ZIANGRUANGAH JESUH LEITLUN AH A RUNG TUM?

Preached on 21, Dec, 2016                 

By Rev. Henry vl Hmangaih

Tu zan ah kan lak ih pakhat khat hi interview lo tuah sehla ziangtin ha in sawn ding?

Thusuhnak- “Ziangruangah Malaysia ah na ra?” Malaysia ih na ratnak san ziang a si
Sannak- A sannak kan pek dan a bangaw lo ding..asinan, kan zaten beisei le tumtah nei in kan ra thluh! Dik ko lo maw? Mahte tlan tlan ih tlang Malaysia ih ra suak duaudi kan um maw? Um lo!

Asinan, kan ra thlen le  tui kan dinhmun zohsehla hrekkhat cu “ Malaysia ih kan hnatuan a remcan tuk ruangah maw, lole kan remcanlo tuk ruangah maw Malaysia ih kan ratnak san hngilh le mang nawn lo tla kan um men ding! Asinan, kan zaten Malaysia ramsung ra lut ding in kan khua le ram ihsi kan rat tikah tumtahnak le beiseinak felfai nei kan si thluh!

Tuikum khal Pathian zaangfahnak le hruainak zarah kumkhat sung ih kan hngahhlap bik mi ni le thla-Sweet December sungah Pathian in in hruai lut ih tu ah kan hmaite ah Christmas Ni Sunglawi (December ni 25) tla kan lawm thlang ding! Hih tikcu caan ahhin mi hrekkhat cu atufang ih kan tawn mi harsatnak ruangah, tuarnak le damlonak ruangah, hna`uan remcanlonak le remcaan tuknak pawl ruangah Christmas kan  hmansan le ziangruangah Christmas kan hmang timi tla mangngaih lo, ruat lo, theihhngilh ih mah le duhdan dan ih tikcu caan hman tum tla kan um men ding.

Kannih minung  hman in tumtahnak le khawkhannak nei thawn ke kankar a si ahcun kan Bawipa Jesuh Khrih khal in a sunglawinak suilukhuh, van sui khawlipi le sinak hlip in leitlun ih farah, zonzai le siahhlawh vek in a niambik mi cawkhuang ih a runsuah tikah “ Tumtahnak le khawhnaknak, Mission felfai zet a nei a si. Cumi cu Christmas Pathian duhzawng le mannei zet ih kan hman theinak ding hrangah kan theihfeng tengteng a tul.

Ziangruangah kan Bawipa Jesuh Khrih cu leitlun ah a rung tum si pei?

Bible, Pathian tongkam parah `humaw in kan zoh theihzat tuzan ah kan zoh tlang ding:

(1). Pathian ih kumkhua/ Catuan thiltum a si.

Leitlun ih kan Bawipa Jesuh Khrih a rung suah ding hi Pathian ih kumkhaw ruahmannak , catuan thil tum a si. Leitlun ih sual  a luh hlan, tluksiatnak  a thlen hlan ihsin Pathian in ziangkim theithluhtu a sinak hmang in a rak khawkhan cia le remruat cia a si.

Efesa 1: 4-5 “ Khrih thawn kan pehzomawknak thawngin Pathian in kannih cu Amah ih hmaiah mi thianghlim le mawh neilo si dingin leilung a sersiam hlan hmanin Amah ih ta ah in rak hril zo. In duhdawt ruangah, Pathian in Jesuh Khrih thawngin a faale ah in cater ding cu a lungawi zawng le a duhzawng in rem rak ruat cia a si” ( Pathian ih khawkhannak a si)

I Pet. 1:20- “ Amah cu leilung seem hlanah Pathian ih hrilcia mi a si zoih atu nanmah ih hrangah netabik caan ah hin Pathian in a langtermi a si.”

A rung suahnak hrangah Thukam Hlun ihsin in kamsang pawl in an rak phuang rero zo:

Paul G. Humber, director of Christian Outreach Ministry, (CR), cun Thukam Hlun ah hin Jesuh Khrih ih thuhla, cangvaih dan ding le nundan ding ram simkhawl cianak a zaten 400 lenglo a um ti ah a cabu 400 + Prophecies, Appearances and foreshadowing of Christ in the Old Testament”  timi ah a ngan. Cuzat lak ihsin a langsar bik cu

v  Bethlehem ih  a suah ding thu (Micah 5:2- Famkim –Matthai 2:1,5; Lk. 2:1;John 7:42-43)

v  Falam Thianghlim hrin a si ding thu (Isaiah 7:17- Famkim- Matthai 1:18-24) ah Joseph- na nupi hi falam thianghlim a si ti ah vancungmi in an sim) 

v  Abraham tesin fa ihsi ra suak ding a si thu (Seem. 22:18-Famkim- Matthai 1:1-17-David ih fapa, Abraham ih fapa  ti ah a ngankhum)

Gal. 4:4- Sikhalsehla tikcu tinmi a thlen tikah Pathian in a fapa a run thlah. Nunau sung ihsin a suak ih Judah daan  hnuai ah a nung”

John 1:14- Thu cu minung ah a acing ih kan lakah a um; zaangfahnak le thutak in a khat.

