Mi Thlawsuak (Greek- makatios)

Kan Bible Cathianghlim in mi thlawsuak pawl thu a sim lai ah Jesuh in malmaakbik pa ih thu khal a sim tel. "Cathianghlim ih a simcia vekin Milai fapa cu a thi ding; a sinan Milai fapa zuartu ih hmakhua cu a va pit so! Cupa cu a nuih pum sungih sin suak lo in rak um sawnta sehla a maih hrangah a tha sawn ding," tiah  a ti (Matt.26:24). Camsiatmi minung pawl hrangah Pathian in Khrih ah thlawsuahnak lamzinthar in on sak saal. Bible in mithlawsuak a timi pawl cu:

(1) Pathian neitu (Saam 33:12)

              Veikhat ah  Rock Feller cu thinbaang le awloksong in lam a leeng. A rualpa in, "Ka rual, ziang na cang? Thinnuam lo zetin na um? Ziang ka lo tuahsak pei? tiah a sut. Cutikah a nih in, "Sunseu lawnghman hnangam te'n i um ter theitu um hai sehla ka neihmi hrekkhat ka pe mai ding," tiah a let. Rock Feller timi pa hi leitlun ih milianbik ih siarmi a rak si. Paisa a neih tam daan cu pacang 30 rori paisa siartu dingah laakha peekin a sor. A paisa neihmi hi pakhat hnu pakhat phah vivo sehla leilungpi rori vei tam nawn a vel suak thei ding, an timi pa a si. Asinan zan khatte hman hnangam in a it that thei lo. Jacob cu Bethel ramṭhingah (Seem.28:11-12), Piter cu thawnginn sungah (Tirh.12: 6-8), Jesuh cu Lawng sungah (Mark 4:38) thawzetin an it that hluunhlo thei. Ziangruangah? Pathian nung an neih ruangah a si.

Bible in Inn ṭha le lo ṭha neitu, Motor le thilri tampi a neitu, Degree sangzet neitu, nupi le pasal hmel ṭha neitu pawl hi mi vanṭha le mi thlawsuak an si, a ti lo ih Pathian neitu hi "Mithlaw suak" a ti ta riai. Minung siar daan le Pathian ih siar  daan cu  a va bang aw lo em! Unau! na saduhthahmi na nei lo nan Bible cun Pathian na neih ruangah mi thlawsuak, a lo ti sokhaw. Pathian nung na biak men lawng si lo in na nei, cucu simaw nunman nei bik cu! Na neihmi theithiam in lungawi thu sim thlang aw. Mi neihmi zoh hlah, a cemral ṭheh ding. Na neihmi Pathian cu ziangkim a cem hnu khalah a hmun kumkhua ding sokhaw.

(2) Pathian thu theih duhtu (Thufim 8:34)

      Korea actor hminthang pathum cu saar thihin an thi. 2005 kum ah Liyan Cho, 2008 kumah Choyin Shi, 2010 kumah Parkyong Ha a thi. Ziangruangah an thi tile an thutheihmi ruangah an bei dongtuk ih an awk that aw, ti a si. Leitlun thu theih tam cu beidonnak le thihnak tiang a thlen thei. Pathian thutak theih tam cu hnangamnak, lungawinak, le fimvarnak a si. Curuangah Bawipa in,"Ka thu theih duhah ka biakinn ah ra in sangka kiangih a hngaktu cu mi thlawsuak an si," a ti (Thuf.8:34). Hagger ramcar ih a ṭah rero lai ah vancung mi ih hnemnak aw thei khaw pumpuar le hnagamten an nufa in an um thei. Leitlun rawl cu ei tam le in cerh, kan ning. Asinan Pathian thu cu a mak nasa. Kan ngai tamle a thaw sinsin. Kan khop lo deuh deuh. Pathian thu theih duh le theih hiar sinsin ding cun ngaitam sinsin a ṭul.

(3) Jesuh ruangih hmuhsuam, nautatnak ton (Matt.5:11-12)

              Zokhalin midangih in hmuhsuam le in dodal tikah thlawsuah ka co, kan ti thei dah lo ding. Asinan Jesuh cun a mah ruangih kan tuar, kan ṭah, kan beidon tikah mi thlawsuak, tin in ko lamlam. Theihthiam a va har ve! Pathian in "Rundamnak cu zinlai ah a retih sui lukhum cu hling le so lak ah a ret" in a lang ṭheu. Daniel ih rualpi pathum meipi sungah Jesuh in a leenpi, Stephen Lungto ih an deen lai ah paih vorhlam ah dingin Jesuh in a tuarpi. Cupawl cu mi thlawsuak an si.

(4) Thlawsuah siar thiamtu

Kan BIble sungah Pathian ih thlawsuah siar thiamtu tampi an um. David cun,"Ka parih a thatnak ruang ahhin Bawipa cu ziang so ka peek ve ding?" a ti (Saam 116:12). Paul khalin,"Sim cawk lomi Pathian ih zaangfahnak laksawng ruangah a hnenah lungawi thu ka sim ding," a ti ve (II Kor.9:15). Bible cun thlawsuah co tamtu hnakin thlawsuah siar thiamtu hi mi thlawsuak, tin a ko sawn. Thlawsuah nei liailiai ih a siar thiamnak neih cuang lo ahcun riahsiatnak pengtam men ah a cang.

Curuangah unau! Bible ih nunman nei , mi thlawsuak a timi na si theinak dingah a tlunih thu pawl siar ṭha awla Bawipaih hnenah lungawinak hawl thlang aw (Saam 37:4).

Evan. S. Tha Nei Fai