Wednesday, November 30, 2011

Ziangruangah Kan Tluṭheu?-V


Kan zangzel tuk ruangah
          Jer.48:10 ah, Daithlang zetih Bawipai hna a ṭuantu cu siatserh si seh, ti kan hmu. Bible cun mize a duh lo. Milaw a duh. Pathian-in thlawsuah a pek mipawl kan zoh tikah milaw pawl an si ṭheu. A hman duh mi le a hman thei mi khal milaw pawl an si. Lei dan ah si seh, thlarau lam danah si seh lawt lo hi cun thlawsuah dawn a theih lo ih, ṭhanso khal a theih lo. Cuihhleiah tluukbah khal a awl te. Bible sung kan zoh khal le milawpawl cu mi hlawhtling an si ngenge. Zumtu cu law ding hrimhrim kan si. Pathian duhdawtnak hi kan thei ngaingai lo a si kei maw, zangzel kan tum tuk hi. Setan kan ralpa hin le zangzel emem ih kan um le a duh zawng a si si. Cu cu nitin a hnaṭuan pa khat a si ve. Cuihhleiah kan tisa duhdan hin le in neh tuk ṭheu ih, Thlarau lam duhdan thlun nawn loin, kan tisa duhdan kan thlun sawn ṭheu. Cuihruangah kan zangzelnak khal a si phah.
 A hrimhrimin minung taksa dan khalah milaw le mi taimapawl cun ei ding si seh, in ding si seh, inn le lo le sumpai si seh an nei ngenge. Mizangzelpawl cun ei ding si seh, in ding si seh, inn le lo sumpai si seh an tlasam rori si ko. Kan sim zo bangin Pathian khalin thlawsuah a pek ṭheu mipawl cu milaw le mitaimapawl hi an si. Thlarau dan ih mi hlawhtling, Pathian mihman a si kan ti mipawl khal khi mi zangzel an um lo. Mai hna le mai ṭuanvo par ih milaw le taima emem ih ṭuan pawl an si. Kan pupapawl khalin ṭawngfim an neih mi a um. Ṭuan hruthro cun ei hruthro. Ṭuan deng mang cun ei dengmang ti hi. Hi hi thlarau dan ah si seh, taksa lam dan ah si seh thuhman a si. Zumtu kan zaten law uhsi. Kan zangzel tuk hi awlten kan tluk lohlinak a si.
          Bible sungah hmun dangdang ah mize zo hman ih an rem lo le a ṭhat lo zia kan hmu. Mal lai in zoh tlang ka duh, kan hrangah zirhtu ih a can thei pangah:
Suah.5:13  Mi daithlang le mi zangzel nan si.
Thuf. 19:15    Zangzel ih na ih ringring men a si ahcun na ril a rawng ding.
I Tim. 5:13      Zangzel nan hmang.
Thuf. 6:6   Mi zangzelpawl cun sihte khi va zoh seh. Sihte nuncan zia in zir seh.
Thuf.6:9    Mi zangzel pa ziang tiang  so na ih ding.
Thuf. 19:24        Mi hrek cun an zangzel tuk ih an kaa sung ih rawl bar ding an zum lo.
Thu. 21:5  Mizangzel cu tlaksamnak a pan.
Thuf.22:13         Mizangzel cu an um men.
Thuf.26:13         Mizangzel in leng a suak duh lo.
Thuf.26:14         Mizangzel cu sangkaa khar kawpza in a merh awlter rero bangin a ihkhun Par ah a letaw rero.
Thuf.26:15-16    Zangzel um dan.
          Bible cun zangzel cu a duh lo nasa. Ziangruangah saw zumtu kan tluk ṭheu ti le kan zangzel tuk ruangah fam teh. Mipiangthar cu law ding hrimhrim kan si. Ziangruangah tile Bible in zangzel a duh lo ruangah. Bible ih duh lo zawngih kan nun cun kan tlu tinak a si.

