Thursday, July 28, 2011

Ziangruangah Si Innsangah Kan Hlawhsam Ṭheu-2


Pathian mi hman ti ih kan theih lar zetzet mi pawl, asinan an fale  kilkhawinakih hlawhsam pawl hi a tamsawn an fale suh le kawm tikah “ ka pa in in tlawnsan tamtu” lole “ Ka pa in in lehpi dah lo pi” lole “ ka pa inn ah a um mal tuk a si si” tin suanlam ṭha zet an nei ve. Culo khal suanlam tampi a um thei ko ding. Khatlamah, an suanlam hi ruah le zoh rero tikah a dik thei mi tampi a um thei ruangah nu le pa in kan fale kilkhawinakah an lungput le nundan hi thupi zetah kan ruat a ṭul. Tuihlan kum ziangmaw tizat ih kan Chin nu le pa, Pathian mihman pawl ih kan rak uar zet mi cu mai innsang khal tlung lo ih thla tamtak rawngbawlnak mission field lole rawngbawlnak hmun ih cam thei kha a si ih, mi pakhat khat crusade, camping thawi vak suak thei ringring le mai inn hlumman lo cu Pathian mihman tile mi langsar tin kan ruat. Aṭhazawng in kan ruat asilen cu a diknak khal ziangmaw zat a um ngai. Mai innsang hman ngaihsak man lo khawp ih Pathian hnaṭuan thei cu! Asinan, cumi ih a rahsuah, an fale zutama, nu le pa’i thuawih lo, mi luhluh lole mibawraw ih an um hmuh le theih cun mai innsang thlahthlam tahrat ih lenglam rawngbawlnak thupibik ih ret kha a rak fuh bik lo ti a hmu suak aw vivo.  Atu kan san, leitlun fimthiamnak , technology, internet le globalization sanah phei cun tuihlan kan pi le pu san hnakin innsang ah fanau le in nuthling lole Patling an mahmawh cuang. Innsang a hlawhsam a si ah cun a lenglam hlawhtlinnak kha hlawhtling ti ih siar theih a si lo. Lenglam hlawhtlinnak cu innsang hlawhtlinnakih rahsuah ding mi a si.
Awle, cuti insangah kan hlawhsam ṭheunak san pawl ih lang cu kan fale sim le zirh an ṭul canah an zohṭhimding, an thlun ding le an ṭulsam mi zirh, hruai le bawm dingah nu le pa in kan khihhmuh mal deuh ruangah a si thei. Ahman, zo cio khal in mai fale cu ka sim ko, ka zirh ko  tin kan ti thluh ding. Asinan, fale kilkhawi ti hi – “tuah aw, ti aw, na ti lo len ka lo thawi ding” tivek zawngih zirhawk le hro a si lo. Cuhnakin  duhdawtnak thawi “ tuah tlang, tuah pi, biangbiakawk, lehtlang, hnihsuah sai tlang, hro si lo in thuawih dingih zirh, ṭihding ih thupek si lo in thuawih ding ih nunsim thiam” tivek lam sawn a si. Nu le pa tampi in kan palh ṭheu mi cu kan fale zirh, kaihhruai an ṭul tuk canah zirh lo in an pitlin hnu ah thunun (control) ciam co kan tum. Ziang ka ti ai saw? Ṭhimnakah, Bible in “ Nauhak cu a fehnak ding lamzin ah a nauhak lai ihsin zirh aw la a upat hnu khalah a thlah lo ding” (Thufim 22:6 ) a ti. 