Pathian ih khawkhan, lairelnak vekin, program vekin van Bawi fapa, Jesuh cu lei ah a ra.

2). Pai’ duhnak tuah ding ah ( to do the will of his Father)

Jesuh in – John 4:34- “ Ke ka rawl cu I thlahtu ih duhnak tuah le hna`uan I fialmi `uan `heh hi a si”  ti ah a ti.

Jesuh in–John 6:38-40“Vancung ihsin ka rung `um tikah hin keimah ih duhmi tuah dingah ka rung lo, I thlahtu ih duhmi tuah dingah ka rung a si. Cule I thlahtu ih duhmi cu hihi a si: I pekmi hmuahhmuah kha pakhat hman hloter lo in , ni netabikni ah an zate ih ka thawhter sal `heh ding kha a si. Zianghrangah tile ka Pa ih duhmi cu Fapa kha a hmu ih a zumtu hmuahhmuah cu kumkhua nunnak an ngahnak ding kha a si. Cule ni neta bikah nunnak ah ka thoter ding a si” ti ah a ti.

Paul- I Tim. 2: 3- 6“Pathian cun mi hmuahhmuah rundam ih an um ding le thutak an theih ding a duh. Ziangahtile, Pathian pakhat a um ih, Pathian le minung karlakah remnak Palai pakhat, Minung Khrih Jesu  a um.Anih cu mi hmuahhmuah tlensalnak hrangah amah le amah a pe aw. Cumi cu a tikcu caan te ah theihter a si.

1.      Jesui’ mission, Pai duhnak tuah cu- Rundamnak `hehsuak(  John 19:30 “ ~heh a si zo” “ A kim `heh zo”

2.      Minung hnen ih Pathian duhnak cu- a thlahmi Jesuh zum hi a si .John 6:29-  Jesuh in, “ Pathian in `uan hai she ti a lo duhsakmi cu a thlahmi pa zum kha  si” ti ah a ti.

Jesuh in -Matthai 12: 50- A thusim ngaitu pawl hnen ah- “ Zokhal sisehla vancung ih a ummi ka Pa ih duhnak a tuahtu hmuahhmuah cu ka unau, ka farnu le ka nu an si” ti ah a ti.

Heb. 11: 16- zumnak ruang ih Pathian fa a si mi le a tuartu pawl in ram thasawn cuan ih ke an kar rero lai ah … “ …Pathian cu annih in , “ Kan Pathian” ti ih an kawh tikah Pathian a ning a zak lo, ziangahtile an hrangah khawpi a tuahsak zo.  ( Amah a zumtu pawl cu Pathian in in zahpi lo! Halleluijah! Amen! )

Jesui’ runnak san cu- A pai duhnak tuah a si ih cumi cu a `heh thluh zo. Nang le keimah in a fapa cu zumnak thawn kan cohlang a silen kannih khal a fate can theinak kan nei.

3.  Nangmah le keimai hrang a nunnak pe ding ah

Mark 10:45- “Ziangahtile Milai Fapa  hman hi rianmi si lo in miriantu si dingah le mi tampi tlen dingah a nunnak pe dingin a ra asi” (Cf. Matt. 20:28). Nangmah le keimah in nun ka neih theinak hrang a nunnak pe dingah a rung. ~ongkam dang in kan sim a silen kan hrangah thi ding in a rung tinak a si.

Zirmi: Tuini mi tampi in Christmas kan hmuah dan, kan hman dan hi cun duhdawttu Pathian ih ning hi cu a nater tuk ding ka ti. Anih cun a sunlawinak ziangkim tansan in – nautabik cawrawl peknak kuang a run hril, a sunlawinak a tan, a nunnak rori kan hrangah a pe. Tuini ah zumlotu cu rello, zumtu, mi piangthar ka si a tiawtu mi tampi cu “ Christmas hi Pathian phatsannak, sual tuahnak le nawmcennak” ih hmangtu tampi an um. Ziangtluk Runtui thinlung hi na bang kei maw?

