Tuesday, November 29, 2011

Ziangruangah Kan Tlutheu? III


 Nunau le mipa umtlang nakah
          Kol. 3:5 Nupasualnak, zohmawi lo mi nuncan taksa hiarnak le hurnak pawl cu nunter hlah uh, ti kan hmu. I Kor. 6:18 khal ah nu le pa sualnak kha hrial uh. Sualnak dangdang cun milai taksa hi a siatsuah tuk lo. Sikhal sehla Nu le Pa sualnak a tuahtu cun amai taksa par ah sual a tuah a si, tiah a ti. Pathian-in minung in tuah tikah mipa hmuahhmuah hi nunau duhnak nei in in tuah. Cuvek thothoin nunau hmuahhmuah khal hi mipa duhnak nei ih tuah an si ve. Mipa in nunau a duh hi sual a si lo. Cubangin nunau khal in mipa a duh hi sual a si ve lo.
          Amah lawngte mipa in nunau  a duhnak cu dik lo zet le Pathian duhdan pahbal ih a nun le a tuah kha sual a si. Nunau khalin mipa a duhnak kha dik lo zet ih a hman ve mai a si ahcun sual asi. Curuangah Bible cun nupi bul le pasal bul nei dingin in fial. Mipa in nunau duhnak le nunau in mipa duhnak kan neih thluh ruangah ralrin rori a  ṭul. Nunau mipa um tlangnak ih kan ralrin dan ding teh ziangtin a si pei tin na ruat men thei. Hi mi zawnih kan ralrin dan ding ṭha bik cu, mai nupi le pasal a si lo mi thaw cun um tlang tam lo, naih aw ngaingai ih um tlang lo le, zutmet aw rero lo hi a si mai.
          Nunau le mipa um tlang tam le naih ngaingai ih zutmetawknak hin awlten tluknak ah in thlen thei. Nunau taksa mipa taksa hi daiawk le zutmetawk hi zopoh khalin kan duh in nuam khal kan ti cio. Zawngsang khal a awl zet. Cuiruangah nunau le mipa va um tlangnakah hin zopoh khal ralrin a ṭul ngaingai. A pawi lo e ti in na ralrin lo le ka ralrin lo ahcun kan cem a si mai. Mipa hi amah te lawngih um si seh la, Nunau khal hi mah te lawngih um si seh la cu ralrin hi a ṭul lo ding. Nunau le mipa hi kan um tlang celcel ruangah ralrin a ṭul.
          Leitlun ih Pathian mihman zetzetpawl le rinsan tlak zetzetpawl tla nunau mipatnak ih hminsia le mualpho an um phahphah. Ziangruangah tile thlemtu ralpa Setan hi a cangvai nasa ih, kan tisa duh mi a hmang ṭheu. Nunau mipatnak hi mit a meng ta poh ih kan duh ruangah kan ralrin lo cun mualpho ememin kan tlu durdo ding a si ko. A cang thei tawkin nunau le mipa hi mai nupi pasal si ceng lo hi cu um tlang tam tuk lo sehla  a ṭha bik. Pathian hnaṭuantu, Evangelistpawl hi kan ralrin a ṭul hleice. Khaw tin kan tlawnnakah Nunau hi cu hruai vivo lo sehla a ṭha bik. A bur ih khemping crusade kan va tuah tlang ti vek le kawhhran pa khat in in sawm tlang ti vek canah lo theih lo ih kan va um tlang hmanah ralrin a ṭul.
          Kanmah thusimtu-in kan tlawnnakah i thlun aw thu kan sim tlang ke ti ih kan va sawm tla hi cu a ṭha lo deuhdeuh. Cun crusade le khemping tuah dingih Saya a sawmtu bulpak le kawhhran khal hin nunau hi sawm tel tuk lo seh la a ṭha. Nunau hi sawm lo lawlaw ding ka tinak a si lo. Ralring zet ih thil kan ti a ṭul ka tinak a si. Kan ralrin taktak a ṭul. Hih sualnak ih kan luh pang cun camsiat zin kan zawh tinak a si. Ef.5:5 ah nupa sualnak a tuahtu cu Pathian uknak sungah covo a nei lo ti kan hmu. Leilungih minung mit a meng ta poh ih kan duh thluh mi cu sumpai le nunau mipatnak hi a si.
          Setan khalin kan duh mi ciah  in in thlem ahcun awlten in neh mai ṭheu. Curuangah zumtu mipiangthar zate hin nunau mipatnak zawnih kan tluk lonak dingah nasa takin kan ralring kei uh. Setan  hi a um men lo. I Thess. 4:3-5-7 khal ah nupa sualnak tuah lo ding le thianghlim tei um dingah in kawh thu kan hmu. Suah. 20:14 khal ah nupa sualnak le uire lo ding thu kan hmu. Ziang khal asile minung tisa ih um lai kan si ruangah nunau le mipa va um tlangnakah cun kan ralrin rori a ṭul. Zutmetawk, thamawk, naihaw zetih um tlang, hmehawk hi kan taksa hin a duh ih nuam a ti emem mi a si ruangah ralrin a ṭul rori a si. Pathian hmin se tertu kan si lonak dingah.

