Pathian ṭihzah ti ih sullam cu ziang a si?. Bible kan zoh asilen Pathian ṭihzah ti mi hi thupi pawimawh ngaingai a si ti kan hmuthei ding. David, Pathian lung tawng le Thlung Hlun hruaitu ropibik pawl lakih telve mi pakhat khal in hi thu hi tamzet a rel. Solomon, leitlun mi lai um zo mi hmuahhmuah lakih fimbik khal Pathian ṭihzah tu a si. Cuihleiah, Pathian ṭihzah ti mi hi Thufim cabu ih a uarbikmi thupi khal a si fawn. Hi a tlunih mi ropi pahnih hin Pathian ṭihzah ti mi hi an nunnakih thil thupi tuk ah an ruat veve. Cuvek thotho in, Pathian ṭihzah ti mi cu kan nunnak khalah a thupibik mi thil a si a ṭul.
Pathian ṭihzah ti mi cu nun sung muril ih si Amah ṭihzahnak taktak neih hi a si. Ziangtinkim kan tuahnakah Pathian ih thianhlimnak hi kan theih ringring a thupi zet. Amah ṭihzah ti mi cu a hmaika ah thianhlimnak nun thawi felfai te’i nunnak hman hi a si.
Pathian ṭihzahnak ti mi cu a thusim mi cing ringring ding le nunpi dingih ngaihsak hi a si. Pathian cu mi thianghlim, mi dik, thuneihnak hmuahhmuah a neitu, huham thawi a khat mi, ziangkim thei , khawikip ih um, pathian pawl parih Pathian, siangpahrang pawl tlunih Siangpahrang ti kan theihfeng leveten, cui kan theihnak cun kan lung sung ih sin Pathian nung a si ti Amah ṭihzah upatnak ah in ṭhanglian ter.
Pathian ṭihzah ti mi cu in fialmi tuah ding ih duhnak nei ti ai khal a si. Jesun hitin a ti, “ Zokhal keimah in duhdaw asile ka thu a thlun ding.” (John 14:13). Pathian a ṭihzah tu cun Pai fialmi thu a thlun asan cu a nunnak ah Pathian in tuahter a duhmi thlun duhnak ngaingai a nei a si.
Pathian ṭihzah ti mi cu ziang hmuahhmuah hnak in a pakhatnak ih Amah ret tinak a si. “Asinan Pathian uknak le a dingfelnak cu hawl hmaisa uh. Cule thilpawl hmuahhmuah tla cu a lo pe bet ding ” (Matt 6:33-34). Pathian hmaiah le a thuneihnak tangah hnuaidawr tei kan um le, kan nunnak parih thuneihnak hmuahhmuah neitu ah kan ret le kan nunnak ih a pakhatnak si ringring dingah hmun kan pe a si ah cun Amah kan ṭihzahnak kha kan langter a si.
Pathian ṭihzah ti mi cu ziangkim Sersiamtu Pathian nung a si ih kan nihpawl hi a sersiam mi milai kan si, Anih cu kan Pu a si ih kan nih cu a siahhlawh pawl kan si, Anih cu kan Pa a si ih kan nih cu a fa le pawl kan si ti cohlan hi a si. John Piper cun , “ Mi zokhal Pathian ṭihzahnak a neitu cun Pathian cu a cak, a thianghlim in a ṭha tuk lawm mam ti a theifiang ih Ahnenih sin tlan hloh ding le Amah kalh ih nun ding cu a ruat dah hrimhrim lo” ti ah a ti.
Pathian ṭihzah ti ih sullam cu Amah ningnat ter phang, A duhsaknak beisei, A thianghlimnak ruangih ṭihzah, A duhnak sungih lungawi le thatho tei tuhlut aw, kan parih A ṭhatnak ruangah a parih lungawi nun, thinlung thiangte’i Amah biak le a thupek pawl Thiang Thlarau bawmnak thawi kan duhnak rori ih thlun hi a si. Curuangah Pathian ṭihzah ti mi hi thil ṭha rori a si.
Ziangtin kan nunnakah Pathian ṭihzahnak kan ṭhanglian ter in cumi cu nitin kan nunnak lakih a telmi (parts of our lives) ah kan canter thei ding? A si, mi pakhat khat in a duhhrilnak rori in cui lamzin cu a hril, ka hril a ṭul a si. Thufim 1: 29 cun, “ Thutheinak cu nan hua ih , Bawipa ṭihzah cu nan hril lo a si” ti ah a ti. Jesu lawng hi in rundamtu le ka Bawipa a si ti cohlang ta lo cun Amah kan tlun thei lo, tuah ter in fialmi khal kan tuah thei lo men lawng siloin a hrangah kan nung thei lo. Rinnak le Amah thawi pehzawmawknak kha a hrampi a si ih cumi cu kan nunnah kan neih hmaisak tengteng a ṭul.
