Philippines ah kan chin nunmawi a parsuak vivo

Philippines ah kum thum fel ka um ve tlangih cu mi ah kan Chin Christian Community Philippines (CCCP) pawl cangvaih dan le umdan ka zoh rero tikah kan chin nunmawi kan lakah a par rero in ka hmu ih ka lung a awi ngaingai.

Ziang tin?

1          An thinlung put a kau

            Kan chin ram le state mawitertu cu hrin hnamte te Chin ti mi sungah kan um khawm  hi a si. Pangpar hmuan khal hi a sung ih pangpar ci phunphun rem aw tei an um khawm khin a mawi ter. Zohman in nang ka lo ṭul lo ti ah midang (pangpar) kha an va ti dah lo, hnakin an mah le theidan vekih an par cio kha an pawm aw thiam ih cutin dum sung an mawi. Cuvekih, kan nih Philippines ih Pathian thunung a zirtu pawl khal lamdan awknak, thleidan awknak, nautat awknak le  hmuhsuam awknak um riai lo ih tui ni tiang ke kan kar tlang derh do nak hi kan chin nunmawi kilhim tu kan si in ka hmu. Kan ramsung ih a kehkuai rero mi hrin hnamtete ih . ṭhenṭhekawknak nat hrik cu kan miphun duhdawtnak thinlung kautak kan neih mi in a neh in ka hmu. Zo hman kei cu cu mi hrin, cu mi khua, cu mi fa ti vek ti kungko leh hngal vek um riai lo ih, Pathian le kan miphun hrangih kan funkhawm awknak hin kan hmailam hrangah khaw awngnak a suah pi vivo ding ti hi ka beisei.

2.         Chin ti mi ah kan harh tlang in ka hmu.

            Kan miphun a hlohral cun kan mah khal kan hloral ve ti ruahnak hmu thiam in kan kawhawk ṭheu nak laimi, falam, lai rawl , lai dip, lai tihang ti le laimi ka si ti cu kan hnathlamah thlum in khuaitizu bangin ei it um mi sihmansehla, kan hmailam thu saupi ruat thiam in “Chin” mi, chin rawl, chin dip, chin bel, chin tihang ti mi ah kan funkhawm aw thei hi kan miphun hrangah remṭhatnak hna a ṭuantu kan si ve tin ka ruat. A tu fangih kan harhsuak vivo asi ah cun, kan mipi, ram le ṭawng kan kilhim  kumkhua thei ding a si. Falam kan ti cun… a nitel in kan buzuih vivo tinak a si. Kan chin ram cu ziangtik hmanah kan ṭawng in kan khuh neh dah lo ding, nan mi in kan ṭawng cu chin ṭong ti ah in lungkimpi hrih lo hmanseh la, nangmah le keimah in thinlung kaupi nei le hmailam thlircia in Chin ṭawng , chin mi ti ih kan kai kaihnget aw vivo a si ah cun, khawitawk khua le ram ih kan um khalah, kan miphun ṭong cu Chin state ṭawng a si kumkhua ding. Cutikah, a tui kan fimnak hin kan miphun cu Nehemiah vekin kan runsuak ve ding a si. Lai ti ih kan ti awk rero cun- kan unau…. Na thei thiam ko ding pawl kha thazang kan pe tinak a si. Thlanglam laitlangpawl hmuahhmuah in lai ti cu cu kan mah silo in kan unaupawl an pe zo a si. Kan nih thawn a pehparaw lo kan ti men thei nan, a pehpar aw aw a si. Asan cu Lai ti mi kha an mah ah an bun ah cun, kan nih in kan ṭawng ti in ham mengmang khal nung la in neh thotho ti hi thufiang cia mi a si. Nan, Chin ti mi cu chin radio ih sin a kawlram cozah khalin in pek cia mi, mizoram le miphun u pawl khal in chin ti mi ah cun kan mah tui ka calai ngannak ṭawng hmang tu rori hi in khawh ter lai a si. Kan hrangah hi mi hi kan miphun vanṭhatnak hleice le Pathian ih in pek mi , kan hlohral lonak ding ih kan miphun itentity(sinak) a si ti hi hmu thiam vivo uh si. Ziangruangah “Chin” ti mi cu ka uar leuhleuh ti asilen, hi lawnglawng hi lazin (1) um sun a si. Van kainak lamzin umsun cu Jesu a sivekin , kan chin calai, ṭawng le nunphung kan kilhim theinak um sun khal hi Khuanu ih hmin in pek mi “Chin” lawng hi a si ti kan theih thiam hram ka duh. Hi mi hi kan miphun vision ah kan ret ding khal ka sawm aw duh fawn. Tu ah cak lovekin lang hrih hman ning hi vision le idealogy a hmu thiam nang le keipawl lungrual ten kan um/ ṭangtlang a si ah cun kan miphun in nikhua a rei tikah damnak Ci vekah a hman phah ding a si.