Evan. Lal Eng Lian


Sunday, November 27, 2011

Pastor Steve le Pathian Cangvaihnak Maksak


November ni 26, 2011 zan rawng thleng ding cu hngakhlap zetin ka thlir. Ziangruangah tilen hi tikcu canah Pathian kutcak mangbangza in mi a damter mi, keimah rori khal ih ka theihfeng mi in a tawntehmi (testimony) relnak a nei ding. Cutin, ka tlawngkai pi Internaltional Students mi nung 17 pawl thaw cun “ Saved Concert” hmang ding cun kan pawk. Zanlam 5 a rawng kim hi cun Araneta Coliseum, Cubao, Philippines  innpi sungah cun minung 7000 lenglo ih ruah cu kan pungkhawm. Cutin, maksak le thiam fahran in tualsung hlasakthiam  hminthang Gary Valenceano siseh, Joy leh midangpawl in hmuhnawm le thiam tukin mipi in rawn awi! Cutin, mipi au thawm cu a ring in, thangṭhatnak hla mawi ngai phah cun Pathian thangṭhat in kei khal cu ka ban ka rak hawi ve.
Hlasak thiam  midangdang pa 4 in mawi emem ih mipi in awih hnu ah Pastor Steve cu dawhsan (stage) ah cun rawng suak in “ How great is our God!” ti mi a ban hawi in dim tete a rawn ausuahpi hi cu nun mi a tham tuk lawm mam! Ka hnarruh note i ṭam ih, ka thinlung in Pathian ka rak thangṭhat rero!
Pastor Steve Ruetschle hi Union Church of Manila (UCM) senior pastor a si.  Anupi hi Michelle si in fate pathum an nei. Hi kawhhran hi kawhhram tum le cak, international Church , miphun hnam dangdang khawmnak a si ih, keimah rori tla hi Biakinn sungih a thusim ngai in ka rak um rero ṭheu. Amah hi Pathian thu duh tuktu le Pathian ih a hman zet mi a si. Vaiduai le malmakah Motor Cycle accident in June 17, 2010 ah khan North Carolina  ah a tuahmawh aw ih cutin arangtheibik in Cizungah an tlanpi. A hnawng thapi a (spinal cord) an ti mi ah hmunthum rori a siat suah ih cumi ih ruangah Doctor a tuanhlawmtupawl cun zatekah pa hra (10%) lawng hi punghman ten a taksa ah cang thei dingih an zum mi a si. Accident a tawn ihsin  hngawng ih thuailam a cang thei lo. An siatsuahawknak natlam tehnak hi A –E an nei . A a si len cu zianghman thluak siseh ruahnak , taksa cangvai pawl thi reprep tinak a si. Cun E a silen cu a kel, punghman tinak a si. Pastor Steve hi C a si ih cumi ah 50% a lan ti ai a si. Doctorpawl in a damsuak sal a si hmanah a hngawng cin hnuailam hmuahhmuah cu a zeng dingih a cang thei lo ding an ti.
Asinan, kan Pathian hin a kutcak, huham le thiltitheinak hi rinnak thawi Amah a beisei ringringtupawl nunnakah a phuang suak ṭheu! Pastor Steve cun hitin Mipi 7000 hmaiah cun “zumtupawl leitlun hmuntin le ka memberpawl ih thla in camsaknak hi Bawipa in a ngaithla, keimahah cangvaih theinak, thiltitheinak zianghman ka nei lo ti fiangten ka theihawk tikah Bawipa ah pumhlumin rinnak thawn ka ṭhum aw. Amah in in damter dingih ka ke rori in, Arm chair siloin ka fehsal ding ti 100%  ka zum” a ti. Bible cang sung ih nunau thiput thuhla siseh, zeng damlo a rualpipawl in Jesui hnenih an hruai, inn tlun an boh ih Pathian damternak cotu thuhla tla a rel uar zet. Beidawn canih rual le pi, ngaihventu, thlacamsaktu ti mi hi ka cahnak a si tin a rel tel fawn.
Doctor pawl in a hmailam nunnak hrangah ruahsan ding a um nawn lo an ti hnu khalah Pastor Steven cun Bawipa ih a rinnak cu sawhsawn a tum lo. Ka ke in in fehter tengteng ding ti ah thlacamnak thawn Pathian a rinsan. Cutin, Pathian ih kutcak cu nikhat hnu nikhat , zarh khat hnu zarhkhat a nunnak ah a lang. Ih cutin, tu ah cun damlo ih a um khumkhua ding mi le thih hlan tiang zeng ih um ding an timi Pastor Steve cun Bawipa ih thilmak a taksa parih langsuak mi cu ka in a aupi ih, zai hla thawn a saksuak.
Ziangvek dinhmun ah kan ding in, kan dinhmun le hmailam cu pitzet le thimzet si hman sehla, Bawipa ah beiseinak nung  le rinnak thawn kan phurrit a ṭhumtu kan si ah cun tuini ah Bawipai thilmak hi kan nupa nun karlakah, kan innsang tlaksamnakah, kan fale kilkhawinakah, kan eihawlnak le hnaṭuannak, kan pumpak nun le tulmi  tinkim ah kan tep thei a si.  Kan Bawipa Jesu in dungthluntupawl hnenah,  “ Antam cifang tiatte rinnak nan nei a si ah cun hi tlang khal hi Tifinriatah thawn aw seh nan ti len a thawn aw ding” (Matt. 17:20) ti ah a ti.  Cunlawng khal si lo in , Rom 10:11 khalah hitin, “ Zokhal Amah a zumtu hmuah cu mualpho in an um lo ding “ ti ah a ti.

