Saturday, August 13, 2011

Bawipa cu i khâltu a si


Kan Bible bu pumpi ih bung le cang larzet pakhat cu Sam 23 hi a si. Nauhak Sunday school ihsin  zohloin kan rak by heart ih cutin tuini tiangah hi Bible bung le cang hi ka nun cakter tuk bik pakhat lakah a telve. Hitawk hla cang le thu ihsi thazâng lak tlang kan tum pei.
Tû hi sumhnam zuatmipawl hmuahhmuah  lakih kilkhawiawknak nei ṭha lo bik a si. Rinlopi in hmun pakhat khat ah na tan a silen, amah ten siatsuahtu lakah kilhimawk theinak a nei lo. Amah tei tidai umnak  pan le rawl hawl khalah harsatnak khihhmuh tu nei lo cun nei mi a si.  A kiangkap ih a hmuh mi thil in awlsam ten a hip peng thei, hmakhat te ah a pial lohli thei in khur le awng ah tlak a hmang zet. Vawitampi cu zumtu khal hi tû thawi kan bangawknak tampi a um ṭheu.
Sam 23 hi tûkhaltu in a tû hrangih sinsiahtlak le lainatnak thawi a kilkhawi dan thu a si. Kan dinhmun siatbik lai fangah , Bawipa cu kanmah in cawmtu ṭha ah a rawng cang ṭheu.  Amah thawi pehzawmawknak (relationship) hnget kan neih tikah tûkhâl ṭha bangin kanmah in kilkhawi.
1. Bawipa cun mi a pe
“ Bawipa cu I khâltu a si; Sammi zianghman ka nei lo” (v.1). Tûkhâltu ih hnaṭuan cu tû hrangih ei ding rawl le tidai hawlsak hi a si.  Bawipa cu Jehovah Jireh (tumaw cawp Pathian), kan ṭulsam mi tinkim in petu Pathian a si. Mi zokhal Bawipa Pathian amah cawmtu ih a neitu cun thil ṭha a tlasam dah lo ding ziangahtile Bawipa cu mi petu a si ruangah a si.  Lei ih nu le pa hman in fate hrangah thil ṭha pek hna an thiam ah cun, ziangtluk in vancung ih um kan pa, ziangkim neitu le kan zawn in ruattu cun kan ṭulsam mi in pe lo in a um ding!. “ Tlimno lakah i bawhter ih,” (v.2a). Tûkhâltu cun tlimno ṭha umnak hmun a tû kilmi pawl tlannak le eiding hrangah a hawlsak ṭheu.  Khawp ko ih rawl an ei hnu ah , tûpawl cu hnangam zet le thinthi in cui hram hring parah cun an zau in an bawk ṭheu.  Tuini ih kan hnaṭuannak le eihawlnak ih kan um khal hi accident a si lo , Pathian in in retnak hmun ah kan um sawn a si.  Amahlawngte, Pathian in hmundang ah ṭhawn ding le kan umnak hmun fehsan dingih in hruai a tum a si ah cun kanmah lam khalah timlamawknak ṭha le mannak (readiness) kan neih ve a ṭul. Tui kan umnak le dinhmun ah kan hna a ngam, kan nuam ti ih hnangamzet ih kan um lai hman ah Pathian cun cuhnak ih hram hring umnak ṭhasawn  dang tla a nei thei lai thotho. Curuangah, in hruainak ih piangah kan thlun vivo ding a si cutiasilolen kan hrangih Pathian in a ṭhabik in timtuahsakmi /in pek a tum mi co ngah lo in kan sung thei. Pathian cu kan hrangih ṭhabik thei tu le zawn in ruattu a si ruangah a duhnak thlun ih ke kan kar ngam a si ah cun kan ṭulsam mi tinkim ṭuanvo in laksak in in pe vivo ding.
2. Bawipa cun mi a hruai
“ A thiangmi tiva kamah I hruai” (v.2b). Tûkhâltu cun a tûpawl cu an bangnak rehter ding le thazâng thar pe dingah dil le dâi thiang umnak hmun ah a hruai ṭheu.  Kan hnaṭuan ṭul tampi tlansan ih Pathian thawi can hleice hmannak cun kan ṭulsammi thazâng thar in pe ding.  Hmun fianrial Pathian aw kan theih thei nak ding le amah thawi hmatawn ih kan kawmawk theinak ding hmun kan hawl thiam a thupi, cuti Pathian thawi pawlkawmawknak ihsin nunnak tinung- a thutak sung le hmangin  kan in ngah ṭheu a si. “ Ka thazâng a tlunter sâl i, i tiamcia vekin lamzin dingah i hruai (v.3).  Can hnih khat cu tû a ât tuk ruangah le a luhlul tuk ruangah tûkhâltu in a ke ih a vuak le a hliam can a um, cuti a ti tikah tu le tu tlan hlohnak lakih sin a kilhim thei. Asinan,  Tûkhâltu cun cutin a vuak le zilh lawng siloin a damfel lai hlan lo cu tû ih ke le hliamhma cu a tuam, a dawm in a fingkhawi.
