Nunau Ropipawl

Dungthluntu cabu sungah hin nunau ropi zetzet kan hmuh mi an um. Cupawl lak ih hretkhat pawl nunnak hmangin thlarau lam thazang kan la tlang pei.

1. Dorkas{Dung.9:36-41}
            Hi nu hi leitlun hmuh ih mi ropi ciamco cu a silo nan thlarau lam ah cun mi duhum zet mi a si. Anih cun Pathian ih pek mi a kut thiamnak te cu mi bawmnak ah a hmang ti kan hmu. Thuthang ṭha a sim ciamco ti kan hmu lo nan kawhhran sungih mi harsa te bawmtu ṭha tak a si. Mi bawmtu si hi a va sunglawi em! Ahleice in nuhmei farah pawl bawmtu a si ruangah mi ngainat mi a si.{v.39}. Unau na kut le ka kut hi mi bawmnak ah kan hmang ṭheu maw? Mi bawmtu kut hi kut thianghlim le thlawsuah mi kut a si.{Dung.20:35}.

2. John Mark nu Mary{Dung.12:12,6-18}
            Hi John Mark nu Mary cu Jerusalem ah inn an nei ih an inn cu zumtu pawl ih khawmawknak le thlacam tlangnak hmun ih an hman ṭheu mi a si. Unau Pathian ih in pek mi kan inn te hi ziangnak ah kan hmang ṭheu. Zumtu pawl maw ngam ṭheu zumlo tu sawn? Pathian hnen ih thlacam nak ah maw leitlun mipawl ih duhzawng men ah ha kan hman ṭheu? Pathian mipawl ih thlacam khawmnak inn a si ruangah a neta bik ah cun an fapa John Mark cu Pathian hna ṭuan tu duhum zet le Bible ngantu{Marka cabu ngantu}ah a rungcang a si.Thlacam nun neitu le zumtu pawl ngaina ṭheutu Nu neih hi ziangtluk in so a sunlawi!

3. Lydia {Dung.16:14-40}
            Hi nu hi sumdawng puanthan zuar tu a si. Amai khua ngaingai cu Thyatira khua mi a si. A sumdawnnak ruangah Philipi khua tiang a rak thleng. Cui khua ah cun Paul le Silas rawngbawl in an va thleng ih thuthang ṭha an sim mi a ngai tikah a piangthar ta riai. A fehnak kipah Pathian thu ngainatu a si. Europe ih thuthang ṭha karh zainak ding hrampi ih nu tlingah a cang lan ta riai. Unau sumdawng kan si ah maw ziangvek hna ṭuan kan si khal le Lydia bangin thuthang ṭha karh zai nak ding ih hmanrua ah kan cang thei a si. Hi nu hi Philipi kawhhran dinnak ding ih a hmanrua ah a cang fawn asi.

4. Prisilla{Dung.18:}
          Hi nu hi a pasal thawn puan inn tuah ih cawm aw an si. Paul ih rawngbawlnak khal bawmtu ṭha tak an si. A pasal thawn Pathian thu duh zet le Pathian thu fehdan khal thei fel zettu an si. Hi nu hi sungkua Pathian thu ih kai hruai theitu khal a si ih Pathian mi pawl khal an inn ih len sawm ih Pathian thu relpi paih zet Pathian ngaina tu nu a si.{Dung.18:24-28}.

 5.Rhodi{Dung.12:13-14}
           Peter thawng a tlak lai ih Mary inn ih zumtu pawl thla an cam lai ah a telve. Zanvar thla an cam lai ah Peter thawng inn in a suak ih sangkaa a king lai ih ong ding ih va tlantu kha a si. Hi vek fala thlacam ngainatu le Pathian fa le pawl um khawmnak ih tel nuam ti zettu fala hi uar a va um em! Thlarau lam ih mi duhnung zet mi a si.

6. Saphira{Dung.5:1-11}
           Midang pawl hi tluk ih duh um an si laiah Saphira cu thuphan per hmang silo pi si vek ih sim thei zet nu, a langhngan zawng ih rawngbawl duh zet,Pathian hmaihnak in milai hmai ih sunlawinak hawl paih zettu nu, Pasal khal thuphan per pi ngam hluahhlo a si ruangah a thi cih ve a si kha. Unau Pathian in a kawhhran thianghlim tibaltu cu a kholhfai ṭheu. Hi nu le apsal khal thuphan per in member lak ih an um ruangah Pathian in a thenhlim hai a si kha.

  "Curuangah nan nungdanah ralring uh"{Ephi.5:15}

  Siartu zate Pathian thlawsuahnak co hram uh.
  Evan. David Ceu{saya Ceu te}
  Tahan

..........................

Hminsin: A sermon ropi zet in hlawmtu Saya David Ceute parah lungawinak ka tarlang.