·         Nun taktak ih lungawithu simnak, amah cohlannak, upatnak le sunlawihnak thawi kan hman ding hi a phu tuk aw!

Jesuh in Matthai 18:11- “ Milai fapa cu a hlomi hawl dingah a ra” ti ah a ti. Cun, Luke 19: 10 khalah,“  Milai fapa cu a hlomi hawl ding le rundam dingah a ra” ti in a ti.

Eden tluksiatnak ruang ah sual ih a hlozo hnu, kumkhaw hremhmun hmabak cu kanmah in kan dil le ngen ruangah si lo in amah in a duhdawtnak thawn fapa hmang   niambik mi Bethlehem cawkuang sung ah rung suak in kan rundamnak hrangah cross ah a nunnak liam in in thlen zo a si. Zumnak thawn tuini ah amah cu kan cohlang a silen kan zaten Pathian fa si theinak kan nei a si.

John 1:12- Mi `henkhat cun an sang ih an zum; curuangah Pathian ih faate cantheinak thu a pek. Pathian ih faate an cannak cu leilung daan, minung ih thi le sa in hrinmi in a si lo; Pathian amah rori kha an Pa a si”

4.  Setan hna`uan siatbal dingah

I John. 3:8“ Zokhal sual a tuah ringrintu cu Setan ih ta a si, ziangahtile Setan cu a hramthok ihsin sual a tuahtu a si. Pathian Fapa a langnak cu Setan hna`uannak siatsuah `heh ding rori ahhin a si”

Setan hi Pathian ih ral tumbik a si ih minung ih kan ral khal a si.  Kan Bawipa a runnak san cu a hna`uannak siatbal thluh dingah a si

Ziangsi Setan ih hna`uan cu:

1).  Sual tuah, thatlonak le siatnak thlen

I Jn. 3:8a-“ Zokhal sual a tuah ringringtu cu Setan ih ta a si, ziangahtile Setan cu a hramthok ihsin sual a tuahtu a si.”

I Peter 5: 8-9 Fimvarte in um uh! Ralringte in um uh! Nan ralpa Setan cu deh ding  hawl ah a huuk reromi kiosa bangin a tawi a vak zok rero a si. Nan zumnak ah hngetkhoh uhla Setan cu do uh, ziangahtile leilung tlun khuazakip ih a ummi Khrstian unau pawl khal hi bangtuk in harsatnak hi an tuar rero ve a sit i kha nan thei 2).

II Kor. 4:4- Zumlotu pawl ih thlarau mit a cawtter

Natnak a thlen, mi a luhhnawh, mi a thlem..asinan hi pawl hmuahhmuah hi kan Bawipa in Setan cu kross ih a thihnak hmang in a lu a rialbek thluh ih Amah zumnak thawn nehnak cotu ah in tuah zo a si.

Sem. 3:15- “ Nunau thawn ka lo raalawter ding ih nan tesinfa tiang in nan rawl aw ding. Na lu a lo subeek ding ih nang in a kedil na cuk ding” ti ah a ti. – Kross ah a thihnak in Setan lu a rialbek thluh zo. A huham cahnak cu kan tlun ah a cem.

I John 5:4-“ Pathian fa a si mi poh in khawvel kha an neh thei. Cule kan zumnak thawngin kannih cu khawvel nehtu kan si. Khawvel a nehtu cu zo so an si? Jesuh cu Pathian Fapa a sit i a zumtu pohpoh cu khawvel nehtu an si”

                                

Thukharnak

Pathian fapa a runnak san cu:

1). Pathian ih kumkhaw, catuan tumtahmi famkimter dingah

2). Pa Pathian ih duhnak –rundamnak tuahsuak dingah

3). Sual sal ih a tang le sual ih a hlo zo hnu leitlun minung pawl runsuak dingah

4). Setan rallian kan neh theih lo mi a huham le hnatuan in siatsuah sak ding ah

Hi pawl hi Jesuh in in tuahsak thluh zo ruangah zumnak thawn ka ta ti ah cohlang aw la, ral tha zet in Setan tlun ah nehnak ausuah khum aw, Jesuh ih rundamnak sungah lungawi aipuang in tlangleng aw. Fapa Jesuh Khrih kan zumnak thawg in thiam in cotertu Bawipa a si ih thiamlo conak ding hrimhrim a um nawn lo.

Pathian in lo thlawsuah hramseh.  

PATHIAN CANGVAITERTU

PATHIAN CANGVAITERTU

Sunday Sermon (16^th, Oct, 2016)                               Rev. Henry vl Hmangaih

Bible: James 5:15-18

..................................................................................................................................................................