Evan. Lal Eng Lian

Ziangruangah Kan Tluṭheu?-IV


 Rualpi Kawm mi ah
          I Kor.15:33 ah bum mi si hlah uh, ṭawng thimnakah rualpi ṭha loin ziaza ṭha a siatter ti a si. Hi thu vek ciah hi kan pupapawl in thufim an nei. Mirel hmang na pawl le mirel na hmang ding, Rukru hmang na pawl le rukruk na hmang ve ding, tiin; hi thu hi thu hman a si. Mai bulpak cio kan nun zoh sal cio sehla kan pawl mi kan rualpipawl ih mizia nundan hi kan cawng mai. Cuihruangah rualpi hi a thupi tuk. Kan nun in tuah ṭha tu rualpi an um ih kan nun in tuah setu rualpi khal  an um ve. Kan rualpi tapoh hin rualpi ṭha an si thluh lo, ti  theiin rualpi kan pawlnak zawnah ralrin rori a ṭul. Kannih laimi hi cu rualpi ngaina, rualpi loih um thei lo tluk kan si. Hla hmanah rual thar hawl uh, rual hlun hngilh hlah; rualpi ṭha cu sui le ngun an si, ti kan nei. Mipiangthar cun kan rualpi pawl ding mi hi kan ralrin a ṭul ngaingai.
          Minung cu mah lawng ngaingai ih um thei kan si lo. Rualpi le tlanpi hnaṭuanpi ti vek cu kan ṭul mi a si. Curuangah hi hi kan pawl ding mi a si maw si lo ti cu mahte ih ruah ṭhat a ṭul. Mi zokhal sualfa kan si thluh ih curuangah sualnak lamih awn cia kan si. Kan rualpi pawl mi Pathian thu ih um lo tisa mi tuk an si cun anmai duhdan le nundan vekih nun ve a awl te. Thil ziangkim hi remṭhat le tuahṭhat lam hnakin siatbal lam cu a awl sawn, cu vek cu kan nitin nun khal hi a si. Thatnak lamih hruaiawk hnakin siatnak la ih hruaiawknak hi a let tampiin a awl sawn. Curuangah mipiangthar tampi cun kan rualpi pawl ding mi hi ka thlarau nun siattertu ding a si maw si lo ti zohfel ih kan ralrin a ṭul. Hiti ih ka ti tikah rualpi hmuahhmuah hi misual le mi ṭhalo sualnak zin ih mi hruaitu lawnglawng an si thluh ka tinak a si lo.
          Rualpi ṭha nun remtheitu le, felnak zinih mi hruai theitu khal an um. Cuvek rualpi cu kan pawl ding mi an si. Bible sung khalah rualpi ṭhalo in siatnakah mi an hruai thei zia thu si seh, rualpi ṭha in ṭhatnakih mi an hruai thei zia thu pawl khal a ngan. Cu cu mal laiin kan zoh ta hnik ding.
Rualpi ṭhalo thu
Job. 16:20 ah cun hitin Job in, “ Ka rualpipawlin in hmuhsuam Pathian ṭahhnawhin ka mit thli a luang” ti ah a ti. A rualpipawl ruangah thil ṭhalo tiang a ṭawng phah.
