Friday, August 19, 2011

Thlacamnak Ih Thiltitheizia

Zumtupawl in kan Pathian hnen ih thla kan camnak hin thil nasazetin a ti thei. Kan Pathian hi thlacamnak ngaitu{sangtu}Pathian a si.{Ps.65:2}..Kan Pathian ih thiltitheinak a tak ih kan kawh thlaak thei nak cu thlacam nak hi a si.Thlacamnak ih thil a ti thei zia cu:

1.Minung hrangih thil cang thei nawn lo khal cangtheiah a can ter.
 Zumnak ih kan pa Isak in a nupi Rebekah "cing"zo mi fa nei ding in Pathian hnen ih thla a cam nak cun nau te thar Pathian in a pe{Gen.25:21}...Jacob ih nupi Rakili khal a "cing"zo nan
thla a cam tik ah Pathian in a sul{nau inn}a onsak saal ih fapa a hring{30:22}...Hanah khal fa nei thei lo ih a "cin"hnu ah Pathian hnen ih thlacam nak ruang ah fapa duh um zet Samuel a hring a si kha....Thlacamnak cun milai hrang ih si thei nawn lo{cangthei nawn lo}khal cang thei ah a can ter.
2. Thlacamnak cun a khaar aw zo mi Saangkaa khal a awngsal thei
 Israel pawl Izipt an suah san ih Tipi sen an thlen tik ah hmailam ah thihnak tipi, dung lam ah ral...thih nak ding in a kulh thluh ih an lamzin a pih thluh lai ah Moses ih thlacam nak{banphar}ruang ah Pathian in mangbang za in luat nak sangkaa a on sak.{Exo.14:1--30}..Peter thawng a tla ih thih lawng hma bak ih a um lai khal ah zumtu pawl ih thlacamnak hmang in Bawipa'n a luat ter...Unau, na lamzin a pit maw? Beidong mai lo in thlacam aw. Kan Pathian cu thlacam saangtu Pathian a si kha.

3.Thlacamnak cun boruak a ti danglam.
 Pathian mi Elijah ih thlacamnak ruang ah kumthum le a hrek sung Israel ram ih ruahsur nawn lo le dai fawr hman um nawn lo nikhat thil thu ah ruahpi a sur...{Jam.5:17}..Thlacamnak cun boruak sia khal boruak ṭha ah...thinpihnak khal ruahsannak Ni eng mawi ah mi a hruai ṭheu.

4. Thihnak sung in mi a luat ter
Hezekiah Siangpahrang pa cu Pathian in a thih ding thu prophet hmang in a theih ter tik ah mitthli thawn thla a cam ih Pathian in a natnak a dam ter lawng si lo in a dam kum, kum 15 rori a sau ter bet..{Isai.38:1--5}...Peter khal thih ding lawng hma bak zo mi thlacamnak ruang ah luat nak a co.{Dungthlun.12:5-12}.

5. Thlacamnak cun sun zo (hlohzo) mi a ngahsal ter thei
David siangpahrang cu a remruah sual ruangah Amalek pawl in a neih mi za ten{a nupi fa nau tiang in}a lak sak ih a Inn, Lo khal an ur thluh. Asinan, Bawipa ah thazaang thar a la saal ih thlacam in Bawipa thu a rawn tik ah Bawipa'n a sun zo mi{a hloh zo mi}hmuahhmuah in a
pe saal thluh.{1Sam.30:1--19}..Unau, nang teh na rem ruah sual ruang ah sun mi na nei in na bei a dong maw? Cuvek caan ih thazaang thar laak nak ding Bawipa kan neih hi a sunglawi tuk.{1Sam.30:6-7}..Thlacamnak ruangah kan ngahsal thei.{1.sam.7:3--20]

6.Thlacamnak cun raal nehnak a thlen.
Siangpahrang Jehosaphat cun thlacamnak in raal a neh..{2Chro.20:1--20}.Moses banpharnak ruangah Israelpawl in an raal an neh.{Exo.17:8--13}. Leitlun ih thil ti thei bik cu hlaapi ah a um lo na ka sungah a um ih cucu thlacam ih Pathian kawh hi a si.