Nu le pa tampi cu kan Bible ih in sim mi a linglet zawng in kan thei. Fale an nauhak laiah zirh tum lo in an pitlin hnu ah thunun kan tum ciamco ih a sawt mawh zet. An pitlin hnu ah cun zirh hnakin thurawn pek an hlawkthlak deuh. A si, nule pa in kan fale an nauhak laiah kan zirh mal deuh a bang, kan zirh kan ti hmanah a men men in mi tampi cun kan zirh. Pathian ṭihzah ding, nu le pa upat ding, ai ih upa upat ding, u le pawl upat ding , sung le kua duhdawt ding, lole thuawih nun neih ding” tivek  pawl. Hi pawl nauhak zirh can ṭhabik cu “ nui pumsung an um ihsi kum 13 an kim hlan hi a si. Kum hleingai a thlen hlanah na fanu, na fapa kha Pathian thuthawihnak nunah ṭhatei na kaihruai a si ah cun a damsung kum lamzin dikah na hruai thei ding. Asinan, hi kum  13 a si hlanah ṭhatei na zirh lo a si ah cun thungai thlak suahin kum 13 a kim hnu ah zirh tum ciamco khal aw la a sawt mawh zet ding. Minung kan mizia, kan uar zawng, mi kan biakdan, kan nundan a zate hi zankhat thilthu ih kan parih thleng thutthi mi an si lo. A kumtel ih kan rak ṭhanlen pimi, mizia le sinak pawl an si. Kum 13 kan si tiangah neh zetih nu le pa in fale in hruai lo a si ah cun cumi hnu ih kan nunnakah thleng danglamawknak thleng ding cun harsatnak pakhat khat kan tawnta lo le Piantharnak kan co a ṭul. Harsatnak, ṭahnak, aihramnak le beidawnnak kan vawn tawn curco khin thu kan sut aw ih , Pathian kan hlam lawng si lo in nu le pa khal kan hlam sal. Nan, cuvek hnu ih harhsal cu thil awlai a si lo, vanglai ih co ding mi le thiamding mi thilṭha tampi kan can ih , kan thlennak ding thleng ban lo ih kan um lanta khal a tam ding. Cun, kan harhsuah a tlai ruangah kan thlen tumnak kah thlen khal a tlai in rual kan ban loh phah thei fawn.
Awle, ka rel tam thlang, ziangruangah innsang ah kan hlawhsam ṭheu ti mi cu sannak tampi um lakah nauhak lai ih zirhawk, kaihhruai awk  nu le pa in kan thlahhlam le innsang kekkuai mi ihsi ra kan si ruangah tin kan hmu thei. A ra lai dingmi ah innsang hlawhtling, nuam, lei ihsi van nun tep duhtu kan si ah cun thil dang hmuahhmuah hnakin mai innsang ( rawngbawlnak hmaisabik) kha thupibikah kan ret rori a ṭul. Nu le pa in Pathian ṭihzahnak thawn, punghman ten fale an nauhak lai kum 13 a kim hlan kulh sung hmuahhmuah ah thlacamnak thawn, Bible zirtlangnak thawn, lehtlangawknak le thanzang pekawknak thawn theihtawp suahih ṭan kan lak cio a ṭul! Nu le pa in fale kilkhawi nak hrangih kan hman tlang dinmi duhthusam tla ruah aw, ngansuak in cutin ṭan kan lak rori a ṭul. Cutin, innsang nun , nu le pa ihsin fale pawlah a hlawhtling a silen kawhhran a fansuak ding ih kawhhran ihsin pawlkawm tete le a rampum tiang a fansuak thei ding a si. Pawl tinkim damnak, Khawhhran tinkim damnak le rampumpi damnak cu innsang ih fa le nau kan kilkhawiawknak le innsang nun hrisel le selonak parah a ṭhum aw aw a si. Nu nasilen innsang nuam dinsuak dingah leitlun ah nangmah na thupibik ih pa na si khal len innsang hlawhtling dinsuak dingah Pathiang sangtu ah cun nangmah na thupibik ti na cohlan le Pathian rinsan in na mawhphurhnak ralṭha zet le duhdawtnak thawn na kenkawh ngam a ṭul.
Siartu zaten Pathian in lo thlawsuah hram seh

