Thutak theih hi lohtheihlo ih ṭûl mi a si. Asan cu thutak lole thudik ti ih na zummi in na pumpak nunnak, thubawhcahnak le na hmailam nundan tiang a lo hngawng a si. Atui kan san ah hin mi tampi in ziang vek kan zum khallen a pawi lo thinlung taktak thawi kan zum a si ah cun an ti. Asinan, thinlung taktak thawi zum khallen kan zum mi a diklo ah cun thinlung taktak thawi sual vuarvi le ṭhelh pumhlum a theih a si.
Paul cun Galatia zumtupawl hnenah ca a kuat asancu Pathian thutak ihsin pial ta hratin thutak lem ah an hersan ruangah a mangbang tuk ih anmahpawl hruaikirsal a duh. ( Gal. 1:6, 3:3, 4:9) Zangfahnak thuthangṭha cu sakhuanak betnak in siseh, vumzimtannak in siseh, thil ṭha tuahnak in siseh, rundam si theinak ding hrangih a ṭulmi tintian betnak in an siatter. Ngunngaih takih Galatians cabu hi zirnak kan nei asilen fehsualnak le zumnak diklo lakih fehpennak le kilvenawknak hrangah in bawm thei ding ahleice in thuthangṭha- rundamnak thu kan sim le phuan tikah hi cakuat hi theihfel a ṭûl cuang.
Paul in Galatia zumtu pawl hnenah hitin ca a kuat, “ Khrih zângfahnak hmang in a rak lo kotu hnen ihsin khati tluk rang ih thuthangṭha danglam ih nan rak thawnhlo mai cu ka mang a bang. Cumi cu thuthangṭha taktak a si lo. Nanmah lo buaiter ih, Khrih thuthangṭha lingletter duhtu mi hrekkhat an um sawn a si. Sihmansehla kanmah si seh, vacung ihsi a ra mi vancungmi khal siseh nan hnenih kan rak phuan zo mi kalh ih thuthangṭha dang nan hnenih an phuan a si le a phuangtu cu camsiat in um seh. Hi hlanih, kan rak lo sim zo vekin, atu ah ka lo simsal. Mi pakhatkhat in nan rak cohlan cia zo mi kalh ih thuthangṭha dang nan hnenih a phuan asile a phuangtu cu camsiat in um seh”. ( Gal 1: 6-9).
Thutak kan theih ding hi thupek a si. Thutak cu a tleng aw lo a hmun ringring. Paul ih simdan vekin kan sim asilen zohman in thutak an thleng thei lo, a dungthluntupawl siseh vancungmipawl khalin an thleng thei lo. Cun, mi zokhalin Pathian thutak- thuthangṭha kalhin thu a sim a si ah cun Paul thotho cun , “….camsiat in um seh” a ti. Cumi cun ziangtluk in thutak thu hi a thupi ti a langter! Thutak cu 100% a dik. Asinan, thutak lem a si mi cu 99% a dik. Thutak ihsin thutak lem thei thei ding cun, fimkhur le cipciar takin Baibal kan zingzawi le zir a ṭûl. Flannery O’Connor cun hitin a ti, “ Thutak cu painuam kan ti zawng in a thleng aw men lo.”
Thutak- thuthangṭha cu a hlanpi kumzapi pakhatnak hlan ihsin siatsuah rero a rak si zo ih tuni ah cun ziangtluk luar in siatsuah a si ding? Kan humhimawknak hi ziang a si ? Baibal ah kan kirsal a ṭul. Pual cun thutak a si mi thuthangṭha thu cu I Korin 15: 1-4 ah hitin a ngan, “ Cuitlunah, u le nau tla, keimah Paul in nan hnenih ka rak phuan zo mi, nan rak cohlan zo mi le nan dinnak khal a si mi thuthangṭha cu nan hnenih phuansal ka duh. Nan hnenih ka rak phuan mi thu kha nan cing ringring ih nan zumnak kha ṭhathnemnak nei lo a si lo ah cun cui thuthangṭha in rundam nan si. Ziangahtile, a hmaisabikah keimah khalih ka rak cohlan ve mi cu nan hnenah ka rak lo pesawngsin. Cumi cu hitin a si, Cathianghlim ih a sim vekin Khrih cu kan sualnak pawl hrangah a thi . An phum ih, Cathianghlim ih a sim vekin a ni thumnakah a thosal.” Thutak a si mi thuthangṭha cu- Zisu Khrih cu leiah a rawng piang, kan sualnak ruangah a thi ih, thihnak neh in nithum nakah a thosal. Rinnak lole zumnak thawn cui thu cu kan zum ih kan cohlan tikah rundamnak kan co. Ka mah ih kan zuamnak, felnak le sakhuanak ruangah a si lo Amai zangfahnak ruangah sawn a si. Galatia 2:16 khalin hitin in sim, “ Minung cu Dan thlunnak ruang in thiam a co lo ih, Jesu Khrih zumnak ruang sawnin a si ti thei in, Dan thlunnak sungin si lo in Khrih zumnak ruangin thiam kan co theinak dingah kan nih khalin Jesu Khrih cu kan rak zum a si.”
Kan thei thiam ban lo in kan zum lo tla a va si hmanah Pathian thutak cu a thleng aw dah lo. Asinan, cui Pathian thutak sawn cu kan zum le kan thlun leveten kan mah milai nun sawn in thleng ṭheu a si. Galatia 1:10 ih in sim bang in thutak cun Paul ih nunnak a thleng a si, “ Ziangahtilen, atu ah minung ih pawm ding maw, Pathian –ih pawmding saw ka hawl? Asilole minung lungawiter maw ka tum? Ziangahtile, minung ka lungawiter men a si ah cun kei cu Khrih-ih ṭemṭawn sal ka si lo ding.” Ṭemṭawn sal ti ih sullam cu siahhlawh pumpe aw rel duhnak a si- Sal pakhatkhat suak ding lole sal dinhmun ihsi zalennak pek a si mi a pu rian ding ih sal dinhmun ih um hril le thlang sawntu, Pual in Khrih rian a hril vek hi a si. Cumi cu thangthangṭha ih huham le thiltitheinak a si.
Thutak theih hi a thupi tuk lawm mam ziangahtilen thutak cun nan nundan ding lamzin a lo kawhhmuh ding. Kan nunnak ih kan zawhmi zin a diklo a si ah cun kan tumnak hmun dik kan thleng thei dah lo ding. Tumruhnak men in kan thlentumnak lolen kan tawpnak in thlenpi lo, kan zawhmi lamzin a dik a ṭûl. Kan tumtahnak hmun thleng ding cun thutak thawi milaw in kan fehnak kan thleng a ṭul ziangahtilen cumi lawng cun kan thlennak ding lole kan tawpnak in khihhmuh thei a si.
Cumi tuah ding cun, Pathian thu zir aw la thlun aw. Thutak ah cun hnget zetin bet aw la, cule tutak in zalennak a lo pe ding. Asilen, cui thutak cu na thei maw? Na nitin nunnakah na nunpi maw? Kan ram zumtu a ti aw mi pawl hin thutak kan theih lawng a tawk lo, kan theimi thutak kan nunpi a cu a si.
No comments:
Post a Comment