Thuhmaihruai

Thukam hlun le Thukam thar pumpi hi kan zoh a silen Pathian ih cangvaihnak in a khat! Pathian in a minung pawl a runsuahsak, an tlaksam caan ih a cawmnak, an ral pawl a nehsaknak le an tulmi tinkim tlun ih a cangvaihnak in a khat. Kan nun le kanmah thawi pehpar aw ih thupi bik khal hi ziangtluk kan hnget, neinung, kan tha, kan thiam timi hnak in ziangtluk lole ziangtluk zing in kan lakah Pathian a cangvai ti hi a si.

      Pathian a cangvaihnak hmun ah nawmnak a famkim ih nun in umzia a nei theu.

      ..thlawsuahnak, nehnak le hlawhtlinnak a um

      ..thlengawknak dik a thleng theu

      ...zalennak le sual nehnak a um

      ..duhdawtnak in ram a la

      ...kawhhran le khawtlang a nuam

      ...remnak le daihnak a um

      ...dingfelnak in hmun a luah

      Pathian a cangvaihnak tikah:

o   Dam lo in damnak an co

o   Mitcaw in khua an hmu

o   Kebai pawl ke in an feh

o   Miphar pawl an thiang

o   Hnaset pawl in thu an thei

o   Mizonzai pawl in nun nawmnak le lungawinak an hmu

o   Misual bik , hnawn mi le laktlak lo pawl tla an nun thleng in minung thar ah an cang.

o   Pathian minung pawl lakah “ Pathian sunglawinak” a lang suak.

Curuangah, tuisan ih kan tul bik mi khal:

1). Biakinn ropi, mawi zetzet le tha zetzet a si lo,

2). Choir ropi le hlasak thiam tampi khal an si lo,

3). Mifim, Bible thiam sang le doctor rual tampi khal an si lo,

4). Milian le sumpai tampi neitu an si lo,

Kan pumpak, innsang, kawhhran le miphun in kan tul bikmi cu Pathian ih cangvaihnak a si.

Cuih Pathian ih cangvaihnak cu kan hnen ih a um theinak dingah zo le pawl in Pathian an cangvaiter timi kan zoh ta ding.

Pathian cangvaitertu pawl:

1). Peknak nun a neitu pawl

Peknak nun neitu pawl in Pathian an cangvaiter theu

Ø  I Siang. 17: 8-23-Sidon khua ih Zarefath nuhmei nui peknak in Pathian a cangvaiter- a neihsun te siangzet in pathian mi Profet Elijah hnen ih a pek tikah a sitti le sangphut a cem thei nawn lo a si kha.  Siangzet ih Pathian hnen ah a petu le midang hrangah a nungtu pawl in Pathian an cangvai ter theu

Ø  John 6:1-14-  Nauhak pate ih peknak in Pathian a cangvaiter.(Sang hlom 5 le ngate 2) A neih sung sangper pa 5 le ngate 2 kha Jesui’ hnen ah siangzet in a hlan. Jesui’ kutsung a thlen tikah a let tampi ah Bawipa in a karhter ih mipi 5000 rawl donak ah a hmansak.

Ø  Mk 12:41-44-Nuhmei nui peknak in Pathian lung a tawng. ( dar tangka pia 2)Malte a sinan a neihsun a pe. Ziangzat kan pe tihnak in kan pek lo mi ziangzat a tanglai timi in kan peknak hi tah a si sawn.

Ø  John 12: 1-3- Mary in Alasbasta remhmui Jesui’ hnen ih a pek mi in Jesuh a lungawiter “ A tuah thei tawk a tuah zo” ( Mk. 15:8a). A pekmi man hlut lam Tangka 300 man hnak ih tam. An san ah Patling pakhat in nikhat ah tangka fang 1 lawng an hlawh. Kum 1 sung patling hlawhzat.

Tirh. 20: 35b- Ka Bawipa Jesuh in “Ngahlam hnak in Pek lam ah lungawinak a tam sawn”

Pathian ram hrang, midang hrang ih na peknak in na nun ah lungawink a lo pe ding.

Kan peknak hi ziangtluk Pathian kan duhdawt ti langfiangtertu a si fawn

            - Na Sum le pai peknak

            - Na tikcu le caan tha peknak

            -Na thiamnak le thazang Pathian hrang ih na hmansuah mi pawl hi Pathian na duhdawtnak langtertu an si.

II Kor. 9:7b –“ Pathian in lungawinak thinlung thawi pehtu a duhdawt a si” (KJV)

Lk. 6:38-“ Pe uhla pek nan si ve ding..”