Bawipa in ziangvek kan natnak, kan vansannak khal hi Amai hnenih kan thlen le amah kan rinsan a si ah cun a huham langsuahnak le a thilmak langsuahnakah a hmang thei a si! Pathian in lo thlawsuah hram seh.  

Saturday, November 26, 2011

Ziangruangah Kan Tlutheu?- II


 Sumpai Kan Hawlnak Zin ah

          I Tim.6:10 ah paisa duh cu sualnak phun kip thawktu hram a si ti kan hmu. Sumpai hi leitlun minung, mit a meng pohpoh ih kan duh thluh ti mi a si. Kei cu sumpai ka duh lo ti ṭawngtu tla cu theih ding a har zet. Sumpai hi mi hmuahhmuah ih kan duh thluh mi ti a si ruangah kan hawlnak zawnah kan ralrin ngaingai a ṭul. Leitlun ih Pathian mi hman zetzet pawl khal sumpai ah hminsiatnak an nei phah ṭheu. Ziangruangah tile sumpai cu a hman a nuam  ih, cuihleiah innsang tin le mai bulpak cio ih kan ṭul tuk mi khal a si fawn. Kan sim zo bangin zumtu hi thlemtu in in thlem ringring ruangah kan ralrin nasat a ṭul. Kan ralring na cing hmanin Pathian duh lo zawngin kan nung ṭheu si khawh kan ralrin lo sapbai cun kan cem a si mai. Sumpai duhtuk ruangah thil ṭha lole Pathian duh lo zawng tiangtiang tuah dingin Balaam cu a ke a kar suak mai a si kha! Danp. 23:4; II Pet.2:15b Balaam cu thil ṭhalo tuah man a co ding mi paisa a duhtu a si tiah Bible in a ti. Zumtupawl hi sumpai hawlnak le ngahnak ding zawnah hin kan ralring kei uh.
          Setan hi a to men lo. Kan tluknak dingah nasatakin hnaṭuanin a cangvai rero a si. Sumpai na hawlnak ruangah thlacam na bansan maw, lole sumpai na hawlnak ruangah na khawmawk na bansan maw, sumpai na hawlnak ruangah na Bible siar ṭheu kha na bansan maw, sumpai ngah duh tuk ruangah Bible kalh zawngin kan cang vai in aw kam kan suah pang maw? Bible tleunak hnuaiah mah le mah cekaw cingcing uhsi. Rinsan tlak zumtu thlarau lam nun cak le nun duh um zetzet sumpai ruangih cau sialsial le tlu hmuh ding kan tam tuk. Mipiangtharpawl ih kan ralrin ding mi pakhat cu sumpai hawlnakih thuk tuk le luar tukih kan hmanawk pang ding hi asi.
          Hi ti ih ka ti tikah sumpai hi hawl lo lawlaw ding ka tinak a si lo. Sumpai kan hawlnak zinah Setan hin tluuknak thang a kam duh zet ruangah ralring uhsi, ka tinak a si sawn. Minung lei taksa ih um lai kan si sungah cun sumpai hi kan hawl a ṭul ih, lotheihlo ih kan ṭulmi khal a si. Amah lawngte Pathian duh lo zawngih duhham lutuk le saphu kuavir bangih a luh ih luh nguaingo tuk hi a ṭhalo. Thlawsuah pe theitu cu Pathian a si ti hi hngilh pang pang hlah uhsi. Pathian duh lo zawng ih sumpai ngah le lennak parih Pathian lungput le a ṭawng mi Bible ah mal lai kan zoh hnik pei:
Thuf. 11:4- Lennak hi a ṭha lem lo.
Thuf. 11:28 - Lennak a rinsantu cu thal thinghnah bangin an til.
Jer. 17:11 - A dik lo ih tangka ngahtu minung cu mai ti lo ti a awptu vate vek a si. A san ṭhat lai takah a lennak a sung ding. A netnak ah cun ziang hman lo mi ah a cang ding ti kan hmu.
Thuf. 27:24 -Lennak hi kumkhua in a hmun lo.
Mk. 10:23- Milian vanram luh a har.
Mtt.6:24 -  Pathian le sumpai hna a ṭuan kawp theih lo.
Thup.18:3- Sumpai ngahnak ṭha lo a um.
Sumpai hi a duh lo zo hman kan um lo. Cuiruangah hi zawnah kan ralrin taktak a ṭul. Kan ralrin lo ahcun kan tlu mai ding. Lennak hmuahhmuah hi a ṭha lo, a sual thluh tinak a si lo. Pathian dan pahbal lole, dik zet ih lennak hi a ṭha; cu cu Pathian thlawsuah a si.
          Pathian duh lo zawng le Bible kalh zawngih lennak sumpai hawlnak hi mipiangthar cun kan hrial rori a ṭul. Hi zawnah hin zumtu ṭhaṭha rinsan tlak zetzet pawl an tlu ṭheu. Cuiruangah, sumpai hawlnak le ngahnak ding zinah hin napin ralring uhsi.

Evan. Lal Eng Lian

Friday, November 25, 2011

Ziangruangah Zumtupawl Kan Dungtawlh Theu?


