Malachi cabu hi mipi, thinnau le mangbang vangsang ih a ci ai rero mipawl hnenih ngan mi a si. Duhsaknak le aipuannak thawi Pathian an thangṭhat rero hnuah, tuarnak sum in an nun a sun tikah Pathian an duhnak an hloh. Cutin, Persian uknak hnuaiah cun an sungkua, cianmazi, sum le pai le nuntu khawsak dan pawl cu phurrit phur in an rum rero. Hipawl ih ruangah a nungmi Pathian biak le a rianṭuan cu an hrangah ninum vekah a cang.
Bung khatnak lamah cun, Pathian in Israel fatepawl ziangtluk a duhdawt ti a sim thu kan hmu thei. Cutikah Bawipa in, “ Esau le Jakob cu unan an si, asinain Jakob le a tesinfa pawl ka duhdawt ih, Esau le a fesinfa pawl cu ka hua. Esau ih tlangpar ram ka siatsuah ṭheh ih a leilung cu hramlak cinghnia hrangah ka tân a si,” a ti. Hi mi ah hin Pathian in Esau hi a hua a tinak a si lo. Hi mi hin Jacob a duhsawn ti a sim men a si, Jacob cu Esau hnakin a ṭhathleice ruangah ti si lo in Amah Pathian in a a hril ruangah men a si. Genesis 25: 23 cun, Bawipa in, “ Na pum sungah miphun pahnih an um. A râl aw phun hrimhrim in an suak ding; Pakhat cu a dang pa hnakin a cak deuh ding ih, A upa sawn in anaupa a rian ding,” ti ah a ti. Hi mi khal hin Pathian cu mi diklo a si tinak a sawh lo. Ziang ruangah Pathian in Jacob a thlang ti hi kan theithiam bân lo men ding asinan Pathian in ziang a tuah ti mi hi a fiang tuk ti hi kan theifiang thei a si.
Cutin nikhat cu Jacob in pehang a suan rero lai ah, Esau cu cau hnephnep in a ra tin ih a naupa ih hnenah ei ding a dil. Asinan, Jacob cu “bumtu” ti a si bang tukin a unau pai hnenah cun a fa u sinak thleng a dil. Ruat cuca loin , Esua khal cun a aw lohli ih cutin a naupa ih rawl suan mi thaw cun a hnawh puar aw.(Gen 25:29-34).
Hi thu tiangah hin, Esua hi mi ṭha sawn a si tin kan ruat men thei. Asinan, Pathian cun culolam zawngin a ruat ve thung. “ Pathian lainatnak kha zohman in sîpsan lo ding in ralring uh. A sia a khami thingkung a hung tum ih a tur ṭha lo in mi tampi zonzaihnak a pek bangtuk cu zohman si hlah uh. Nu le pa sualnak tuah hlah uh; thlarau lam zianghman a siar lotu Esau bangtuk si hlah uh; anih cun fa upa rocotu sinak kha rawl voikhat ei-ah a zuar hlo mên a si. Nan theih vekin neh hnuah a pa ih hnen ihsin thlawsuahnak ngah sal a duh nain a ngah thei nawn lo a si kha! ziangah tile mitthli thawn ngen rero hmansehla a tuah ciami cu a ṭhin thei nawn lo.” (Heb. 12:15-17). Esua bangin tuini ah zumtu tampi cu rawl vawikhat ei men ah kan kumkhaw malsawmnak a zuar duhtu tla kan um men thei. Mi tampi cu sualnak sungah zuang lutin , sualsir ih an kirsal lo ah cun an hmaiah an tuahrah in a hmuak ti fiang lo ih a um rero tu tla an um.
Malachi cabu sungih mipi pawl hin Pathian ih nunsimnak an tawng rero. Asinan, cuti cing cun, an dinhmun le nun can kha sirin Pathian hmaiah Amah thawi pehzawm awk sal hna kha an thiam lo. Duhdawtmi unau, tui ni ah hin Pathian in in duhdawt ruangah ho khaw nun in zirh ṭheu. Curuangah Pathian nunsimnak kan tawn canah kan lungput hi a thupi ngaingai. Pathian in in duhdawt ti kan zum lo asi ah cun Amah cu thinlung ngaingai in kan be thei dah lo ding ahleicein nunsimnak kan tawn canah kan vuivai lohli pang ṭheu.
