PATHIAN CANGVAI TERTU

Mi tampi cun kan ṭulnak lole ṭulmi in Pathian a cangvai ter ti ah kan ruat ṭheu. Thla kan cam  le kan ṭawngnak  khalah Pathian in kan ṭulmi a thei ih inpe ding tin kan ti liam men. A hman, kankan ṭulmi le samni a thei ngai. Nan, cui kan ṭulmi cun Pathian a cangvaiter lo. Ziangruangah cutin ka ti? Kan ṭulmi in Pathian cangvai ter siseh la nang le kei cun tuini ah co ding kan nei zik lo. Kan hnakih ṭul ṭiaṭia an tam tuk. Na kiangkap zohhman law, ei le in ding nei lo  kut dawh tampi na hmu ding! Lo le ei in ding neih lo ruangah nitin mi a thawng tel ram harsa ah cun an thi. Culawng hman siloin leitlun hmun kau sawn na zoh asilen, tilian, thlisia, linghnin, tlangkang, bawmpuak, accident le a phunphun ih ruangah bawm ṭulih khat na hmu ding. Cui bawmṭul pawl  hmuahhmuah cun Pathian an cangvai ter thluh lo, asilen an ṭul lo maw si, ṭul tuk pan teh. Cupawl hnakih ṭul zo si um cuang ding? Cui an ṭulnak in Pathian a cangvai ter maw ti aw seh la a san a harsa zet ding. Asilen, ziangmi in si Pathian cangvai ter? Pathian cu ziangkim theitu a si ruangah

         Pathian cangvai tertu sawn cu thuawinak le rinnak a si. Ziangtluk na ṭul ti mi hnakin ziangtluk Pathian ih ṭawngkam na theihmi na thlun, na rinnak ziangtluk Bawipa ah na ṭhum ti mi in Pathian a cangvai ter.  Josua 1:8 cun, “ Thukham cabu cu hngilh hrimhrim hlah. Asungih nganmi bangtuk ih na nun theinak dingah a sun a zan in siar ringring aw. Cutiih na tuah le na ṭhangso dingih na tuahmi hmuahhmuahah na hlawhtling ding a si” ti ah in tiam. Kan ṭulmi in Pathian a cangvai ter ti siloin, a thu kan thlunnak le Amah kan rinnak sawn in Pathian a cangvai ter a si.