Lesson:

Peknak nun a neitu pawl in Pathian an cangvaiter. Kan pumpak, Innsang le fellowship in Pathian ih cangvaihnak tamsin hmuh kan duh a silen “Peknak nun” hi kan nun ah a um a `ul. Siangzet ih petu tampi kan tul a si.

2). Thangthatnak nun a neitu pawl

Thangthatnak nun a neitu pawl in Pathian an cangvaiter. Nun taktak thawi amah sunlawih ih thangthattu pawl in Pathian ih kutcak le cangvaihnak an hmu tam cuang.

2 Sansiarnak 20:21-22 (Read) Siangpahrang Jehosaphat le a ralkap pawl ih Pathian an thangthatnak  cun “Nehnak a pe”.  Siangpahrang 3 kom (Ammon, Moab le Edom) in an bawr. Nan Bawipa in an ral pawl cu anmah le anmah a doawk ter ih an zaten an thi thluh. “ Hlasak, lole Choir’ thawi raldo a si ih Pathian a tel ahcun ziangvek te khal in neh theih thluh a si. Rang le ralnam,  hmanraw tha lawng hi ral nehnak a si lo. Thangthat nun a neitu pawl in sualral nehnak khal hi an nei a si.

Tirh. 16: 25 - Paul le Silas ih thangthatnak in Pathian huham a ko suak.-Nasa zet in ling a hnin, Sangka pawl a ong aw, an kut khihnak cikcin a poih aw theh”

Asinan, harsatnak hnuai ihsin Pathian an thangthat, an harsatnak zawn zoh lo in Pathian sawn zoh in thangthatnak hla an sak. Cutikah, an umnak innpi a hnin ih Pathian cahnak le thiltitheinak an hnen ah a runglang suak.

Pathian kan biak le thangthat tikah:

      Lungawinak thawn amah thangthat uh si. (Saam 100:4) “ A biakinn sungah lungawinak thawn ra uh; a hmun thianghlim ah thangthatnak thawn; a parah lungawi uhla a hmin thangthat uh”

      Amah focus in thangthat uh si(not music nor song itself) (Mathai 18:20-“ ziangahtile ka hmin in mi pahnih siseh, pathum siseh, nan pumkhawm tikah nan hnen ah ka um ve a si” titu Pathian ih umpinak a tak rori in kan co ding.

      Amah sunlawih le thangthatnak ah nun di a riam (Saam 89:15-16)- “ Hla thawn a lo biatu pawl cu mi lungawi an si; na mithmai tha tleunak sungih a tlanglengtu pawl cu, Bawipa mi thlawsuak an si. Ziangahtile nangmah ih ruangah sun nihlawh an nun a nuam; na thatnak ruangah nangmah cu an lo thangthat”

      Ralring tulmi: Farasi le daan thiam hrekkhat vek in thangthat lo ding (Mt. 15:8- “ Himi pawl hin an kaa lawng in in upat ih an thinlung ngaingai cun in hlat zet a si”  

      Thlarau le nunnak zate thawn biak ding a si (John 4:24)- “ thlarau le thutak in” – a thatnak, a zaangfahnak, a duhdawtnak, le a malsawmnak pawl ruat phah in thangthat ding.

      Thangthatnak hi kan nunphung (lifestyle) ah hman ding a si (Saam 34:1- “Bawipa ih parah ka lung a awi ringring ding. Amah thangthatnak cu ka bang dah lo ding” Biakinn sung le khawmnak lawngah a si lo ding.

Heb. 13:15- Curuangah Khrih zarah Pathian hnen ah thangthatnak thawinak cu catbang lo in hlan uhsi. Cui thawinak cu a hmin thangthatnak kan hmur rah cu a si”

Lesson:

Tuanvo menmen ih Pathian thangthat si lo, nunnak taktak thawi Pathian thangthatnak in Pathian a cangvaiter. A thangthattu lam ah nun lungawinak, hnangamnak le cahnak thar mi a pe ih, kan thangthat mi Pathian ih cahnak le huham kan hnen ah a ko suak a si.

3). Thlacamnak nun neitu pawl

Thlacamnak hi Pathian cangvaihter dan thabik pakhat a si.  Thlacam nun a neitu le thlacamnak thawn caan a hmangtu pawl in Pathian ih kutcak le cangvaihnak nasa zet in an tep theu.

