PATHIAN BIAK NUN

Pathian kan biaknak cun kan thinlung, ruahnak le kutke a cangvaiter tengteng ding  a si ti mi Malachi bung hmaisapawl ihsin kan zir zo. Cupawl khaikhawmnakah, Khrih dungthluntu kan si vekin kan nunnak cu Pathian biak nun thawi nitin nung ding ih runsuah kan si.  Pathian biak nun hi Bawipa’i Ni hrangih kan timlamawknak ṭhabik a si.

          Malachi 4:1 cun Bawipa’i Ni cu a ra thleng tengteng ding ti in sim. A ra thleng “ mai thei” ti thu a sim lo ih , “ ziangtikah a ra thleng tengteng ding” ti mi sawn a sim. Bible Ca Thianghlim cun , “ Ziangkimtithei Bawipa in, “ Somei bangin a lingmi meisa ling a ra thleng ding. Mi puarthau le mi ṭha lo pawl fangkung ro vekin ur an sinak ni a ra thleng cing ding. Cuih ni ah annih pawl cu meisa in ur ṭheh an si ding ih an hram le an hnge zianghman a tâng lo ding.”( Mal 4:1) ti ah a ti.  Ngainat um zet phuansuahnak  pung (picture) a si ciah lo asinan Ca Thianghlim thotho in Bawipa’i Ni ruahnak dang in sim, Hitin, “ Sikhalsehla kannih cu Pathian ih in tiamkammi van thar pawl le lei thar, dingnak a tlanlênnak hmun cu kan hngak a si” (2 Piter 3:13) ti ah a ti. Thilṭhalo a tuahtu’i hrangah cun , Bawipa’i Ni a ruahnak cu a hmaisa tak vek a si thei, asinan Amah azumtu’i hrangah cun Bawipa’i Ni cu a neta sawn vek a si ding- Bawipa’i Ni tleng ding cu a cuan, hngakhlap zetin a hngak. Cutivekin, Cui ni rawng thleng ding kan cuan tikah , Kan nunnak Pathian biak nun thawi nung ding in kan timlam. Asilen, ziangtin Pathian biak nun cun kan nung ding? Malachi bung 4 hin Pathian biak nun ih nundan phunhnih in zirh.

1.         LUNGPUT DIK

          Pathian biak nunih nung ding cun, Pathian  hmin kan upat, ṭihzah le a thu kan ngai a ṭul a si. Malachi 4: 2 cun, “ Sikhalsehla ka thu a ngaitu nannih pawl hrangah cun ka mi runnak huham nan parah ni bangin a tlang ding ih ni tleunak in harhdamnak a pek vek in nan parah damnak a thlengter ding. Caw fate caw inn ihsin an suahmi vekin luatzet le lungawizet in nan um ding” ti ah a ti. Pathian hmin upat, ṭihzah le a thu ngai ti mi ih sullawm cu Pathian -Asinak kha lungput dik ih hmuh lole Pathian Amah hnenih lungput dik neih hi a si. Lungput dik cun nuncan ziaza dik a hring suak asi  ti hi hngilhhlah uh si. Kan biakmi Pathian -zovek a si ti mi hmuh le theihfiang nak cun kan nunah danglamnak nasa ngaingai mi a thlen. Thil pakhat khat cangsuak thei lo ding vekih a lang canah, thutak a si mi Pathian thaw cun ti thei lo mi/cang thei lo mi zianghman a um lo ziangah tilen Anih cu a cakmi Pathian a si  (El Shaddai) ti mi ah kan ṭhumaw thei. Thangṭhatnak hlamawi sakih kan kut kan thlir suah tikah, Anih cu Cawisan ih a um mi (El Elyon) asinak kha kan thlawsuah in kan sunlawi. Anih cu hramthawknak le cemnetnak nei lo, kumkhua ih nung a si. Zohman in Amah an semsuah lo, asinan Anih cu ziangkim sersiamtu le semsuahtu, kumkhua Pathiang nung (El Olam) a si. Rinhlelhnak sumzing in kan nun in tham ih kan thla a vai le kan parih thiltleng mipawl hi Pathian in in theihsak ngaingai pei maw? tivek ih kan nun a hnin canah, Pathian lamah lungput dik kan nei ding a thupi tuk ziangahtile Bawipa cu kan zawn in ruattu le  in hmu ringring tu Pathian a si (El Roi). Ṭulsam mi thil pakhat khat kan neih tikah dawnhar in beidawn hlah uh si cuhnakin Bawipa’n in theihsak ding ti hi fiangin ring ngam uh si  ziangahtile Anih cu Petu Pathian (Yahweh Jireh) a si.  