Khrih thawi kan pehzawmawk leveten Amah thawi kekar tlang kan thawk thei. Cuti asilen ziangtin Pathian ṭihzahnak cu nitin kan nunnakah kan ṭhanglian ter thei ding? Asi, Pathian ṭihzahnak kan nunnakah ṭhanter ngaingai kan duh a si ah cun hi a hnuai ih ta pawl hi vawn zoh vivo aw:
(1). Thudik hmaitawn aw. Pathian thunung thawi naih aw te ih kan kekarnak le a thunung kan siarnak cun kan thinlungah Pathian ṭihzahnak nasa ngaingai mi a pe ih, Pathian ih duhnak hmuh thiam theinak le nundan dikah in ṭhangter a si. Curuangah, Pathian thu sungah ciah aw aw, zingzawi aw, siar rero aw, zir tlut tlo aw. Na thinlung sangka awg aw la, zirh theih in um hram aw.
(2). Amah cawisang aw. Pathian cu asinak vekin theih fiang tum aw. Pathian theihnak diklo le caurau cun thlarau lam nunih palhnak le tluksiatnak ah a lo hruai ding. Ziangtluk sunglawi Pathian a si ti kan theih feng lawngah Pathian ih zangfahnak hi fiang le thuk sin kan theithei. Pathian hmai ih tangdawr tei um, kan nunnakah thupi bikih Amah ret, A cahnak le a zangfahnak zarah Amah cawimawi ih nunkhua kan sak leveten Pathian ṭihnak le upatnakah kan nunnah nitin a ṭhanglian ṭheu a si.
(3). A thu awih in um aw. Paul in Filippi mi pawl hitin a sim, “ Curuangah ka duhdawt mi tla, thu nan rak lun ṭheu vek khan, ka um lai lawngah si loin, atu ka um nawn lo hnu khalah nasasawnin ṭih le khur phahin nanmai rundamnak cu ṭuansuak uh” (Fil.2:12). Kan rundamnak cu kan tuahnak le nun in langter ding kan si.
(4). A rahsuah hrangah timtuahcia aw. Kumkhua ih a hmun ding mi le a thupi ngaingai mi ah lole a lângte sung nawmcennak le thilri, anetnak cu ṭahnak, sunralnak le siatsuahnak ih mi thlentu hrangah kan nunnak hmang ding in duhhril theinak kan nei. Bible in hitin in sim, “ Bum in um hlah uh. Pathian cu ziang siar lo men ding a si lo. Ziangahtile, mi in ziangkhal a tuh mi cu a ah khal a at ding. Ziangtin tile amai tisa lamih a tuhtu cun cui tisa ihsin siatralnak a at ding.Asinan, Thlarau lamih a tuhtu cun Thlarau hnen ihsin kumkhawnunnak a at ding. Cule thil ṭha tuah dingah thanau hlah uhsi. Ziangahtile, kan bansan lo asile a ticucan teah kan at leh ding a si” (Gal 6:7-9). Pathian ṭihnak cun thlaici, nunnak ih mi a hruai tu ṭheh dingah in tûl ih kan nunnak le cân khal Pa’i mithmuh ih a thupi mi hnaṭuan sungah in hruai lut ṭheu a si.
Pathian ṭihzahnak cun -fimnak (Thuf 9:10), thianhlimnak (Thuf 16:6), nunnak (Thuf 10:27; 14:27), himnak (Thuf 14:26) le diriamnak (Thuf 15:16, 22:4) pawl hi midang parah siseh, kan mah le mah parah siseh, Pathian ih in duhdawtnak parah le thil dangdang parah mi a pe. Kan zumnak le nunnakah Pathian ṭihzahnak kan neih ringring asilen hi a tlun ih tapawl khal hi kan nunah siar le hmuh theih in a lang suak ding a si.
Curuangah, Pathian ṭihzah ti mi cu a hmaika ah felfaite i nun, Amah rinsan le nunnak pumhlum ih duhdawt, sual le a duhlo zawng ih si thiarfihlimawk le a duhnak thlun ih a lungawinak mithmai hawl hi a si. Curuangah, kan zaten nitin kan nunnak le rinnak ih ke kan karnakah Pathian ṭihzahnak hi kan lungsung ah lut thuk ter vivo uh si…. Pathian in lo thlawsuah hram seh!
No comments:
Post a Comment