Siartu za te Pathian in mal lo sawm hram seh.

Evan.David Ceu{HCT}
Ngailan

Ziangruangah Pathian Miropipawl A Sunlawinakin A Suahsan?

    "....Cun Samson cun nidang vek in ka taalsuak saal mai ding ti ah a ruat, Asinan Bawipa'n a tlansan zo ti a thei aw lo..."{Thuthen.16:20}.

    " Sunlawinak cun Israel a suahsan tinak ah naute hmin ahcun Ikabod a sak..."{1Sam.4:21}.

     " Na lamzin cu a hnen {Nunau sual}ih ta thawn aw la a sangkaa khal va naih hlah, Culole na sunlawinak cu midang a pe ding..."{Thufim.5:8-9}.

Ziangruangah Samson vek Pathian mi ropi{Pathian ih nasa tak ih a hman mi hnen in}Pathian sunlawinak a hlo a si pei?. Zumtu'i nunnak khal ih a
ṭihnung bik mi cu Pathian sunlawinak ih suahsan mi le tlaansan mi si hi a si.Pathian rundamnak kan comi cu kumkhaw daih si hmansehla kan nun ih a sunlawinak phuang aw ṭheu mi le Pathian ih mi a hman ṭheunak pawl hi cu kan nun dan ih a zirlo le in tlaansan in in suahsan thei a si. Ziangvek khua le ram,ziangvek kawhhran le ziangvek innsang khal Pathian sunlawinak ih suahsan mi cu mi vanduai bik an si. Zumtu pawl hin kanmah te in sunlawinak kan neilo,Pathian sunlawinak ih in umpi lawngah kan sunglawi cih ve men.

          Asile Ziangruangah si pei Pathian sunlawinak in Pathian mi ropi hi a suahsan or a tlaansan....?
1.  Serhthianghlimawknak tlaaksam ruangah{Thuṭhen.16:7,14,17,Mipum.6:1-21}.
          Samson hi a suah hlan ihsin Pathian hrangih Nazarit{Serhthianghlim mi}a si. Asinak vek in a serhthianghlimawk sung hmuahhmuah ahcun Pathian huham le sunlawinak in a khat. Asinan, leitlun mi menmen bangih a nun le veten thlarau lam ih a thiltitheinak{sunlawinak} cu a hlo mai a si.Zumtu unau, kannih khal kan pianthar veten Pathian hrangih serhthianghlim mi kan si zo ruangah leitlun mi vek ih nung thei kan si nawnlo. Leitlunmipawl ih tham mi kip le tuah mi kip le an fehnak kip le an tonak kip khal ah kan hrangih tuah ve lo ding to ve lo nak le tham ve lo ding mi a tam tuk. Daniel tei rualza khal mi ram an thlen hmanah Pathian duhdan ih an serhthianghlim awk ruangah huham in an khat ih anmah hmang in Babylon ram pumpi ah Pathian sunlawinak tianga lang a si. Rinnak ih kan pa Abraham khal Pathian duhzawng in thianfihlimawknak nun a nei, Lot cun a nei ve lo. Lot cu a miatnak ding a si phawt cun Sadom khawpi{Zumlotu misual rual}lakih um poi a ti lo. Lot cun sumpai a nei, hlawnthilri a nei nan thlarau lam ah huham{sunlawinak} a neilo.Abraham cu Pathian hrangih a serhthianghlimawk ruangah thlarau lam huham{Pathian sunlawinak}in a khatih leitlun thlawsuah khal a sung cuanglo. Zumtu unau kan nun ih Pathian sunlawinak lang kan duh asile Pathian hrangih serhthianghlim awknak kan neih tengteng a
ṭul a si.

