DAWITHLUNTU PATHIAN IH DUHDAWTNAK

Jonah cu ngapi in dawlh tahrat in, a tawnteh mi le a tlunih thilthleng  cu rapthlak za le duhnung lo zet si hmansehla, thutak ṭunghmun mi cu Jonah cabu hin mangbangza Pathian ih duhdawtnak thuanthu in sim a si. Ahlecein, bung thumnak hin ziangtin Pathian duhdawtnak in mi a dawithlun ti thu a rel.

Catbang loin Pathian duhdawtnak cun in dawithlun

Kan theihthiam ban le ruahban hnakin thuk sawn in Pathian in in duhdawt. Cui duhdawtnak cu kan tlansan thei dah lo ding. Tlansan kan tum a si hmanah, catbang loin  in hawl ringring ih kan mah thawi duhdawtnak ih kan pehzawmawk le kan nun in tundin a tum. Sam cangantu cun hi tin cui duhdawtnak cu fiangten a sim, “Na hnen ihsin khuiah so ka relh ding? Na mithmuh ihsin khuiah so ka tlan cuang ding? Vancung ah kai ningla cunah nang na um ding; Mithi pawl ram Sheol ah it khal ningla cunnah na um thotho ding. Thla nei bangin nisuahnak lan in zuang khal ningla; Asilole nitlaknak a hlat bik hmunah um khal ningla, cutawkah na kut in I hruai ding ih, keimah bawm dingah na rak um thotho ding.” (Sam 139:7-10)

          Jonah cu Nineveh ah feh lo in Tarshish lam a feh tikah, Pathian thu ngai lo in a um asinan, Pathian in ngapi hmangin a dawithlun thotho. Ngapi cu Jonah hremnak dingih tuah a si lo, asinan Jonah kha Pathian ih duhnak ihsi hla tuk ih a thlanhloh lonak ding ih kilhimtu, tihaaknak lakih si runsuaktu, himdamtei Nineveh a thlen kirsal theinak dingih hmanrua le Jonah ih thinlung hel nemternak dingih Pathian hmanrua a si. Pathian in in duhdawt tuk ruangah can hnih khat cu kan mai duhnak ih sin in runsuak dingah nunsimnak kan parah a thlenter ṭheu. Job 5:17 cun, “ Pathian ih nun a simmi cu milungawi an si! Nun a lo sim a sile na ninghang duh hlah” ti ah a ti.

          Kan palh can khalah Pathian cu kan parah awlpasamten a beidawng mai lo. Cu aiah a hnenah in hruaikir sal ṭheu. Hi thutak  hi Bible ih in sim mi mipi pawl nunah kan hmu thei. Jakop , bumhmang cu Pathian thawi an buanawk hnu ah, Pathian hmaiah a mah le mah  a tangdawr aw terih cutin Isreal ti ih kawh a si. David, uirepa, tualthatpa a rak si rori mi khal cu Pathian ih lungtawng ti ih kawh a si. Peter, vawi thum rori Jesu phatsan tu khal kha Pathian in nasa takin a kohhran hruaitupawl lakih mi pakhat dinhmun in a hmang. Jonah 3:1 hi Bible cang pawl hmuahhmuah lakih hnangam thlak bik cang a si ding ti theih tluk a si, “  Bawipa ih ṭawng cu Jonah hnenah a vawihnihnak a ra thleng sal..”  A dik, Bawipa cu can ṭha dang mi pesal tu ---vawi thum, vawi li, and vawi ngai…tvk…duhdawttu Pathian a si.

Pathian ih duhdawtnak cun sual tlansannak le rundamnakah mi a hruai

          Jonah cu hruai kirsal ih a um hnu ah, Bawipa in hitin thu a pe, “ Tho awla a nasa zetmi khawlipi Nineveh ah feh aw; ka lo sim ciami vekin ka thu va phuang aw,”( Jonah 3:2) ti ah a ti. Hi mi Bible cang hin a bulhram a si mi in sim: Pathian cu a hamhaih ve lo; karbak pakhat tete in can khat hnu can khat mi a hruai. Cumi cu Pathian in duhdawtnak thaw a tuah. Jonah cu a vawihnihnak Pathian in a kawh tikah,  a thu a thlun cutin “ Nineveh khua ah a feh. Nineveh cu khaw tum ngaingai a si ih khawsung cu nithum sung feh a si. Ni khat sung a feh ih Nineveh khua ah cun thu a sim: “ Ni sawmli hnuah Nineveh khawpi hi ca cem ding, “ ti ah a tlang-au ciamco.” (Jonah 3:3-4)

          A pehzawm Bible cang dang kan zoh vivo asilen Ninehveh khaw mipawl in Pathian thu an zum ih rawl ulh in thla an cam ti kan hmu thei.  Mi hmuahhmuah- a niambik ih sin siangpahrang tiang- saidip puan an sin ih rawl an ul. An tilva, rannungpawl tiang in rawl an ul ter. Mi hmuahhmuah in an sualnak tlan san in Pathian an ko. Assyrian khawpi Nineveh ( Assyrian mi pawl hi an ral pawl nung cing ih an vun lip ṭheu tu, mi sual sawksawlawl pawl ti ih theih an si), khawpi ropi le sualnak ih khat cu sualsirnak dikah hruai in a um- an  ruahnak an thleng ih, cutin an thinlung khal an thleng cumi cun an nun pumhlum le khawpi nun khal a thleng danglam thluh.