3.         An tlawmngai in an taima

            Vanduainak ih kan ngaih-nat, cawrbah le thihhloh thu ah tlawmngainak kan nei in kan taima zet ti ah ka hmu. Hi mi hi kan sawm nung vivo khal a thupi tuk lawm mam. Kan bawm thei mi kan unau dam lo le cak lo cu sawmdawl aw vivo ding kan si. Text tla kan kuat aw thei, cun sum le pai zawng khal in, um hmunah leng aw le vehvai aw in, cu lo khalah thlacam sakawk tawnnak thawn. Kan suahkhawm le puai kan neih canah kan hruaitu upa hmaisa le in hruaitu rero pawl fak an tlak ka ti zet. Tuah uh, ti uh ti ih thupek lam siloin, an mah rori in an tuah, hma an hruai vutvo tikah kan nih hrangah zohṭhim tlak ngaingai an si. Cumi lakah, tangdawrnak nun an nei bet hi kan hruaitu le kan CCCP member pakhat le pakhat kan chahnak thuthup a si in ka thei.

4.         Pathian an duhin miphun an duhdawt

            Pathian theihnak um lo cun miphun khal lamzin dikah  hruai theih a si lo. Ziangkimah kan hlawhtlinnak le kan chaknak khal Bawipa’i kutsungah a um. Bawipa thawi kan pehzawmawknak a ṭhat leveten kan miphun a tlusawpmi le a sawn rero mi tundin hna khalah ka mawhphurh a si ti ah veinak le seherhnak kan nei thei. Hi nun miphun duhdawtnak kan lakih a parsuak hi a lungawi um ngaingai mi a si. Mi tampi ih an hmuhsual mi hruang an lan in ka thei. Rawngbawltu tampi cun rawngbawltu si le miphun hrangih hnatuan, miphun thuhla rel, miphun pumkhatnak ding lamih cangvaih hi tlusia le dungtawlhah an ruat. Cuvekih mitampi in an ruah ruangah kan ram ih Pathian thusimtu tampi cun miphun ṭhangsohnak le kekarnak ding thu rel cu serh vekah maw an ruat ih, Pathian thu ih feh lem lo pawl hrangah an tun. Himi hmuhnak(worldview) kan neih mi hi a pawibik mi a si. Kan thusim thiam le evangelist, pastor rual le kan scholars, mihrat khawkheng pawl hin kan miphun Pathian thu le taksa ih kan ṭhansoh a ṭulnak lam hi uar vivo sela ziangtluk kan miphun in kan ṭhathnempi ding . Jesu ka saya ṭhabik( my best teacher) cun a miphun Israel pawl a vei in a seherh duahdo, a nun khal an hrangah le kan hrangah a liam, cuvek in a kamsang(prophet) Jeremiah, moses, Josua, Elija… a tam tuk . pawl hmuahhmuah cun an miphun hrangih thih khal an huam nan, kan nih hmuah ziang kan ti a si pei maw… kan miphun veitu le seherh tu rawngbawltu lakah kan mal deuh a bang. Pathian thu cu kan sim e asinan, miphun duhdawt ding le seherh ding thu kan fah aw dah lo tuk… Miphun duhdawt ding khal hi kan zirh tel rori a ṭul in ka hmu.. Lolen, Pa Pathian in fanu, fapa le miphun in pek mi hi mi hmuhsuam mi, nautat le ek rawtnak ah kan cang kum khua pang ding… Miphun duhdawtnak kan ṭul in kan mamawh tuk lawm mam..Thlacamnak thawn kan miphun(chin) hrang rori khalah hin kan can kan hma tam deuhdeuh a cu a si..