In Khâltu Bawipa cun kan taksa ṭulsam mi lawng si lo in kan thlarau lam ṭulsammi khal in theihsak.  Bawipa cun kan si dan vekin, kan umnak kipah in cohlang thei. Amahlawngtecu, kan umnak kelih kan um  lanta ding in siang lo. Bawipa cun Amah thawi kan pehzawmawk sal theinak dingah lamzin tinkim a dap rero.  Kan tluk le bah tikah, a duhdawtnak kutcakin in kai tho. Kan balh tikah  faiten in kawlh.  Pathian hmaiih tangdawr tei a tlulut tupawl hrangah a ngaidamnak cu a lak in a um. Cuti, a hnenih tangdawrnak thawn mi a tlûklut tikah ngaidamnak a co in Pathian ih hminthianghlim cu sunlawih in a um ṭheu. Asinan, Pathian fa si cingih luhlul tuk le nun ṭha lo bawl ih kan um a si ah cun Pa in fapa siatral ding nun a sim bang in Pathian nunsimnak kan tawng ve ding. “ Ka fapa, Bawipa in nun a lo sim tikah ziang siar lo in um hlah aw. A lo kawk tikah na tha nau hlah. Ziangahtile Bawipa in a duhdawtmi cu nun a sim ih, fa ih a cohlanmi cu a zilhhau ṭheu a si” (Heb.12:5-6). Pathian thuthawi mil aw lo ih kan nun cân, thlahdah aw tak le nun bawhhlawh thawn kan nung asilen Pathian ih nunsimnak kan parah a thleng thei ringring. Kan zohmi lamin dingter ringring dingah Bible Pathian thutak sungah ciah aw in cuisin fimnak kan lak ringring a thupi ngaingai.  Vawi hnih khat cu Amah rinsan sin kan thiam theinak dingah, kan  hngahawknak –lei thlawsuah, sumpai bawmnak hrampi, dam le cahnak , kan company le hnaṭuan ṭha pawl tla in sawiṭhiah sak ih cutin Amah lawnglawng ah tlukluh a him bik ti in zirh ṭheu. Cuti kan tlûkluh tikah, kan ṭulsammi hmuahhmuah amah ah a rak famkim ti kan zirsuak sal.
3. Bawipa cun mi a hum
“ A thimmi thihnak hawrkuam sung zawh hman ningla, maw Bawipa, Ka ṭih lo ding; Ziangahtile nang cu ka hnenah na um, na talhtum le na kianghrol in ka hna in ngamter” (v.4). Can hnih khat cu Bawipa’n thimnak , ṭahnak le tlaksamnak pawl umnak hawrkuam kan zoh in sian can khal a um thei, cule kan hmai lam ih thilṭha sawn lungawinak thar, cahnak thar, thlawsuah thar in pek dingmi pawl ruangih lungawi hna kan zir thiam theinak dingah.   Hawrkuam a si mi ihsi tlangsang thlithiang nawmnak in teptertu- harsatnak sungah si Bawipa thawi naihte ih kan rak kawmawk ngah ṭheu. Harsatnak hawrkuam le ṭahnak zanthim pawl tla cu Amah lawnglawng in a si kan nun cakter sal thei ti le diriam ko in tuah thei ti kan hmuhfeng theinak dingah an si. “Ka ral pawlih hmuhhngan ah cabuai parah rawl i hun i; Ka lu ah hriak i culh i, ka khuathai khal a liam thluahthlo” (v.5) Tûkhâltu in a tû ih taksa kilhimnakah hriak a culh ṭheu bang in in khâltu kan Bawipa khal in ṭihnung phunza kip lak ihsin nitin in rak kilkhawi ṭheu. Bawipa kan lamih a ṭan ah cun kan ral pawl cu mualpho in an um ding. Thlaphang le mangbang in ziang thil khalah kan um a ṭul lo ziangahtile Bawipa cu kan humhimawknak a si ruangah.
“ Ka nunsung hmuahhmuah ah, ṭhatnak le duhdawtnak cun pelh loin i thlun ringring ding. Bawipa ih inn ah kumkhua in ka um ding” (v.6). Bawipa cu’n cawl lo in, palik pawl in misual pawl sualnak kaih tum ih an dawithlun rero vek si lo in,  kan hrangah ṭhatnak thilpek in pek duh ruangah in dawi thlun ringring. Kan damsung hmuahhmuah ah in kilveng ding le thlawsuah in pe dingah in umpi ringring ding thu in tiam a si.
Cuti asilen, kan ṭulsam le mamawh mi in bawm dingah zawi hnenah kan tlan ṭheu? Mangbang vansan tawn cânah, zawi hnen kan pan ṭheu? Tûkhâl ṭha Jesu’i hnenah kan nun le ṭulsam mi tinkim in cawm dingah kan rinnak kan ṭhum zo maw?  Tûkhâl ṭha Jesu’i hnenih kan vansannak, phurrit le harsatnak kan thlen tikah anih cun beidawn in in tanta lo ding. Tû cun tûkhâltu ih aw a thei ih cutin a thlun.  Tuiniah, in khâltu Bawipa’i aw kan ngaithla in a hruainak kan tlun maw?  Ahnuai ih mai nun zohfelnak hi Tûkhâl ṭha na thlun maw thlun lo ti na theihfeng thei awknak dingah vawn zoh hman: (1) Hnâ ih tehnak: Tûkhâl ṭha ih aw na ngaithla maw?  le (2) Ke ih tehnak : Tûkhâl ṭha ih aw na theih mi na thlun maw?
Siartu zate’n Pathian in lo thlawsuah hram seh.