Ziangruangah Si Innsangah Kan Hlawhsam Ṭheu 1


Tuini kan leitlun pumpi zoh le thlirtikah innsang hlawhsam hi a ni ni in kan pung deuhdeuh. Ram cangkang le kan zohsan bikmi lakih tel pakhat USA kan zoh asilen a kum telin innsang kekkuai le nupa ṭangṭhenaw thawm vang siseh, single parent (Pa lawng lole Nu lawng innsang hruaitu) kan pung deuhdeuh.  Cumi ih rahsuah dysfuntioncal Children (innsang punghmanlo- nu le pa ih awpnak hnuai ihsin ṭhanglianlo fanau) hmuh ding an tam deuhdeuh.  Ram a cangkan vivo le hmun ṭha ih kan um poh len nupa siseh laitlang khawte ih nitin lothlo ih hnaṭuan tlang, sungkua kimtei rawl kilkhawm tivek tla kha a harsa deuhdeuh. Kan hnaṭuannak hmun, zung le hnakaih a danglam tlang tikah nupa khal sun nihlawh hmu aw lo ih ṭhenawknak can ah kan tlang leng thlang. Cuvek thotho in kan fale an silen anmah le zirnak ah cutin tlai le zan ih in an ra tlun can lawng cu kan tawnawk khawm can a si. Kan san in in pek nawn lo ruangah nu le pa khal sunvui hna dangdang ṭuan in mah le hna ah nupi/pasal hmuh ban lo ih sumpai hawl san ah kan tlang leng thlang. Cuti a si tikah, a liamcia mi ah “ ziangruangah innsangah kan hlawhsam ṭheu?” ti mi thusuhnak khal hi tuihlan hnakin nasa sinin kan suhawk a ṭul. Mikip ih kan duhmi innsang hlawhtling le nuam dinsuah ding hi thil awl ai lo zet, zuamawknak, pumpekawknak, tumruhnak le sikan nasa zet neih a ṭul ti khal kan theih feng sinsin a ṭul.
Aliamcia kan Chin nu le pa kan zoh asilen cu tui kan san thaw cun an dang aw zet tlang. Kan chin ram ih tlangleng tu kan nu le pa hrekkhat tla cun a takin an hmang rero lai nan, ramsung hmunpi ih um le ramleng suakpawl cun an hmang nawn lo. Kan nu le pa, pi le pu sanah cun innsang tin in mai lo (thlawhma) kan nei ih cutin nupa nitin te mai lo ih feh le lo thlawh kha kan hnapi a si. Cun, midang thawi ṭuankhawm kan duh le kan tlakaw ih cutin innsang nupa khal hmun dangdang ah ṭhendarh aw lo in hmunkhat te ah hna kan ṭuankhawm ṭheu. Cuti a si tikah, tuisan ih kan theih leuhleuh mi innsang nupa karlakih uiretnak (nupa ṭangtawm sualnak) tuah thuhla tla tui dinhmun hnak cun theih ding a dem zet. Cuvek cingih nunau/mipa uire tivek theih an um asilen mi tirhsiang luar deuh ti ih mi zohtleu mi an si. Asinan, tui kan san ah cun kan nupi/pasal khal mi nupi/pasal le midang pi thawn kan hmuhbanlonak office ah nisen sa tuar nawn loin hnipuan mawi bikbik le ṭhabik bik thawn aircon hnuaiah hnaṭuan in an khawsak tikah innsang kan thupit ter lo ah cun mipa hrangah siseh, nunau hrang khalah siseh tlemnak a tam cuang. Cumi ih a rahsuah cu, accident tawng le cumi ruangih innsang kekkuai khal theih ding tuini ah mi tampi a um aw aw. Cutin, nu le pa bik innsangah kan kehkuai tikah kan fale cu khawmtu neilo arpi ih a fale a thihsan vekin vavai in an ṭap, an nunkhua a thim. Rawngbawltu kan si maw, sumdawng kan si maw, zungkai kan si ah maw innsang thupi zet ih kan ret lo ah cun siatnak ti mi hin zohman in hlat lo ti hi kan theih a thupi.
Awle, ka thupi ziangruangah innsangah kan hlawhsam ṭheu? ti mi thuthawi pehparaw in Kristian rawngbawltu innsungsang ihsin kan zoh pei. Kan Chin ram rawngbawltu saya hminthang taktak pawl hi insang hlawhsam ti ih mi relmi an um ka thei hnuaihni.  Zo an si ti ka rel tum mi a si lo ih ziangruangah kan hlawhsam, ziangtin innsang hlawhsamnak ihsin kan luat thei ding, kan kilhim aw thei ding?  ti lam kha ka rel tum mi a si tikah a ruang le a tidan ding lam ka uar ding.  Innsang hlawhsam ti mi hi a phunphun ih tehdan kan nei thei ding; Sumpai lamih hlawhsam, innsang lungawinak le hlimnak lamih hlawhsam, sungkhat unau pawlkawmawknak lamih hlawhsam, fanau kilkhawinak le nuncan lamih hlawhsam tivekin a phunphun a um thei ding. Cumi ah ka rel duhmi cu taksa nundan lole nungcang (moral behavior) lamih hlawhsam ka rel duh mi sawn a si. Nu le pa Pathian thu thiam zetzet, Kawhhran le ram hrang khalih thlawhsuah tum taktak nei, thlarau lam ih pa rori ti ih kan hmuhmi kan pa le tampi ziangruangah an fale zutama, mi hnaihnawk ringringtu fanu/fapa, khua le veng hrang mi hnawksak ah an suah thei? Hi thu hi mi hmuahhmuah ih kan thusuh mi a si ka zum? Kan thusim mi hi kan innsangah kan hmang suak lo maw lole kan thusim mi kan thupit ter tuk ruangah kan thusim mi kan innsang ih hmansuah kan thlau thla? Lole sim lawng duhtawkin a takih nunpi lamah kan daitlang?