Tulai kan ram mipiangthar tampi zoh tikah piangthar cak vohvo hnakin cau sialsial le tlu ti hi theih ding le hmuh ding kan tam tuk hi thin a na zet. Khaw dangdang va tlawng sehla tui hlan ih thlacam ngetngotu le, khawm lo ih um thei lotu kha khawm khal paih nawn lo le thla khal cam nawn lo. Pianthar pek ih kuak le tibur khal hlawn thluh zo si tibur hmawnsal le kuak fawpsal va hmuh ding kan tam tuk thlang. Riah siatza ngaingai a si. Duhdawttu Pathian thinlung hi ziang tlukin na kei maw!
          Heb.10:38 ah ka mi fel cu zumnakin a nung ding. A dungtawlh ahcun a  parah lungawinak hrimhrim ka nei lo tiah kan hmu. Jer.8:3-7 ah ka hnen ihsin nan tlan; vate hman kir an thiam nan nannih cu nan kir duh lo a ti. Mtt. 24:10 Mi tampi in zumnak an bansan ding ti kan hmu. Kan tluk tikah Pathian thin a na duahdo. Duhdawt tui thinnatnak hi duhdawt mi hin awlten kan tuah thei. In duhdawt biktu cu Pathian a si ruangah dik lo, fel lo, tha lo ih kan um ih kan tluk tikah Pathian  a tuar na tuk ti hi kan theih a tul. Cuih ruangah zumtu hi ziangruangah kan tlu theu ti hi kan tluknak san ti mi hi kan zoh tlang ka duh.
I.                  RALPA SETAN RUANGAH
          IPet. 5:8 ah fimvar te in um uh, ralring te in um uh nan ral Setan cu deh ding hawl ah a huk rero mi kiosa rilrawng bangin nan lakah a tawivak rero a si ti kan hmu. Zumtupawl hin ral dang kan nei lo kan ti le a sual lem lo ding. Setan hi kan ral tum bik a si mai. Kan ral a si mi Setan hin mi piangtharpawl tluk bah thei dan ding hi sun le zan a ruah buai bik mi a si ih kan hmaiah bahnak a tuah theu. Cuih ruangah zumtu tampi kan tluk-bahnak asi.
          Setan cu mifim hrawkhrawl ngaingai a si ruangah tisa dan ih kan duh mi si seh, kan pianthar hlan ih kan duh mi hmangin si seh in thlem theu. Cuvek ih tu hlan ih kan rak duh cio mi hmangih in rak thlem tikah in neh awl ih kan tlu suaiso mai. Setan hi hmuh theihin kan hnen ah amah rori a ra lo. Eden hmuan ih Evi le Adam tei nupa a tha le a sia theihnak thingrah ei dingih a thlem tum ah amah rori ra lo i rul a hman vek khan hman rua pa khat khat hmangin in thlem theu. Kan minung pi hmangin si maw lole kan tisa cak-hiarnak hmangin si maw kan tluk kan bahnak ding a tawlrel rero theu a si.