2. Thladahawknak ruangah{Jer.48:10}.
           Pathian mipawl hnen ih Pathian sunlawinak a hlohsal
ṭheunak pakhat leh cu nuam tete ih thlahdahawk vivo nak ruangah a si ṭheu.Rawngbawl tir laiih pekawknak nun nasa tak ih nei caan a hung rei vivo ih nuam tete ih thlahdah hrethro vivo ti vek hi thil ṭihnung tak a si. Pianthar pek le rawngbawl pek ih Pathian hrangah ṭhahnemngainak vek nei nawnlo mihlo hrangih mitthli tla mal vivo,thlacam , Bible siar le sungkua khawm tivek maw a phunphun thladah hrethro vivo nak hi Setan ih lungawi zawng a si. Samson khal Pathian in a hmang zet, cahnak in a khat nan,can a hung rei vivo tikah nuam tete in sual a neel vivo, a thlahdah aw vivo ih a tawpnak ahcun Pathian sunlawinak tiangin a tlansan a si kha.
          Curuangah, Pathian in Jacob khal can rei zet hnuah ."..Tho aw la Bethel ah feh aw,cutawk ah na u Esau hnen ihsi na tlaan lai ih a phuang aw tu Pathian hrangah maicaam va din aw "{Gen.35:1-5} a ti a si kha.Unau nangteh na nun ah maicaam thawn nan hla aw zo maw..?Ziang  asi hmanah kirsal in
Bethel ah{Pathian thawi pawlawknak}ah kan fehsal kei uh. "Daithlang zet ih Bawipa riantu cu camsiat in um seh.."{Jer.48:10}.

3. Cawhpolh nun ruangah{1Sam.2:22-26}.
           A tlun ih Bible caang kan siar le Eli ih fapa Hopnia le Phinehasa tei unau nun kan hmu.Pathian hnen ih pek dingmi thawinak sa an duhduh in an ei,biak inn ih ra mi nunau an duhduh in an sualpi men ruangah an rampi tiang Pathian sunlawinak in a suahsan a si. Zumtu unau Innsang pa bik le nu bik nun cawhpolh tuk ruangah Innsang ih Pathian sunlawinak langlo in a um thei.Cuvek in kawhhran hruaitu a thup te nun ih cawhpolh{Pathian thil le leitlun sualnak tuah tlang hluahhlo}ruangah kawhhran ah Pathian sunlawinak lang ding kan dal{dawn} thei a si. Ralrin a va ṭul em!

4. Thlarau lamih nunthup neih lo nak ruangah
{Thu
ṭhen.14:16-17,16:16-17}.
        Samson in a pek ahcun a fala nu ih a suh rero khal le a cahnak san thuthup a sim duhlo nan anetnak ahcun tuar aw nawn lo in a sim ih a nun tiang in a tuar phah.Unau, Pathian mipawl cun mi lakih sim lo dingmi Pathian le kanmah karlak lawngih kan neih hlenhli dingmi thuthup a um a si.Thimnak ah...Pathian kutcak kan hmuh mi tetti kan khan ih mipi hmaiah kan sim
ṭheu a ṭha zet ko. Asinan a caancaan ahcun porhawknak phun ah a cang zik ṭheu. Pathian lakih kan pekawknak tivek tla kum reipi a si zo ih mi thazaang kan pek nak ding ih sim ṭul zet ih kan theih a siahcun thuhran,culo ahcun Pathian lakih na pekawknak cu nangmah le Pathian lawng in thei men seh,mipi hmai ah aman cu Amah in a lang ter sawn ding a si.Hezekiah khal a damlo a hung dam ih Babylon mipawl in an ra veh tikah a ṭullo mi an robawm retnak tiang a rak zoh ter ruangah Isaiah in nikhatkhat ah Babylon pawl in na zoh ter mi thil hmuahhmauh an ram ah an phur theh ding a ti.{Isai.39:1-8}.Pathian mi cun leitlun mi hmaiah kan sidan hmuahhmuah ih sim thluh a ṭul lo. Samson nunau hnen ah a thuthup a sim thluh ruangah a cem ta riai ansi kha.,

4. Hnaglnak ruangah{{Thufim.16:18}.
         "Uarawknak cu hlohralnak hmaiah a feh ih hngalnak cu tluknak hmai ah.."{Thufim.16:18}. Pathian ih a huat zetmi sual pakhat cu hngalnak hi a si. Pathian in malte in hman deuh maw mipi tlun deuh ih in ret ve ten mah le mah sinak thei nawnlo ih uarawk pang,hngal pang a awl tuk..."Mi zaangzel le mi hngal hrimhrim Pathian in rei a hmang theilo".

