Ziangruangah Kan Tlutheu?- II

 Sumpai Kan Hawlnak Zin ah

          I Tim.6:10 ah paisa duh cu sualnak phun kip thawktu hram a si ti kan hmu. Sumpai hi leitlun minung, mit a meng pohpoh ih kan duh thluh ti mi a si. Kei cu sumpai ka duh lo ti ṭawngtu tla cu theih ding a har zet. Sumpai hi mi hmuahhmuah ih kan duh thluh mi ti a si ruangah kan hawlnak zawnah kan ralrin ngaingai a ṭul. Leitlun ih Pathian mi hman zetzet pawl khal sumpai ah hminsiatnak an nei phah ṭheu. Ziangruangah tile sumpai cu a hman a nuam  ih, cuihleiah innsang tin le mai bulpak cio ih kan ṭul tuk mi khal a si fawn. Kan sim zo bangin zumtu hi thlemtu in in thlem ringring ruangah kan ralrin nasat a ṭul. Kan ralring na cing hmanin Pathian duh lo zawngin kan nung ṭheu si khawh kan ralrin lo sapbai cun kan cem a si mai. Sumpai duhtuk ruangah thil ṭha lole Pathian duh lo zawng tiangtiang tuah dingin Balaam cu a ke a kar suak mai a si kha! Danp. 23:4; II Pet.2:15b Balaam cu thil ṭhalo tuah man a co ding mi paisa a duhtu a si tiah Bible in a ti. Zumtupawl hi sumpai hawlnak le ngahnak ding zawnah hin kan ralring kei uh.

          Setan hi a to men lo. Kan tluknak dingah nasatakin hnaṭuanin a cangvai rero a si. Sumpai na hawlnak ruangah thlacam na bansan maw, lole sumpai na hawlnak ruangah na khawmawk na bansan maw, sumpai na hawlnak ruangah na Bible siar ṭheu kha na bansan maw, sumpai ngah duh tuk ruangah Bible kalh zawngin kan cang vai in aw kam kan suah pang maw? Bible tleunak hnuaiah mah le mah cekaw cingcing uhsi. Rinsan tlak zumtu thlarau lam nun cak le nun duh um zetzet sumpai ruangih cau sialsial le tlu hmuh ding kan tam tuk. Mipiangtharpawl ih kan ralrin ding mi pakhat cu sumpai hawlnakih thuk tuk le luar tukih kan hmanawk pang ding hi asi.

          Hi ti ih ka ti tikah sumpai hi hawl lo lawlaw ding ka tinak a si lo. Sumpai kan hawlnak zinah Setan hin tluuknak thang a kam duh zet ruangah ralring uhsi, ka tinak a si sawn. Minung lei taksa ih um lai kan si sungah cun sumpai hi kan hawl a ṭul ih, lotheihlo ih kan ṭulmi khal a si. Amah lawngte Pathian duh lo zawngih duhham lutuk le saphu kuavir bangih a luh ih luh nguaingo tuk hi a ṭhalo. Thlawsuah pe theitu cu Pathian a si ti hi hngilh pang pang hlah uhsi. Pathian duh lo zawng ih sumpai ngah le lennak parih Pathian lungput le a ṭawng mi Bible ah mal lai kan zoh hnik pei:

Thuf. 11:4- Lennak hi a ṭha lem lo.

Thuf. 11:28 - Lennak a rinsantu cu thal thinghnah bangin an til.

Jer. 17:11 - A dik lo ih tangka ngahtu minung cu mai ti lo ti a awptu vate vek a si. A san ṭhat lai takah a lennak a sung ding. A netnak ah cun ziang hman lo mi ah a cang ding ti kan hmu.

Thuf. 27:24 -Lennak hi kumkhua in a hmun lo.

Mk. 10:23- Milian vanram luh a har.

Mtt.6:24 -  Pathian le sumpai hna a ṭuan kawp theih lo.

Thup.18:3- Sumpai ngahnak ṭha lo a um.

Sumpai hi a duh lo zo hman kan um lo. Cuiruangah hi zawnah kan ralrin taktak a ṭul. Kan ralrin lo ahcun kan tlu mai ding. Lennak hmuahhmuah hi a ṭha lo, a sual thluh tinak a si lo. Pathian dan pahbal lole, dik zet ih lennak hi a ṭha; cu cu Pathian thlawsuah a si.

          Pathian duh lo zawng le Bible kalh zawngih lennak sumpai hawlnak hi mipiangthar cun kan hrial rori a ṭul. Hi zawnah hin zumtu ṭhaṭha rinsan tlak zetzet pawl an tlu ṭheu. Cuiruangah, sumpai hawlnak le ngahnak ding zinah hin napin ralring uhsi.

Evan. Lal Eng Lian