Nu Duhdawtnak langter dan

                                                NU DUHDAWTNAK LANGTER DAN

                                                                                    Henry vl Hmangaih

“ Happy Mother’s Day!’ ti ah casiartu Nu pawl nan zaten duhsaknak ka lo hlan. Nui’ Ni sunglawi kan thlen tikah fale in kan thinlung ih tumbik mi cu ziangtin ha ka nui’ hnen ah ka duhdawtnak hi ka langter ding ti hi siseh la ka duh.

Ziangruangah nu cu kan duhdawt a `ul?

Anmah um lo sehla kan seem lo ding. Anmah um lo sehla tui’ kan dinhmun kan ding lo ding. An ei le in, an sin le fen, an mawinak ai in kan mawinak  ding sawn ruat ih ziangkim in zohzuntu le tuini kan thlen theinak hi anmah ih in kilkhawinak a si. Pathian ih in pekmi ti in fale kan hrangah an nunnak tiang hman a `ul ahcun pe siangtu an si. Ahleicein, leitlun khaw tleu kan hmuh hlan ah an pumsung ah thla 9 `ha in pai ih cuihsin kan rung suak. Thiam mi zianghman kan nei lo `ah le hnawifawh ti lo cu! Tui kan dinhmun kan thei thlennak ding ah it lo le sing lo in, ni khaw sia le cen lakah, nisa mangkeng hnuai khal ah rian hrang an `uan, mi ih hmuhsuam le nautatnak hmuahhmuah khal an tuar . Mi kan bang theinak hrang  taksa dan le thlarau lam dan khal ih in cawm pitlingtu an si. An tlun ih kan leiba hi a theithiamtui’ hrang ahcun kan damsung ih rulh cawk ding rual a si lo.

Ziangtin kan nu le kan duhdawtnak kan langter ding?

Mi tampi cun nu le an duhdawtnak hi ca thawn siseh, cun biaza in siseh, facebook le website phunphun hmang in an langter. Ahleicein, kan nih Chin nu tamsawn cu facebook le internet lam thiam lo an si. Anmah kan duhdawtnak biazai le aanka pawl cu thei sehla an di a riamzet ding. Nan, vanduaithlakzet in mi tamsawn kan nu pawl un online an hmang lo. Cuti a siruangah, a lo hringtu na nu kha na duhdawt taktak asilen hi a hnuai ih ta pakhat khat hmang tal hin na duhdawtnak langter ve aw:

1). Na kaa rori in lungawithu sim aw. 

An kiang nai ih um le an hnen ih um nasilen na kaa rori in an hnen ah feh tahrat in “ Ka nu, ka lungawi tuk! Nang vek nu `ha le nu tling ka lo nei hi! Pathian in lo thlawsuah sinsin seh” tivek le kan thiam dandan in lungawithu kan sim ding. Cun, lam hla ih um kan silen a khat tawk in kan bia in lungawithu kan sim ding. Mothers day kan thlen ah tla hi cun hringtu nu a nei hmuahhmuah in nu kha biak in lungawithu sim tengteng ding. Khua a hlumlotu in phone te khal in lungawithu sim ding. An phu tuk rori a si kan nu le hin.

2). Sumpai pe aw/kuat aw. 

Sumpai nu le pai hnen ih pek lole kuat hi anmah kan duhdawtnak kan langter dan phunkhat a si ve. Sumpai an nei zet, an todelh aw khal a si thei, asinan, hi vek Mother’s day caan ah hin na lakphak in nak ah lole na pocket money ah ti in sumpai na tlin tawkte in pe aw. Tam deuh na tlin a silen tam deuh pe aw. Nan, na tlin lo a silen pek lo rori hnak in malte tal pe aw. Na peknak kha a tlun ih na lungawinak langternak a si ti khal kha na nu in thei seh. Na nu le pa na cawmnak lole zohkhennak hrangah na len hngak hlah aw! Ziangtik tiang an lo dampi ding ti na thei lo. Cun, nangmah khal ziangtik ah na thi ding ti na thei cuang lo. Curuangah, na neih tawkte in nu le pa kha zohkhen in sumpai pe in kuat tengteng aw. Punghman na kuat thei lo a si khallen “ Mother’s Day’ caan te tal ah kuat tum aw.