Wednesday, July 27, 2011

Taksa Kang Damternak Si ṭha bik


Taksa kang hi leitlun minung tambik cun kan duhthu si lo in ka tisual pang lole kan kiangkap ih thil cangmi pakhat khat ruangah kan tep cio ding ka zum. Cun, taksa kang hi a phunphun in a um thei; kut lole ke kang, taksa hrekkhat kang lole a besebikah taksa pumpi kang tivekin. Kang hi a takih tuarlo tui hrangah cun theihthiam pi a harset. Kan Chin ṭongfim pakhat “ a hmelin zoh hlah a aan in ngai aw” kan ti mi hi kang thu ah hin a fiang zet in ka thei. Lenglam ih hmuhnak le zohnak ih ziang ti thamlo kang fate khal hi a takih tuartui hrangah cun pacang pa rum hrunhro rero nak tlak a si.
Awle, hi ka cahram ah hin ziangtin taksa kang lole kang lak ihsin kan humhim aw thei ding ti lam rawn ngan ka tum lo ih kan parih taksa kang lole kang kan tawn leveten ziangtin kan tuanhlawm aw ding ti lam sawn a si. Ahman, vawitampi cu taksa kang lole kang hi kan mai fimkhut lole ralrin lo ruangah kan parah a thleng , cumi ih ralrinnak kan pekawk theih mi cu ralring tei taksa kangter lo dingih um a si. Asinan, vawitampi cu kan ral ring cing in minung ti pan cu kan rak ralring ringring cawk lo. Rinlopin, kan rawl hmeh suan tivek in in rak per, ka siti kan tivekin in rak peh, cun, bel kan cawiah ralring man lo in a tlang sa in kan taksa in rak kang tivek a phunphun kan rillohpi in kan parah tleng an um ṭheu. Cutiasiruangah ziangtin cuvek kang na taksa parah a um tikah na tuah ṭheu? Na fale pawl kut le ke a kang tikah ziangtin na tuamhlawm? Kang lo dingih kilhimawk a thupit tluk in na taksa a kang pang a si khal len na taksa siatsuah lo ding le a rang thei bik ih a damnak si na ngaihtuah lohli cu na hrangah le ka hrangah thil ṭha bik mi a si. Ahman, nang cu pitling na si ruangah na kut le ke kang ding tla in vanduai thilthu ti mi lo ah cun na fimkhur thiam tla a si men thei, asinan, na fanu, na fapa ralrin thiam lo pawl hrangah ziangtin an kut le ke a kangah na tuamhlawm ding?
Keimai pumpak nunah, nauhak lai ihsin mi zuanzang le harhvang ti cu tawh lo ding ding, tham lo dingding rak tawh thai hi ka paih zet si hmang. Ka taksa khal ah kang hi ka rak tuar ve nasa. Amahlawngte cu Pathian kilvennak zarah kang hliamhma tum pipi tivek cu ka rak tuar dah lo. Kut zungpi, zunglai kang lole ngel kang tivek cu ka rak tuar ve phahphah. A sa a nat thei tuk tik ah ziangtin ka damter lohli ding ti hi ka ruah tambik mi a si. Hrekkhat cun hasi(Colgate) lole a bangpi a dangdang a ṭha an ti. Cutin, ka ciing ih ka vawn hnih ṭheu. Reilote cu a zia um a bang nan a hawng khing ih cutin a puar ding cu a dawnkham cuang lo. A sa zualpi reilote sung cu a daih nan, a rei deuh in a puar thotho.
Mi hrekkhat dang leh cun kang hmasi um nawn lo ih dam viarviar na duh len cu “ khuaitizu” tla kang hmasi ah hnih ringring sela a ṭha an ti. Nan, hi thu cu keimah ah a takih tawnteh mi ka nei lo.  Thufim pakhat kan theih larzet mi “ experience is the best teacher” ti mi thuthawi pehpar aw in taksa kang si ih ka hman mi si ṭha bik ka lo ruah ding.  Hi ka relding mi si hi Mizoram lam, mizo unaupawl tla cun “ tinreng damdawi” – “ziang hmuahhmuah si” tin tla in an ko. Thil ziangtinkim deuh thawh ah an rak hmang si awm tak a si.
Ahmin cu “Ṭhunsuiwa” lole “ efficascent oil”  ti kan theih mi ruhna si kha a si. Taksa ruhcang na ih hnih le hmehawknak lawngah si lo in taksa kang hrangah hleihlei a ṭha tuk lawm mam!  Ka taksa a kang tinten a kangnakah khan hmakhatten ka hnih cih ih cutin, a hawng sa nawn lawk, asinan a sa a reh cun a dam cih ringring. Hi Ṭhunsuiwa ka hnih le hman cin ah cun kang ruangah taksa puar le na ka tuar a um nawn lo.  Na taksa khawitawk khal a kang a silen sumpai cem hautak lo bik le ṭhabik ih ka hmuh mi cu “Ṭhunsuiwa” kawl si hnih lohli kha a si.  Doctor pawl in teh ziangtin hi thu an sim ding cu ka thei lonan keimai pumpak tawnteh mi ah cun kang hmuahhmuah lakih si ṭhabik ka ka hman rero mi a si. Na taksa a kang tikah daitlang loin rak hmang ve hman… na sir aw lo nasa ding. Amahlawngte, na kut lole na taksa a kang leveten na hnih lohli a ṭul, a puarhnu lole a reihnu ah cun a ṭhahnem tuk lemlo. Nan, a kang ihsi na hnih cih hngal a si ah cun a takin a ṭhazia na sawr ṭangkai cih ding.

