PATHIAN BIAK CU PEKNAK PEK HI A SI

Pathian biak cu peknak pek hi a si. A ṭhatnak le ropitnak kan sawn kirsalnak a si. Danpeksalnak 16:16-17 cun, “ Nan hrin zate sungih mipa hmuahhmuah cu Bawipa biaknak hmunah kum khatah vawithum nan ra pei. Lantak Puai, Rawl Lâk Puai le Puanthlam Puai ah nan ra pei. Zozo khal laksawng nan keng ciar ding ih, Bawipa ih thlawsuah tam a dawngtu in tam deuh, mal a dawngtu in mal deuh, Bawipa nan Pathian hnenah laksawng nan keng ciar pei.” ti ah in sim. Pathian hnenih peknak pek cu kan hrangah can ṭha a si ih mikip in Pathian thlawsuah kan dawn dan cio vekin pe ding kan si.

            Malachi bung 3 lam kan zoh asilen Pathian in a mipawl cu a thu an thlun nawn lo ti a sim thu le a ningnat thu kan hmu thei. Pathian ta cu thawhlawm le ṭhenhra ṭhenkhat pek lonak in an fir. Cutikah Pathian in ṭhenhra ṭhenkhat le thilpek pawl tla cu a hnenah , a biak inn sungah rak keng sal dingah le thlawsuah khal a peksal ding thu a tiamkam mi kan hmu thei.

             Bawipa in, “ keimah hi Bawipa cu ka si ih a thleng-aw dah lo mi ka si. Curuangah nannih Jakob tesinfa pawl cu nan cimit hrih lo a si. Nanmah hlanih nan pupa pawl vek thotho in nannih khal ka dân pekmi pawl ihsin nan pial ih zianghman nan thlun lo a si. Keimah lam hawkir uhla nan lam ka hawikir ve ding. Asinanin nannih cun, ‘Na hnenih ra kir sal dingah ziangso kan tuah ding?’ tiah nan sut. Kei khal in ka lo sut ve hnik pei: Mi pakhat in Pathian ta fir hi a dik nan ti maw? A dik lo ti cu zapi theih a si, asinain nannih cun nan fir thotho. ‘Ziangtin so kan lo fir?’ tiah nan sut hrih. Ṭhenhra ṭhenkhat le thawhhlawm nan pek lo tikah nan fir a si. Nan zate parah siatcamnak a thleng, ziangahtile nan miphunpi in ka ta in fir ruangah a si. Biakinn ah nan ṭhenhra ṭhenkhat cu kimtein rak keng uhla rawl tampi a um ding. I hniksak hnik uh, vancung sangka pawl ka awng ding ih nan hrangah thilṭha a phunphun ka run burh ding. Nan lo rawl pawl cucik kharbawk in an siatsuah lo ding ih nan Sabit hri parah Sabit rah a bawr in a rah ding. Cuti cun miphun hmuahhmuah in malsawm dawng, mi lungawi ti ah an lo ti ding, ziangahtile nan ram cu ram ṭha le ram nuam a si ding,” ti ah a ti ( Malachi 3:6-12)

            Pathian biak cu kan thinlung ih sin a thawk ding ih cutin kan taksa le nunnak, cangvaihnak hmuahhmuah ah a lang ding a si- cu mi cun kan sumpai khal a tham tel.  Peknak pek ih sin kan nunnakah thil pathum thleng dingah kan siang:

1. Peknak thawi Pathian biaknak cun a humhimnak kan parah a thlen.

            Ziangruangah Pathian in sumpai thu hi a thupiter ? Asan cu duhhamnak le leitlun thilri duhnak pawl  hi zuk biaknak bang in buainak an si ṭheu ruangah a si. Pathian duhdawt hnakin mi tamsawn cun sumpai duhdawtnak kan nei tam sawn. Culeveten, Pathian rinsan ai ah kan  sumsaw kan rinsan. Pathian in damter sal in duh ih cumi damtersalnak dingih a hmanrua cu peknak pek hi a si. I Tim 6:10 cun, “Ziangah tile paisa duhtuk cu sualnak phunkip thoktu hram a si. Mihrek cun paisa neih an duhtuk ruangah kan zumnak an tlansan ih riahsiatnak in vawi tampi an thinlung a kuaiter.” ti ah in sim.  Paisa a sual ti ah Bible in in sim lo, asinan paisa duhtuk cu (the love of money) sual a si ti ah in sim. Sumpai kan duhtuk a si ah cun kan zumnak hrampipawl  le pehtlaihawknak  ṭha neih ding kha kan cawhcawrawi sual thei. Asinan peknak Pathian hnenih kan pek tikah, Pathian cu sumpai duhtuknak sung ih sin in humhim dingah siannak kan pe tinak a si. Sumpai duhtuknak sungih sin Pathian in a lo hmu lo a silen ziangtluk tam na neih khal len na lungawi thei dah lo ding, na daih aw thei dah lo ding.. leitlun no in khah ti ni a nei lo. Bawipa in in hmuhim hram seh.