James 5:17-“ Elijah cu kanmah bangtuk milai a si ko. Sikhalsehla ruah sur lo dingin taimak suah in thla a cam ih an ram ah kum 3 le a hrekt sung ruah a sur lo. Cuih hnu ah thla a camsal ih ruah a sur sal. Cutiin leilung in ti le rawl a suah sal” Elijah ih thlacamnak ruangah kum 3 le hrek sung ruah a sur lo ih, thla a camsak ih cutin ruah a sur sal. ( I Siang. 17)

Ø  Thlacam sawhsawh si lo

Ø   Zumnak in thlacamnak in mina a damter

Ø  Heb.11:6 bangin “ Pathian in in bawm ding, a cangvai ding, a tuah tengteng ding” ti zum ngam a tul.

Ø  Mi ding ih thlacamnak cu a cak zet ih hmual a nei  

A camtu kha Miding, mifel,  mi dik, mi thiang si a tul. Cam thiam le thiamlo lam a si lo.

      Thlawsuah vanruah pumpak le innsang ih a sur theinak ding ahhin thlacam nun a neitu Pathian zumtu sung ah hin kan va tul tak em?

I Siang. 18:38- Elijah cu amah lawng a si. Asinan, Baal profet 450 le khawzing nu Aserah profet  400 pawl hmai ah a zam lo law law. “ Maw Bawipa , i run let hram awla cuticun hi minung pawl in Bawipa nangmah cu Pathian taktak na si ti an lo thei ding ih na hnen ah na hruai kirsal ding a si” ti ah thla a cam” Van ihsin meisa a rung tla ih thawinak a kang theh.  Thlacamnak in Pathian a cangvaiter.

Suah 17: 8-12 -Joshua le a ralkap pawl Amalex ral an do lai ah. Moses, Aaron le Hur pawl thla an rak cam...Pathian in nehnak a pek.

Joshua 10: 13 –Ammon mi pawl thawn an doawk lai ah Joshua in thla a cam ih ni a ding- “ Ninu Gibeon khaw tlunah ding hrih aw, thlapa Aijalon hawrkuam par ah ding hrih aw a ti” cutik ah.. ni khat sung rori vanlai ah Ni a ding ih an ral an neh thluh lai hlan lo ni a liam lo... mangbangza a va si em.

Lesson:

Kawhhran in thlacam tu nu le pa, zumtu tha midingfel tampi hi kan tul a si.

Kawhhran hmaisa thlacamnak ah thil 3 a thleng:

Tirh. 4: 31- “ Thla an cam theh vete in cutawk ih (1)an tonkhawmnak inn cu a hnin thluh,(2) Thlarau Thianghlim in an khat ih (3)Pathian thu cu raltha zet in an sim

Peknak nun neitu, thangthat nun neitu le thlacam nun nei ih Pathian cangvaitertu si cio dingah Pathian in lo thlawsuah hramseh. 

Pathian ih bawm theimi si aw

September ni 28: TUINI THUCAH(106)

Pathian ih bawm theimi si aw.

■ Pathian cun an harsarnak ihsin mi zovek khal a bawm thei nan bawm hiarmi le hiarlomi, lole bawm duh le duh lo a nei.
■ Harsatnak a tuartu zaten a bawm thluh lo. Bawm thluh sisehla leitlun minung zohman harsatnak nei kan um lo ding.
■ Pathian kut sungah ziangvek buainak le harsatnak khal cinfelnak a phi(answer)a um thluh nan a bawmnak kutcak a langsuak theinak ding minung lam ih in dil ngen mia um:

1. Na nunnak Pathian hnen ah pe hmaisa aw.

■ Leitlun thil dangdang -sualnak, thatlonak le nawmnak ah pe hlah. A netnak cu siatnak a si.
■ Pathian hnen ah, a hman ding ah, a sunlawinak hrangah pe aw cule Pathian na nunnak ah a sunglawi ding.
■ Thaisun ah ziang kan cang ding kan theilo nan in hruaitu Bawipa cu thaisun le kan hmailam neitu a si.
■ Amah naih awla cule a hnen ihsin thazang cahnak na ngah ding.

2. Amah rinsan aw.

■ Minung hman in mah rinsantu par ih thil tha tuah le bawmnak kutza tial san hna kan thiam. Zianghmanlo kan si hmanah beiseinak taktak thawn in pan, in rinsantu cu kan theitawp suah in kan bawm theu.
■ Kan Pathian khal hi rinsan duhtu Pathian a si. Cule, anih cu rinsan a tlak ngaingai fawn. Amah rinsantu le tlaihsantu lak ihsin a bawm theilomi pakhat hman an um lo. Amah a rinsantu an mualpho dahlo.
■ Amah rinsantu pawl in Pathian ih lennak, thatnak, thiltitheizia an hmu tam cuang.