5. Sualsir duhlo nak ruangah{Thufim.28:13}.
         "Mai sualnak a thup tu cu a hlawhtlinglo dingih thup lo ih a phuangsuak ih a hawisantu cun zaangfahnak an hmu ding"{Thufim.16:13}. ti ah a ti. Pathian mi cu sual a tuah khal asile Pathian kehram ih nun kekkuai ih a sirawk ahcun Pathian in a ngaidam in a hmang theisal thotho a si{Thu
ṭhen.16:28-30,Ps.51:17,1John.1:8-10}.
                 
         Pathian sunlawinak ih Samson a suahsan hnu cun mi hnihsuak sainak men le mi zoh nom men ah a cang ta  a si. Aw...Pathian mi hrangah cun a va na ve! Tuihlan ih Samson mi hmuahmuah ih an
ṭihzah mi le upatmi pa cu tu ahcun mi duhtawk ih puahcawkmi le hnihsan mi ah a cang ta riai..Paul in "mi lakih tlang au rero tu keimah sawn hi hnawn mi ka si pang ding ka phang a ti kha"{1Kor.9:27}."Pathian sunlawinak ih in thawm lawngah sunlawihnak kan nei kanmah te in kan neilo"ti thei in Bawipa ah kirsal uh si. Samson khal a sam a hung cerhsal ih sualsir in Pathian a kawhsal tikah Bawipa in a phuba a laksak a si kha.{Thuṭhen.16:28-31}.

Pathian in a thu mal sawm seh.
 
Saya Ceute
Tahan

Hlawhtlin Ni ih Hlawhsam


Leilungtlun ah ziangziang kan tuahnak ah hlawhtlinnak kan hmuh ni tluk ih nuam hi a um lo men ding. Asinan Khristian nun ahcun milai hmai ih kan hlawhtlin ni hi Pathian hmai ih kan hlawhsam ni a si thei. Pathian hmai ih hlawhtlin le milai hmai ih hlawhtlin hi thil bang aw a si lo. Kan Bible sungah hlawhtlin ni ih hlawhsam kan hmuh mi an um. Cupawl tla cu:

 1.Moses{Num.20:1-13}
           Moses hi Pathian miropi Israel pawl Izipt sal ih hruaisuaktu ding ih Pathian hman mi a si. Israel pawl an ti a haal lai ah Pathian in lungpi vaw aw a ti ih a vuak tikah tidai asuak.{Exo.17:1-7}. Asinan voihnihnak ahcun Pathian in vaw nawnlo in thusim men aw la tidai a suak ding a ti nan a duh lo ih voihnih a vuak tikah mipi
ṭulmi tidai cu a suak durdo ko{Num.20:7-13}. Moses in Pathian thulunglo ih lungpi a vuak laiah mipi ṭul mi tidai cu a suak thotho. Ziangruangah tile khaiṭum ah Moses nun ih Pathian a lungawi ruangah asilo, nan mipi a zangfah tuk men ruangah a si. Mipi hmaiah cun a hlankel in a hlawhtling vek nan a hlawhtlin ni kha Pathian hmaiah cun a hlawhsam ni a si ta riai. Khai ni ih a thilti ciah kha Kanan ram a luh theilo nak a si {Num.20:12-13}.Unau, mipi hmai ih mi hlawhtling kan bang zet laiah kan nunthup ah Pathian riahse zet tla hin a um thei a si cu. Voitampi cu kan nun ih Pathian a lungawi ruangah silo in mipi a zangfah tuk men ruang ih a kutcak in hmuh ter can tla a um. Mipi cu in hmuhthei nak a leng in in tah Pathian cun sunglam nun in in tah a si {1Sam.16:7-9}. Kan nun ah Bawipa hi a lungawi kem? Kan hlawhtling kan ti mi hi Pathian thinnatertu men a si pang kem?ti hi zumtu cun kan ruah ṭheu ding mi a si.

