RINNAK IH THUTAK PAWL

Harsatnak le mangbangnak, nitin ih na tawn ṭheu mipawl ruangah, na nunnak in na sunmang a that tivek in na ruat sual dah maw?  Asilolen, na nun sung hla cu riahsiatza hlathu thawn a tawp ding a si hi ti teh in na ruat dah maw ? Maw cuti ding hrimhrim ih sermi le mi vansia kei cu ka si ti’n ruahsanak nei lo in na cau?

          Christian zumtu nang le kei hrangah cun , hi a tlun ih thusuhnak pawl lan thil tampi a um lai. Winston Churchil cun , “ A taktak  asi mipawl cu sunmangpawl hnakin an ṭha sawn” ti ah a ti. Na duhthusam pawl cu lang suak lo ih an um a ṭul lo. Si ko, a ngaingai ah an ra cangsuak thei in  cangsuak lo thei fawn, amah lawngte cu mi na sunmang le thuruah mipawl cun na nunnak  a diklo zawngah a lo hruai peeng ding a si hrimhrim lo.

          Malachi cabu pumpi cun na lei khual tlawnnak zalamtln  ih thil ṭul hmaisa mi  thutakpawl le cui na khualtlawnnakah cun  lamzin dik ih na feh vivo theinak dingah,  na zanmang a siat can le zanih Pawpi sahrang rual in na mang bawtsiat ding ih an lo thlurh ciamco can khalih rinnak ih thutakpawl pawkhngek in na pahthlang thei nak ding ruahsaknak a lo sum a si.

          Na sunmang pawl kaihhnget vivo dan lamzin pakhat a si mi cu Pathian biaknak fehtlang in a si. Kan Pathian biaknak cun amah kan duhdawtnak, a hnenih peknak kan pek, amah kan thlun, a rian kan ṭuan le amah kan upat ṭihzatnak tlunah hna a ṭuan ṭhabik. Ṭawng dangin kan ret asilen, Pathian cun kan duhdawtnak, biaknak, peknak, rianṭuannak le upat ṭihzahnak  zate’n  co a phu hrimhrim a si. Cumipawl cu rinnak ih thutakpawl an si.

Amah Kan Duhdawt Tikah Pathian Kan Biaknak In Hmuar A Nei Bik

          Pathian in a lo duhdawt tuk ruangah nangmah thawi um tlang a duh. Jeremiah 31:3 ah cun Bawipa in,  “ Lam hlapi ihsin an hnenah ka lang. Maw Israel mipawl, ka duhdawt ciami nan si ih nan parah duhdawtnak cu cat loin ka nei ding” ti ah a ti.  Hi thu Bawipa in a simnak san cu a mipawl hnenih sin an sawnnak theih a duh ruangah asi. Cui a duhmi sawnnak cu amah duhdawt kirsal hi a si. Pathian nunnak taktak thawi a betupawl cun amah an duhdawt. Bible Ca Thianghlim in sim bangin, “ Pathian kan duhdawt cu amah ih in duhdawt hmaisat ruangah a si” (I John 4:19) ti ah a ti.  Pathian in a lo duhdawtzia na theih thuk poh asilen nangkhal in amah na duhdawt kirsalnak a thuk sinsin ding. Bawipa cun kan nun pumhlum ih kan duhdawt hi a phu hrimhrim  na ti ve lo maw?

A Dung Kan Thlun Tikah Pathian Kan Biaknak In Hmuar A Nei Bik

          Luke 9:23 ah cun Bawi Jesu’n, “ Zokhal sisehla I thlun duh ahcun mah zawnruahnak kha tlansan sehla nitinte a thinglamtah phur in I thlun seh” ti ah a ti. Nang cu thenfai ciami na si zo ruangah , na nunnak ih sin Khrih ih duhnak lang suak seh. A mai lamzin cu lamzin ṭhabik le dikbik a si. Pathian nunnak taktak ih a betupawl cun Khrih ih keneh an thlun. Curangah, John 10:27 ah cun Jesu’n , “ Ka tû pawl cun ka aw an ngai; keimah in ka thei hai ih annnih in in thlun” ti ah a ti. Pathian cun kan nunnak pumhlum thawi cat bang lo ih amah kan thlunnak nun co ding hi a phum hrimhrim na ti ve lo maw?.

