Kan Bible zoh tikah hruaitupawl ih thu le hla zingzawi ding tampi kan hmu thei. Cipciar sin in kan zoh asilen zoh ṭhimtlak taktak hruaitu an um rual in , riahsiatnak thawi an mi hruainak cem netter khal siar ding bo lo an um. Hruaitu ṭha umnak ram, khua, kohhran, innsang cu an ding suak ṭheu. Asinan, khatlamah hruaitu ṭha um lonak ram, khua, kohhran le innsang cun ṭhansoh hnakin buzuih le siatralnak lam an pan. Hruaitu sinak hi mikip in kan tep cio ti sela kan relsuak tuk lem lo men ding!. Hrekkhat cu Ram hruaitu, hrekhat cu Khaw Bawi , Hrekkhat cu Kohhran hruaitu , cun Hrekkhat cu mai innsangah tvk…. Kan zate in kan fim ah kan ât ah maw hruaitu dinhmunah lolen hruaimi dinhmunah kan um.
Kan nih cu Zumtu kan si ruangah, kan kaihhruaiawknak hi zumlotu pawl hruaikaiawk dan thawn a danglamnak ziang maw zat a um ding. Cu mi pawl lakah tui ṭumih kan zir khawm dingih ka duh mi cu Siahhlawh Hruaitusinak dinhmun hi a si. Hruaitu si cing in Siahhlawh vek rori ih mi riantu dinhmun ih um a si. Hruaitusinakah a phunphun zohthim ding (models) a um ko ding nan, a tu fang ih kan ram zumtu le Kawhhran hruaitupawl dinhmun zoh tikah kan tlaksambik ih ka theih mi cu Siahhlawh Hruaitusinak hi a si. Hruaitu tam sawn cun leitlun hruaitu hminthang pawl ih hruaikaiawknak pawl kan siar in kan uar, cun kan mi hruainak khalah kan sawm, cumi cu a sual ka ti hrimhrim lo, asinan zumtu kan hruaikaiawknakah cun cu men lawng cu a rak tawk lo nasa. Ziang maw zat cu in bawm nan thlarau lam hruaiawknakah kan hlawhtlin ding zatin kan hlawhtling thei lo. Leitlun hruaikaiawknak dinhmun lan in kan feh rori a tul. Cu mi cu thinlung put le sunglam nun ze mawi in a si ding. Pastor kan si ah maw, Kohhran upa, Nu upa, Mino upa, Sunday school zirhtu le mai innsang hruaitu lubik kan si khalah kan kaihhruaiawk dan ngun ngaih zetin kan ruah kir sal ka duh. Hruaitu pakhat na silen ziangvek nun le lungput nei mi na si ti’n na hruaimi pawl in an lo hmu?. Na mi hruainakah na tha nau in ziangruangah hlawhtlinnak ngaingai na pem thei lo tivek in nangmah le nangmah teh na zohkir aw sal ṭheu maw?. Tui mi na hruai dan hnakih tha deuh a um thei lai in na thei maw?. Ziang zawnah na tlasam in ziang zawnah na tha a cak ?. Ziang vek kaihhruaiawknak si kan tlaksam bik mi tin na ruah ?. Hi kan cahram ah cu pawl khal cu kan zoh phah tum ding.
Siahhlawh Hruaitupawl ih ṭhumawknak hrampi pawl
1. Tangdawr ten an um ih Pathian in an mah a khaisan can an hngak men.
A tu can ih kan hruaiawk dan zoh tikah mi tampi cun hruaitusinak hi Lal hrawtnak ah kan hmang pang ṭheu. Hruaitu ka si pam ti i thuneihnak le lalnak hmuahhmuah lek khawh ciam co tum tla a um aw thei. Culawnghman silo in mah le mah khaisang aw ta hrat in Lucifer, Nebukadnezar le Haman ih lam zin kan zawh ṭheu a si hi maw!. Bawi Jesu’i thusimmi hi ngunngaih tak in vawn zohhnih aw, ziangthu ah si dungthluntu pawl hi an buai?.
Mark 10: 32-45 “……Curuangah Jesuh in an zatein a kokhawm ih, ‘Leitlun ram uktu pawl cu an ukmi pawl kha an lal-hnawh ih an hotu pawl tla cu thu an nei nasa ti cu nan thei. Asinain nannih lakah cun hi bangtuk cun a si lo pei. Nanmah lakah pakhatnak si a duhtu cun nan zate sal a si pei. Ziangah tile Milai Fapa hman hi rianmi si loin miriantu si dingah le mi tampi thlen dingah a nunnak pe ding in a ra a si,’ ti ah a ti”
Sunlawinak thawi Jesu’n a uk tikah a vawrh le keh lam ih to Jeim le Johan in dungthluntu dang pawl um lo sung ih Jesu an rak dil ruangih kaithlun dang pawl lungawilonak thu kan hmu. Cumi ih peh vivo ah an lakih ropi bik si an cuh aw aw. Asinan, Jesu cun nan lakih ropi bik si nan duh asile nan zate a riantu lole siahhlawh a si ding a si a ti. Leitlun ram uktu pawl vekih lalnak lek khawh kha an ti ding a si lo zia thu a sim bet. Asimfiang vivo nak ah Amah Jesu in a nunnak thu a rel’ …. “rianmi si loin mi riantu si dingah le mi tampi tlen dingah a nunnak pe ding ..” a si thu a sim bet. Cui, nun rori cu si kan nih hruaitu pawl in kan lungput ah kan ret ringring ding.
Philipi 2: 2-11- khal in “.. Khrih cu Pathian sinak a nei ringring; Asinain Pathian bang dingah hranhram in a tum dah lo. Cu ai-ah, Amah ih lungtho tein, a sinak hmuahhmuah a tânsan ih, hnen-um sinak la tahratin, Minung ah a cang ih minung pianzia in a piang. Tangdawrnak thinlung a nei ih, Pathian thu thlun in, Thinglamtah thihnak tiangin a tuar. Curuangah a sâng bik hmunah Pathian in a cawisang ih, Hmin hmuahhmuah lakih cungnung bik hmin a pek…” a ti.
Khrih cu Pathian a si, Asinan, Amah le mah zianghman lo ah a can ter aw. Ṭawng dang in kan rel a si le a sunlawinak hmuahhmuah kha kan hrangah a sung bung ih a sinak hmuahhmuah tlansan in Siahhlawh ah a cang ti theih a si. Tangdawrnak le siahhlawh sinak hnipuan a hruk ih a nun thawn thih tiang mi rian le a Pai thu ngai in a um. Cuvekin, Khrih cun Siahhlawh Hruaitusinak dinhmun in a dungthluntu pawl a rian ih a nun rori in a hruaimipawl a zirh. Amah le mah a khai sang aw dah lo ih, a pai khansan ding can a hngak men. Cui nun duhdim le thuk cu mang sal in kan nih khal kan degree, hminthannak, lalnak pawl hlip thla in tangdawrnak le siahhlawh lungput nei in mi rian ding ih kawh kan si. In runtu Jesu’n cui lamzin cu zawh dingah kan nih hruaitu pawl hi in tan ta a si.
No comments:
Post a Comment