 2.Saul siangpahrang{1Sam.15}.
          Pathian in Saul siangpahrang hnenah Amalek raal va do aw la that thluh aw tiah a ti. A va do ngaingai ih raalnehnak cu Bawipa'n a pe ko. Asinan anih khal a raalneh ni ah Pathian hmaiah a hlawhsam. Pathian in ka thuvek ih thil na tilo ruangah siangpahrang dingah ka lo duhlo a ti a si kha.Mipi hmai ih raalnehnak a co{a hlawhtlin ni}ah Pathian in a sinak in a hlon. Pathian in ziangkim theitu asinak cun Saul siangpahrang hi raalnehnak ka pek le Kei ka sunglawi lo ding ti hi a theicia keukeu nan raalnehnak a pe thotho. Cumi cu Israel mipi a zaangfah tuk men ruangah a si. Unau Pathian ih hlawhtlinnak le thlawsuah in pek mi hin Pathian maw a sunlawih kanmah?. Kan thlawsuah don ni, kan hlawhtlin ni pawl hi kan Pathian lak ih kan sun bik ni a si thei a si cu. "Curuangah ding ih ruat aw mi cu a tluk lo nak dingah ralring seh"{1Kor.10:12}.
  3.Akkhaan{Joshua.7}.
         
Pathian in Israel pawl raalnehnak a pe ih kanan ram ih khawpi pakhat Jeriko an neh. Jeriko khawsung ih thilri zianghman nanmai hrangah nan la lo pe ti ah a ti. Asinan Pathian in raalnehnak a hun pe taktak cu raalkap dang pawl in thulung zet ih raal an do laiah Akkhaan cun a thup tei mipi theih lawn hawl mi a nei. Mai hawlmi nana cu a hlawhtling ve ko. Babylon puan ṭhaṭha le Sui le Ngun laak lo ding mi a rak la ih hlawhtling zet in a thei aw. Asinan a hlawhtlin nak in amah le a Innsang hrang tiangah thihnak a thlen.{Josh.7:20-26}. Kan hlawhtlinnak kan timi hi kan nun le kan Innsang hrang ih siatnak thlen tu men ah a cang pang pei maw? Mai hawl mi cu an hmu cio. Israel raalkap pawl cun raalnehnak thawi Bawipa'i ramkauhnak ding an hawl laiah Akkhaan cun amai ṭanghma a rak hawl a hlawhtling ve ko nan ka thihnak ding le ka innsang saitnak ding a si ti a rak ruat ban lo a va poi em!. Hlawhtlin hi a sual lo nan Pathian duhzawng ih hlawhtlinnak a si maw?ti mi hi a thupi bik mi cu a si. Pathian duhzawng asilo ah cun kan nun in velna sal tu menah a cang ding a si.

         Curuangah zumtu unau "minung hmai ih hlawhtling zet vek si, Pathian hmai ih hlawhsam mi sihnak cun Pathian hmai thawn minung hmai thawn hlawhtling mi si hi a
ṭha bik a si”. Ziangkim kan tuahnak ah Bawipa lungawi aw sehla, Amahlawng hi sunglawi ko seh ti hi kan nun ih duh mi le haal mi si koseh.

 Pathian in a thu mal in sawm sak seh.                                                    
 Evan.David Ceu
 {Ceu family]
Tahan

Thursday, August 18, 2011

Ama Khunzia Tuat cun

A MAN KHUNZIA TUAT CUN

Vawitampi ah cun ka mang ngaih lo,
Ziangzat a si ding, ziangtluk a cem tam ding?;
Ka tikcu hman mi ni le thla pawl.

Ka taksa harhdamnak le hriselnak;
Dam lo can ih si hlum khat te a man khun zia,
Ka ruah can le lei canah;
Ka nat hnak in ka dam ni a tam;
Dam man Bawipa'n in khawng siseh la,
Sam cawk ding ni ka nei ding maw?