Khrih Neih Ih Danglamnakpawl


1. An sual ringring thei nawn lo ( I John 3:6,9; 5:18) Piangthar pakhat a sual ringring ahcun a rundamnak a hlo thei. Pathian lam ta si lo in, tiah a titu an um  ṭheu. Bible cu,"Pathian hrin, piangthar taktak an sual ringring thei nawn lo" a ti. Curuangah RUNDAMNAK A HLO THEI ti hi Bible ṭhate ih kan siar lo ruangah a si.

 2.Thih hnangamnak an nei (Saam 23:4-7) Minung fa zokhal thih ngam taktak an um lem lo ding. Thihngamnak le thih hnangamnak hi Thlarau hna
ṭuan lawngih kan ngah thei mi a si.

 3. Can tawkih lungawi theinak an nei (Habakuk 3:17-19). Leitlun hi can tawk le sinak tawkte ih lungkim thei lonak ram a si. Khrih neitu lawnglawng in cuih lungawinak taktak neih theih a si.

  4. Suupawktheinak an nei (IITim.1:7) Tisa hiarhaalnak a phunphun hi minung minunnak cun a har tuk. Thlarau bomnak in suup awk theinak hi Pathian fa pawlin kan nei.

  5. Beidon thinhar caanah hnemtu an nei (John 16:27,33) Minung in kan rual
ṭha le unau hi ziangmaw cin cu kan hnem thei a bang nan a pittawp cu kan hnem aw thei lo. David a fapa thih tumih lungawi theinak a neihmi, Job kha a fanau le a neih mi an cem theh ni ih a lungawi theinak kha hnemtu Thlarau zar ah a si.

  6. Vanah Pa an nei (Mtt. 6 :9). Khawmvel mi cu an mah hringtu leitlun pa lawng an nei ih zumtu cun thithei lomi vancung ah PA kan nei.

 
7. Vanah an hmin ngan in a um (Luka 10:20). Nunnak cabu sungih kan hmin ngancia a si thu theih fiang ahcun hnangam lo  in kan um thei lo.
    
  8. Vanah Inn-nuam an nei (John 14:1-2). Leitlun ih Inn le lo kan neih hmanah kan hna a ngamih vanih innnuam kan neih mi zumnak mitih kan hmuh bet cun lungawi a mak.

  9. Vancungmi pawlin nitin an kil (Saam 34:7). Leitlun raalkap ih kilmi ralbawi hman khi an hnangam tuk. Vanmi kilmi kan si hia nasa lawlaw.

  10. Pathian in a ngaihsak (I Pet. 5:7 )Milian le leitlun bawi ih ngahsakmi sihman khi a nuam tuk. Pathian in in ngaihsak sokhaw.
    
  11. Vanah laksawng an nei (II Kor.5:10). Kan tuanman hmuahhmuah Bawipan vanah in khal sakih in pe leh ding.
     
  12. An sual tikah nusimtu kan nei
(He.12:5-6). Cung Pathian ih nunsim duhmi cu a fa duat kan si.

13. Sualah an tlu lanta thei lo (Saam 37;23-24). Kan tluk le thosaltu Thlarau kan nei.
Siartu zaten Pathian in lo thlawsuah hram seh.
Evan. S. Tha Nei Fai
Tahan
....................
Hminsin: A sermon ropi zet in hlawmtu Saya Fai tlunah lungawinak ka nei.

Pathian Fapa Leitlun a Ratsan


Pathian fapa, Jesuh cu hnaṭuan duhmi le tumtah mi tampi nei in hi leitlunah a ra. Aratnak san in zumtu cio kan nunnak ah sullam nei ko seh.

1.Pathian uknak din dingah (Mtt.6:10; 13:11)
Tluksiatnak ruangah hi leitlun pi hi satan kutsung ah a thleng zo (John 18:36; I John 5:19). Jesuh leitlun a rat tikah a zumtu pawlih thinlung ah Pathian uknak a dinthar saal vivo. Cuih Pathian uknak nun cotu hmuahhmuah cu BibLe in "VAN TI LE KHAWMI" tin in ko (Filipi 3:20).