2.   Peknak thawi Pathian biak cu Amah thawi hnaṭuantlang tinak a si.

            Pathian hnenih  thlawhsuah kan dawn mi kan pek tikah ziangkim neitu cu Amah a si ti kan langter ih hleiah kan nih cu a hnaṭuanpi kan si ti kan langter. Kan sumdawn theinak , neih mi bank account, sum zinpi/hrampi , miatmi le sum  kan ngah theinak pawl hmuahhmuah hi a hnen lawngih si ra mi an si. Anih cun za ah za (100%)  a nei cing in za ah pahra (10%) lawng a hnenih keng kir dingah in phut. Cucing cun, vawitampi cu pe lo in kan um ziangahtile pawipeng ṭul a um tikah hman ding kan nei lo pang ding ti kan phang. Kan ṭul can ih in cawmtu cu Bawipa a si ti kha kan hngilh. Cun hrekkhat cu sumpai hi kan hawl thei ruangah le kan mai zuamnak lawng ih ngah ah kan ruat aw. Sumpai hi zo ih ta ti le ziangruangah saw kei hi in thlawsuah ti kan raut cu ca lo. Cun mi hrekkhat cu kan neih mi sumpai hi Pathian in in san sung ti ka theithiam lo. Ṭhimnakah, rualpi thawi hnaṭuan tlang nan si len nan ngahmi cu a zatrep ih ṭhen awk a si ṭheu. Asinan, kan Pathian cu a fale zawn in ruattu a siruangah kan ngah mi ih 90% in pe ih 10% te lawng in phut. U le nau, ruat rero hman anih vek zohman an um lo. Ka ta nan fir ti ih in ti tikah ruat peh vivo hman uh zo saw mai hnaṭuanpi ih thil fir dah? Cuvek mi cu hnaṭuanpi ah zohman in an duh lo. Vawitampi Bawipa (kan hnaṭuanpi) ih ta kan fir cing ih in hnawng lo hi ziangtluk mi hualvanṭha kan si! Ziangtluk Pathian ṭha hna kan ṭuan pi! Rual le uh, Peknak kan pek tikah Pathian cu kan sumpai tlunih cangvai dingah kan sawm ih, kan ṭulsam mi amah in in pe ding ti rinnak hnget a parah kan ṭhum tinak a si. Peknak thawn Bawipa hna na ṭuanpi tam poh a silen ziangtluk zawn a lo ruattu a si ti, mi ih fawrh le fial ṭul lo in nangmah rori in na tep ding.

3.     Peknak thawi Pathian biak cun a thlawsuah malsawm in sûm.

             Malachi 3: 10-11 cun, “. Biakinn ah nan ṭhenhra ṭhenkhat cu kimtein rak keng uhla rawl tampi a um ding. I hniksak hnik uh, vancung sangka pawl ka awng ding ih nan hrangah thilṭha a phunphun ka run burh ding. Nan lo rawl pawl cucik kharbawk in an siatsuah lo ding ih nan Sabit hri parah Sabit rah a bawr in a rah ding.” ti ah in sim. Peknak pek hi rinnak ih hnaṭuan a si. Peknak thawi amah fiah ding ah Pathian in in singkhaw( zuam). Pathian ih tinchhia (match) cu kan tinchhia (tuatdan) thawn a bang aw lo. Kan pek tikah , kan ṭulsammipawl hmuahhmuah pek ding in tiam ih hleiah peksawng ding kan neih sin theinak dingah tamsin pek khal in tiam a si. Cumi ih tiduh san cu na lian ciamco ding ti ai a si lo nan na ṭulsam mi hmuahhmuah a lo pe ding ti ai a si. Anih cu danglam dah lo Pathian a si ruangah a thutiam mi pawl kan parah a famkirter ding ti kan zum hnget thei. Anih cu mizan, tusun le thaisun khalih a danglam lo Pathian a si. Hi pawl hi kan hrangih a thutiam kan kaihhnget ding mi an si. Peknakah Pathian cu neh ban rual a si lo.       

            Peknak tel lo in Pathian kan be thei lo. Peknak thawn Pathian kan biak tikah, Anih cu kan sumpai thuthawi pehpar aw in- in humhimtu dingah, kan hnaṭuanpi (partnership) si dingah le malsawmnak hmuifu a phunphun in burhtu dingah kan siang ti nak a si.  Khrih nun neitu le amah riantu kan sivekin, Pathian kan biaknak cun kan hmur le kâ lawng si lo in, a thlawsuah kan dawnmi sumsaw, tangka dip khal a cangvaih ter tengteng a ṭul a si. Curuangah, Pathian ta firnak/ruknak sual ih sin kan luat tlang pei uh. Thlawsuah na dawn mi kha dik tak le felten Bawipa pe aw la, ziangtluk malsawmnak  nasa  a lo pe bet ti kha thlir hman!

Pathian in lo thlawsuah hramseh!