Thuf. 18:24  “ Rualpi hrekkhat cu can tawite sung lawng an hmun” a ti.
Mtt. 26:50 Judas in Jesu a zuar. Amah thluntu a si nan rualpi ṭhalo ah a cang.
I Kor.15:33 Rualpi ṭhalo in ziaza a siatter ti a si.
Ef. 5:7 -Cuvek mipawl cu pawl khal pawl hlah uh, tiah in sim.
Rualpi ṭha thu
Thuf.17:17    Rualpi ṭha in duhdawtnak an langter ringring.
Thuf. 27:6 Rualpi ṭha cun na thin a lo natter hmanah duhsaknak ṭha a nei.
Thuf. 18:24b Sikhalsehla unau hnakih a ṭha sawn mi rualpi an um.
John 11:11          Lazaras hrangah Jesu cu rualpi ṭha  .
John 15:15          Kannih hrang khal ah Jesu cu kan rualpi ṭha a si.
II Kor. 5:18 Pathian cu kan rualpi ṭhabik a si.  
Rualpi ṭha le ṭha lo hi an um taktak. In duhdawttu ih kan ruah mi pohpoh hi kan rualpi ṭha an si thluh lo. Cuvek thothoin in huatu ih kan ruah mi hi kan rualpi ṭha  tla an si sawn thei. Rualpi hi athupi tuk. Kan ram piangthar tlu tampi ih an tawng ṭheu mi cu, ka rualpipawl ruangah si lawm ka tluk an ti. Thil um thei mi cu  a si ko. Kan kiang le kan kap kan pawl  ṭheu mi, kan innhnenpawlih mizia le nuncan hin kan theih lo sungah in rak neh ih in suan thei zet. Curuangah kan um pi, kan rualpi pawl mi ah napi ih ralrin rori a ṭul. Kan tluk  lonak dingah.
          Rualpi ṭha nun fel kanmah hnakih thlarau mi le nun cak, Pathian thu thei, thlarau lam ih Pacang ṭha kan pawl ahcun kan theihawk lo sungah kan nun hi a hnget in in tuah ṭha ih sualnak lamzin ah kan feh lo ih tluangten kan feh in kan ṭhang a si. Hi leitlun dan ih thuthang ngai ih, a theitu pawl hnen ih na um tam le anmah na pawl  tam ahcun leitlun thuthang cu na thei ngenge. Cucun theihnakah na ṭhang a si mai. A netnak lamah tla cun nangmah tei thuthang theih caknak le, theih duhnak na nei mai ding. Cuvekin rualpi ṭhalo kan pawlnak khalah a si. Kan nundan hi ṭha lam khalin si seh , a selam khalin si seh in neh awl tuk. Cuihruangah ralrin rori a ṭul. A pawi lo ka duhduh ka pawl ding in neh cuang lo ding tiih ṭan lak ding a si lo. Kan sim zo bangin ṭhatnak lamih hruaiawk hnakin siatnak lamih hruaiawk cu a let tampiin a awl sawn. Nun dan ṭhalo le fello cu pawl lo mai aw. Hua hlah awla kawm lo mai aw.

