Thlun Hlun ah cun puithiampawl cu Pathian le minung karlak ih palai hna ṭuantu an si. Mi pakhat khat in puithiam hnen fehta lo in Pathian an be thei lo. Thlung Thar ah cun , Khrih dung pumpe aw ih a thluntupawl hmuahhmuah cu puithiam ti ih ruah kan si. Kros parih Jesu’i thihnak le thawsalnak cun pumpakih Pathian naih theinak in pe. Thuphuan 1: 5-6 , “ Cun, theihpitu rinum a si mi, mithi lakih suak hmaisabik, leitlun siangpahrangpawl uktu a si mi Jesu Khrih hnen ihsin zangfahnak le hnangamdaihnak nan hnenah um hram seh. Anih cu in duhdawttu le amai thisen roriih kan sualnakpawl in khawlhfaisaktu a si. Cun, anih cu Pathian le a Pa hnen lamih siangpahrang le puithiam ih in tuahtu a si. A hnenah thangṭhatnak le thiltitheinak cu kumkhaw tlaitluan in um hram seh. Amen.”
Nang le kei cu kawhmi puithiam, midangpawl Pathian hnenih hruaitu ding kan si. I Peter 2:9 cun, “ Sikhalsehla, thim sung ihsin amai thleu mak zet sungih a lo kotui tlinzia cu nan phuansuah theinak dingah nannih cu hril mi miphun, siangparhang hrin puithiam, miphun thianghlim le amai mihleice nan si” ti ah in sim. Malakhi cabu an ngan rero laiah hin, puithiampawl hin Pathian thu hi an thlun lo. Nan, tui ni ah kan hrangah cun, Pathian thu parah kan rinum a ṭul a si ziangahtile Pathian kan biaknak ih pakhat a si. Ṭhate’i a zirhnak kan ngai ih, kan phuansuah le kan zirh sawng tikah a thu parah kan rinum ti nak a si.
Pathian thu cu uluk zetih ngaithlakaw. Ziang tin Pathian thu hi kan zoh/ruat ? Vawitampi cu fimnak in zirh duhmi kan thlahlam in na thei maw?. Ngunngaih zetin Pathian thu hi kan ngaithlak le kan nunnak sungih kan lak a ṭul a si. Vawitampi cu, kan buaiaw ter thei tuk ih Bawipa’i in sim tum mi thei ding in daitei cawlh le a aw nem ngaithla ih can lawng pek hi kan thlauthla pang ṭheu. Curuangah, hurhuk ih Bawipa’i in biaknak aw nemte pawl kan theithiam lo. Can hnih khatah cuvekin hurhuk aw nemte in in biak ṭheu ruangah, a aw theithiam dingah amah naihte ih kan um ringring a ṭul a si.
Phun tampi in Pathian in in be ṭheu. Cumi lakih pakhat cu a thu-Bible hmang in a si. Bible nitin ten kan siar a si ah cun kan nunah Bawipai in biaknak aw thar kan thei ding. Cun, Pathian mi rualpi le midangpawl hmang khalin Bawipa in in be ṭheu. Hi mi hi dungtluntu pawl (discipleship group ) ih tumtah mi khal a si. Kan nunnak ih harsatnak le buainak kan tawn mipawl hmang khalin Bawipa in in bia. Anetabikah, Thlarau Thianghlim, in hruaitu le thutluknak kan tuah can ih daihnak in pe tu feh tlang in in be ṭheu.
Vawi tampi cu , theihnak hi kan buainak a si lo, kan theihmi thu thinlung sungih lakluh le a takih thlun sawn hi a si kan buainak ṭheu cu. A cancanah cun , Bawipa’n in bia ti kan thei ko, asinan in biaknak, tuah dingih in fialmi le tuahlo ding in ih in sim mi kan duh lo (Jonah bangin). Curuangah, kan mit kan sing ih kan mai duhnak lamah ṭan kan khawh hrim thotho. Cuvek canah in duhdawt tuk ruangah, a duhdawtnak-aurinak ( love megaphone) hmang ta hratin tuarnak le harsatnak hmangin a lamah in hnukkir sal ṭheu a si. Cuvek can lawngah mi tampi cun kan ruahnak zate thawn Bawipai thu kan ngai thei.
Pathian in amah naihte ih um dingah le a thu ngaithla dingah in duh ziangruangah tilen malsawm thlawsuahnak thawi in vur a duh. Isaiah 55:2-3 cun, “ … I ngaithla uhla ka sim mi vekin tuah uh; Rawl lakih aṭhabik mi nan ei dingih nan nun a nuam ding. Ka minungpawl , I ngai uhla ka hnenah ra uh; ka hnenah ra uhla nunnak nan ngah ding….” ti ah in sim. Kan nunnak in hruaitu dingah zopawl lole ziangpawl si ruahnak si kan ngaithlak ṭheu? Thlawsuahnak nun thawi nitin leng ding cun Bawipai ṭawngkam suak ngunngaih zetin kan ngaithlak a ṭul.