Hi a tlun ih thil pahnih hi kan hmailam thu ah siseh, atu rori ih kan tawn mi harsatnak in siseh, tawng ding vek ih kan ruahmi buainak, tihnak le thlaphannak lak ihsin Pathian ih bawmnak, runnak le kutcak kan hmuhnak ding hrangah kan nun ih a um hmaisak a tul a si.

Curuangah,
》Bawipai hnen ah na nunnak pe aw.. a him bik ih a tha bik fawn.
》Amah rinsan aw cule na tuah theilo mi zaten amah in a lo tuahsak ding. In bawm ti lawng silo in in tuahsak theh ding.

"Bawipai' hnen ah na nunnak pe aw, Amah rinsan awla a lo bawm ding"( Saam 37:5)

Pathian thlawsuahnak thar na hnen ah um hramseh.

Peknak-Pathian Malsawm Dawnnak Titler

PEKNAK-Pathian malsom dawnnak titler

Thufim: 11:25- Siangzet in nung aw la na lian ding, midang va bawm awla an lo bawm ve ding.

                                                     September ni 11, Sunday Zing, 2016 thusimmi 

Thusimtu: Rev. Henry vl Hmangaih 

Dr. R. Mark Dillon, Vice President, Wheaton College

Kawhhran le peknak thawi pehpar aw in minung phun 4 kan um  ti ah a cabu “ Giving and Getting in the Kingdom” timi ah a ngankhum.

Cupawl tla cu:

1). Ui le hreh cing ih petu ( Reluctant giver -50% of the population)- sumpai  le peknak thuhla an hnen ih sim le rel cu phurrit ah an ruat. An thupit termi cu “ Ka Sumpai cu keimah thuthu” tihi asi.

2). Punghmanlo ih petu (Casual giver-25% of population)- Annih pawl cu, “ Ka sumpai ziangzat saw ka pek ding?” ti ah thu an sut.

3). Seherhnak thawi petu ( Thoughtful giver-20% of population)-  Cu pawl cun “ Ziangzat ha Bawipai’ ta ka pek sal thei ding?” ti ah thu an sutaw aw.

4). Hleice zet ih pehtu (gifted giver-5% of population). Hi minung pawl cun peknak nun ah hin lungawinak nasa zet an nei. Thusuhnak an tuah mi cu “ Ziangzat kan pek a tul lole ziangzat kan pe ding timi silo in Pathian ih tangka ziangzat kan sup (keep), kawl ding” ti sawn a si. An hmuh dang a danglam zet.

Thusuhnak: Hi peknak petu phun 4 sungah khuinah bikah na um? Khui mi dinhmun ah cang (become) lole thleng ding na duh?  Mah le mah sutaw cio uh si.

Sermon ih tumtahmi:

1.  Pehnak ih sunlawi zia kai ngah ih peknak nun neitu, mi tirhsiang si cio thei dingah

2. Peknak ruang ih a ra mi lungawinak le thlawsuah a phunphun co thei dingah

3. Peknak ruang ih Pathian ram karhzaiternak le van ih ro tampi khawl ngahtu si cio thei ding.

Peknak phun 5

1). 1/10 le thawhhlawm- (Motivated by obedience & rewarded by blessing) “ Ka ta” ti ah Pathian in a ti- Ngaingaitei tilen na pek lo len Pathian ta na ru tinak a si. 1/10 peknak hi a hramthok (Basic) a si.  Pathian in in fiah uh ti ah a ti mi a si.  Ziangtikah kan pe ding?  Na hlawh na suah veten pe cih aw. Khui ah ? Thlarau rawl kilnak mai biakinn ah (Rinumzet ih petu hnen ih lungawi thusim le pelotu hnen ih sawmnak)—Mal.3:6-12; Mt. 23:23.

2).  Thlairah hmaisabik ( Motivation is generosity & reward is abundant life)[Neh. 10:35-36; Thuf. 3:9-10 siar aw]    Cumi cu Israel pawl in Pathian hnen ih an pekmi a si. Pathian in a rak dilmi khal a si fawn. Lo hnatuantu in fiangsin in tuini ih kan nih hnak in an theih ka zum. An thlaici thlak ihsin a hmaisa ih rah a rahmi kha a siat ah maw, a that ah maw Pathian hnen ah pek ding a si.

Ø  Na thlahlawh ihsi a pung thang hmaisa bik kha pek ringring ding a si.

Ø   Cumi cu Pathian hnen ah sumpai na duhdawt lo, a  thlawsuah ruangah lungawi thu na sim kirnak a si.

