Mi hrekkhat cun Pathian biak ti mi hi zarhpi ni ih Biak Inn ih khawm le thangṭhatnak hla sak hi a si tin a ruat men. Malachi cabu sung ih sin kan zir rero vekin, Pathian biakdan dik cu cu aiin nasa ngaingai in a thuk. Pathian, asinak le kan tlunih a thil maksak tuahmipawl thei ih kan mah le tithei tawk ih ṭhabik ih kan sawn/lehrulh kirsalnak a si. Kan tithei tawk ih ṭhabik a hnenih pek- tuantei biakinn ah a mah be ding ih rathlen, kan sungkua duhdawt tei fingkhawi, thlawsuah kan dawn mipawl le ṭhenhra ih ṭhenkhat a hnenih hman tei pek. Cuihleiah, Pathian biak ti mi cu Amah rianṭuan (serving) hi a si.
Malachi 3:13-18 in minung phunhnihpawl ih thu in sim: Mi ṭhalopawl, Pathian a ṭihzahlotu le a rianṭuan lo tu pawl; Mi fel, Pathian a ṭihzahtu le a rianṭuan tu pawl. Mi ṭhalopawl cun Pathian rianṭuan cu a lak men a si, hlawknak a um lo an ti. “ Nan simsuak rorimi cu ‘ Pathian kan rian rero hi a lak a si. A simmi vek ih tuah hi ziangso a ṭhathnem? Kan tuah sualmi kan sir aw ih kan riahsiatnak Ziangkimtheitu Bawipa’i hnenah langter tum rero hi ziangso sawtnak a um? Kan hmuh cio vekin mi puarthau lehlam thlawsuahnak an ngah ko a si! Mi ṭha lo pawl mi neinung zetzet ah an cang ih tlunah thilsual tuah tahrat in Pathian thinsaunak an hniksak ih cawhkuannak zianghman tawng lo in an luat ko a sisi!’ nan ti,” tiah a ti( vv 14-15). An ṭawngkam ih ruangah Pathian ih thinlung a na tuk lawm mam!
Hi mipipawl hin ziang tin cuvek Pathian dokalhnak ṭawngkam tla an phutsuak ngam ti ih kan mawhthluk hlanah, hipawl hi kan suhawk hmaisat a ṭul ding men ding: Ziangruangah cuvek thil an ṭawngsuak ngam a si ding? Cuvek mi hrimhrim maw an si ding? A pakhatnakah , an khawhmuhnak mit a dik lo/ a ṭha lo. Sam cangan tu cun, “ Ziangahtile mi hngal pawl khi ka iksîk ih, Miṭha lo pawl milian ih an can khi ka hmu thei lo” (Sam 73:3) ti ah a ti. A feh vivo ih cutin Sam cangantu thotho cun hi Malachi sanlai minungpawl vekin thunetnak hi tin a tuah- “ Thianghlim zetin ka um ih ka kut khal sualnak tuah loih an um hi a lak maw a si ṭheh ding?” ( Sam 73:13). Asinan, cu tawkah tawp lanta lo in le a kiangkap zoh kual rero nawn lo in Bawipa zoh cu anetnakah a hril sal. Cutin Pathian Biakinn sungah a feh tikah, ziangvek thil cubang miṭha lopawl parah cun a thleng leh ding ti kha a theithiam, “ Lamzin naalnak ah annih cu na ret ih, siatnak sungah na tlak ter hai” (Sam 73:17-18). Cuvek thotho in kan nih khal, kan kiang le kap zoh in ke kan kar a si ah cun Pathian hmaiah phun le tlawkciar in kan can kan cemral ter thei. Kan khawhmuhnak mit ṭha lo mi damternak cu Bawipa amah hnen-tlunlam zoh hi a si. Na kiangkap maw na zoh, lam a lo hruaitu Bawipa?
Malachi bung 3 sungih miṭhalopawl in Pathian dokalnak ṭawngkam an ṭawngsuah nak san dang leh cu an thinlung ruahnak a ṭhatlo/ a kawih ruangah a si. Matthai 12:34 cun, “ Rul hrin pawl! Mi siava nan si ih ziangtinso ṭawng ṭha cu nan ṭawng thei ding? Kaa cun thinlung sungih a ummi a ṭawng a si” ti ah a ti. Thinlung ruahnak ṭha lo, mah le mah thupibik ih ruahawknak ih si damternak cu riantu hnaṭuannak –Pathian rian le midang riannak hi a si. Thinlung damlonak nei na si pang len, Bawipa pan lohli aw, lo damter ding ah na lamah a mit a um.
