Sunday, November 27, 2011

Pastor Steve le Pathian Cangvaihnak Maksak


November ni 26, 2011 zan rawng thleng ding cu hngakhlap zetin ka thlir. Ziangruangah tilen hi tikcu canah Pathian kutcak mangbangza in mi a damter mi, keimah rori khal ih ka theihfeng mi in a tawntehmi (testimony) relnak a nei ding. Cutin, ka tlawngkai pi Internaltional Students mi nung 17 pawl thaw cun “ Saved Concert” hmang ding cun kan pawk. Zanlam 5 a rawng kim hi cun Araneta Coliseum, Cubao, Philippines  innpi sungah cun minung 7000 lenglo ih ruah cu kan pungkhawm. Cutin, maksak le thiam fahran in tualsung hlasakthiam  hminthang Gary Valenceano siseh, Joy leh midangpawl in hmuhnawm le thiam tukin mipi in rawn awi! Cutin, mipi au thawm cu a ring in, thangṭhatnak hla mawi ngai phah cun Pathian thangṭhat in kei khal cu ka ban ka rak hawi ve.
Hlasak thiam  midangdang pa 4 in mawi emem ih mipi in awih hnu ah Pastor Steve cu dawhsan (stage) ah cun rawng suak in “ How great is our God!” ti mi a ban hawi in dim tete a rawn ausuahpi hi cu nun mi a tham tuk lawm mam! Ka hnarruh note i ṭam ih, ka thinlung in Pathian ka rak thangṭhat rero!
Pastor Steve Ruetschle hi Union Church of Manila (UCM) senior pastor a si.  Anupi hi Michelle si in fate pathum an nei. Hi kawhhran hi kawhhram tum le cak, international Church , miphun hnam dangdang khawmnak a si ih, keimah rori tla hi Biakinn sungih a thusim ngai in ka rak um rero ṭheu. Amah hi Pathian thu duh tuktu le Pathian ih a hman zet mi a si. Vaiduai le malmakah Motor Cycle accident in June 17, 2010 ah khan North Carolina  ah a tuahmawh aw ih cutin arangtheibik in Cizungah an tlanpi. A hnawng thapi a (spinal cord) an ti mi ah hmunthum rori a siat suah ih cumi ih ruangah Doctor a tuanhlawmtupawl cun zatekah pa hra (10%) lawng hi punghman ten a taksa ah cang thei dingih an zum mi a si. Accident a tawn ihsin  hngawng ih thuailam a cang thei lo. An siatsuahawknak natlam tehnak hi A –E an nei . A a si len cu zianghman thluak siseh ruahnak , taksa cangvai pawl thi reprep tinak a si. Cun E a silen cu a kel, punghman tinak a si. Pastor Steve hi C a si ih cumi ah 50% a lan ti ai a si. Doctorpawl in a damsuak sal a si hmanah a hngawng cin hnuailam hmuahhmuah cu a zeng dingih a cang thei lo ding an ti.
Asinan, kan Pathian hin a kutcak, huham le thiltitheinak hi rinnak thawi Amah a beisei ringringtupawl nunnakah a phuang suak ṭheu! Pastor Steve cun hitin Mipi 7000 hmaiah cun “zumtupawl leitlun hmuntin le ka memberpawl ih thla in camsaknak hi Bawipa in a ngaithla, keimahah cangvaih theinak, thiltitheinak zianghman ka nei lo ti fiangten ka theihawk tikah Bawipa ah pumhlumin rinnak thawn ka ṭhum aw. Amah in in damter dingih ka ke rori in, Arm chair siloin ka fehsal ding ti 100%  ka zum” a ti. Bible cang sung ih nunau thiput thuhla siseh, zeng damlo a rualpipawl in Jesui hnenih an hruai, inn tlun an boh ih Pathian damternak cotu thuhla tla a rel uar zet. Beidawn canih rual le pi, ngaihventu, thlacamsaktu ti mi hi ka cahnak a si tin a rel tel fawn.
Doctor pawl in a hmailam nunnak hrangah ruahsan ding a um nawn lo an ti hnu khalah Pastor Steven cun Bawipa ih a rinnak cu sawhsawn a tum lo. Ka ke in in fehter tengteng ding ti ah thlacamnak thawn Pathian a rinsan. Cutin, Pathian ih kutcak cu nikhat hnu nikhat , zarh khat hnu zarhkhat a nunnak ah a lang. Ih cutin, tu ah cun damlo ih a um khumkhua ding mi le thih hlan tiang zeng ih um ding an timi Pastor Steve cun Bawipa ih thilmak a taksa parih langsuak mi cu ka in a aupi ih, zai hla thawn a saksuak.
Ziangvek dinhmun ah kan ding in, kan dinhmun le hmailam cu pitzet le thimzet si hman sehla, Bawipa ah beiseinak nung  le rinnak thawn kan phurrit a ṭhumtu kan si ah cun tuini ah Bawipai thilmak hi kan nupa nun karlakah, kan innsang tlaksamnakah, kan fale kilkhawinakah, kan eihawlnak le hnaṭuannak, kan pumpak nun le tulmi  tinkim ah kan tep thei a si.  Kan Bawipa Jesu in dungthluntupawl hnenah,  “ Antam cifang tiatte rinnak nan nei a si ah cun hi tlang khal hi Tifinriatah thawn aw seh nan ti len a thawn aw ding” (Matt. 17:20) ti ah a ti.  Cunlawng khal si lo in , Rom 10:11 khalah hitin, “ Zokhal Amah a zumtu hmuah cu mualpho in an um lo ding “ ti ah a ti.