Peknak Kan Pek Tikah Pathian Kan Biaknak In Hmuar A Nei Bik

          Pathian biak daan dik cun a mah duhdawt, a dungthlun le a hnenih ih si thlawsuah kan dawnmi pawl siangzet  le lungawi thatho tei pek kirsal pawl a huap. Malachi 3:10-12 ah cun Bawipa in, “  Biakinn ah nan thenhra thenkhat cu kimtein rak keng uhla rawl tampi a um ding. I hniksak hnik uh, vancung sangka pawl ka awng ding ih nan hrangah thiltha a phunphun ka run burh ding. Nan lo rawl pawl Cucik kharboawk in an siatsuah lo ding ih nan Sabit hri parah Sabit rah a bawr in a rah ding. Cuti cun miphun hmuahhmuah in malsawm dawng, mi lungawi tiah an loti ding, ziangahtile nan ram cu ram tha le ram nuam a si ding,” ti ah a ti.  Jesu’n peknak thu thawi pehparaw in thil pahnih hitin a sim. A pakhatnak cu “ Ngah lam hnakin pek lamah lungawinak a tam sawn” (Tirhthlah 20:35) . A pahnihnak cu “ Pe uh la cule pekin nan um ve ding” (Luke 6:38). Pathian nunnak taktak thawi a betupawl cun thlawsuah an comipawl kha lungput dik le siangzet in Bawipa an pe kirsal theu.  II Korin 9:6-7 ah cun, “ Thlaici malte a vawrhtu in rawl malte a khawm ding; tampi a vawrhtu in tampi a khawm ve ding, thi ciing ringring uh. Zozo khal a thinlung a thencat ngah hnuah pe she; sir awknak thawn pe hlah she; ka tunavo a si, ti khalin pe hlah seh. Lungawi aipuangte ih a petu lawng Pathian in a duh a si” ti ah a si. Bawipa cu lungawi aipuangte ih kan peknak co thlak a si hrimhrim.

A Rian Kan Ṭuan Tikah Pathian Kan Biaknak In Hmuar A Nei Bik.

          Malachi 3:17-18 cun Bawipa a ṭihzahtu -mifel pawl le a ṭihzahlotu -miṭhalopawl  ih thuhla a thlei dang.  Pathian nun taktak ih a betupawl cun amah an rian.  Kan Bawipa Jesu amah rori hman rian ih um dingah si loin mi riantu dingah leitlunah a ra ( Mark 10:45).  Curuangah, Bawipa cun kan nun pumhlum thawi amah  kan rian hi a phu hrimhrim. Sual ngaidamnak le Pathian thawi remawknak na co theinak dingih na aiih Jesu’i tuarnak, thihnak le thawhsalnak fiang thei na theihngah ah cun , cui na theihfiang mi thutak cun nangmai hrang le hlawknak hrang lawng ih nun na tum ringring nak a tawp ter ding ih na ai ih thihnak neh ih a thosal tu Krih rian dingah na nun a lo cak ter ding. Cui na hrangih duhdawtnak thawi a nun liam tu cu na nunnak in a thei fiang zo maw? Joshua cun a hruaimi Israel fale pawl hnenah hi thu hmang hin a zuam, “ BAWIPA  nan ren duh lo a si ah cun tuihsun ah hin hril uh; Mesopotamia ram nan pupa pawlih an rak biakmi khawzing pawl maw nan biak sawn ding; a si lole atuih nan umnak ram Amor miphun pawlih khawzing pawl deuh so nan biak ding, hril uh. Kei le ka innsang cun BAWIPA kan biak ding a si,”  ti ah a ti.

Amah Kan Ṭihzah Tikah Pathian Kan Biaknak In Hmuar A Nei Bik

          Mi zokhal Bawipa  ṭihzahnak le upatnak a nei tu in an nunnakah Pathian ih damternak kutcat famkim an tep ṭheu. Cuihleiah, nitin an nunnakah  luatnak, lungawinak le nehnak an tep.  Malachi 4: 2 cun Bawipa in, “ Sikhalsehla ka thu a ngaitu nannih pawl hrangah cun ka mi runnak huham nan parah ni bangin a thlang ding ih ni tleunak in harhdamnak a pek vek in nan parah damnak a thlengter ding. Luatzet le lungawizet in nan um ding” ti ah a ti. Bawipa nunnak taktak thawi a betu cun amah cu an ṭihzah in an upat ziangahtile Bawipa cun upat ṭihzahnak thawi amah kan rian hi a phu hrimhrim ti an thei fiang.

          Tui ni ah unau,  hminthan duhnak le mithmai ṭha ngah duhnak in na nun a lo buai ter maw?  Bawipa’i duhnak tuah hnakin mi ih lawm le pawrh duhnak lungthin thawn hna kan ṭuan pang maw?  Bawipa’i hmai ih din hnakin mi nung hmaiih din kan ṭih sawn pang maw ?  Atu fang hi kan hngal hngawnnak a um asilen tlansan in lungsir kekkuai thawn Bawipa’i hnenih kan kir can ṭhabik a si. Cu mi cu Pathian ṭihzah kan ti mi khal cu a si.  A tlun ih kan tarlan mipawl cîng ringring in Bawipa kan Pathian cu duhdawtnak, peknak, thlunnak, riannak le ṭihzah upatnak thawn kan be tlang kei cio pei uh ziangahtilen anih cu kan zawn in ruattu BAWIPA a si. Zumtu diktak le  nunnak taktak thawi Bawipa a betupawl cun hi a tlun ih tapawl hi an nunnakah nitin an hmangsuak ih cutin cahnak isin cah sinsin nakah an ṭhanglian vivo .

Pathian in lo thlawsuah hram seh!