Esau tesinfa Edom mipawl in , “ Kan khawpi pawl cu siatsuah ṭheh an si zo nain kan dinsal pei, “ an ti ah cun Ziangkimtithei Bawpa in , “ an duh ah cun dinsal ko haiseh; ka bal ṭheh sal thotho ding. Mi in ‘Ram sualral,’ ti in le ‘Bawipa ih thinhengnak kumkua in a tongtu miphun ,’ tiah an ko ding,” tiah a ti. Cumi cu anmah Israel mi an mit rori in an hmu ding ih, “Bawipa cu Israel ram sung lawngah si loin a leng khalah a nasa a si,” an ti ding. Hi mi hi simkhawl cia mi thu Pathian in Israel mipawl a hmin puang darhtu ding ih a hman ding thu relnak a si. Cun, khatlamah hi mi hi Pathian in Israelpawl khan an malsawmnak dawnmi cu tuarnak khâ zet lak khalah siar thiam ding in a theihtersalnak khal a si fawn. Cuvek thotho in, Pathian in lungput dik (positive attitude) cu kai hnget dingah le a hnenah lungawi thu sim ringring nun nei ding hi in duhsakmi a si. ( I Thes 5: 18).
Israelpawl in Pathian an sunlawih lo, cuihleiah, an tuahmi le nun danah Bawipa a lungawi maw awi lo ti zohfiang awk an thiam lo. Bibal cun, “ A mit a cawmi, a si lole a nami, a si lole a ke a awlmi ṭilvapawl thawinak ah ka hnenih nan pek tikah a ṭha ṭheh ko, zianghman a poi lo, ti ah nan ruat maw si? Cuvek ṭilva kha ramuk tu hnenah pek hnik uh! Nan parah a lung a awi ding maw? Nan parah mithmai ṭha a nei ding tiah nan zum maw?” a ti. Pathian hnenah kan ti theitawk a ṭhabik hnak ih mal kan pek tikah kan nih khalin hi tawkih Israel mipipawl vek cekci in kan tuah ve tinak a si.
Pathian hi kan thinlung takin kan be lo le, a biakdan dik in kan be lo a si ah cun Amah kan biak hi kan cawlhsan a ṭha sawn. Asan cu,Pathian in ziangtin Amah kan bia ti hi a thupit ter ngaingai a si. Amah kan biak ti mi hi a hrangah a man a khung in a sunglawi tuk lawm mam! Cuvek thotho in Pathian biak ti mi hin kan mah khalah ṭhathnemnak ngaingai mi a pe. Ngaingai tei ti ah cun Pathian biak dan dik cun Pathian thawi kan pehzawmawknak cu hlum le dai tahnak vekin mi a tah a si. Pathian hnenah kan ti theitawk ṭhabik kan pe lo a si ah cun cumi cun a mah kan ṭihzah ngaingai lo ti a lang ter.
Pathian in kan ṭulmi ziangkim in pe, curuangah kan neihmi ih a tawnete lawng hi pe ding kan si ce lo. Kan ti theitawk ih ṭhabik hi a phu hrimhrim a si. Rom 12:1 cun, “ Cuti a siruangah ka u le ka nau tla, a tam zetmi Pathian ih zângfahnak ruangah hin nan ruangpumpi cu a thiangmi le cohlan tlak raithawinak bangtuk in Pathian hnenah pe uh, ti ah ka lo dil. Cumi cu Pathian hnenih nan pek dingmi biaknak taktak cu a si.” Cuti asi ruangah, kan zaten kan nunnak le taksa cu a nungmi raithawinak vekin Pathian hnenah pe uh si. Cumi cu Pathian biak dan dik- thinlung, ruahnak le tuahnak zatei thawi biak hi a si.
Pathian in lo thlawsuah hram seh!
No comments:
Post a Comment