Pathian thu phuangaw. Siangpahrang hrin puithiam, a cahnak huham phuangtu dingih kawh kan si vekin, a thu nung hi tui ni ah kan phuansuah dingzat phuangsuak thei aw in na thei aw maw? Duhdawtnak thawn hi thutak (Bible) hi kan ausuah pi thei maw? Efesa 4:15-16 cun, “ …duhdawtnak in thutak cu sim in, lu a si mi Khrih ah ziangtinkimah kan ṭhanglian thei ding. Amah Khrih hnen ihsin taksaruangpi zaten hmunkhat ah rem zetih pehzawmawin an kaikhawm aw. Taksa peng kipin anmai hna fingfing ṭha zetin an ṭuan ih, cutin hlikhlawk kipin taksaruangpi cu hmunkhat ah a kai khawm ṭheh. Curuangah taksa ruangpi cu duhdawtnak ah amah ten a ṭhang ih, a tuah ṭha aw.” ti ah in sim.
A cancanah cun, duhdawtnak tel lo in thutak kan phuang ṭheu na ti lo maw? Curuangah, mipi in in naih ngam lo in in ṭih. Cuvek thuthawi pehpar aw in, heh le heh tin thlacamnak thawi in rundamtu Jesui hnenah thutak duhdawtnak thawi phuangsuak thei dingah kan dil a ṭul. Cutin, mipi pawl cu hmatawn ih kan ruahawk tikah an nun Bawipa le a thu ah kan tungding thei ding a si. Cun, khatlam ve thungah, a cancanah cun kan nem leh lituk, lolen duhdawtnak kan ngah leh lituk ih, thutak ih in zirhtum mi sim ngah lo in kan kan sual ṭheu. Mipi hmaitawn ih an palhnak sim kan hrial, ṭawngkam hak hman ding cu mah le mah that aw ding vekah kan ruat. Kan ṭawng mi in mipi pawl a khamin a dawidarh thluh tla kan phang. Asinan, cuvek a si khalah thutak cu duhdawtnak thawn a si dan vek cekci in kan sim a ṭul. A si, duhdawtnak thawn thutak cu kan phuang ding. Hi mi hi Jesui tuah dan a si. Hi mi hi cing ringring uh si, kan ṭawngkam in midang hrangah nunnak lolen thihnak a thlen thei a si.
Pathian thu zirhaw- Malakhi 2: 8 cun, “ Sikhalsehla atu-ah cun nanmah puithiampawl riangri lamzin dik ihsin nan pial zo. Nan thuzirhnak ruangah mi tampi in thil sual an tuah. Nanmah thawn ka tuahmi thukamnak cu nanmah in nan bal zo” ti ah a ti. Pathian in bulpak cio kan nunnak hi a hnenih mihlo hruainak ah thasuah cio dingah in duh. Thusuhnak a um thei mi cu: Tui ni ah ziangtin mipi pawl hnenah rawng kan bawl? Bawipa’i hmai ih tuah vekin kan ṭuanvo a thabik in kan tuah cio maw?
Tui lai zarhpi ni Christian pawl cun an nunnakah nehnak nun an hmang suak thei lo. Thinnaunak, ṭihnak, tuahmawhawk phannak le zetnak thlarau sia phuahhlamin an mah le nuam tinak hmun, insung ah le khan fate ah an tawm bet. Asinan, Pathian in cuvek men ih nung dingah in sersiam lo. Kan mai hrang lawngah siloin, amai hrangah le midang hrang sawnah nung suak dingah in duh. Nehnak nun thawi nitin kekar ding khalah in duh sak. A si, nehnak nun thawi ke karih, mi dang hrialih mahte um ti siloin midangpawl kha tungding le Khrih hnenih hruai dingah ṭuanvo sangbik in pe a si..
Ngunngaih zetih a thu ngaithlak, phuansuah le zirhnak in Pathian lamzinpawl kan tlun a si ah cun, bulpak kan nunnak cio ih Pathian thukam “…keimah thawn tla kan remaw zet; anmah in a dikmi an tuah lawng si loin midang in thitha lo an tuahmi an tuah nawn lonak dingah mi tampi an zirh ih an bawm a si.” (Malakhi 2:5-6) ti mi kan co ding.
Thil pakhat khat ziangmi si Pathian na riannak ding ih na tuah thei mi le midang hrangah zohṭhim ding ih na hmuh (model) thei mi a um? Zuamnak (challenge) cu cohlang aw la , rinnak in ke karsuak aw. Pathian in a lo umpi ding ih a tiamkam mi nunnak le remawknak cu na tep ngah tengteng ding a si.
Pathian in lo thlawsuah hram seh!
No comments:
Post a Comment