Evan. Lal Eng Lian

Tuesday, November 29, 2011

Ziangruangah Kan Tlutheu? III


 Nunau le mipa umtlang nakah
          Kol. 3:5 Nupasualnak, zohmawi lo mi nuncan taksa hiarnak le hurnak pawl cu nunter hlah uh, ti kan hmu. I Kor. 6:18 khal ah nu le pa sualnak kha hrial uh. Sualnak dangdang cun milai taksa hi a siatsuah tuk lo. Sikhal sehla Nu le Pa sualnak a tuahtu cun amai taksa par ah sual a tuah a si, tiah a ti. Pathian-in minung in tuah tikah mipa hmuahhmuah hi nunau duhnak nei in in tuah. Cuvek thothoin nunau hmuahhmuah khal hi mipa duhnak nei ih tuah an si ve. Mipa in nunau a duh hi sual a si lo. Cubangin nunau khal in mipa a duh hi sual a si ve lo.
          Amah lawngte mipa in nunau  a duhnak cu dik lo zet le Pathian duhdan pahbal ih a nun le a tuah kha sual a si. Nunau khalin mipa a duhnak kha dik lo zet ih a hman ve mai a si ahcun sual asi. Curuangah Bible cun nupi bul le pasal bul nei dingin in fial. Mipa in nunau duhnak le nunau in mipa duhnak kan neih thluh ruangah ralrin rori a  ṭul. Nunau mipa um tlangnak ih kan ralrin dan ding teh ziangtin a si pei tin na ruat men thei. Hi mi zawnih kan ralrin dan ding ṭha bik cu, mai nupi le pasal a si lo mi thaw cun um tlang tam lo, naih aw ngaingai ih um tlang lo le, zutmet aw rero lo hi a si mai.
          Nunau le mipa um tlang tam le naih ngaingai ih zutmetawknak hin awlten tluknak ah in thlen thei. Nunau taksa mipa taksa hi daiawk le zutmetawk hi zopoh khalin kan duh in nuam khal kan ti cio. Zawngsang khal a awl zet. Cuiruangah nunau le mipa va um tlangnakah hin zopoh khal ralrin a ṭul ngaingai. A pawi lo e ti in na ralrin lo le ka ralrin lo ahcun kan cem a si mai. Mipa hi amah te lawngih um si seh la, Nunau khal hi mah te lawngih um si seh la cu ralrin hi a ṭul lo ding. Nunau le mipa hi kan um tlang celcel ruangah ralrin a ṭul.
          Leitlun ih Pathian mihman zetzetpawl le rinsan tlak zetzetpawl tla nunau mipatnak ih hminsia le mualpho an um phahphah. Ziangruangah tile thlemtu ralpa Setan hi a cangvai nasa ih, kan tisa duh mi a hmang ṭheu. Nunau mipatnak hi mit a meng ta poh ih kan duh ruangah kan ralrin lo cun mualpho ememin kan tlu durdo ding a si ko. A cang thei tawkin nunau le mipa hi mai nupi pasal si ceng lo hi cu um tlang tam tuk lo sehla  a ṭha bik. Pathian hnaṭuantu, Evangelistpawl hi kan ralrin a ṭul hleice. Khaw tin kan tlawnnakah Nunau hi cu hruai vivo lo sehla a ṭha bik. A bur ih khemping crusade kan va tuah tlang ti vek le kawhhran pa khat in in sawm tlang ti vek canah lo theih lo ih kan va um tlang hmanah ralrin a ṭul.
          Kanmah thusimtu-in kan tlawnnakah i thlun aw thu kan sim tlang ke ti ih kan va sawm tla hi cu a ṭha lo deuhdeuh. Cun crusade le khemping tuah dingih Saya a sawmtu bulpak le kawhhran khal hin nunau hi sawm tel tuk lo seh la a ṭha. Nunau hi sawm lo lawlaw ding ka tinak a si lo. Ralring zet ih thil kan ti a ṭul ka tinak a si. Kan ralrin taktak a ṭul. Hih sualnak ih kan luh pang cun camsiat zin kan zawh tinak a si. Ef.5:5 ah nupa sualnak a tuahtu cu Pathian uknak sungah covo a nei lo ti kan hmu. Leilungih minung mit a meng ta poh ih kan duh thluh mi cu sumpai le nunau mipatnak hi a si.
          Setan khalin kan duh mi ciah  in in thlem ahcun awlten in neh mai ṭheu. Curuangah zumtu mipiangthar zate hin nunau mipatnak zawnih kan tluk lonak dingah nasa takin kan ralring kei uh. Setan  hi a um men lo. I Thess. 4:3-5-7 khal ah nupa sualnak tuah lo ding le thianghlim tei um dingah in kawh thu kan hmu. Suah. 20:14 khal ah nupa sualnak le uire lo ding thu kan hmu. Ziang khal asile minung tisa ih um lai kan si ruangah nunau le mipa va um tlangnakah cun kan ralrin rori a ṭul. Zutmetawk, thamawk, naihaw zetih um tlang, hmehawk hi kan taksa hin a duh ih nuam a ti emem mi a si ruangah ralrin a ṭul rori a si. Pathian hmin se tertu kan si lonak dingah.