          John 10:10 khal ah rukru cu ru ding that ding le siatsuah dingah a ra ti kan hmu. Hi rukru pa Setan na hnen le ka hnen ih a rat tikah kan thlarau hrangih thil tha a keng dah lo. Kan thlarau le kan taksa hrangih thiltha zet vekih lang si, kan thlarau le kan taksa hrangih siatnak lawnglawng a keng sawn. Cu mi theithiam lo ih Setan duhdan ih kan nun le veten kan tlu ih kan rundam lungawinak cu in ruk sak. Sam. 51:12 sungah sam  cangantu in na rundam lungawinak cu i pe salaw tin a au ruangro. Sam cangantui rundam lungawinak cu ruk sak in a um a si cu.
          Setan hin kan rundamnak a tham ban lo nan kan rundam lungawinak cu a tham ban a si. Cuiruangah Bible cun Setan cu hmun kian hlah uh (tik cu tha) pe hlah uh in ti. Ef. 4:27 Zumtupawl hin kan nun ah Setan hmun kan kian (tik cu tha) kan pek a si ahcun kan nunnakah lalnak a co ih cu cun mualpho emem in kan tlu thum durdo a si ko. Cu ti kan tluk le ve ten thlarau lam thlawsuah kan co ding mipawl hmuahhmuah khal kan hloh thluh. Cui hleiah Pathian thin kan natter. Khat lamah mi hrawkhawlpa Setan cu lungawi emem in a um. A san cu a tumtah mi a hlawhtlin ruangah.
          Kan theih ding mi cu Zumtu kan nun hmangin Setan le Pathian an doaw a si ti hi na nun le ka nun hmangin nehtu dinhmun ah an ding thei a si. Setan ih duhdan na thlun ahcun Setan a hlawhtling mai. Pathian duhdan na thlun le Pathian a hlawhtling a si mai. Thimnakah Job ih nunnak hmangin Pathian-in Setan lakah nehnak a co kan ti thei. Cui ruangah Pathian-in Job a fak, Ezakiel 14:14-20. Hi vekin na nun le ka nun hmangin Pathian-in Setan lak ah nehnak co ve hram seh. Pathian mi theih (Piangthar) kan si hnuah cun Pathian le Setan karlakah mi thupi tuk kan si, ti hi thei uhsi. Nangmah hmangin Pathian-in Setan lakah nehnak a co thei ih, nangmah hmang thotho in Setan-in Pathian lakah nehnak a co thei ti theiin fimvar zetih kan um a tul.
          Zumtu kan hrangah Setan hi kan rualpi tha si loin kan ral tum bik a si ti hi thei uhsi. Jame 4:7, “ Cuihruangah Pathian duhnak a thluntu si uh, Setan kha do uhla a tlan mai ding,” a ti. Ziangruangah Bible in Setan do in fial tile kan siatnak lawnglawng kengtu le tuahtu kan ral a si ruangah do in fialnak a si. Ziangruangah Mipiangtharpawl kan tlu theu ti le kan ral Setan ruangah fam teh. Zumtu len uh, kan ral Setan hi tikcu tha pek lo dan hi zir in do tengteng uhsi, kan tluknak a tawlreltu cu amah hi a si.
 
Evangelist Lal Eng Lian

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...