Nitin ka hawpmi zilthil thiang ,
Ziangtluk Oxigen langkhat a khung?;
Dam lo ih Cizung a kai mi le a bese mi cun,
Khung pi pi in an lei theu;
Tuini tiang ka hman ni zilthli thiang liangluang,
Sertu Bawipa in a man in khawng siseh la;
Sam thei ti ni ka nei ding maw?.

Man lo ih ka in mi cirhti thiang le daiziar ti,
Ka pian ihsin tui ni tiang ka hman mi pawl kha;
Sumpai le sui ngun ih lei ding siseh la,
Kei hin sam thei ti ka nei kem?;

Neih sunte Anthur hang le tisawp,
Antam kio le sawhthu bawl pawl;
Thaw hluaihlo ih ka ei theinak,
Kaa thawt si lei tul lawi,
Nitin ka vawlh zohzoh thei nak hi;
Bawipa'n an man in bill seh la,
Ka kan thei ding maw?

Hring dildel chin ram le,
Maktarai Inn ropi pawl;
Mi ih an rel men si lo,
Mit rori ih leitlun kilkip ka hmuh thei le;
Sersiarmi pawl an mawi zia ,
Ka mit ih ka hmu thei tla hi;
Hmuhteinak man in khawng sisehla,
Sam thei ti ni ka nei ding maw?

Ka hmuh nitin khawtleu mawi,
Thlatin electric bill ka ruah tikah;
Sertu Bawipa hin in khawng siseh la,
Sam cawk ti ni um ing maw?,

Ka cawlhdamnak hrangah zan dai ,
Si hlum nitin ei tul lo in;
Ka lu le lukham a dai awk rualih,
Thaw zetih ka it that thei mai tla hi;
Aman Bawipa'n in dil sehla,
Sam cawk ding ni ka nei pei maw?

Thlawsuahtu Bawipa'i pekmi,
Damhriselnak, inn le lo tha,
Hmancawp ding sum le pai;
Zilthli thiang le cirhti dai,
Khaw tleu mawi le hmuh theinak;
Thaw le dai teh theinak pawl,
A tamtuk ka ruahcawk lo mi pawltla;
Aman khunzia ka vawn tuat cun,
Ziangvek dinhmun le can ih ka um khalah,
Bawipa'i lam in rak hruaizia hmu thiam in,
Lungawi thusim ding hi a um ringring

Tuesday, August 16, 2011

Sehla!

SEHLA
Harsat le vansan hi tawng dah lo sela,
Mangbang le ningtih hi tawng dah lo sela,
Tlaksam le tulmi nei lo in um dah lo sela,
.Pathian hnenah bawmnak dil in thla ka cam pei maw?

Sum sahpi vansang ah um in khua dur lo sela,
Thli le ruah tak pi in sur lo sela,
Minung nunnak, tilva le leilung hin
Ziangtluk tuar in a siat phah ding?

Vansannak, tlaksamnak, damlonak,
Zonzaihnak, natnak le tlaksiatnak pawl
Hmuahhmuah hin ka lei tisa cu cauter hman sela,
Cupawl ruangah Bawipa naih lo thei lo ih in tuah ruangah
Tuarnak le harsatnak khal a hmelmawi in hmuhter tu sawn!

Sunday, August 14, 2011

THLARAU RAWL: Nu le Pa’i Ṭuanvo Thupituk Mi

THLARAU RAWL: Nu le Pa’i Ṭuanvo Thupituk Mi: "Hringtu nu le pa in an thinlung hmuahhmuah, an nunnak
hmuahmuah, an cahnak hmuahhmu..."

