Thil pakhat khat natnak a silolen tuarnak in a lo cim maw? Na zonzaihnak le tuarnak ih ruangah na num pumhlum kha harnakin a lo dawlh thluh vekin na thei aw maw? Harsatnak a bang aw mi kha mi pahnih hnenah pe ve ve awla, cui harsatnak an pahtlang dan cu sulpelaw zet a si thei. Mi pakhat sawn cun hitin, “nunman ka nei nawn lo, ka cem , ka ruahsannak a thim, a hlo thluh” tin thin pit in a um a si thei. Cun, mi pakhat ve thung cun cui harsatnak le buainak thuai ih sin thang ṭhatnak le lungawinak lamhla thawn Pathian a thangṭhat a si thei fawn.
A diklomi lungtho (negative emotions) pawl hi kan nunnak le ruahnak Pathian thutak thawi mil aw ih nun le feh kan thlan tikah, kan hrangah camsiatnak si lo in malsawmnakah an cang thei. Kan dinhmun le sinak Pathian ih cahnak le huham thawi hmuhawk thiamnak ti khal in a rel theih ding.
Na ruahnak ding ter aw
Kan beiseinak in a takih thilcang mi a thlenbanlo tikah, beidawnnak sumzing a hawng suak ṭheu. Mikip in a diklomi ruahnak (negative feeling) hi kan neih thluh mi a si. Asinan, kan ralrin a tul. A diklomi kan ruahnak lungtho in kan nun in mawn tikah sual sungah kan tlu lut pang thei. Curuangah, uluk le fimkhur zetin kan tawntehmi pawl hi kan fehter (process) a ṭul. Thil kan ruahdan in kan lungtho a hnawng ih cutin kan kan lungtho in kan nuncan ziaza a hngawng sin.
Kan mai sungah hin nitin te doawknak a um ringring. Cumi ah Satan in vawitam bik a hman mi cu kan ruahnak hi a si. Kan ruahnak hmang in kan nun in buan ih cutin kan nun caklo sin dingah in dirhtlak a tum ziangruangahtile kan milai khawruahnak hi a cakzet ti a theih ruangah a si. Curuangah cun a si kan ruahnak tinkim hi Khrih thulunnak hnuaiah kan pekluh ringring a ṭulnak san ( 2 Cor 10:5).
Na nun dingter aw
Zumtu kan zaten Khrihah ah nun famkim nei ding le rinnak sungah thuksin ih ṭhanglian sinsin dingah kawh mi kan si. Pathian thawi pawlawknak hngetkhoh nei thei dingah thubawhcahnak felfai tuah aw. Pathian thawi can hmantlang kha na nunnakih thupi bikah ret ringring aw. Na nunnak kha Pathiann in a lo duhnak vekih nungsuak dingah a mai tumtahnak thawi milaw ih feh ringring dingah dingter aw.
Ziangtin na nunnak cu Pathian ih duhnak thawn milaw in a um ti na thei thei ding? A thutak hmang in na thei thei. Bible hi ziangtin nundan dik le ṭha in kan nung ding ti kan tehawknak ding tahfung a si. Leitlun in nundan a lo zirhmi lawngah ṭhum aw hlah, na ṭhumawknak ding Pathian thutak ih sin pial sual hrimhrim hlah aw. Harsatnak le buainak na tawn canah, hnathar tuah dingih ke na kar canah Bawipa in ziangsi tuah ter i duh ti in Pathian ih thu lo sim ding mi thinfual te ih ngai ding kha thlahthlam hrimhrim hlah aw.
Pathian thutak cu nitin nunnakih kan hman suah tikah, kan saltannak pawl ihsin zalennak kan pumpak nunah in pe. Ziangtin harsatnak lole kan parih thilthleng mi kan dokirsal lole kan sawnkirsal ding ti theih lawng hi a tawk lo, cui kan theihmi cu a takih tuahnak lole thlunnak in a nemhnget a ṭul. Jeremiah cun natnak le tuarnak raptlak zet a tuarlaiah, a dinhmun ih zirin Pathian kha thu a ṭhen mai lo. Cuhnakin, a tawn mi harsatnak le buainak pawl cu Pathian ih sinak thawi milaw in a lehrul sawn. Pathian ih zaangfahnak cu thlahlo in a kai hnget ih cumi cu Bible in zingtin ten a tharsal a thutiam rinumnak a ti mi cu ( Tahhla 3:23) a si.
Harsatnak le buainak ai ah Pathian in thlawsuah a lo burhmi le pekmi zozai pawl kha siar thiam nun zir aw. Hi mi hi tlarau lam ih pitlin le tlin lo langfiangnak bik pakhat a si. Na nunnak Pathian thawn milaw in um ter aw. Amai thu na lun le thlun tikah, ziangruangah harsatnak le buainak na parah thlen ter a siang ti mi nuam nai teten a lo sim thei sal ding. Bawipa cu zovek a si ti mi in hram thawk aw. Cun, Bawipa cu a ṭha a si ti kha cing ringring fawn aw. Anih cu zahngai thei Pathian le thlangamtu Pathian a si ( 2 Cor. 1:3). Na thinlung a kekkhuai le na vansan canah Bawipa kha na baan ah lo kai ding le lo hruai dingah siannak pe aw. Na ruahsannak a parah ṭhum aw. Bawipa ah si lo in leitlun thil pakhat khat a si lo le minung parah na ruahsannak na thum a silen, na phurrit a zual deuhdeuh ding.
San a ra lai ding mi ah ziang ro si na tefa pawl hnenah roh ta na duh? A tuhtahnak ruangah Pathian in harsatnak kan parah thlen a siang. Curuangah, rinnak thawn cui harsatnak pawl cu sawnkirsal aw. Na natnak, tuarnak le harsatnak pawl kha a diklomi lungtho le ruahnak thawi sawnkirsalnak in na can a lakin liamter men hlah aw. Nun kan ti mi hi nangmah le keimah ih thuhla hlir a si lo. Na harsatnak Pathian bawmnak thawi hlawhtling zetih na fehtlang hnu ah midang tampi nangmah vekih harnak a tuartupawl hrangah thazangpetu le bawmtu ah na cang thei a si.
Nun kan ti mi hi zirnak bualrawn vek a si. Hi kan leinun cu a langte sung a si ih, kan kumkhaw hmun sawn cu kan Pa’i hnenah a si. Kan nun hi ṭhahnemsin, santlai sin kan si theinak dingah nitin rem in kan um. Curuangah, kan nun le lungput hi kumkhaw thilah ṭhum uh si. Atu hi kan hrangah Jesu’i duhdawtnak zun ah kan uar kirsal le a hnenih kan kirsal can a si. Amah theifiang sinsin ding ah a hnen pan uh si. A thu siarnakah kan tha suah sinsin uh si. Mi pakhat khat kan duhdawtlo mi kan rinsan taktak thei lo, cuvek thotho in kan theih lo mi khal kan duhdawt taktak thei fawn lo. Kan nunnakah ziangvek harsatnak, buainak le zatlaaknak kan tawng a sihmanah, a tu hi kan nun le ruahnak lungtho Bawipa’i duhdan thawi rualte ih kan fehter ding can a si ziangruangahtile a thutak sungah mi zokhal Amah rinsan tu cu an mualpho dah lo ding ti ah Bawipa in a ti ( Rom. 10: 11). A diklomi lungtho na nunnak ih a um pang a silen Pathian ṭihzahnak le rinnak thawn cui dinhmun cu thlawsuah ah cangter aw.
Pathian in a thu kan zate hrangah malza in sawmsak hram seh.
Peter Tanchi
No comments:
Post a Comment