2.A hlomi pawl hawl ding le ruun dingah (Luka 19:10)
Sual sungih a pilhlo zomi minung in Pathian hawl theinak zianghman kan nei nawn lo (I Kor.1:21). Curuangah duhdawttu Pathian in a lainatnak in a fapa Khrih a run thlahih a Tuuhlo pawl in hawl. In hmuh ngahvete'n a van mithiang pawl thawn nunkhat,lungkhat in in leengtlang ter. Misual bik in hawl suakih nunthar in pe saal hi cu a thukin a va mak lawmam em!

3. Sual sungin in sansuak dingah (Mtt.1:21)
 Zakia le Samaria nu bangih sualhri pi ih hrentaang mi pawl kan mahte kan taal suak thei lo ih Jesuh Khrih in a thisen in sualhri in botcat sak.Zumtu hmuahmuah cu cuih sual sal sungin in luat ter zo..Hallelujah (Kol.2:14:Kal.5:1). Sual sal kan sinawn lo ih Cungbikih fahniang kan si sawn.

4. Thutak thei ter dingah (John 18:37)
 Jesuh in siangpahrang Pilat hmai ah Thutak theih ter hi Leitlun ih ka rat san a si,ati.
*Thutak cu zo a si?
-# Jesuh ...John 14:6
 #  Thlarau Thianghlim...I John 5;6
* Thutak cu ziang a si?
 #  Pathian thu....John 17:17)
Thutak theih cu luatnak a si (John 8:32). Motor thluun in Motor thu an thei ih Caw dawi pawlin caw thuhla an thei. Khrihh thluuntu in Thutak an thei ve thung. Nangteh zawithu,ziangthu na thei tam bik?

5. Raalnam thlen dingah (Mtt.10:34-35)
Jesuh in leilung tlunah remnak thlen tertu ah a ra ti'n in ruat hlah uh,raalnam kengin ka ra sawn a si,ati. Keimah ruangah pa le fapa, nu le fanu, ni le mo pawl an raal aw ding,a ti.Cucu buainak thlentu a va bang ve! Sadu Sandar singh a pianthar veten a nu le pa, a paseu pawlin raal zohin an zoh. Mi zokhal Khrih a zumih a pianthar taktak ahcun zum lotu (Milem bia) a nu le pa, a unau thawn an rem thei nawn lo ding. Ziang ah tile Khrih le satan, zumtu le zum lotu, tleunak le thimnak cu an um tlaang thei lo (II Kor.6:14-15).

6.Satan hna
ṭuan siat bal dingah (I John 3:8)
Minung ziang tlukih micak,milian le mifim khalin satan cu an doneh thei hrimhrim lo ding. Ziang ahtile  anih cu thlarau sual, Pathian hman do ngamtu a si. Curuangah Jesuh in Cross thilti theinak hmangin Satan hnatuan cu a siat bal thehih a cemral ter. Aaron ih kianghrol in Faro dawithiam pawlih kianghrol rulih cangmi a dolh cem theh bangin rallian satan le sual hnatuannak cu Cross parah khenbetin a nuai ral theh zo. Cuih thutak parih a dingtu hmuahhmuah in satan le sual hnatuan nehtheinak kan nei ve...Hallelujah.

7. Nun kan neih ih tamtakih kan neih theinak dingah (John 10:10)
Jesuh in a nun cu vancungin in run tawm mai lo ih minung sahring ah rung cangin Cross ah a thi ih thlaanin a thawh saal hnu ah van ah a kai. Thlarau in a rung tumih kan sungah a nung. Cuih thosal Khrih nun cu nun tam a si. A thlarau hruainak ih kan nun,kan peek awk sinsin tikah a maih nun maksak cu kan nunah ruun tipi bangin a luangliam theu. Nun tam timi cu sumpai le hlawnthil neih tam liailiai a si loih can tawkih lungawi,neihzat te ih diriam theinak a si.

8. Kan zoh
ṭhim dingah ( I Pet.2:2)
Jesuh khi vancungah to ringring men sehla a nun kan zohthim thei lo ding. Kan cawn,kan zothim dingah leitlun ah minung bangin a ei,a in, a tlangleng. Misual -mitha, mifim - miaa, milian-farah theidang loih a kom, a biak bangin kan nih khal thlei dan nei hlah uh si. Cat loih thla a cam bangin kan nih khal thlacam daithlang hlah uh si. Pathian hnenih sunloihnak a peek ringring bangin ziangthu khalah Pathian hnenah sunloih upatnak pe ringring uh si.
A siartu nan zate’n Pathian in Khrih ih leitlun a ratsan (8) a takin kimter hram seh.
Evan. S. Tha Nei Fai
Tahan
..............................
Hminsin: " Pathian Fapa Leitlun a ratsan" ti thupi hmangih Pathian thu in hlawmtu Evan. S. Tha Nei Fai hnenah ka lungawinak ka tarlang.