Nu le Pa’i Ṭuanvo Thupituk Mi

Hringtu nu le pa in an thinlung hmuahhmuah, an nunnak hmuahmuah, an cahnak hmuahhmuh le thazang hmuahhmuah thawi Pathian duhdawt dingih pum an pekawk tikah, an fale hnenah ro sunglawi bik kumkhaw daih an tanta thei.
Pathian in nu le pa pawl cu an fale nun dan ding lamtluan tinkim tumtah felzet nei ih zirh dingah ṭuanvo a pe. Cuti a si ruangah, nu le pa in  an fale pawl cu ciindan ṭha (good habits), nundan ṭha (good manners), thupi hlapi ih ret ding mi pawl (values), nungcang ziaza, le a pawimawh bik Pathian thu pawl sim le zirh ding an si. Bible in hitin in sim, “ BAWIPA nan Pathian cu nan thinlung zate, nan nunnak zate le nan thazaang zatein nan duhdawt pei.Tuihsun ih ka lo pekmi thukham pawl hi nan thinlung sungah caam ringring seh. Nan fate pawl zirh sin uh. Inn nan um tikah siseh, lengih nan feh tikah siseh, sim ringring uh. Nan colh tik le hna nan ṭuan tik khalah saal ringring uh”(Deut. 6:5-6). Kan fale pawl taima zetih kan zirh ṭulmi hrekkhatpawl kan zoh tlang hnik ding.
Pathian in nauhakpawl  anmah ih thuhla an zir a duhsak mi pawl:
1.         Pathian in nauhakpawl hi a hrangih sunglawi hleice vekin a hmu. (Sam 139:14)
Nauhak pawl hi an mak zet an nunnak ih thilpawi mawh zetih an retawk vekin an cang duh zet.  Ṭhimnakah, na falepawl khan , “ zianghmanah na santlai lo” ti lawnglawng thei ringring sela, kha vek kha si ko an si ding.  Curuangah, I John 3:1-2 cun hitin , “  Pathian kan Pa-ih in duhdawt zia hi ruathnik uh! In duhdawtnak a maksak ruangah Pathian faale ti ih kawh kan si hi; cuti ih in ti vekin kan si taktak. Curuangah a si hi khawvelih in theih lo nak cu! Pathian khal a thei lo. Ka duhdawtmi pawl, atu cu Pathian fate kan si zo; a sinan ziang bangtuk kan si lai ding ti cu a fiang hrih lo. Sikhalsehla Khrih a rat tikah cun amah bangtuk kan si ding ti kan thei; ziangahtile amah a si vek cekci in kan hmu ding.” in zirh.
2.       Pathian in an hrangah tumtahnak ropi zet a nei (Eph. 2:10; Jer.29:11)
Bible cun na fale pawl kha accident ih rawng piang men si lo, Pathian ih mangbangza kutsuak,  a tumtahnak sunglawi zet hlensuak ding ih tumtahnak felai tak nei ih a  tuah mi ti’n in sim.  Hmuhnak sangtak thawi ziang an cang thei ti mi an rak hmu cia a silen cu mi cun an zirnak tinkim- calai lam fimthiamnak, lehawknak, zuksuai le thil dangdang ah an hrang tha thoter tu le dawksau  aw sin thei ding ih phurter tu, bawmtu ah a cang thei.
3.      Pathian in lungawi aipuang tei um ringring dingah a duhsak ( I Thess. 5:18).
          Pathian ih lungawi ringring nun neih ding hi thupek a si. Lungawinak cun thinlung khawruahnak lamah hriselnak a pe.  Fale pawl cu ziangkim ah Bawipa ah lungawi ringring thei ding in nu le pa in kan zirh a ṭul. Ṭhimnakah, thleng aw dah lo mi- hringtu nu le pa, pianpi u le nau, mipa lole nunau ih an piannak, u le nau ih sungkaw member ih an pian dan, an miphun, ram, taksa tum fatet le an sinak tinkimah Pathian ih remruah le lairel hmu thiam thei dingah nu le pa in kan zirh le hmuh rori a ṭul . Mi pa an si len mipa vekih nung ding le nunau an silen nunau vekih nung ding in. Asi, hi mi ah zumtu nu le pa nei le nei lo kan danglamnak san cu fale zirh ih a thupit zia thu ah a si. Nu le pa zohṭhiamtlak ih kan nun lo ah cun ziangtin fale kan zirh thei ding?