3. Laksawng sunglawi `hen aw. 

Na nu in cuvek, kha vek ka duh ti in a `ulmi a lo `inpiah (dil) lo ding. Cuhnakin, nangmah in ziangsi ka nu ih duh mi, a `ulmi ti theihsak tum aw la, na budget ih tlin tawk in Mother’s Day ni tivek ah laksawng pe aw. Cumi khal cu na nu na duhdawtnak na langternak hmanrua a si. Thil khung tuk na tlinlo mi tiangtiang a `ul hran lo. Na dinhmun le sinak mil te in na pek ahcun na nu in a rak lo theihthiam sak tuk! A liamcia kum le caan ihsin tuini tiang ah ziangvek laksawng na nu na then in na pe zo?

4.  Rawl kho kilpi aw. 

Na nu na duhdawtnak na langter dan dang leh cu na inn ah rawl na suansak ding ih a ei na sawm thei. Culo khallen, a lengah rawldawr cangkang le special ah na eipi thei. Cuhnak hman ih `hasin ka ti mi cu u le nau umkhawm le hla aw tuk lo nan silen, nan unau za in sumpai thawh khawm uhla rawl suang in cumi cu kilkhawm uh. Cule, rawl ei hlan te ah sungkhawm neihpi uhla na nui tlun ih nan lungawinak kha pakhat hnu pakhat `ongkaa in sim uh. Pathian hmin tla in thlawsuahnak pe uh. Cule, cuih `um khalah a hleice vek laksawng tete pek bet nan duh khal len nan pe thei. Kum khat ah Mother’s Day hi vei khat lawng hman a si tikah hivek caan hi nu a nei laitu pawl in remcang ah lak thiam a va thupi ve! Na nu kha lungawi le thinnuam in uhseh.. cucu na thlawsuah kung a si.

5. Na nu lungawi in umter aw. 

 Thufim 23:25 ah “ Na nu le na pa lungawiter aw. Nangmah a lo hringtu na nu cu lungawi in um seh” ti ah in zirh. Nu le pa lungawiter hi fale ih `uanvo tum ngaingai kan neih mi a si.  Nu le pa ningnatter, riahsiatter le mitthli tlakter tamtu tla cu `ih a nung tuk! San tawinak le kum note ih thihnak a si. Curuangah, tui Mother’s Day ihsi cun ziangtin ha ka nu ih lung ka awiter  thei ding. Ziang si ka nu ih duh zawng? Ziangsi ka nu ih huat mi? ti thei hliah ding ah zuam nasa aw! Na nu kha na tlun ih a lungawi a si ahcun a `ongkam ih thlawsuahnak na co mi pawl na parah hlawhtlinnak a lo thlentu thlawsuah hmuifu an si ding. Atufang ah na nu na lungawiter maw na riahseter? Na nu kha thinbang le donhar in um ter hrimhrim hlah! Na thlawsuah a pit ding. Nan, na lungawiter a si ahcun Bawipa in a lo zaangfah camcin ding.

Thukharnak

A tlun ih kan rel lang mi thu hlawm pa nga lo khal hi nu le kan duhdawtnak kan langter dan ding phun tampi a um lai ko ding. Asinan, hi thuhlawm pa 5 pawl hman hi a taktak in kan thlun a si ahcun kan nu le hin ka fanu , ka fapa hin in va duhdawt ve.. Pathian in hi vek fa in pe hi cu ka lungawi tuk ti in Pathian tlun ah le na tlun ah an lungawi tengteng ding. Tui`um Mother’s Day ihsin hringtu nu lungawitertu le  Pathian mithmai `ha an zar ih a cotu si camcin ding ah siartu zaten Pathian in lo thlawsuah hramseh.

Hminsin: May 10, 2015 Falam Times ah suahzo  mi a si.