Friday, August 12, 2011

Thlacamnak


Mil Aw Lo Mi !!


Pa tum nawn si cing ih tahben tak kha!
Taksa tha, bawmban tha nawn ih lang si tu le tu dam lo hmang kha!
Pa fa tete si cing ih heer zet kha!  
Pa fate nawn si cing ih rawl heh nawn kha!
Pa tuak, hmeltha vurvi si thiam mi zianghman nei ngutngat lo kha!

Pacang tha, mi fim ti aw si mai miphun sehernak nei lo kha!
Tuah le tuansuah mi ngutngat nei si lo ih ti theibik vekih um hmang kha!
Farah le harsa zet cingih milian bik vekih um aw ter le hnipuan hruk ringring kha!
Nu le pai hminthat ruangih mi dang tlunih rak hngal ve ciamco kha!
Mah khal ziang si ce cuang si lo ih midang hmuahsuam hmang zet kha!
Mipa sin a keukeu ih nunau vekih um kha!
Tlangval sin a cingih hnipuan baal le rimse tak hruk thei zet kha!
Tlangval si cingih nu’i hni dir tunto theu kha!

Fala hmeltha zet si cingih thinse nawn kha!
Chin fala si cingih mai tawng zahpi kha!
Chin fala si cingih miphun dang tlangval uar thei tuk kha!
Chin fala si cingih rinumnak nun nei lo kha!
Fala si na cingih taksa le hnipuan bal thei tuk kha!
Nunau si na keukeu ih mipa vekih um awk ter kha!
Fa la si na cingcing ih nu vekih um awk ter ciamco kha!
Fala si na cing ih tuaifai awk paih lo zet kha!

Nupinu si na cingcing ih fale vekih um ringring kha!
Nupi nu si cingih khawlak len heh tuk kha!
Nupi nu si cing ih thinsia tuk kha!
Nupi nu si cing ih Pathian thei lo zet kha!
Nupi nu si cing ih zahmawh rel hmang kha!