4.      Pathian in duhthlannak (choices) an tuahmi parah mawhphurhnak la dingah a duh ( Gal. 6:7)
          Nu le pa in fale pawl hnenah duhthlannak zalen an neih thu hi kan sim ding a si. Asinan, cu mi rualrual in duhthlannak zalen an neih vekin an duhthlanak ih rahsuah (consequences) khal an laak ngam a ṭul ti khal kan zirh rori a ṭul. Ṭhimnakah, An taksa hriselnak (cianmazi) kha ṭha tei an fingkhawi lo asilen hmakhat ten tu le tu an na ringring thei tivek. Fale in hi thu hi an theih tengteng a ṭul: An duh thlang thei ding in zalennak  an nei nan an duhthlanmi ih rahsuah (result or consequences) a ṭha lam a si maw a sela a si khal len cumih ihsin an tlansuak thei lo. An duhtlanmi a si vekin an palh ah maw an ti fuh ah maw an pahtlang ngam a ṭul ti khal kan sim cia a ṭha.
5.      Pathian in mah le mah rinsanawknak hnakin Jesu Khrih rinsannak nun thawi an ṭhansoh a duhsak ( Fil. 4:13).
          Pathian thu thawi nundan ding ṭha tei kan khihhmuh aw lo a si ah cun, mah le mah rinsanawknak hin hngalnak ah awlsam ten mi  a hruai thei, ahlecein hlawhtlinnak kan co tikah. Cun, khatlamah mah le mah rinsanawk tuk ih kan hlawhsam pang asilen beidawnnak le thinnatnak ah mi a hruai awl zet fawn. Curuangah, nu le pa pawl in kan fale cu Pathian hnenah rinnak ṭhum ringring ding le anmai pumpak nunnak hrangih Pathian thiltitheinak rinsan ding le anmah hmang ih Pathian cangvaihnak hmuthiam dingah lam kan hmuh rori a ṭul.
Pathian  in nauhakpawl hnenih an rualpi thu thawi an theih a duhsak mi pawl:
1.       Na fanu, na fapa cu nel um te le tluangtlam te ih um dingah zirh ringring aw, ahleice in an rualpi pawl mi thlang thiam  dingah fimkhur ding in zirh aw ( Thuf. 13:20, I Kor. 15:38) ziangruangahtilen “ rualpi ṭha lo in ziaza ṭha a siat ter” ( I Kor. 15:33) tin fiangten Bible in in sim.
2.       A thupi bik mipawl retthiam ding hi a si.  Pathian in na fanu, na fapa ih nunnakah a thupibik mi hmun a luah a ṭul. Cumi ṭheh ah sungkua, zirnak, mawhphurhnakpawl le anetabikah rual le pipawl.
3.       An cut hlan ih ngaizawng nei lo dingih zirh thiam. A hleicein high school an suah hlan- an nauhak deuh lai le college ih an kai can ah hi thu hi ṭhaten nu le pa in rak zirh neh cia a thupi zet. Culole hi can te hi fanu le fapa tambik an lule can a si tikah nu le pa’i hrangah Pathian fimnak dil in hi can ah thupi zetin fale hruai thiam a ṭul.  Na fale an cut hlanih falat tlangval ngaizawnawknak ihsin na kilhim a silen hi zalennak panga pawl  hi a takin an tep : (1) An zirnak hnaihawk theitu le an thinlung la peng thei tu  lak ihsin(2).  A ṭul lo mi tuarnak le natnak lakih ihsin (tuah mawh awknak le lunglennak) (3). Rualpi kawm lo ih mahte lawng ih um hrannak lak ihsin (4).  Pathian ih laksawng pekmi talent pawl pungter sin thei ding in le,  (5). Tisa caaknak sual (immorality) le cumi ih a rahsuah (consequences) lak ihsin na luater thei.
Hi pawl hi cing ringring in nu le pa pawl in kan fale an tlai hlanah Pathian thu le taksa dan ih an theih ṭul mi zirh in can hmang cio uh si.
Pathian in siartu kan zaten thlawsuah in pe cio hram seh.

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...