Evan. Lal Eng Lian


Sunday, November 27, 2011

Pastor Steve le Pathian Cangvaihnak Maksak


November ni 26, 2011 zan rawng thleng ding cu hngakhlap zetin ka thlir. Ziangruangah tilen hi tikcu canah Pathian kutcak mangbangza in mi a damter mi, keimah rori khal ih ka theihfeng mi in a tawntehmi (testimony) relnak a nei ding. Cutin, ka tlawngkai pi Internaltional Students mi nung 17 pawl thaw cun “ Saved Concert” hmang ding cun kan pawk. Zanlam 5 a rawng kim hi cun Araneta Coliseum, Cubao, Philippines  innpi sungah cun minung 7000 lenglo ih ruah cu kan pungkhawm. Cutin, maksak le thiam fahran in tualsung hlasakthiam  hminthang Gary Valenceano siseh, Joy leh midangpawl in hmuhnawm le thiam tukin mipi in rawn awi! Cutin, mipi au thawm cu a ring in, thangṭhatnak hla mawi ngai phah cun Pathian thangṭhat in kei khal cu ka ban ka rak hawi ve.
Hlasak thiam  midangdang pa 4 in mawi emem ih mipi in awih hnu ah Pastor Steve cu dawhsan (stage) ah cun rawng suak in “ How great is our God!” ti mi a ban hawi in dim tete a rawn ausuahpi hi cu nun mi a tham tuk lawm mam! Ka hnarruh note i ṭam ih, ka thinlung in Pathian ka rak thangṭhat rero!
Pastor Steve Ruetschle hi Union Church of Manila (UCM) senior pastor a si.  Anupi hi Michelle si in fate pathum an nei. Hi kawhhran hi kawhhram tum le cak, international Church , miphun hnam dangdang khawmnak a si ih, keimah rori tla hi Biakinn sungih a thusim ngai in ka rak um rero ṭheu. Amah hi Pathian thu duh tuktu le Pathian ih a hman zet mi a si. Vaiduai le malmakah Motor Cycle accident in June 17, 2010 ah khan North Carolina  ah a tuahmawh aw ih cutin arangtheibik in Cizungah an tlanpi. A hnawng thapi a (spinal cord) an ti mi ah hmunthum rori a siat suah ih cumi ih ruangah Doctor a tuanhlawmtupawl cun zatekah pa hra (10%) lawng hi punghman ten a taksa ah cang thei dingih an zum mi a si. Accident a tawn ihsin  hngawng ih thuailam a cang thei lo. An siatsuahawknak natlam tehnak hi A –E an nei . A a si len cu zianghman thluak siseh ruahnak , taksa cangvai pawl thi reprep tinak a si. Cun E a silen cu a kel, punghman tinak a si. Pastor Steve hi C a si ih cumi ah 50% a lan ti ai a si. Doctorpawl in a damsuak sal a si hmanah a hngawng cin hnuailam hmuahhmuah cu a zeng dingih a cang thei lo ding an ti.
Asinan, kan Pathian hin a kutcak, huham le thiltitheinak hi rinnak thawi Amah a beisei ringringtupawl nunnakah a phuang suak ṭheu! Pastor Steve cun hitin Mipi 7000 hmaiah cun “zumtupawl leitlun hmuntin le ka memberpawl ih thla in camsaknak hi Bawipa in a ngaithla, keimahah cangvaih theinak, thiltitheinak zianghman ka nei lo ti fiangten ka theihawk tikah Bawipa ah pumhlumin rinnak thawn ka ṭhum aw. Amah in in damter dingih ka ke rori in, Arm chair siloin ka fehsal ding ti 100%  ka zum” a ti. Bible cang sung ih nunau thiput thuhla siseh, zeng damlo a rualpipawl in Jesui hnenih an hruai, inn tlun an boh ih Pathian damternak cotu thuhla tla a rel uar zet. Beidawn canih rual le pi, ngaihventu, thlacamsaktu ti mi hi ka cahnak a si tin a rel tel fawn.
Doctor pawl in a hmailam nunnak hrangah ruahsan ding a um nawn lo an ti hnu khalah Pastor Steven cun Bawipa ih a rinnak cu sawhsawn a tum lo. Ka ke in in fehter tengteng ding ti ah thlacamnak thawn Pathian a rinsan. Cutin, Pathian ih kutcak cu nikhat hnu nikhat , zarh khat hnu zarhkhat a nunnak ah a lang. Ih cutin, tu ah cun damlo ih a um khumkhua ding mi le thih hlan tiang zeng ih um ding an timi Pastor Steve cun Bawipa ih thilmak a taksa parih langsuak mi cu ka in a aupi ih, zai hla thawn a saksuak.
Ziangvek dinhmun ah kan ding in, kan dinhmun le hmailam cu pitzet le thimzet si hman sehla, Bawipa ah beiseinak nung  le rinnak thawn kan phurrit a ṭhumtu kan si ah cun tuini ah Bawipai thilmak hi kan nupa nun karlakah, kan innsang tlaksamnakah, kan fale kilkhawinakah, kan eihawlnak le hnaṭuannak, kan pumpak nun le tulmi  tinkim ah kan tep thei a si.  Kan Bawipa Jesu in dungthluntupawl hnenah,  “ Antam cifang tiatte rinnak nan nei a si ah cun hi tlang khal hi Tifinriatah thawn aw seh nan ti len a thawn aw ding” (Matt. 17:20) ti ah a ti.  Cunlawng khal si lo in , Rom 10:11 khalah hitin, “ Zokhal Amah a zumtu hmuah cu mualpho in an um lo ding “ ti ah a ti.

Bawipa in ziangvek kan natnak, kan vansannak khal hi Amai hnenih kan thlen le amah kan rinsan a si ah cun a huham langsuahnak le a thilmak langsuahnakah a hmang thei a si! Pathian in lo thlawsuah hram seh.  

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...