Bawipa in ziangvek kan natnak, kan vansannak khal hi Amai hnenih kan thlen le amah kan rinsan a si ah cun a huham langsuahnak le a thilmak langsuahnakah a hmang thei a si! Pathian in lo thlawsuah hram seh.  

Saturday, November 26, 2011

Ziangruangah Kan Tlutheu?- II


 Sumpai Kan Hawlnak Zin ah

          I Tim.6:10 ah paisa duh cu sualnak phun kip thawktu hram a si ti kan hmu. Sumpai hi leitlun minung, mit a meng pohpoh ih kan duh thluh ti mi a si. Kei cu sumpai ka duh lo ti ṭawngtu tla cu theih ding a har zet. Sumpai hi mi hmuahhmuah ih kan duh thluh mi ti a si ruangah kan hawlnak zawnah kan ralrin ngaingai a ṭul. Leitlun ih Pathian mi hman zetzet pawl khal sumpai ah hminsiatnak an nei phah ṭheu. Ziangruangah tile sumpai cu a hman a nuam  ih, cuihleiah innsang tin le mai bulpak cio ih kan ṭul tuk mi khal a si fawn. Kan sim zo bangin zumtu hi thlemtu in in thlem ringring ruangah kan ralrin nasat a ṭul. Kan ralring na cing hmanin Pathian duh lo zawngin kan nung ṭheu si khawh kan ralrin lo sapbai cun kan cem a si mai. Sumpai duhtuk ruangah thil ṭha lole Pathian duh lo zawng tiangtiang tuah dingin Balaam cu a ke a kar suak mai a si kha! Danp. 23:4; II Pet.2:15b Balaam cu thil ṭhalo tuah man a co ding mi paisa a duhtu a si tiah Bible in a ti. Zumtupawl hi sumpai hawlnak le ngahnak ding zawnah hin kan ralring kei uh.
          Setan hi a to men lo. Kan tluknak dingah nasatakin hnaṭuanin a cangvai rero a si. Sumpai na hawlnak ruangah thlacam na bansan maw, lole sumpai na hawlnak ruangah na khawmawk na bansan maw, sumpai na hawlnak ruangah na Bible siar ṭheu kha na bansan maw, sumpai ngah duh tuk ruangah Bible kalh zawngin kan cang vai in aw kam kan suah pang maw? Bible tleunak hnuaiah mah le mah cekaw cingcing uhsi. Rinsan tlak zumtu thlarau lam nun cak le nun duh um zetzet sumpai ruangih cau sialsial le tlu hmuh ding kan tam tuk. Mipiangtharpawl ih kan ralrin ding mi pakhat cu sumpai hawlnakih thuk tuk le luar tukih kan hmanawk pang ding hi asi.
          Hi ti ih ka ti tikah sumpai hi hawl lo lawlaw ding ka tinak a si lo. Sumpai kan hawlnak zinah Setan hin tluuknak thang a kam duh zet ruangah ralring uhsi, ka tinak a si sawn. Minung lei taksa ih um lai kan si sungah cun sumpai hi kan hawl a ṭul ih, lotheihlo ih kan ṭulmi khal a si. Amah lawngte Pathian duh lo zawngih duhham lutuk le saphu kuavir bangih a luh ih luh nguaingo tuk hi a ṭhalo. Thlawsuah pe theitu cu Pathian a si ti hi hngilh pang pang hlah uhsi. Pathian duh lo zawng ih sumpai ngah le lennak parih Pathian lungput le a ṭawng mi Bible ah mal lai kan zoh hnik pei:
Thuf. 11:4- Lennak hi a ṭha lem lo.
Thuf. 11:28 - Lennak a rinsantu cu thal thinghnah bangin an til.
Jer. 17:11 - A dik lo ih tangka ngahtu minung cu mai ti lo ti a awptu vate vek a si. A san ṭhat lai takah a lennak a sung ding. A netnak ah cun ziang hman lo mi ah a cang ding ti kan hmu.
Thuf. 27:24 -Lennak hi kumkhua in a hmun lo.
Mk. 10:23- Milian vanram luh a har.
Mtt.6:24 -  Pathian le sumpai hna a ṭuan kawp theih lo.
Thup.18:3- Sumpai ngahnak ṭha lo a um.
Sumpai hi a duh lo zo hman kan um lo. Cuiruangah hi zawnah kan ralrin taktak a ṭul. Kan ralrin lo ahcun kan tlu mai ding. Lennak hmuahhmuah hi a ṭha lo, a sual thluh tinak a si lo. Pathian dan pahbal lole, dik zet ih lennak hi a ṭha; cu cu Pathian thlawsuah a si.
          Pathian duh lo zawng le Bible kalh zawngih lennak sumpai hawlnak hi mipiangthar cun kan hrial rori a ṭul. Hi zawnah hin zumtu ṭhaṭha rinsan tlak zetzet pawl an tlu ṭheu. Cuiruangah, sumpai hawlnak le ngahnak ding zinah hin napin ralring uhsi.

Evan. Lal Eng Lian

Friday, November 25, 2011

Ziangruangah Zumtupawl Kan Dungtawlh Theu?


