PUMPE AW DUHDAWTNAK

Crucified picture

          Jesu in khat le khat duhdaw aw dingah in fial. Kanmah in duhdawt vekin kan nih khal midang va duhdawt dingah thupek in pe. John 15:13 cun duhdawtnak langsuahnak sangbik in zirh, “ Mi pakhat in a rualpipawl hrangah a nunnak a liam, cu mi hnakin ropisawn duhdawtnak zohman in a nei lo” ti ah in sim. Pumpe ih duhdawtnak tlukih duhdawtnak sangsawn dang a um thei lo. Cui, pumpe duhdawtnak kan ruah le mitthlam tikah lungsungah hmakhat te ih a rawnglang theu mi cu nui duhdawtnak a si theu.

         Mary, Jesui nu khan hivek duhdawtnak cu a langfiangter bik in a zum um. Monu ding ih hualcia a si cing khan a mai hmingsiat le mualpho khal pawisalo in Pathian thu a awih in Pathian hnenah pumhlum in a hlanaw aw. Cuti a tileveten, Pathian fapa hringtu Nu ah a cang. Nau a pai laiah, Nazareth ihsin Bethlehem khua ah tla a tlawng. A nauhrin a cut zik tiangah peng za tampi ke in a feh ih Laak thaw khal in khual a tlawng. Jesu’i hrangah amah in nuam a ti zawng le a duhnak pawl hmuahhmuah a fehsan ngam a si. Cumi cu si pumpe aw duhdawtnak kan ti theu mi cu. “ Na hrangah nuam ka tizawng le ka duhzawng khal ka caan in ka tlansan ding” ti mi nun hi a si.

           A duhdawt zetmi a fapa an khenbet lai khalah khan Mary cu thinglamtah hram ah a um. John in hitin a ngankhum, “ Cule Jesu- ih khraws kiangah a nu, a nu-ih naunu, Kleopas nup Mary le Mary Magdali tla an ding” ( John 19:25) A dungthluntupawl an relh thluh le, tih, khur ih an umlai can khalah khan Mary cu a fapa ih kiangah a ding. Jesu a duhdawt tuk ruangah cui a tuarnak hmun khalah a pan. Thihnak hmun, thlan thim tiang khalah, a mai nawmnak le duhnak tlansan in Jesu’i kiangah a va umpi. Pumpe aw duhdawtnak ti mi hi thil harsa zet a si ih cuhnakih harsa sin mi cu catlo ih pumpe aw duhdawtnak neih le hman ti mi hi a si. Cumi cu a si mai tanghma siallo duhdawtnak kan ti mi cu: “ Nuam le tha ka ti zawng ka cawlhsan kei, nangmai nuam le tha na tizawng kha pehzawm in ka tuah vivo ding.”ti ai a si.

            Mary in mai tanghmasiallo duhdawtnak in hmuh. Asinan, Mary ih tuahmi cu Jesui duhdawtnak thawi kan hrangih a pumpekawknak thawi thim cun rel tlak a si lo la la. Jesu in duhdawtnak famkim in hmun ahleicein midang duhdawt ding kan ti thu thawi a peh par aw mi ah.... “ Ka lo duhdawt vekin pakhat le pakhat duhdaw aw uh” ( John 15:12b)tin in sim. Baibal in Jesu ih in duhdawt vekin midang va duhdawt ve ding ah in zirh. Pathian ih duhdawtnak nun ih teptu lole tepzotu kan si lo ah cun Amai in duhdawt vekih midang va duhdawt ding cu thil har lawng hman silo in thil cang thei lo lawlaw a si. Tanghmasialo duhdawtnak lansuah ter thei ding cun , a hmaisabikah Pathian ih duhdawtnak kha kan mah rori in kan teh hmaisak a tul a si. I John 4:19 ih in sim bangin, “ Amah in in duhdawt hmaisak ruangah kan nih khalin kan duhdaw ve” ti a si kha.

          Mary ih nun ah kirsal sela, Luke in Pathian ih kawhnak a saan dan fiangten a ngankhum, “ Cule Mary in, “ Ngaihnik, kei cu Bawipai salnu ka si. Na sim mi vekin ka hnenah thleng ko seh,” ti ah a ti”’ ( Luke 1:38). Pumhlum ih hlanawknak thinlung a nei. Pathian in tuahter a duhmi tuahduhnak thinlung a nei. Kan zate hrangah, Pathian ih duhdawtnak tep ding cun, mary ih thinlung vek – pumhlum ih hlan aw mi kan neih ve a tul. Pathian in tuah dingih in fialmi tinkim tuah dingah kan lungkim le kan man a tul. Asi, Pathian hnenah kan nunnak pumhlum ih kan hlan tikah, mi dang khal mai tanghmasial riai lo ih duhdawt theinak nei dingah in cakter a si. Midang hrangah kan mah ih nuam tizawng le duhdan tlansan ih bawm men lawng hman siloin cui nun cu pehzawm in hmang suak vivo thei dingah in cakter a si.

           Mi pakhat khat pumhlum ih Khrih hnenih a pe aw tu cun mai tanghma siar riai lo in midang duhdawt theinak a nei. Pathian in kanmah ah ti theinak huham in in thuam theu. Khristian nun ti ih kan ti rero mi hi pumhlum ih hlanawknak thawn khaikhawm a si theu ih asinan cui nun cu Khrih hnenih pumhlum ih kan hlanawk hnu lawngah a cangsuak thei mi a si. Ziangahtilen, Amah Khrih lawng hi si- Amai in duhdawt vekih midang duhdawt thei dingih in bawm thei tu cu! Mary bangin, Pathian hnenah kan nun pumhlum kan hlanawk sian leveten mangbangza a kutcak le thiltitheinak kan hmu theu a si.

           Asilen, siartu unau, cui kan sim rero mi Pathian ih duhdawtnak kan ti rero mi cu zumnak thawn Khrih cohlang in le Amah ah nun pumhlum hlanaw in na tep ngah zo maw? Nangmai pumpak nunnak, na innsang, na khawhhran le khawthlang nun thlengdanglam dingah , Jesu in nangmah a lo duhdawt vekin midang duhdawt ve dingah na tiar aw maw? Pumpe aw mi duhdawtnak thawn Pathian in lo hmangsuak hram seh!