Malachi 2:17 lam kan zoh tikah a mipawl ih an biak dan Pathian in a nin thu kan hmu thei, “ Nan ṭawngkam in Bawipa cu a ning zo.Asinanin nannih cun, “ Ziangtin so Bawipa cu kan nin? ti ah nan sut. Nannih in, “ Ziangkimtithei Bawipa in thil tha lo a tuahtu pawl cu mi ṭha an si ti ah a ruah; thungai ih ticun a duhzet hai a si,” nan ti.
Kum sawmsarih sung, Hebrew mipawl cu Babylon salah an tang, an ralpawl ih kulh le an siatral ding zoh in an um. Pathian neilo, zuknung a betupawl le sualnak a phunphun sungih a phum aw mipawl cu an ralpawl an si. Makzetmi cu, Israelpawl cu an sahimnak hrang ruatih ṭih le khur ih an um rero laiah an ralpawl cu a nitel in an hlawhtling deuh deuh abang.
Malachi san lai ih Pathian minung pawl cun an ralpawl a nitel ih an ṭhansoh zutzo an hmuh le zoh tikah Pathian in zianghman an hrangah a tuah lo ti ah an ruat. Hitin thu an sut, “ Ziangruangah Pathian in hi vek minungpawl hi thu a ṭhen lo a si ding? Ziangruangah saw Pathian in a rawtcimih thluh lo ?” An nun an zoh tikah an khawruah a har, “ Pathian hin kan zawn in ruat ngai lo a si ding. Hi Pathian neilopawl hman thu a ṭhen lo a si ah cun, hi a dikmi Pathian hin ziangtin kan nung, kan um ti in ruat lo a si ding”an ti. Riahsiatza a si mi cu, khawimi a dik in a dik lo ti an thei na keukeu cingin, an nundan diklo phuahhlam tuahnakah Pathian dokalh an tum. Sualnak an tuah tikah Pathian cun an tlunah thinsau ding in an duh, nan an parih ṭhatlonak a tuahtupawl parah Pathian in zianghman a tuah lo tikah Pathian parah an thin a sau thei lo. Pathian biak ti mi ah hin thinsaunak, a kutcak rawng lang ding hngah hi a telve a si. Pathian hi amai sinak vek silo zawngin kan hmuh tikah kan thin a tawi lohli ṭheu. An mak vek kan si ve lo maw? Kan parih thlengmi siatnak, tuarnak pawl hi kan sualnak ruangah lole kan mah in a diklo mi kan tlan ruangah a si men thei ti thei lo in kan sual khuhnak le phuahhlamah, Pathian thu kan sut in kan dodal maw?
No comments:
Post a Comment