Tulai kan ram mipiangthar tampi zoh tikah piangthar cak vohvo hnakin cau sialsial le tlu ti hi theih ding le hmuh ding kan tam tuk hi thin a na zet. Khaw dangdang va tlawng sehla tui hlan ih thlacam ngetngotu le, khawm lo ih um thei lotu kha khawm khal paih nawn lo le thla khal cam nawn lo. Pianthar pek ih kuak le tibur khal hlawn thluh zo si tibur hmawnsal le kuak fawpsal va hmuh ding kan tam tuk thlang. Riah siatza ngaingai a si. Duhdawttu Pathian thinlung hi ziang tlukin na kei maw!
          Heb.10:38 ah ka mi fel cu zumnakin a nung ding. A dungtawlh ahcun a  parah lungawinak hrimhrim ka nei lo tiah kan hmu. Jer.8:3-7 ah ka hnen ihsin nan tlan; vate hman kir an thiam nan nannih cu nan kir duh lo a ti. Mtt. 24:10 Mi tampi in zumnak an bansan ding ti kan hmu. Kan tluk tikah Pathian thin a na duahdo. Duhdawt tui thinnatnak hi duhdawt mi hin awlten kan tuah thei. In duhdawt biktu cu Pathian a si ruangah dik lo, fel lo, tha lo ih kan um ih kan tluk tikah Pathian  a tuar na tuk ti hi kan theih a tul. Cuih ruangah zumtu hi ziangruangah kan tlu theu ti hi kan tluknak san ti mi hi kan zoh tlang ka duh.
I.                  RALPA SETAN RUANGAH
          IPet. 5:8 ah fimvar te in um uh, ralring te in um uh nan ral Setan cu deh ding hawl ah a huk rero mi kiosa rilrawng bangin nan lakah a tawivak rero a si ti kan hmu. Zumtupawl hin ral dang kan nei lo kan ti le a sual lem lo ding. Setan hi kan ral tum bik a si mai. Kan ral a si mi Setan hin mi piangtharpawl tluk bah thei dan ding hi sun le zan a ruah buai bik mi a si ih kan hmaiah bahnak a tuah theu. Cuih ruangah zumtu tampi kan tluk-bahnak asi.
          Setan cu mifim hrawkhrawl ngaingai a si ruangah tisa dan ih kan duh mi si seh, kan pianthar hlan ih kan duh mi hmangin si seh in thlem theu. Cuvek ih tu hlan ih kan rak duh cio mi hmangih in rak thlem tikah in neh awl ih kan tlu suaiso mai. Setan hi hmuh theihin kan hnen ah amah rori a ra lo. Eden hmuan ih Evi le Adam tei nupa a tha le a sia theihnak thingrah ei dingih a thlem tum ah amah rori ra lo i rul a hman vek khan hman rua pa khat khat hmangin in thlem theu. Kan minung pi hmangin si maw lole kan tisa cak-hiarnak hmangin si maw kan tluk kan bahnak ding a tawlrel rero theu a si.