Pathian hnaṭuan cu ṭhathnemnak le hlawknak a um lo ti ih a aukio rerotu miṭhalopawl vek si lo in, Bible ih Pathian miropipawl, Amah ṭihzahtu le a riantupawl khal in Pathian rianṭuan ih a man hlatzia thuhla mangbangza mi ruah ding an nei ve. Gen 12 ah cun Abraham in Pathian ih kawhnak lung in khawitawk hmun le ramah Pathian in a hruai ding ti, a fehnak ding hmun khal thei riai lo in a pawksuak. Cuti a tuahnak in Pathian cu khawitawk hmun khalah a rian ding ti a lang ter. Josua khal in kei le ka innsang cun Bawipa lawng kan rian ding ti ah a ti- a relduh mi cu Pathian rianṭuan cu sungkhaw hnaṭuan a si a ti. Mah pakhat lawng ih hnaṭuan a si lo a ti. Siangpahrang fimbik a si mi, Solomon cun Bawipa ṭih le a thupekmipawl thlun cu milai hmuahhmuah ih ṭuanvo a si ih cumi cu minung ih kan damsan a si ti ah a ti (Ecc 12:13). Pathian ih siahhlawh, Daniel cun siangpahrang biak ding ai ah Pawpi puk sungih hlawn a hril sawn. Cui a nun hmang in Pathian biak ti mi cu ziangmawsi-lamzin nuam le awlsam kan ti mi lakih si thi ding ih a hnenih pekawk sian hi a si ti a langter. Kamsang Isaiah, tling lozet ih a thei aw tu nan Pathian in kawhnak a theih levete’i a hrangih nung ding ih pumpe aw tu “ Zo so ka thlah ding?” cun Pathian hnaṭuan cu vohbik hnaṭuan a si a ti( Isaiah 6:5-8). Apostle Paul khal in Philippi khua ih zumtupawl hnenah, “ …Kei ka hrangah cun nun cu Khrih a si. Curuangah thih khal le a hlawk sinsin”(Phil 1:21) ti ah a ti.
Pathian cun tangdawrte ih Amah kan rian hi a phu hrimhrim. Amah cu riantlak hrimhrim mi Pathian a si. Amah kan rian tikah, Anih cun kan tuahmi a hmin sin ringring ih cutin kan ṭuanman laksawng in pe sal ding a si. Vawi tampi cu, mi in kan thilṭha tuah mi an theihhngih lohli ih kan tuahsual mi pahnih khat lawng te an cing ringring. Asinan Malachi 3:16 ah cun “ Cule Bawipa a ṭihzahtu pawl cu pakhat le pakhat an be aw ih an ṭawngmi cu Bawipa in a ngai ih a thei. A mithmuh ah Bawipa a ṭihzatu le a hmin a upattu pawl ih thuhla cu cabu sungah a khum a si” ti ah a ti. Bawipa in a hrangih kan tuah mi sunte le kan relmi sunte pakhat khal hrelh lo in a hmu, a thei, a ngaithla in a hminsin ringring. Amah a riantu pawl hnenah tlawhsuah malsawm khal a tiamkam. Ziangvek thlawsuah ha a tiam kam? Hi lei kan dam sung ih malsawm thlawsuah le nun a ra lai ding mi ih malsawm thlawsuah in tiam kam a si. Suahlannak 23:25 cun, “ Nannih cu Bawipa nan Pathian nan biak pei; rawl le tidai in ka lo thlawsuah ding ih nan hnen ihsin natnak cu ka lakhlo ṭheh ding asi”, “ Taksa harhdamnak ih zirmi cu man a nei ve ko nanin thlarau harhdamnak hrangih zirmi cu ziangtinkim in man anei. Ziangah tile a tu-ah siseh, hmailam hrang khalah siseh , in tiamkammi cu nunnak a si” (I Tim 4:8). Bawipa kan rian tikah, Anih cun thlaw in suah hleiah a duhdawtmi fahniang vekin in cawm a si. “..Anmah cu ka minung an si ding. thil ka tuah suak ni ah cun ka ta rori ah an cang ding. A pa a riantu fapa cu a pa in a zângfah ṭheu vekin anmah cu ka zângfah ding” (Malachi 3:17). Bawipa kan rian tikah , Anih cun Amah riantu le rianlotupawl cu a thlei dang sal ding. “ Cutikah a dingmi le a ding lomi parah ziangvek thil a thleng aw tile keimah I riantu le I rianlotu pawl ziangvek an cang ti cu ka minung pawl in an hmu sal ding a si,” ti ah a ti (Malachi 3:18).
Pathian in in duhdawt-Cui thutak thu cu Malachi bungkhat thu ah in sim. Amah rian ti mi cun tuanvo hlensuah (tauanci) nak menmen ih kan tuahmipawl hi a sawh lo. Pathian cun nangmah le na thinlung put kha si a zoh ringring. Nangteh na Pathian riannak ziang na bang? Pathian rianṭuan ti mi hi ziangtin na hmu? A pakhatnak ih minungpawl vek na si sual maw? Pathian rianṭuan cu ṭhathnemnak a um lo , a lak menmen a si tin na ti maw ? Maw ,a pahnihnak pawl vekin Pathian rianṭuan cu vohbik duhsaknak/thawsuah sungbik a si tin na hmu?
No comments:
Post a Comment