Pa si na keukeu ih nupi fanau zawnruahnak nei lo kha!
Pa si na cingih ler tukih fala dang kawp hmang zet kha!
Pa si na cing ih hnatuan paih lo ze zet kha!
Pa si na cing ih upat le tihzah tlakih nun tum dah lo kha!
Pa si na cingih Pathian thei lo tuk ih nung kha!
Tlawngta si na cingih cazoh paih lo tuk kha!
Bible tlawng kai cing ih Beer le zu heh tak  ringring kha!
Bible tlawng kai ih Pathian thu sim ding nei dah lo kha!
Bible  tlawngkai cingih hngal le puarthau  tak ih um kha!
 
Piangthar si cingih khawm paih lo zet kha!
Piangthar si cingih Bible siar dah lo kha!
Piangthar si cing ih thlacam  paih lo zet kha!
Piangthar si cingih thlarau hlo veinak nei lo kha!
Piangthar si cing ih midang duhdawtnak nei lo vekih nung kha!

Pathian rawngbawltu si cingih Bible siar , thusim le thlacam ze tuk kha!
Pastor, rawngbawltu si cingih mi relsiat hmang zet kha!
Pathian hnatuan tu si nan ih zahmawh rel hmang zet kha!
Pathian rawngbawltu si cingih rawngbawlnak uar lo kha!
Pathian rawngbawltu si cingih mai innsang thlahthlam tuk kha!

Thursday, August 11, 2011

Thlawsuah hi Kan Tlûknakah a Cang Pang maw?