Israelpawl Hnenih Bawipa'i Thucah 12


Bawipa Pathian in Israel pawl Kanan ram an luh zawngah thutampi a tiamih cuih sungin 12 kan zoh tlang hnik pei.

(1) Kanan ram nan luh  tikah nan mai laih lomi tikhur, nan cin lomi sabit le Olif kung pawl,nan sak lomi Runinn tha pawl nan nei dingih rawl lakih a
 ṭha bikbik nan ei ding. Cuihcaan ah Egypt ramin a lo hruai suaktu nan Biak Pathian in hngilh hrimhrim lo pei (Daanpeksalnak 6:11-12;8:12-14).

(2) Kanan pawlih an khawzing (an pathian) nan biak hrimhrim lo pei (Daan.6:14).

(3) Kanan ramih um miphun 7 pawl...Hit, Girgash, Amor, Kanan, Periz, Hiv, Zebus pawl an zaten nan that theh tengteng pei (Dan.6:1-2).

(4) Kannan pawlih fanu le fapa pawl thawn nan nei,nan
ṭhi aw hrimhrim lo pei (Daan.6:3-4).

(5) Nan neihnun ih nan
ṭhanso vivo tikah kan hawl thei le ka fim ruangah kan lian tiah nan ruat aw hrimhrim lo pei. Bawipaih in peek, nan ti ringring sawn pei (Daan 8:17-18).

(6) Nan fim le nan
ṭhat, nan tam le nan cah ruangah Kanan ramih luut thei in nan ruat aw lo pei (Daan.7:7-8;9:4-6).

(7) Gerizim tlaangin thlawsuah nan aupi dingih Ebal tlaangin camsiatnak thu nan than pei (Daan.11:29).

(8) Levi hrin (Pathian hna
ṭuan) pawl nan thlauthla hrimhrim lo pei (Daan.10:9;12:19).

(9) Pathian thupeek hi nan beet lo pei,nan hlon fawn lo pei (Daan.12:32).

(10) Nan lorawl le hmuansung suak pawl 1/10 hmaanten nan pe pei (Daan.12:22-25).

(11) Nan umnak ramdang mi pawl ih nun daan nan cawng lo pei (Daan.18:9).

(12) Sumpai a
ṭhangin mi nan coih lo pei (Daan.23:19).

       Pathian zangfahnak ruangih ramdang a thlengmi zumtu unau pawl.......
       @ Na nunnom ruangah Pathian na hngilh pang maw?
       @ Ram ropi na thlen ruangah na hngal pang maw?
       @ Na hna
ṭuan buai ruangah khawm na daithlaang pang maw?
       @ Peeknak ah na daithlang sual maw?
       @ Ramdang mi pawlih nun daan tha lo na cawng ngah pang maw?
       @ Kawlram ih na taanta mi unau le na nu la pa na daaithlan pang maw?
       @ Zuu man a ol paam tin na dawk hluahhlo mai maw?

       @ Na lawinak kawhhran or Fellowship ah sorbawk tlakin na pe aw maw?
       @ Sumpai khawlnak caang thiam lo'n na eiek tuk maw?
       @ Na ngahsun sumpai Pathian hna
ṭuannak ah na hmang siang maw?

Siartu zate'n cung Pathianin lo thlawsuah cio hram seh.
Evan. S. Tha Nei Fai
Tahan
.....................
Hminsin: A sermon in hlawmtu Saya Fai tlunah lungawinak nasa zet ka nei.

