Hngakhlap zetih ka rak thlirmi ATS International Students’ retreat cu a ni kan thleng. Cutin, zing nahzi 6:00 ah Takaytay hmun ih Tlangkang, Dil mawi le Dil tiso zoh dingah rualpi pawl thaw kan pawk. Cun kan lakih innsang nei khalin an nupi fanau le an rak hruai ve. Cutin, innsang nei Korea ih isin David tei sung le Canada ih sin Tom tei sung an rat ve ih Mawtaw pathum khatin kan trip aw aw.
Dil mawi lawngleng thawn kan kai hnu ah, Tlangkang le Dil tiso zoh ding cun kan pawk. Kan fehnak ding hmun hi tlangpar a si ruangah ni aling in hmun a so zet. A pa a nu ti um lo in mitampi cun Rang an to. Nan, kan nih kha mi tamnawn kan si ruangah a bur ih feh in cutin ke in kan lawn so. Kan lakah Tom ih fapa kum 6 pate hi a tel ve. Cu pate cun kei khal ke rori in tlangparah ka lawn ve ding a ti. Nan, amah zohin a nauhak tuk hleiah, tawl ṭenṭi te taksa nei lo a si ruangah hi nauhak pate hi a ti ve menmen si ding, a tlin awm lo tuk aw ti ah ka thinlung te in ka ruat.
Kan pawh suah rualin a bag fate phur in Jedi khal cun in thlun ve. Takaytay cu Philippines ih Tlangkang le Dil tiso umnak hmun a si ruangah hmun larzet mi a si ih, retreat ih a zoh tu hi nitin an kalh aw ve nohnoh. Cutin a suk lam le so lam cat lak lo in lamzin ah cun kan pial aw. Ni a ling tuk ruangah farlawng 3 ding hrawng kan feh hi cun kei tla cu ka hekhek rero zo. Jedi khal cu ka zoh ih a cauve zet zo. Culakah Rang neitu pawl in le lawngten an tangka duh ah mi an thlun ih kan lo phur thlang kem ti in a tu le tu Jedi cu an sut. Nan, Jedi cun, No (Aih), No (Aih) ti lawng in a sawn.
Pengkhat hrawng a hlatnak ka feh hnu cun a so deuhdeuh, ziangah tilen kan thlen naih thlang ruangah si. Cu cun, Jedi khal cu a cau ngah riai. A ke in lei a sit phahphah ih a cau ti hi theih theih fahran a si thlang. Lukhum fate cu a kut in a kai ih cui so niling lakah cun nuam naiteten a ke a kar chet co. Naih nawn in ka hawn zoh ih, a thlan in a taksa pum hi a bual thluh. A kum khukhri hrawng nauhak pawl ve thlung asilen cu Rang parah to in khat tawkah mi an hawn lan ṭheu. Tu le tu Rang nei tu in na bang tuk ding, to thlang men aw an ti! Nan, Jedi cun ka duh lo (no), ka feh thei lai a ti. A nule pa in an hawn dawi man, na to thlang lo ding maw an ti? Nan, Jedi cun No (Aih), ka feh thei lai a ti thotho. A nu le pa khal cun an zangfahzet nan, an fapa te ih zuamnak cu an upat ih hramhram in Rang an to ter lo . Cutin, nuam naite te in ni ling lak le tlangkang mei khu veuh vo, ni sa ling mangkawh lakah cun kan feh so ih anetnakah Tlangpar thli nawmnak le kan tum hmun kan thleng ta riai. Jedi cu ka hei zoh ih, a mithmai pan te thawn cui thlang pawng parah cun lungawi in a hni rero. Ka tum hmun ka tlengthei ti si awm takin thawveng zetin a um.
Jedi ih tumruhnak ka hmuh tikah tampi thazang ka ngah ih ka nun khal i cakter fawn. Vawi tampi cu Pathian hna kan ṭuannakah siseh, thil pakhat khat kan zirnakah siseh , a rangthei lam, a tawizawng lo le a hahdam zawngih kan tumhmun thlen tum hi a awlte. Mi hrekkhat cuvekih kan feh tikah hlawhtlinnak ih manhlatnak kan tep ngah ṭheu lo. Cuihleiah, mi tampi cu a hram kan thawk ṭha zet, nan harsat kan tawn can ah siseh, lamzin awlsam sawn a um can ah siseh, thil dangdang hnaihnawktupawl ih ruangah kan zirnak, rawngbawlnak lole tumtahmi kan cawlhsan ih kan buzuih sal ṭheu. Jedi nauhak pate in ka tumnak hmun ka thlen lai hlanlo cu ka feh ding ti ih tumruhnak thawn, beidawng mei lo ih a feh ngerngo ruangah a tumnak hlawhtling tei a thlen vekin kan nih khal ziangvek harsatnak kan hmaiah a thlen hmanah, ka tum maw ruh saruh tin Pathian cahnak rinsan thawn kan feh vivo a si ah cun ni ni khatkhat ah kan tumnak hmun kan thleng thei ve ding a si.. Nauhak pate Jedi hnenih si khalin zir ding lesson hi a rak um thotho a si hi teh!
Siar tu hrangah thlawsuah si hram seh!
No comments:
Post a Comment