i nun ah  thlengdanglamawknak nasa zet a thleng kan hmuh thei bangin nang le kei Jesu a neitu’i nun ah teh ziang thlengawk danglamnak hmuh ding a um ve?

Pathian Huatzawng Lungrualnak

Lungrualnak hi a thupi tuk ko nan lungrualnak hmuahhmuah hi Pathian duh zawng an si thluh lo. Curuangah kan lungrualnak hi Pathian duh zawng a si le si lo kan cekawk cingcing a ṭul. Lungrualnak pohpoh hi Pathian thu ruangah a si thluh lo ti kan theih a ṭul zet. Curuangah lungrualnak pohpoh hi rel mawi thluh ding a si lo ih huat thluh ding khal a si fawn lo. Curuangah kan zohṭhim dingah lungrualnak diklopawl kan zoh tlang vivo ding.

1.Adam tei nupa lungrualnak Sem.3:6.17
An lungrual dan.

a.Pathian duh dan pah bal dingin.
b.Pathian thu hnakih Setan thu lung sawn dingin.

Arah suah

a.Pathian thawi ṭhenawknak. Sem.3:23.24
b.Dinhmun ṭha hlohnak. Sem.3:7
c.Pathian camsiat tuarnak. Sem.3:16.19
d,An cithlah tiang in misual sinak. Rom. 5:12

Adam tei nupa lungrualnak hi Pathian duh lo zawng lungrualnak a si. Kannih khal Adam tei nupa bangih lungrualnak dik lo kan neih a si ah cun Pathian kan parah a lungawi lo dingih kan hma khua a pit
ding. Pathian duh dan pahbal ding zawngih lungrual hi a ṭihnung tuk. Adam tei nupa lungrualnak ruangah tui sun ni tiang hi can kan cannak a si. Nang le kei khal Pathian duh lo zawngih lungrualnak kan
nei ve pang a si ah cun kan parih Pathian a thinheng hlei ah kan fate tiangin an tuar phah ve ding a si. Adam tei nupa lungrualnak zoh in lungrualnak pohpoh hi daw hlah kung, uar hlah kung, ṭawmpi hlah kung. Kan hrangah ṭihnung za a si.

2.Babel lungdawl dingih lungrualnak Sem.11:3.4

An lungrual dan

a.An hminṭhannak dingah.
b.Umkhawm ringring thei dingin.
c.Pathian rawn lo ih cangvaihnak ah.

Arah suah

a.Pathian an parah a lungawi lo.
b.An ṭawng a danter thluh.
c.Thenawknak a suahter.

Babel lungdawl thu khalah mipi an lungrual zet nan Pathian duh zawng a si lo. Lungdawl dingih an lungrual ruangah an parah Pathian a lungawi lo ih an ṭawng tiangin a danter thluh. Um khawm duh ruangih lungrual an sin an an ṭawng a bangawk nawn lo cun an um tlang thei nawn cuang lo. Curuangah an ṭhenaw sadarh thluh thotho.

Zumtupawl hin a dik mi lungrualnak cu kan duh ding a sinan a diklo mi lungrualnak cu kan ṭawmpiawk lo rori a ṭul ko. Kan lungrualnak hi Pathian huat zawng a si maw si lo ti zoh fel cingcing a ṭha. Pathian duh lo zawngih lungrualnak cu mawizet le ṭhazet vekin lang khal seh la ṭihnung a si. Babel lung dawl dingih an lungrualnak cun tui sun ni tiangih ṭawng bangawk lonak a thlen. Zumtupawl in Pathian duhzawng lungrualnak hi dawh in cui zin cu zawh uh si.

Evan Lal Eng Lian

Zumtupawl Ih Thihnak cu

"Maw thihnak khuiah so na tur cu..?maw.. thlan nang khuiah so na nehnak cu...? Kan bawipa Zisu khrih ruangah nehnak in petu Pathian hnenah lungawi thu um hram seh..."{1Kor.15:55-56}.

Hi leitlun ah cun zumtu khal siseh zumlotu khal in siseh bangrep tei kan ton leh dingmi cu "Taksa thihnak"hi asi{Rapture tiang kan nung dam cenglo ahcun}.Asinan thi ciocio kan dinhmun a bang aw lo nasa ding.Zumtu{Khrih neitu pawl cu}tu hnak in kan thih hnu ah kan sunlawinak a lang sinsin ding.Asile Zumtu'i thih cu Bible in ziangtin in sim.....?