          John 10:10 khal ah rukru cu ru ding that ding le siatsuah dingah a ra ti kan hmu. Hi rukru pa Setan na hnen le ka hnen ih a rat tikah kan thlarau hrangih thil tha a keng dah lo. Kan thlarau le kan taksa hrangih thiltha zet vekih lang si, kan thlarau le kan taksa hrangih siatnak lawnglawng a keng sawn. Cu mi theithiam lo ih Setan duhdan ih kan nun le veten kan tlu ih kan rundam lungawinak cu in ruk sak. Sam. 51:12 sungah sam  cangantu in na rundam lungawinak cu i pe salaw tin a au ruangro. Sam cangantui rundam lungawinak cu ruk sak in a um a si cu.
          Setan hin kan rundamnak a tham ban lo nan kan rundam lungawinak cu a tham ban a si. Cuiruangah Bible cun Setan cu hmun kian hlah uh (tik cu tha) pe hlah uh in ti. Ef. 4:27 Zumtupawl hin kan nun ah Setan hmun kan kian (tik cu tha) kan pek a si ahcun kan nunnakah lalnak a co ih cu cun mualpho emem in kan tlu thum durdo a si ko. Cu ti kan tluk le ve ten thlarau lam thlawsuah kan co ding mipawl hmuahhmuah khal kan hloh thluh. Cui hleiah Pathian thin kan natter. Khat lamah mi hrawkhawlpa Setan cu lungawi emem in a um. A san cu a tumtah mi a hlawhtlin ruangah.
          Kan theih ding mi cu Zumtu kan nun hmangin Setan le Pathian an doaw a si ti hi na nun le ka nun hmangin nehtu dinhmun ah an ding thei a si. Setan ih duhdan na thlun ahcun Setan a hlawhtling mai. Pathian duhdan na thlun le Pathian a hlawhtling a si mai. Thimnakah Job ih nunnak hmangin Pathian-in Setan lakah nehnak a co kan ti thei. Cui ruangah Pathian-in Job a fak, Ezakiel 14:14-20. Hi vekin na nun le ka nun hmangin Pathian-in Setan lak ah nehnak co ve hram seh. Pathian mi theih (Piangthar) kan si hnuah cun Pathian le Setan karlakah mi thupi tuk kan si, ti hi thei uhsi. Nangmah hmangin Pathian-in Setan lakah nehnak a co thei ih, nangmah hmang thotho in Setan-in Pathian lakah nehnak a co thei ti theiin fimvar zetih kan um a tul.
          Zumtu kan hrangah Setan hi kan rualpi tha si loin kan ral tum bik a si ti hi thei uhsi. Jame 4:7, “ Cuihruangah Pathian duhnak a thluntu si uh, Setan kha do uhla a tlan mai ding,” a ti. Ziangruangah Bible in Setan do in fial tile kan siatnak lawnglawng kengtu le tuahtu kan ral a si ruangah do in fialnak a si. Ziangruangah Mipiangtharpawl kan tlu theu ti le kan ral Setan ruangah fam teh. Zumtu len uh, kan ral Setan hi tikcu tha pek lo dan hi zir in do tengteng uhsi, kan tluknak a tawlreltu cu amah hi a si.
 