3). Harsa hrang peknak (Motion is compassion, sympathy , love & the reward is  Sympathy- joy, and treasure in heaven)

Ø  Isaiah 58:10- Rilrawng mi an pum nan puarter ih mi tlasam pawl an tul mi nan pek a si ahcun a lo kulhtu khawthimnak hi sun nitleu ah a cang ding.             

Ø  Thufim 19:17- Mi farah par ih zaangfahnak neih cu Bawipa ih hnen ih thil pek bangtuk a si; Bawipa amah in a lo pesal leh ding.

Ø  Saam 112:9 Mi harsa le mi farah hnen ih siangzet ih pek cu .. mi upat mi sinak a si

Ø  Saam 41:1b..mi farah zawn ruattu cu.. an harsat caan ah Bawipa in a bawm ding.

Ø  Thufim. 28: 27- Mi farah pawl khi thil va then awla na hlawhsam dah lo ding.

Ø  Mathai 6:3-4- (Ralrin ding- A thupte ih tuah ding.

4).  Thlaici tuh- (Motivation is reward and harvest is 30,60,100 ih karh) Mark. 4:8- Ram tha ih tlami

Na hmailam cu na thlaici thuh mi parah a thum aw.. ramtha ih na tuh a silen a let 30,60,100 a karh ding. Cumi cu kawhhran, rawngbawlnak, biakinn hrang , crusade, camping tvk....

5). Zumnak thutiam- (Mark 11:22- “ Pathian ah zumnak nei aw”; ( Motivation is faith). Himi cu thuawihnak, lole midang zaangfahnak ihsi ra um mi a si lo. Pathian thiltitheizia zumnak ihsi ra um mi a si.  II San. 16:9; Thusimtu 5:4- “ Pathian hnen ih thukamnak na tuah tikah na thukam vekih tuahsuak dingah na khulfung hlah. Ziangahtile Pathian in mi aa cu zianghman ah a hai lo. Na thukam vekin pe aw”

Curuangah, PEKNAK cu:

1. Kan sinak taktak langfiangtertu a si

a.       Kan peknak ihsin ziangtluk Pathian kan duhdawt ti theih a theih.

b.      Ziangtluk in Pathian ih in kawltermi parah kan rinum ti a langter. 

2. Pathian Bank ah sumpai kan khawl tinak a si. ( I Siangpahrang 17:7-16

3. Midang hrang ih malsom phurtu si theinak lamzin pakhat a si.

4. Thil ropi tuahnak ah Bawipa in a hmang theu (Mathai 14:13-21)

5). Pathian malsom dawnnak titler a si (Thufim. 18: 16- “ Mi pakhat ih peknak in a hrang sangka a onsak ih mi ropi pawl hnen a thlengter” ( KJV) Semtirnak 22-

Kan nun cilh ding  le theih ringring ding ih ka duhmi:

1.      Pathian in lo thlawsuah le lo malsawm a duh ruangah “ Peknak “ sangka a lo onsak a si.

2.      Mi harsa le farah na hmaikaa ih Pathian in a rak kuat mi an um len na tlin tawk in bawm aw.

3.      Sum le pai hi kan ta a si lo- a zaten Bawipai’ ta a si. Kannih cu Bawipai’ sum kilkhawitu kan si. Curuangah, dikzet le felzet ih kilkhawitu si aw. Pathian in a hman a duh caan ah ui lo in pe suak theu aw. Na sianglo a silen.. thil dang pakhat khat hmang in Pathian in a lo laksak ding ih na sumpai zate tiang in a cemral thei.

4.      Na sum le neihmi in Pathian sunlawih, thangthat aw.

5.      1/10 dikzet in pe aw. Pathian ih ta a si. Na pek tikah Pathian hrangah pe na si hrih lo. Na pek lo cun a tan a ruksak sawn a si.

6.      Kan zaten Peknak hi Pathian hna kan tuan tlang theinak a si.

7.      Tuini ihsi rori in siangzet in Pathian hnen ah pe theu aw.

Thukharnak

Ø  Danpeksalnak 8:17- Curuangah kanmah ih cahnak le thazaang in kan lian a si , ti ah ziangtik hman ah ruat hlah uh. Nan lennak dingah cahnak huham a lo petu cu Bawipa nan Pathian a si kha thei ringring uh...)

Ø  Pe uh la pek in nan um ding ti ah Cathiang hlim ih sim bangin siangzet ih Pathian hnen ah sis eh, midang hnen ah siseh Peknak nun a neitu si cio thei dingah Pathian in lo thlawsuah cio hramseh.