1. Thlawsuah a ti asi{Thup.14:13}.
Eden tluksiatnak ruangah Pathian camsiat tuar in thihnak cu mitin fangsuak hman sehla Khrih nehnak ruangah Zumtu'i hrangah cun "thihnak"hi camsiat si nawnlo in "thlawsuah"ah a cangsal zo a si.Kan Bible in "Tuahcun Bawipa thawi pehzomnak a nei zo ih a thimi pawl cu thlawsuah a co mi an si ati"{Thup.14:13}.Thihnak in zumtu pawl cu insiatsuah theilo kan umnak hmun lawng in thawn thei.Lei ih ta Van ah...Harsatnak hmun i ta lungawinak hmun nuam ah..Cuvek cu a si thihnak in zumtu'i parih a tuah theimi um sun cu..

2. Hlawknak asi ati.{Phi.1:21}.
"Kei ka hrangah nun hi Khrih a si ih thih khal hlawknak asi a ti"{Phi.1:21}.Thih pohpoh hi a hlawkthluh lo,mi pohpoh ih thih khal a hlawk a ti lo.Khrih nun neitu pawl ih thih lawng hi a hlawk asi.Amen.Ziangah tile zumtu pawl ih thihnak cun dinhmun ṭha sin in tuah sak ruangah a si.

3. A sunglawi a ti{Ps.116:15}.
"A mithianghlim pawl ih thih cu Bawipa'i hrangah a sunglawi tuk asi"{Ps.116:15}.Fapa tlanhlo a pai hnen a thlen kha a pai hrangah cun a sunglawi tuk mi a sivek in kan thihni cu kan Pa'i hnen kan thlen ni a si ruangah Bawipa'i hrangah cun a sunglawi tuk mi a si.Khrih ruangaih Bawipa'i mithiang a si zo mi pawl kan van a ṭha tuk kan thih hman ah Bawipa hrangah a sunglawi mi a si.

4. Zumtu'i thih cu thi silo in ihthat a si ati{1Thes.4:13-16}.
Ziangtluk ih kan bang hman ah,ziangtluk ih kan thin a har khal le ihthat lai ah cun kan hngilh thluh.Cu hleiah ihthat cu an thosal ṭheu, cuvek in Zumtu'i hrangah cun thih hi ihthat a si ruangah harsatnak hmuahhmuah hngilh thluh ih kan cawlh ding can a si ih kan kan thosal leh ding tinak khal a si.Thihnak in kan thuanthu in cem ter lo ding.Nehnak in kan thosal ding.Halelujah..Amen.Zumtu hrangah cun thihhnu ah thawhsalnak ni eng maw a um ringring asi.

5. Zumtu'i hrangah cun thinak cu phenthlam men a si{Ps.23:4}.
Saam cangantu in "Thihnak phenthlam horkuam zawhhman sehla thilṭhalo hrimhrim ka ṭihlo ding,ziangahtile nang cu ka hnen ah na um a si..."{Ps.23:4} ati.Curuangah zumtu pawl cu kan thihnak phen ah eng{tleu} a um ringring a si.Phenthlam a um cun
tleunak a um ringring vekin zumtu pawlih thihnak cu thim zet vek in lang hmansehla khatlam ralah thleunak a um ringring asi. Phenthlam hi ṭih ding a um lo,mi a tina theilo, mi a siatsuah theilo vek in zumtu hrangah cun thihnak hi thlam vek men fang a si in siatsuah thei ngaingai lo asi. Amen.Hi nunneitu lawnghi nunman nei bik le thih man nei bik kan si.

Curuangah unau, midang pawl khal, nun mannei le thih mannei an si theinak dingah thuthang ṭha hi sim sin uhsi.Can reipi hman kan ṭuan man nawn lo ding.Khrih in nehnak thawn in hngak zo asi. Siartu zate Bawipa'n thazang thar in pe sehlaw.