Evangelist Lal Eng Lian

Tuesday, November 22, 2011

Van Ih Ro Khawl (Luke 12:13-21)

A hmun lo mi leiram ah zumtupawl cu Bawipa in a ram hrang hnaṭuan  sunglawibik ṭuan dingah, Amai kut le kei ai ah in thlah. Cumi ah mi tampi cun hi leitlun hi kan ram ngaingai hmang ti in a phunphun in thlawsuah malsawm kan dawn mi khal kan khawlkhawm.  Leitlun hi suahsan thei nawn lo ding vek tlukih kan ruahawk can ah kanmah lo midang kan nunnah a lang ban thei lo. Hileiah mikhual le cambang men kan si ti mi tla hi kan hngilh pang ṭheu ( I Pet 2:11). Jesu in kut le ke dang a neih nawn lo ruangah tuini ih zumtu nangmah le keimah hi Bawipa’n a hnaṭuannak hmanrua kut le ke ah in hman a duh.  Pathian in a duhnak famkimtertu dingah na neihmi le hlawnthil lo dil sehla , Isaiah bang in “ Bawipa hinah ka um, keimah i thlah aw!” ( Isaiah 6:8) na ti thei kem?

Kan leitlun hi nikhat hnu nikhat a siat deuhdeuh, khawitawk ram le hmun kan um khal len muannak le himnak taktak a um lo. Farah, beidawn le thinnau ruangih mah le mah thataw lawng si lo in, millian bikbik tiang khal kan zoh asilen nun beidawng ih mah le mah that aw (suicide) theih ding an um ringring. Cun, mi hrekkhat cu an lennak mi ih iiksiik ruangah, an neihnunnak  lawnsak duh ruangah meithal in siseh, nam le hriamhrei a phunphun thawn siatsuah in an um fawn. 

Kan Bible ah Jesu in milian pakhat ih tahṭhimnak hmangin sumpai thu thawi pehpar aw mi ah fimnak thu in zirh, “ Vawikhat ah milian pakhat a um ih a ram sung ihsin rawl tampi a suak. Cutikah a thinlung tein ‘ Ka lo sungsuak rawl retnak ka nei nawn lo. Ziang ka tuah ah so a that ding? Hitiin ka tuah pei: Ka rawl-inn pawl ka bal pei ih tum deuh in ka sak pei. Cunah ka rawl le ka thilri hmuahhmuah ka ret pei. Cule keimah le keimah cu: Mi vannei pa! Kum tampi sung na tul dingmi thilri na nei zo. Na duhduh in nung huahho aw; ei aw, in awla nuam zetin nung aw, ka ti aw ding,’ tiah a ruat. Sikhalsehla Pathian in a hnenah, ‘Mi-aa pa! Tuih zan rori –ah na nunnak hi a cem ding; cule na hrangih na khawlcia mi na thil hmuahhmuah hi zo in so a co ding?’ a ti,” tiah a sim. Cun Jesuh in, “ Anmah ih hrangah thilri an khawl ih an lianzet nain Pathian mithmuh ah a lian lomi cu himi pa bangtuk an si,” tiah a netnak a sim.”(Luke 12:16-21)