Thusuhnak tluangtlamte “ Thlawsuah dawn a duh lo kan um maw?”ti’n sut aw sela, “ um lo” ti’n ka sawn cio ko ding ka zum. Ahman, leitlun minung hmuahhmuah in thlawsuah, malsawm dawn kan duh cio. Cuti asilen, “ Thlawsuah malsawm (blessings) kan ti mi hi anmahten an ṭha cio maw?” ti’n sut aw bet sehla teh, “ Aw, an ṭha” tin kan ti cio sal ko ding, asinan thlawsuah malsawn dawndan ding ih a timlam aw lo pawl cu tlûknak lole thil ṭihnung –siatnak in a hmuak ve thung. Pathian in thlawsuah malsawm pek ding mi a hawl rero nan mitampi ih thinlung le nun cu thlawsuah malsawm co dingin an tiar (ready) hrih lo. Malsawm thlawsuah tampi dawn khal hin ṭhatnak lam silo tlûknak le siatsuahnakah mi a thlen thei.
Company tumpi rak hohatu, Christian ih rawng cang, Kawhhran tumpi, nung le cakzet ih  pastor hnaṭuan rak ṭuantu  mi pakhat hi a um. Mi turu le thusim hriakthih co zetu a si. Pathian in thlawsuah mangbangza a burh ih cutin sumdawnnak hlawhtling zetzet tampi a nei. A tirte ah cun mi tampi thlawsuah malsawm pesawngtu a si. A hawng rei deuh in thlawsuah malsawm a dawn mi le a hlawhtlinnak ah cun duhtawk nawn lo in politics ah a lut. Vawitampi rampi ukawknak (public Office) luah ve ding ah a bei, asinan Pathian in a hlawhtlin a rem ti lo.  Nasa ngaingai in a thin a nau ih cutin Bawipa ih a rinnak khal thlauthla in, khua a rei vivo cun a dungtawlh. A dinhmun siatbet vivo in , a netnakah cun a innsang  nu-Kristian nupi duhnung zet le a fanau pawl suahsan in a nunhlun tisa nawmnak cen in a um. A thlawsuah dawn mi pawl cu Pathian sunlawihtu si lo in a hrangah camsiatnak ah a cang.
Pathian hnenah thlawsuah malsawm lo vur dingih na dil, thla na cam hlanah, malsawm thlawsuah na dawn dingmi kilkhawi thiam dingah nungcang ṭha/dik le fel na neih ta a ṭul. Na ralring lo asilen lennak le neihnunnak in na nun a lo siahsuah thei. Asinan, Pathian cu  mi rinum, duhdawtnak le ngilneihnak ih khat a si ruangah dungtawlh le a tlusawn zo mi a fale ngaidam le tundinsal theitu a si.  Lungsir ih a hnenih tlulutsaltu a falepawl cu a duhdawtnak kut zabawng in a cohlang sal ṭheu.  
Kawhhran pakhat khalah hin pastor kum upa tuk lo a um.  Cui, pastor cun a pastor hnaṭuan cawlhsan in sum a dawng.  Hlawhtlinnak le lennak nasa zet ih vur a hawng si tikah Pathian a theihhngilh.  Rinnak ah a dungtawlh ih kum 5 sung rori zumlotupawl vekin a nung. Kum 1997 ih sumdawnnak tlakniam ciamco ṭumah khan a sumdawnnak khal a tla niam ve. A sum lakluh pawl cun a loan, tangka pungṭhang ih a pukmi rulhnak a daih nawn ta lo. Cuisin, hnadang a innsang tundinnak le leiba rulhnak ah ti’n a hawl ciamco, nan hnaṭuan ding a tawng fuh thei lo.  Sumpai lut um nawn lo ti ngaihnak thei lo cu a neih cia mi thil ri pawl a zuar a zuar ih a netnakah a umnak innpi lawng a tang thlang.  An nitin ṭulsam mi le eiin hrangah nuam tete’n an sui le ngun, phones, hnipuan le neihsiah hmuahhmuah an zuar thluh tlang. Nikhat cu a duhdawt zetmi a fanute in hnipuan se ngaingai, hlun zet le tlek diardiar pawl a hruh a hawn hmu cu a ning a na tuk ih, “ Aw,  ka cem thla riai aw “ ti’n a ti. A duhdawtmi a fanute a hmuh cun a lung a zur tuk ih umngaihnak a thei lo, a riah a se tuk lawm mam.  A khan (room) sungah a lut lohli, sangka a hren aw ih cutin khukbil in Pathian hmaiah nauhak ṭah in a ṭap ciamco.  Hiti’n cu pa cun amai thu  “ Pathian hmaiah ṭhing awk rual lo in mitthli canghnap thawn ka ṭap ciamco” ti’n a rel. Hiti’n, “ Bawipa, Ka sungkhan a si ( I surrender to you), I ngaidam aw, I bawm sal hram aw”  ti’n thla a cam. Cuti mitthli rualriat thawi Pathian a ṭahhnawh sal hnu cun “ ka zang deuh vuarvi ngaingai” ti’n a ti. Thil ziangmaw si hin a taksa ihsi suahsan vek hin a thei aw, nan ziangbik a si ti cu a thei lo- phurrit maw, beidawnnak maw lole khawsia (demon) khal a si thei. Culeveten, Bible a siar ih cui a Bible siarmi cun a nun ah thu a sim, “ BAWIPA cu nanmah runtu si dingah a ṭawntai tuk lawmmam lo. Bomnak dilih nan aunak theilo tiangin a hna a sêt lo. Nan sualnak ruangah a lo thei lo a si sawn. Amah biak nan tum tiah Pathian thawn a lo ṭhentu cu nanmah ih sualnak a si.” ( Isaiah 59:1-2).  Cuihleiah, Pa ih sualnak in fale tiang a siatsuah thei ti mi a vawn thei bet ( Exod. 20:5; 1 Sam. 12:13-19). Sual sir ih ngaidamnak Pathian hnenah a dil ih thla a cam hnu cun , a tlunah hnangamnak maksak zet a rawng thleng vekin a khansa. A thaisun ah phone thawn hnaṭuannak ding a hawl ih cutin, hnaṭuan ṭha zet manager hna a ngahsal. Tufang ah cupa cu thlarau lamih hlawhtlinnak le taksa lamih hlawhtlinsalnak zin ah um in Pathian ih ṭhatnak a tepsal.
Unau, nangteh Pathian ih thlawsuah malsawm na dawn mipawl hin Bawipa a lo naihter sin maw a lo hlatter sin? Thlawsuah malsawm na dawn mi hi amah na hngilhnak le na tlûknakah a cang sual pang maw? Kan lennak, neihnak le thlawsuah pawl hmuahhmuah hi Pathian kan hngilhnak, kan hngalhngawnnak , hrosuannak le titerawknak ah hmang ding kan si lo. Malsawm thlawsuah kan dawnnak san hi midang hnakih kan thiamce, ṭuanthei ce le cungcuance ruangah a si lo, Pathian in midang hrangah bawmtu kan si theinak dingah thlawsuah in vur sawn a si. Pathian ih thlawsuah na dawn mi pawl kha ziangtin na hmang? Pathian lungawinak ti famkimtu, innsang le kawhhran, rawngbawlnak, mission hnaṭuannak hrangah na hmang maw? lole na thlawsuah pawl kha Pathian hmelphentu le amah na hlatnak hmanrua ah an cang? Thlawsuahtu hngilh ih thlawsuahmi biak hi Pathian ih huatbik mi a si. 