          Jonah in Pathian in thucah cu tluangtlam ten a sim cutikah mipi pawl ih nun cu a thleng danglam aw viarviar.  Cuvekin, Pathian ih thu tluangtlam te ih kan sim tik khalah, a thunung cun hmuar a nei ih, a ngaitu nunnakah hna a ṭuan ih, a duhdawtnak thuthangṭha cun nunpum a fansuak thluh ṭheu- Cui a thu nung cu kan danglam ter  in a pengparang in kan la kawi ding a si lo. Pathian thu kan sim tikah, Thlarau Thianghlim huham rinsan in kan sim niakno ding ih, cule a rahsuah cu Pathian ih ṭuanvo a si. Amah Pathian sawn kha mi nunnak ih hnaṭuan ding in siannak kan pe ding a si. Paul cun , “  U le nau tla, nan  hnenah Pathian thu theihter dingih ka rat tikah khan ṭawngkam thiam zet le fimnak thawn ka ra lo. Ziangahtile, nan lakah Jesus Khrih le khenbet ih a um thu siar lo a dang zianghman thei lo dingin thutitluknak ka nei. Nan hnenih ka um laiah khan cak lo, tih le nasazetih khur in ka um. Ka ṭawng mi le ka phuan mipawl tla hi mihip thei minung fimnak ṭawngkam thawn a si lo. Cu hnakin ka ṭawngkampawl cun Thlarau le huham an langter sawn a si.Cuti cun nan zumnak cu minung fimnak ah ding loin, Pathian huham ih a din sawn theinak dingah a si” ti ah a ti. (I Kor 2:2-5)

Pathian in mi tangdawr pawl cu lainatnak thawn a sawn

          Nineveh mipi pawl cu Pathian hmaiih an tangdawr sal tikah, Pathian in lainatnak thawn an mah a sawn. Cang hra (10) cun, “ Cutiih an tuahmi le an nundaan ṭha lo pawl an tlansan kha Pathian in a hmuh tikah a thin a sup sal ih an parah thlenter dingih a tummi siatsuahnak cu a thlengter sal lo” ti ah a ti.

          Mipi pawl an sual natsat zia ruah ah thitlak an si, nan  Pathian in Nineveh khawpi  cu a zuah, ziangruangah tile an sualnak an tlansan ih Pathian hmaiah tangdawr in an um ruangah a si. Cuvek thotho in, Pathian in a duhdawtnak thuk le maksak cu sual a sir tupawl hnenah lainatnak le ngaidamnak thawn a pe ṭheu.  Fapa tlan hlo thuanthu ih duhdawttu pa (Luke 15),  a fapa a hmuh kirsal levete’i pan hngal, duhdawtnak ih rak pawmsal, a biang ih fawptu thawn a bang aw zet.

          Unau, a tufang na nunnak ziang a bang? Pathian hnenih sin tlanhlohnak lamzin ah na um  pang maw?   Tui niah, a hnenih sin tlanhloh bansan aw la, a hnen lamah tlan kir sal aw ti ah ka lo sawm.   Bumtu ralpa Satan in na thlan hlohnak a rei tuk zo lole na sualnak a tamtuk zo Pathian in a lo ngaidam thei nawn lo ding, a lo cohlang duh nawn lo ding ti ih a lo sim tikah zum dah aw hlah. Cupawl cu a lo bumnak an si. Bible , Pathian thunung, sual thei lo le palh thei lo cun Jesu Khrih thisen in kan sualnak a zate’n a thiangter thei, a tlengfai thei ti mi in sim.  Hi tin in sim bet, Jonah cu Nineveh mipawl hrangah hminsinnak a si vekin, na sung ih a nung mi Khrih le nangmah cu a tui saan ih minungpawl hrang khalah hminsinnak si ve dingah thlah na si.

          Pathian in a lo duhdawt. A hnenih na kirsal ding thinsauten a lo hngak ringring. Nangmah le nangmah kha a hmaiah tangdawr aw ter aw la na sualnak tlansan aw, cule a nih in duhdawtnak thawn ban tlir in a rak lo pawm sal ding. Jonah cu Nineveh mipawl hrangih hminsinak vekih a hman bang in, nang khal a tui saan mipawl hnenah hminsinak vekin a lo hmang dingih , khawruahhar, mangbangza nangmah feh tlang in a hmin sunlawinakah hi khawpi ah hin a tuah ding a si.

Pathian in lo thlawsuah hramseh.