Minung kan nunphung hrimhrim hi duhhamnak ih khat kan si. Hi tawkih Jesu in milianpa a rel bang hin tuini ah zumtu tampi cu kanmai nunnawmnak le len ding lawng ruatin Pathian in leilung ih zumtupawl in thlahsan kan ruat ban lo. Zing ihsin sun le zan cawl lo in kan ṭuan ih Pathian in damnak , hriselnak le company  ṭha ṭha ih hnaṭuannak canṭha in pe.  Cutin, sumpai khal lei thlawsuah Pathian in in vur. Asinan, Pathian ram hrang ih rawngbawlnak le pumpekawknak ah kan khul a vung ṭheu. Hi tawkah milian pa ih tivek ciah hin, ka fate hrangah, kan innsang  hrangah, ka zirnak hrangah, kan hmailam can hrangah tin sumpai tampi pi kan bank account ah kan nei. Hmailam hrangah ruahhmannak nei ih khawl a sual ka tinak a si lo. Asinan, vawitampi cu cumi sumpai kan khawlnak ih kan duhsan bik cu boss vek ih nuam takih kanmah le innsang, nunnak khawvel ih Holly wood minta le mintami bangih um  hi a si. Asinan, zumtu Pathian fa le ruat ṭha hnih kuh! Cumi cu simaw Pathian in hi leitlun ah in thlahsan?  Hi tawkih milian pa Jesu in ṭahthimnak ih a rel mi hi sumpai a khawl rerotu vek a si. Culen a lian tukih ti ngaihnak khal a thei nawn lo! Ka thlarau cawl aw la, na duh duh in, ei in um aw ti ah a ti aw. Asinan, Pathian in cutluk in neinung, milian khal sisehla “ Mi-aa pa!” tin a ko tlat mai! Ziangruangah si pei, asancu a humhimawknakah Bawipa hmang lo in, a neih mi leihlawnthil-sumpai, neih le lennak a rinsan ruangah a si. Kan hmailam can le nun hi kan kutah a um lo. Bawipai kutah ho khaw a um!

Ṭhimnakah, unau sumpai tampi khawl in, inn le lo ṭha ṭha nei in, car le mi ih lawm le pawrh hi leitlun ah si hman la, ziangtikah na thi ding / ziangtikah kan thi ding kan thei lo! Hi kan Bible catlang ih Jesu ih ṭahthimnak a rel mi ah rokhawl mi thuhla ruangih an buainak thu a rel. Nang khal Pathian in hnaṭuan theinak a lo pekmi thawn sum le pai tampi nei in, na khawl thei a si men thei ! Asinan, Pathian hrangah hmang lo in na hmailam hrangah tin a billion tiang ret khal hman la! Unau, zan khat thilthu ah na nunnak cem sehla zo in ha cu pawl cu rawn co ding! Na fa le pawl tla na ro tata mi ruangah an rawn buai in an rawn satdarh aw thluh pang kei aw! Jesu in can ṭha a um laiah, na dam lai ah, na ṭuan thei laiah, na neih laiah, a ramhrang ih thlawsuah mi hmang dingah a lo duh. Van ah na ro khal dingah a lo duh ! Milianpa vek kan si pang kei ti hi ka va phang ve aw?