Thlawsuah tampi kan dawnmi pawl hi kan tlûknak ah cang lo ih Pathian sunlawinak le midang hrangah malsawm kan sinak hrangah a can theinak dingah Pathian in siartu kan zaten in bawm hram seh ti ah thlaza ka cam.

Wednesday, August 10, 2011

Local Church Kaihhruaiawknak A Ṭhathleicenak Malte

Kan Chin ram Khristiannak thlir le zoh tikah , denomination pakhat hnu pakhat kan kekar dan a bang aw lo zet. Hrekkhat cu Centralization hmang ih kum tampi a rak kaihruai aw kan um ih cumi rualin Local Church rori hi Bible ih in zirhmi a si ti ih Local Church kaihhruaiawknak dinpi tum le cumi ih a ṭhathnemnak pawl- thuthang ṭha simsuahnakah (Evangelism), Mission hnaṭuannak (Missions),  thangṭhatnak le Pathian biaknak ih hmuar a neih hleicenak ( praise and worship) le Pathian thutak dinsuahpinak le  phun dangdang ih Pathian nung kawhhran a ṭhansohnak dingih a thupitzia pawl theifiang dingih zirhawknak khal a tam vivo.
Cun, khatlamah a takih theitu rawngbawltu ziangmaw zat le kan Pathian thuthiam pawlin ziangruangah local church Kawhhran hruaikaihawknak le Kawhhran hmaisa pawl khalih a tak rori ih an rak hmansuah mi le rawngbawlnak tinkim ih an cahsinnak hram a si ti thei cing in kan hmang ngam ciah hrih lo a si pei ? ti lam thu khal hi ruah le zircian ding tampi a um. Asinan, tui ṭumah cun Local Church hman ih a ṭhatnak malte Philipines ih ka hmuhtawn mi le ka siar mipawl ihsin kan zoh tlang dingah ka rawn lo hlawm.  Bible ih in simdan a hram lam ihsi zawt lo in practical ih hmansuahnak ih a rahsuah dan  lam in kan zawt hnik ding.

(1). Local Pastor le Kawhhran member karlakah duhdawtnak hnget a pung.
           Kum thum dan lole kum nga dan tete ih kan
ṭhawnawk hi Pastor le Kawhhran member karlakah duhdawtnak hnget le thlarau lam fa vek taktak ih ruahawknak le seherhawknak  a um thuk man lo thei zet. Pastor le members an thei aw fel ciahciah ti in hmun dang le post dangah ṭhawn a si tikah pastor in a hnaṭuan mi le a rah kha a hmu man lo ṭheu. Kawhhran thuhla lam ih mi thiam hrekkhat cun pastor pakhat ih rawngbawlnak a hlawhtlin le hlawhsam cu kum hra hnu lawngah a lang tin an ti. Cun, kum reilo te ih local dangih pastor a va ṭhawn tikah hnaṭhar le mithar va kilkhawi ti cu a hruaimi mipipawl theifiang ding le anmah thawi ṭhangso tlang ding in can reipi(adjustment) a lak a ṭul hleiah, amah pastor lala khal vaivuan in a um thei. Evangelical pa ropi ti ih theih mi John Stott cu kum 90 mi si in July ni 27,2011 ah khan a thi ih. Anih hi local church pakhat ah kum 60, rawng a bawl pek ihsin a thih tiang a ṭuan.  Hi Pastor, theologian le cangantu ropi hi Local Church a hleice in a rak thupit zia Bible ih in zirh mi a takih aupitu , hmangsuaktu le cabu ngan tamtu bik pakhat khal a si fawn . A cabu " The living Church" phei tla hi cu leitlun Kawhhran tampi nungtertu le ṭhangphawktu cabu a si.