Mangbang le thinbangih kan um canah , hi mi hi theitharsal uh si Bawipa cu daihnak petu lawng si lo in Anih cu Daihnak Pathian a si (Yahweh Shalom). Thubawh cahnak tuah ding ih fimnak le lamhmuh kan ṭul canah, Bawipa cu kan thinlung kiltu (Yahweh Rohi) ti mi thutak parah kan ṭhum aw ngam ding a si. Anih cu kan beunak Lungpi, Kulh, Hauhruang, Siangpahrang, Thuṭhentu, Pa, Lawmman petu, Runtu, Caktersaltu, ruahnak ṭha petu le in humhimtu..tvk pawl hi cing ringring uh si. Curuangah, Pathian biak nun ih nitin nung ding cun, Amah Pathian Asinak parah lungput dik kan neih a ṭul a si. A hmin thianghlim kan ṭihzah, upat le sunlawih a ṭul a si.  Na Pathian ziang vekin nang na hmu? Fate tuk in Bawipa hi na hmu pang maw? Lole na harsatnak lo theihpi lo khawpih hla ih um vekin teh na hmu pang maw? Maw Bawipa cu na kiang nai ih um na rualṭhabik le na harsatnak lo bawmding ih tiar aw ringring, cahnak le huham, duhdawtnak le zawn ruahnak thawi khat in na hmu? . Pathian na hmuhdan/na theihdan le na ruahdan in na nunpum a lo danglam ter ding.

2.     TUAH ṬUANNAK

          Pathian biak nun ih nitin nung ding cun, Pathian ih ṭawngkam kan cing ringring ding a si. Mal 4:4 cun, “ Israel mi hmuahhmuah ih thlun dingah Sinai tlangah ka siahhlawh Moses hnen ih ka pekmi dân pawl le thukham pawl le Moses ih thuzirhmipawl cu cîng ringring uh” ti mi in sim.  Pathian biaknak dik cun kan ruahnak, thinlung, kutke cangvaihnak  le nunpumpi  a danglam ter ti hi kan thei tharsal cio kei uh. Na pathian biaknak in na nunnakah danglamnak zianghman a lo thlen lo asi ah cun na Pathian biakdan na zohfel sal a ṭul ding.  Pathian parih lungput dik kan neih i, mangbangza a duhdawtnak, malsawm thlawsuah in coter mi le a lamhruainak kan  hmuhmipawl cing ringring ih nitin te kan nunnakah a sunlawinak hrangih kan ti theitawk ih ṭhabik  kan hman mi, kan ruah mi, le kan rel mi, le tuahmipawl hmuahhmuah cu thlarau lam ih nitin Pathian kan biaknak nun ah a cang ṭheu.  Bawipa hmuhnak dikih kan hmuh tikah kan tuah ṭuannak ah a langsuak ding a si. Cui kan ṭuannak pawl cu Bawipa kan riannak ah langsuak vivo hram seh!.

Zoh hman, “ Sikhalsehla ni lian le ṭihnungza a si mi Bawipa ih ni a ra thlen hlanah nan hnenah profet Elijah ka run thlah ding. Amah in pa le fâle pawl hmunkhat ah a finkhawm sal ding; culo ah cun keimah ra in nan ram hi ka siatsuah pang ding.” ti ah a ti. (Malakhi 4:5-6) Pathian cun thilsual a tuah dah lo curuangah nang le kei ih par khalah a thu ih a sim mipawl hi a famkim lai ding. Thlunghlun ih sin, Elijah san, Thlung Thar san le Baptist tu Johan ih san, thuphuan sungih thutheitu pahnih, ziangtik can khalah lamzing a phunphun in Bawipa in a thunung cu na hrangah le ka hrang, leilung pumpuluk hrangah a hmang vivo ding a si.

Tui ni ah, hi ca siartu kan lakih mi hrekkhat cu Bawipa’i ni ra thleng dingmi hrangah tiar aw hrih lo, kan nunnak Pathian biak nun thawi nitin hmang suak thei hrih lo tla kan um men thei. Cuihleiah, zo ha ka biakmi Pathian hi a si ti mi pumpak nun ih fiang ngaingai hrih lo le Pathian thawi pawlkawmawknak nun nei hrih lo  tla kan um a si men thei. Culo hmanah Pathian parih lungput diklo a neitu lak khalah kan tel ve tla a si men thei. Ziangvek in kan rak um a sikhalle , a tu fang hi Bawipa Pathian parih lungput dik kan neih ding can a si. Cui Pathian kan hmuhnak lungput dik cun kan ruahnak, thinglung le zeizawngza, kan nunnak pumhlum danglam ter hram seh! . Pumpak nunih Bawipa’i duhdawtnak nun na tep hrih lo asilen a tu rori ah Bawipa Jesu , ka Bawipa le rundamtu si ding ah ka lo duh, ka lo cohlang, ka nun pumpi hi nangmah in nei hram aw ti in  thinlung thacamnak thawn Amah cu cohlang aw. Culeveten, mangbangza a duhdawtnak in na nun a lo hruai ding.. Pathian in lo thlawsuah hram seh!