Thlawsuah Hmansual

"Kanmai cahnak in kan lian a si tiah ziangtik hmanah ruat hlah uh,Nan lennak ding ih ṭuansuah theinak thazâng lo petu cu Bawipa nan Pathian a si"{Danpek.8:17-18}, "Rawl le sabit le hriak ka pek mi le sui le ngun Baal biaknak ih an hman rero mi hi KEIMAH ih pek mi a si ti an theilo"{Hose.2:8}.
Pathian thlawsuah hmansual hi a poi in a ṭihnung tuk mi a si.Kan Bible ah Pathian thlawsuah hmandan thiam lo hmangsual mi tampi an um.Cumi lak ih hrekkhat pawl tla cu:
1.Adam tei Nupa{Gen.2:17,3:4-6}.
Adam tei nupa in Pathian ih ei sianlo mi an ei ruangah an tefasin tiang camsiatnak kan tuar a si hi. Nu le pa in Pathian thu thawi mil aw lo{kaih aw lo}kan ei le kan in ahcun kan tefasin hrang tiang ih camsiatnak thlentu ding a si. Cuihleiah Adam tei nupa cun thingrah ei lo ding an ei hnucun thingkung lakah Pathian an relhsan{Gen.3:8}. Khai thingkung kha Pathian in Amah an relhsan nak ding ih a pek mi an silo. Unau Pathian thlawsuah kan don mi hi Amai hmel phentu ah kan hmang pang maw? A thlawsuah hi Amah relhsannak ah kan hmang pang maw? Kan nun zohfiangsal uh si.
 2.Israel pawl{Exo.32}.
 Pathian in Israel pawl hi Izip ram in a hruaisuak hai ih a hruaisuah ding zanah khan Nan pi le pupawl hnenah thil dil uhla zângfahnak thinlung ka neih ter hai ding ih an lo pe ding a ti, an dil tikah sui le ngun tampi an pe ngaingai a si kha{Exo.12:35-36}. Sinai tlang an va thlen tikah Moses tlangparah Pathian thawn be aw ding ih a soh lai ah Aron hnenah an ra ih "Moses le a thuhla kan thei nawnlo, Kan hmai hruaitu ding Pathian in tuahsak aw ti ah an ra ti"{Exo.32:1-3}. Cu tikah Aron in mipi mithmai zoh in{Pathian mithmai zohlo in} mikip in nan sui le ngun rak keng uhla Pathian cu ka lo tuahsak ding ati ih an sui le ngun cu an rak keng ngaingai, Caw lem a dinsak ih an biak ti kan hmu{Exo.32:1-5}. Cu tikah Pathian cu Israel mi pawl parah a thin a alh in a alh a si kha. Pathian zângfah thil pek an don mi cu Pathian thinnat ter nak ah an hmang a si. Unau kan nih teh kan thlawsuah don mi kan hmandan ah Bawipa a lung awi ding maw a thin a na ding ha? Aron in le a kutthiam nak cu milem tuahnak ah a hmang. U le nau lenuh Pathian ih in pek mi kan Talent hi teh ahmin sunlawinak ah maw kan hman or a thin heng nak ding ah? Thlawsuah don lawng hi a tawklo ziangtin kan hmang timi hi Pathian in a thupit ter mi cu a si. Kan  thlawsuah co mi  in milem kan din pang maw?
            Cun Number.11:33,Ps.78:29-31 sunglam khal kan zoh asilen Israel pawl in Pathian hnenah Sa an dil ciamco ih Pathian in Vanimsa a pe ti kan hmu. Asinan an ei lai rori ah an parah Pathian a thin a heng ih mitampi  an thih phah. Pathian thlawsuah a ei dan le a in dan kan thiam lo{hman thiam lo}ruangah hin natnak si lo lo kan ngah mi tla a um men ding. Pathian hnenah Bawipa na thlawsuah siar dan in zirh aw la a hman dan khal in thiam ter aw ti hi kan thlacamnak ding a si.

3.Gideon {Thu
ṭhen.8:22-28}.
Gideon in Median ral a do ih a neh tikah Israel pawl an lung a awi tuk ih a hnenah an ra. Cu le Gideon hnenah "Nangmah le na fa le na tesin tiang in in uk ding an ra ti tikah, Kei in ka lo uk lo ding, Ka fa le khal in an lo uk lo ding, Bawipa nan Pathian lawng in lo uk seh ati hai"{Thuṭhen.8:22-24}. Asinan mikip in nan rallak thil sui le ngun in pe uh tiah a ti ih an pek. Cui an pek mi cun Ephod timi milem a din ih Israel pawl hruaisual tu ah a cang a si kha{Thuṭhen.8:25-28}. Zumtu unau kan thlawsuah don mi hi kan tefa tiang  hruaisual tu ah a cang pang  maw?

4.Fapa Tlanhlo {Lk.15:11-16}.

 Fapa tlanhlo thu kan hmuh mi khalah a pai hnenah a roco ding mi a dil ih a pa in a pek tikah a pai pek mi ro cu petu a pa tlansannak ah a hmang ta riai.{lk.15:11-16}. Zumtu unau kan pai in pek mi thlawsuah hi amah kan hlatnak ah maw kan hman or amah kan naih deuhdeuh nak ah? Peter cun a Lawng khat ih nga a kaih tikah Bawipai kehram ah a kun ti kan hmu{Lk.5:1-7}. Fapa tlanhlo cun a pai pek mi kha a petu tlansan nak ah a hmang, nang le kei teh? A pek mi silo in petu sawnah tla lut uhsi.
 Siartu zaten Pathian in a thlawsuah hmanthiam nak in zirh hram seh.
 Evan.David Ceu
 Tahan

...............
Hminsin: A sermon sunglawi in hlawmtu Saya Ceute tlunah ka lungawi.

ZIANGRUANGAH JESUH LEITLUN AH A RUNG TUM?

Preached on 21, Dec, 2016                   By Rev. Henry vl Hmangaih Tu zan ah kan lak ih pakhat khat hi interview lo tuah sehla zia...