(2). Dungthluntu pawl (Discipleship) hnget khoh zetin din a theih
.
           Kan ram pumpi ih kan
ṭul bikmi  pakhat lakih telve mi ih ka hmuh mi cu local church tin in Pastor ihsi thawk in dungthluntu pawl (discipleship group) kan neih ding hi a si. Asinan,  hi mi hi local church kaihhruaiawknak hnuai lo ah hin cun a fumfe har zet. Kan ram kawhhran khal in dungthluntu pawl hi a takih kan hmansuah thei ah cun tu hnakin Pathian thu theihnak le nunpinakah kan ṭhan nasat cu a zum um. Philipines ih Kawhhran nung, cak le hlawhtlingbik pawlih kan hmuh mi CCF, GCF, Victoria pawl hi Local Church hlir an si ih, cutin discipleship hi kawhhran an cahnak thuthup le Philipines rampumpi an nawrnak hmanrua ṭhabik a si. Kan ram context cu a dang deuh nan... ahleice in hmunpi ah tla cun form danglam deuh ser (create) phah in hman a theih tuk tin ka hmu. Camping le Crusade lawng ngai hi cun tui kan thlencin hnakih sang cu in sawmsoh a har thlang ding a bang. San ti luan a danglam vivo vekin Pathian rawngbawlnak le kekarnak khalah hin form ah flexible deuh cu kan ṭul in ka hmu.

(3). Local Pastor le Memberpawl in rawngbawlnakah thinlung hmu aw sin in an
ṭuan tlang thei.
          Kum a rei, ni a rei cun member le pastor karlakah kan tlinlonak, tlinnak le zirhawk
ṭul mi kan hmu aw vivo ih, cumi cu tundin kan ṭulnak le sawmdawl kan ṭulnak pawl in theihter vivo. Cutin, Pathian rinsannak thawi kan bawmawk le serawk vivo tikah memberpawl lakihsin rawngbawltu tamsin a ser aw suakin hnaṭuan ṭha ah a zem aw suak thei.

(4). Local pastor kha Pathian thu ah nasa sin ih timlamawknak, pumpekawknak le hlanawknak nei dingah a bawm.
         Zarhtin, Thlatin , Kumtin sermon dangdang Pathian ih pekmi sermon thar le mipi
ṭulmi peksuah ding hi thil awlai lo a si, daitlang zetih Pathian hnaṭuan tu’i hrangah cun mualpho a si mai. Sermon hlun sat ngun deuh cun timlamawknak kan daitlan zia a lang ih kan sermon mi in kan member a neh nawn lo. Asinan, cuti local church ah Pastor kum reipi (kumkhua) ih a um tikah nasa sinsin in Bible zirnak, Pathian thawi pawlkawmawknak nun, Member pawl zirciannak  le duhdawtnak thawn sawmsuak dingah a rawngbawlnak (hnaṭuan) in a bawm. Cuti Pastor in nasa takih timlamawknak le Pathian duhnak (agenda) thei ih thutak a phuansuah ringring tikah Kawhhran cu tuupi sungih cirhti dai thiangte vekin a fim lawng si lo in , a nung ih, thutak a dawngtu pawl nunah damnak si le thazang ah a cang ṭheu. Kawhhran a alh ih Pathian thutak in hmunram pumpak nunah le insangah a luah. Cutin,  tualsung kawhhran hmangin hna ropi le missionary tampi a thlah suah aw thei sinsin.

Siartu zate hnenah Pathian thlawsuah um hram seh.

Sunday, August 7, 2011

Ziangso Kan Rit Ṭheu ?