Khrih ah nan rawngbawlpi,
Saya Ceu te
Tahan

Lazaruh Ih Thawhsalnak

1.       Lazaruh cu Jesuh ih duhdawt zetmi a si (John 11:3)
    Jesuh rori ih duhdawt zetmi cu naa thei lo sehla a mawi nan a naa thotho a si cu! Pathian ih in duhdawtnak hi nat thei lonak le hatsatnak ton lonak a si lo ih harnak lakih a hmelhmuhnak lamzin theih ngah a si sawn. Pathian in Jesuh hi kan nat lonak ding le kan beidon lonak dingah in pe lo ih kan nat caanih in dam tertu le kan beidon caan ih in hnemtu
dingah in pe a si sawn.

2.       Lazaruh ih nat san (John 11:4)
    Martha le Mary tei unau in an ṭapa naa damter dingah Jesuh cu an ko ter. A kotu siseh, Martha tei unau in siseh, a naatu Lazaruh khalin siseha natnak san an thei lo lawlaw. Jesuh  in,"Hih natnak cu Lazaruh ih thihnak ding nat a si lo. Pathian sunlawinak ding le fapa in thangṭhatnak a co theinak  ding nat a si," a ti. Lazaruh ih natnak sullam cu Jesuh in a sim fiang. Zumtu pawl hi a lakin kan naa lo, a lakin kan sung dah lo. Alakin kan tuar maimai dah lo. Daniel rualpi  pathum  pawl meipi   sungih  an  hlon ruangah  Siangpahrang
Nebukannezar in Pathian nung a theih phah (Daniel 3:26-28).

3.       Lazaruh thih  ni 4 hnu ih Jesuh a fehnak san (John 11:17)
    Zual ko pawl ih Jesuh an kawh ah a feh lohli lo. Lazaruh thih hnu ni 4 lawngah a va feh. Ziangruangah a si pei? A taw a rit tuk si kem? A silole Lazaruh a ngaihsak lo tuk? Judah pawl cun minung kan thih tikah kan thlarau hi kan ruak kiangah ni 3 tiang a um ringring. A tlaan mai lo. Ni 4 nakah a tlaan hlo, a zuang hlo, tin ruahnak an nei. Cucu Jesuh in a theih ruangah ni 4 nakah a feh. Cuihhlan ih a feh le Judah pawlin Lazaruh ih thawhsalnak an zum lo dingti a theih ruangah a si. Judah pawlih  pom daan le ruah daan siatbal a duh ruangah a si.

4.       Jesuh a ṭap (John 11:35)
    Lazaruh thlaan kiangah Jesuh nasa takin a ṭap. Ziangruangah si pei? A duhdawt tuk ruangah si pei maw? A si thei. Mipi ih amah an zum lo ruangah a si thei. Asilole Bible in lungawi mi cu lungawipi uhla a ṭap mi cu ṭahpi uh, a timi a thluun tla maw si thei.

5. Thlankhar lung an ṭhawn (John11:39)
     Jesuh thlaanka ah a thleng zo nan thlaankhar lung a um ruangah Jesuh in Lazaruh
a hmu thei lo. Lungto bangih a hakmi kan thinlung ṭhawn ta lo ahcun kan thlarau in Bawipa
a hmu thei lo.

6. Lazaruh a nung saal (John 11:43-44)
     Lei daan ahcun mithi an um le paisa in maw arva in si maw sungkhat kan tohpi ṭheu.
Jesuh cun NUNNAK thawn mi a tohpi,,,Hallelujah. Jesuh cu thawhsaalnak le nunnak a sizia
a lang cih. Jesuh cu in rundamtu lawng si lo in kan nunnak khal a si. Lazaruh cu a thi zo ih
a nunthar cu Khrih a si. Kan bang aw ciahciah.

7. Phoih uhla feh seh ( John 11:44)
    Lazaruh cu a nung saal zo nan ruaktuamnak ih tuam a si ruangah a feh thei lo. Jesuh in,
"Phoih uhla feh seh,"" a ti. Jesuh in kan pianthar (kan nun) lawng ih duh tawk lo, kan feh
ding in duh. A mai hrang le a kawhhran hrangih kan feh, kan ṭuan ding in duh. Curuangah
in ṭawnṭeemtu tisaduhnak pawl hlon uh sila Thlarau in thuam aw uh si. Unau! ziangin feh thei lo in a lo ṭawnṭeem? Na nu pi maw, na pasal? Na rualpi ṭha maw? Na paisa duhtuknak? Thlarau in lo phoih hram aw sehla feh vurvo thlang aw.

Siartu zaten Pathian in malza lo sawm cio hram seh.

Evan. S. Tha Nei Fai