Ziangtikah na nunnak a cem ding ti na thei lo. Kan nun ti mi hi a fiang lo tuk. Bible in zianglam ih pangpar mawizet ih par, zanlam ih vuai sal leh mai vek hi nan si in ti ( Saam 103:15).  Cuti a si tikah unau, tui canah hi thuhla hi ṭhaten ruat dingah ka lo duh!  Na neih mi sum le pai thawn na nunnak a liam hlanah a tam thei bik vanah ro khawl lohli aw. A hmun lo mi lei ram ah, a tlaap, thirek le rukru pawl in an boh ih an siatsuah theinakah na ro khawl hrimhrim hlah ( Matt. 6:19).  Na eicawk lo ding tiangtiang khawl hlah aw. Cuhnakin, thlarau hlo runsuahnakah, mi pakhat nun tundinnakah, rawngbawlnak le cangvaihnakah na damsung can tawite ah a tam thei bik hmang aw. Na nun a liam hlanah na neih mi hlawnthil thawn Van ah ro a tam thei bik khawl aw! Na sir aw hrimhrim lo ding! Lei ih ta cu zianghman vanah na sawm thei lo nan, rinnak thawn, duhdawtnak thawn Bawipa sum na cawih tikah , Pathian in na pekmi kha sum nung, thlarau hlo runsuahnakah le na hrang lawmman ah a lo ret ṭhatsak a si. Lei ih na khawl tam poh len van ah na can tam ding. Thlawsuah tam pi dawngtu na silen Pathian in a lo phut kirsal mi khal a tam ve. Ṭuannak can ṭha na neih laiah Pathian ram hrangah nasa ten peknak thawn ṭuan thei nasi len ṭuan lohli aw ziangahtilen kan can hi can sia a si( Eph 5:15). Ni hnuaiih thil um mi kan hmuh theih mi thil hmuahhmuah hi a nini in an se deuhdeuh. Linghnin le thlisia a tam, leitlun hmun kipah buainak a pung sinsin. Rei kan ṭuan man hlanah Jesu cu in hruai dingah a ra cing ding.

Hi thuthawi pehpar aw in can remcang rawn lak ka duh. Tu ah “ Missions le Nangmah” ti mi cabu khal Pathian in a zaangfahnak zarah letsuak thei in in tuah! Hi cabu hin a tufangah Bawipa in kan leilung ah ziang a tuah rero, Thupek ropi “ mi hmuahhmuah hnenih thuthangṭha thlen le dungthluntu ih tuah” ziang kan thleng (Matt. 28: 19-20), ziangtin ha mi in Pathian an rak atcilh, an nunnak le neih mi van ah ro an rak khawl dan, Ramthim ih thlarau hlo mi thawngtampipawl hnenah an nun tiang liam in thuthangṭha an rak phurhsuah, an neih mi sumsaw tla Bawipa’i inn (van ah) an khawl ti pawl, le kan damsan umsun Bawipa’i hnaṭuan pawl in sim. Cabu tumpi a si lo ih siar a nuam in mi a cakter tuk, a hleice in damsan le dam man nei thei ding minung ah mi a hruai.  Kan Chinmipawl hin hi cabute hi kan kut ah tleng tluh sehla, kawlram kan nawrnak le kanmah le kiangkap zumlotupawl kan nawrnakah nasa ngaingai in in bawm ding ti ka ruahsan.

Cumi ah, na hmuh dah lonak ram, na thlenbanlonak midang innsang, na sim ban lo nak ih um -mi beidawng le caupawl siseh, hremhmun lam pan ih a liam rerotupawl hnenah thuthangṭha simnak thawn telve na duh asilen, hi cabu “ Missions le Nangmah” ah hin , Pathian ih thlawsuah na comi rak thawh ve aw! Na bank account, na sumpai khawlmi, le na innsang ih na retṭhat mi pawl malte na rak thawhsuahnak hmang in hi cabu hi print theih a si. Cutin, innsang tampi le pumpak tampi hnen a thlen tikah, vawikhat mei an hnenah thu na sim siloin hi cabu a siat hlanlo cu hi cabu na bawnnak zarih print suahmi a rak siartupawl hmuahhmuah ah na thlenban lonakah siseh, na thihhnu tiang khal in vanro na khawl thei a si. Curuangah, ralṭha zetin hi thuhla ka ngannak a si.


Hi cabu hrangah peknak thawn ka telve ding ti ah a ti thei kan um asilen hi tawk a hnuai ih address ah hin in rak contact lohli aw. Cabu nam ding in ready fel a si zo. Pathian  rawn aw la, Pathian in na nun ah thu a lo sim asilen rei hngak loin in rak contact lohli aw. Cutin, a ram hrang rawngbawlnakah kan print suak lohli ding.
Address:
Henry vl Hmangaih
Philipines,
Phone: 0063-9433522505
           henrylalhma@gmail.com

Pathian in lo thlawsuah hram seh.

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...