Bible cun, "Zuri hlah uh,Thlarau in khat sawn uh a ti"{Eph.5:18}.Hi tawkah Zuri hlah uh ti kan hmu curuangah zumtu hrangah cun zurit cu Pathian in a duhlo ti a fiang.Cun zuri cing in Thlarau ih khah a theih lo tikhal a fiang. Asinan zumtu tampi cu Zu cu kan ri lo nan thildang kan ri ṭheu a si lo maw? Zu lawng asilo..leitlun thildang khal rit a theih. Kan fanu kan fapa zu an rit cun kan thin a heng zet ṭheu ih asinan kan mah nu le pa tampi cu paisa tla kan ri,hnipuan tla kan ri,Video tla kan ri, Korea zatlan tla kan ri, mihuatnak tla kan ri,Pathian hrang ih can pe theilo khawp ih in tuahtu pohpoh cu kan hrangah thil ṭihnung an si. Zu na ri lo ka ri lo a si men ding asinan thildang kan rit ah cun Pathian lung a awi cuanglo.Pathian in leitlun thil le ri hi kan hman le neih a siangko, asinan kan rit pi ding an silo. Kan rit cin ahcun thildang kan nun ah a tlem nawnlo kan rit pi mi lawnglawng in in uk a si ko. U le nau lenuh ziangthil lak khalah rit nak lak in ralring uhsi. Pathian in a Thlarau in pek mi hman hi kan rit dingah in pe lo. Mihrekkhat cu Thlarau hi a khat ih khat lo in a rit in an ri. Thlarau ripawl cun taw le lu khal thei nawnlo ih tlawkbuakbo an hmang. Pathian Thlarau hi kan duhduh ih kan hruai le kan ritpi dingah Pathian in in pe lo.Fim zet ih lam in hruaitu dingah in pe sawn a si.{Rom.8:14,John.16:6-8}.Pathian in zianghman hi a rit ih rit a siang lo.Thlarau khal rit dingah silo in khat dingah in pe sawn.
Pathian in a thu mal sawm hramseh.

Evan.David Ceu
{Ceu family}
Tahan

Tualṭo Thufim


1. Bawipa Amah lala hin i hnem cingcing lo sehla cu a hna ka ṭuan{rawngbawlnak}ah hin beidong ih ka kirsal nak a reipi zo ding.

2. A liam cia mi ih ka nun dan ka zoh sal tik ah a poi tuk aw ka timi a um vek in ka lungawi nak khal a um ve, ka hmailam ih feh vivo dan ding ka ruahah ziangtin ha a si ke aw...ka ti
ṭheu can khal a um,asinan Bawipa’i parih ka thumawk pawp hnucun hnangamnak in ka khat.

3. Ka fehnak lamzin ah harsatnak,beidongnak le thinpihnak tong
ṭheu hman ningla Pathian a um ti le ka Nu in thla i cam sak ti ka theih sal nak in ka thinphan nak a hlo ter sal.

4. Ka hung upa deuhdeuh ka piantharnak khal a rei deuhdeuh ih Pathian ih i duhdawtnak le sunghno ka Nu ih i duhdawtnak ka ruah tam pohpoh le mak ka ti deuhdeuh.

5. Ka kut ih mi pek mi ka don can hnak in ka kut in mi a pek sawn tam pohpoh le ka thinlung ah lungawinak a tam sinsin.

6. Kehkuai hmuahhmuah lak ah innsang kehkuai hi{broken family} apoi bik ti ka ruah
ṭheu ruangah ka thin ka sup tento ṭheu,kan nu’i tlinlonak ka hmuh ih ka thin a vung heng zik len kei khal a hrang ah ka tling thluh ve cuang lo ti ka ruatsal ih ka hah a dam sualso sal.

7. Ka nu hi cathiam lo te asinan fale kilkhawi thiam zet le Pathian hnen ih thlacam thiam zet a si ti ka hmuh hin Aw...Pathian hivek Nu i pek ruang ah ka lung a awi ka ti
ṭheu...Ka Nu kukbilh ih thla cam lai ka hmuh khi cun zianghman phan mi ka nei nawn lo.

8. Na hlan ih a feh hmaisatu hruaitupawl sawisel mai lo in an tifuhlo mi in ralrinnak zir aw la an ti
ṭhat mi hmang in zuam deuhdeuh nak ah hmang aw ..cu ti asile hruaitu ropi ah na cang leh ding.

9. Kohhran le khawtlang hi mi tawzang satliah le mi
ṭongthei ta piang ih hruai ṭhat theih mai a si thluh cuang lo.

10. Hna
ṭuan tu’i kut cu abal ṭheu,ka kut fai tuk ih mi ka zungkhih rero hi hnaṭuan mi zianghman ka neih lo ruang khal ah a si men thei,hotu le hruai tu sawisel paih zet pawl hi anmah khal khai dinhmun ah um ve hai sehla sawisel tawm an si ve thei thotho.

Note:Zohman ti san ka nei lo,ka irawm suakte ka ngan men.

David Ceu{Ngailan}
Evangelist

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...